VBE ẹdẹ Wednesday, January 18, 2023, iyẹn ne kpataki ọkpa keghi ladian vbe jw.org, iyẹn na khare wẹẹ, a zẹ Ọtẹn Nokpia Gage Fleegle kevbe Jeffrey Winder ni iran gha re ọkpa vbe Ẹbu Nọ Su ọghe Avbe Osẹe Jehova. Ẹ i re eban etẹn nikpia eva na ke ya ekhọe hia ga e Jehova.

E western Pennsylvania U.S.A., ẹre evbibiẹ Ọtẹn Nokpia Fleegle ni vbe re Osẹe Jehova na koko ẹre waan. Vbe ọ waan dee, evbibiẹ ọre keghi si gha rrie igue ọkpa nekherhe na na gualọ iyobọ etẹn. Vbọ ma he kpẹẹ vba, ọ na dinmwiamẹ vbe November 20, 1988.

Te evbibiẹ Ọtẹn Nokpia Fleegle wa gha rhie igiọdu nẹẹn vbe ẹghẹ hia, nọ rhie egbe ye iwinna ugamwẹ ẹghẹ hia. Evbibiẹ ọre wa mobọ gha tama avbe ọgbaroghe ọghe otako kevbe etẹn ni ga vbe Bẹtẹl ne iran do dia owa iran ya, aro Ọtẹn Nokpia Fleegle wa dae wẹẹ, te avbe etẹn na wa sọyẹnmwẹ. Vbọ ma he kpẹẹ vbe ọ dinmwiamẹ, ọ na suẹn iwinna arọndẹ vbe September 1, 1989. Ọ ghi rre ukpo eva vba, ọ na ya ga vbe Bẹtẹl, ọna ọre emwi nọ wa gha hoo nọ ya agbọn ọnrẹn ru vbe ọ rre ukpo 12. Ọ keghi suẹn gha ga vbe Bẹtẹl nọ rre Brooklyn vbe October 1991.

Ughae iwinna ughughan ẹre Ọtẹn Nokpia Fleegle na winna vbe Bẹtẹl. Ọ winna vbe eke na na ku ebe kugbe na tie ẹre Bindery vbe ukpo erẹnrẹn, iyeke ọni, a keghi muẹn gha rrie Service Department. Vbe ẹghẹ na kha na, ọ keghi ga vbe iko na na zẹ urhuẹvbo Russia vbe ukpo eso. Ọ na ghi ru orọnmwẹ vbe ukpo 2006, eni ọvbokhan rẹn ọre Nadia, iran eva ẹre ọ ghi gha ga vbe Bẹtẹl. Iran vbe ga vbe iko na na zẹ urhuẹvbo Portuguese, iran na vbe ya ukpo igbe ga vbe iko na na zẹ urhuẹvbo Spanish. Vbe Ọtẹn Nokpia Fleegle ghi gbe ukpo nibun nẹ vbe Service Department, a na wẹẹ nọ ya winna vbe Teaching Committee Office, vbọ ghi zẹ kpẹẹ, a na vbe muẹn gha rrie Service Committee Office. Vbọ ghi rre March 2022, a na we nọ gha re ọkpa vbe  etẹn ni ru iyobọ ne Service Committee Ọghe Ẹbu Nọ Su.

E Murrieta vbe California U.S.A ẹre a na koko Ọtẹn Nokpia Winder. Evbibiẹ ọre ni re Osẹe Jehova ẹre ọ koko ẹre vbe odẹ ọghe ẹmwata na, e March 29, 1986 ẹre ọ dinmwiamẹ. Ọ ghi rre uki ọkpa nọ dinmwiamẹ, ọ na rhie obọ ye iwinna arọndẹ ọghe ọyọmwabọ. Ọ yẹẹ ọre sẹrriọ wẹẹ, ọ ma ghi hoo nọ dobọyi. Vbọ ghi ru iwinna arọndẹ ọghe ọyọmwabọ la uki nibun nẹ, ọ na rhie obọ ye iwinna arọndẹ ọghe ẹghẹ hia vbe October 1, 1986.

Vbe Ọtẹn Nokpia Winder waan dee, ọ keghi ya tuẹ etiẹn ọnrẹn nikpia eva ni ghaa ga vbe Bẹtẹl. Otuẹ na ẹre ọ ghi gua ẹre kpa ya fill e fọm ọghe Bẹtẹl vbe ọ ghi waan nẹ. Vbọ ghi rre May 1990, a keghi tie ẹre nọ do gha ga vbe Bẹtẹl nọ rre Wallkill.

Ughae iwinna ughughan ẹre ọ na winna vbe Bẹtẹl, ọ winna vbe Cleaning Department, Farm Department kevbe Bethel Office. Ukpo 1997, ẹre ọ rhie ọvbokhan rẹn ighẹ Angela, e Bẹtẹl ẹre iran eva na ga ke ẹghẹ nii gha dee. Vbọ ghi rre ukpo 2014, a na gie iran gha rrie Warwick, vbe iran ghi sẹ evba, Ọtẹn Nokpia Winder keghi deba etẹn ni bọlọ owa ugamwẹ gha winna vbe iran bọ igiogbẹ ọghomwa. Vbe ukpo 2016, a na ghi gie iran gha rrie Watchtower Educational Center vbe Patterson, ughae iwinna na tie ẹre Audio/Video Services ẹre Ọtẹn Nokpia Winder na gha winna. Vbọ ghi rre ukpo enẹ nọ lelẹe, iran na dọlegbe gha rrie Warwick, a na ghi we ne Ọtẹn Nokpia Winder gha winna vbe Personnel Committee Office. Vbọ ghi rre March 2022 a na wẹẹ nọ gha re ọkpa vbe etẹn ni ru iyobọ ne Personnel Committee Ọghe Ẹbu Nọ Su.

Erhunmwu ne ima na ọre ne Jehova fiangbe avbe ikpia na nọ ya “ru emwa ẹse” zẹvbe ne iran ya ru iwinna ugamwẹ ọghe iran.—Ẹfis 4:8.