1. De ẹghẹ ne etẹn na hannọ zẹ hia khian ya gha rrie ẹrinmwi?

 VBE ukpo nibun nọ gberra, eguọmwadia e Jehova kegha roro ẹre wẹẹ, ‘De ẹghẹ ne Jehova khian ya viọ etẹn na hannọ zẹ ni dekẹ gha rrie ẹrinmwi?’ Ma te ka gha roro ẹre wẹẹ, egbọre etẹn na hannọ zẹ eso gha ye gha rre uhunmwu otagbọn na vbe Paradais vbe iyeke okuo Amagẹdọn. Sokpan, The Watchtower ọghe July 15, 2013, gi ima rẹn wẹẹ, a gha viọ Ivbi Otu e Kristi na hannọ zẹ ni ghi dekẹ gha rrie ẹrinmwi vbene okuo Amagẹdọn te suẹn.—Mat 24:31.

2. De ọta ne emwa eso sẹtin gha nọ, kevbe wẹẹ, de emwi ne ima khian zẹ iro yan vbe ako iruẹmwi na?

² Vbọrhirhighayehẹ, eso vbe uwu ima sẹtin gha nọ wẹẹ: De emwi nọ khian sunu daa “avbe ohuan ọvbehe” ọghe Kristi ni khian gha ya ẹkoata ga e Jehova vbe ẹghẹ “orueghe nọkhua”? (Jọn 10:16; Mat 24:21) Eso sẹtin gha si osi wẹẹ, etẹn na hannọ zẹ ne iran hoẹmwẹ ọnrẹn gha ghi kpa gha rri ẹrinmwi nẹ, de emwa nọ khian ghi gha gbaroghe iran. Gi ima guan kaẹn okha eso vbe Baibol nọ gha sẹtin ya iran gha mu ohan. Iyeke ọni, ma ghi do guan kaẹn emwi nọ si ẹre nọ ma na khẹke ne ima gha mu ohan.

DE EMWI NẸI KHIAN SUNU?

3-4. De emwi nọ gha sẹtin ya etẹn eso gha si osi, kevbe wẹẹ, vbọzẹ?

³ Etẹn eso sẹtin gha si osi wẹẹ, avbe ohuan ọvbehe gha kpa hin odẹ ẹmwata rre vbe etẹn na hannọ zẹ ni re Ẹbu Nọ Su gha kpa gha rri ẹrinmwi nẹ. Ọ gha kẹ, okha eso vbe Baibol, ẹre ọ ya iran mwẹ egbe iziro vbenian. Gi ima guan kaẹn igiemwi eva. Nokaro ọre ọghe Ogie Ohẹn ighẹ Jehoiada. Ọmwa nọ wa ya ekhọe hia gha ga Osanobua ẹre ghaa nọ. Irẹn vbe ọvbokhan rẹn ighẹ Jehosieba, keghi gbogba gae ọmọ okpia ọkpa na tie ẹre Jehoas, iran na vbe ru iyobọ nẹẹn ya gha re ọba nọ rẹn enegbe nọ ya  ẹkoata ga e Jehova. Te Jehoas wa gha ya ekhọe hia ga e Jehova vbe ẹghẹ ne Jehoiada na gha rre agbọn, sokpan e Jehoiada ghi wu, e Jehoas na suẹn gha ru emwi dan. Ọ na gha lele ibude ọghe avbe okoro dan, ọ na ghi sẹ e Jehova rae.—2 Krọ 24:​2, 15-19.

⁴ Igiemwi nogieva ọre ọghe Ivbi Otu e Kristi ni ghaa rrọọ vbe avbe ukọ ọghe Jesu ghi wu nẹ. Ukọ ighẹ e Jọn, nọ re ukọ nọ kiekie wu, wa ru iyobọ ne Ivbi Otu e Kristi vbe ẹghẹ nọ na gha rre agbọn, ne iran mieke na sẹtin gha ya ẹkoata ga e Jehova. (3 Jọn 4) Vbe na ghee avbe ukọ ọghe Jesu nikẹre, e Jọn wa hia vbe odẹ ke odẹ nọ da obọ imamwaemwi ọghe emwa okeke yi. (1 Jọn 2:18; ya ghee avbe study note ọghe 2 Tẹs 2:7.) Sokpan e Jọn ghi wu nẹ, emwa nibun keghi suẹn gha lele imamwaemwi ọghe emwa okeke. Vbe na te rẹn emwi nọ sunu, vbe ukpo eso nọ ghi lelẹe, imamwaemwi ọghe emwa okeke gba iko ọghe Ivbi Otu e Kristi nẹ.

5. De emwi nọ ma khẹke ne ima gha mu roro rhunmwuda okha eva na?

⁵ Avbe okha na rhie ẹre ma wẹẹ, egbe emwi vbenian gha sunu daa avbe ohuan ọvbehe vbe etẹn na hannọ zẹ gha ghi kpa gha rrie ẹrinmwi nẹ ra? Ọ gha sẹ ẹghẹ nii, Ivbi Otu e Kristi ni mwẹ ẹkoata daa e Jehova, ni khian gha rre uhunmwu otagbọn na gha zẹ owẹ ihan ra, vbene Jehoas kevbe Ivbi Otu e Kristi ne ima guan kaẹn ban ru ẹre ra? Hiehie! Ma wa mwẹ ilẹkẹtin wẹẹ, etẹn na hannọ zẹ gha kpa gha rrie ẹrinmwi nẹ, avbe ohuan ọvbehe gha ye gha ga e Jehova ẹsẹsẹmwẹse, kevbe wẹẹ, te Jehova khian ye gha gbaroghe iran. Vbọ khian ru iyobọ ne ima ya gele ya ọna yi?

TE EGUỌMWADIA E JEHOVA KHIAN YE GHA GAE VBE ODẸ NỌ KHẸKE

6. De ẹghẹ eha ne ima khian guan kaẹn?

⁶ Vbọzẹ ne ima na mwẹ ilẹkẹtin wẹẹ, eguọmwadia e Jehova gha ye gha gae vbe odẹ nọ khẹke, vbe ẹghẹ nọ wegbe nọ dee vbe odaro? Emwi ne ima he ruẹ vbe Baibol vbekpa ẹghẹ ne ima ye na, ẹre ọ ya ima rẹn ọnọna. Ẹghẹ ne ima ye na kakabọ wa lughaẹn ne ẹghẹ ọghe Ivbi Izrẹl kevbe ẹghẹ ọghe Ivbi Otu e Kristi ni ghaa rrọọ vbe avbe ukọ ọghe Jesu ghi wu nẹ. Nọnaghiyerriọ, gi ima guan kaẹn ẹghẹ eha na: (1) Ẹghẹ Ivbi Izrẹl nẹdẹ, (2) vbe avbe ukọ ọghe Jesu ghi wu nẹ, kevbe (3) ẹghẹ ọghe ima nọ re “ẹghẹ na gha na ya emwi hia khian ọghe ọgbọn.”—Iwinna 3:21.

7. Vbe ẹghẹ Ivbi Izrẹl nẹdẹ, vbọzẹ ne egbe ma na wọọ emwa ni ya ẹkoata ga e Jehova, vbe agbẹnvbo ọghe Izrẹl kevbe avbe ọba suẹn gha ru emwi dan?

⁷ Ẹghẹ Ivbi Izrẹl nẹdẹ. Vbọ ghi bu ẹghẹ ne mozis ya wu, ọ keghi tama Ivbi Izrẹl wẹẹ: “I rẹnrẹn we I gha wu nẹ, uwa ghi do khian emwa dan, uwa ghi mu emwi ne I ma uwa ẹre fua.” (Diut 31:29) E Mozis vbe ya obọ sekhae ne iran wẹẹ, iran gha sọtẹ, a gha mu iran gha rrie imu. (Diut 28:​35, 36) Ẹmwẹ ne Mozis ta na sẹ ra? Ẹn. Vbe ọwara ukpo iyisẹn nibun, avbe ọba nibun kegha ru emwi dan, iran na vbe ya Ivbi Izrẹl gha ga ẹbọ. Rhunmwuda ọni, e Jehova keghi rri emwa rẹn oya, ọ ma ghi kue ne ọba nọ ke uniẹn ọghe Izrẹl rre gha kha yan iran. (Ẹzik 21:​25-27) Sokpan Ivbi Izrẹl ni ya ẹkoata ga e Jehova ghi bẹghe ẹre wẹẹ, ẹmwẹ ne Jehova tae sẹ, iran kegha mwẹ udinmwẹ, iran na rhiegba ye ugamwẹ e Jehova.—Aiz 55:​10, 11.

8. Ọ khẹke nọ gha kpa ima odin wẹẹ, imamwaemwi okeke gba iko ọghe Ivbi Otu e Kristi nẹdẹ ra? Rhan otọ re.

⁸ Avbe ukọ ọghe Jesu ghi wu nẹ. Ọ khẹke nọ kpa ima odin wẹẹ, imamwaemwi ọghe emwa okeke gba iko ọghe Ivbi Otu e Kristi vbe avbe ukọ ghi wu nẹ ra? Hiehie. Rhunmwuda, Jesu ka tae yotọ wẹẹ, imamwaemwi ọghe emwa okeke gha gba ehe hia. (Mat 7:​21-23; 13:​24-30, 36-43) Ukọ ighẹ e Pọl, e Pita, kevbe Jọn wa vbe so igiẹ yọ wẹẹ, ẹmwẹ ne Jesu ta suẹn gha sunu vbe ẹghẹ ọghe iran. (2 Tẹs 2:​3, 7; 2 Pit 2:1;  1 Jọn 2:18) Avbe ukọ ghi wu nẹ, imamwaemwi ọghe emwa okeke keghi gba iko ọghe Ivbi Otu e Kristi. Iran na ghi do gha re ọkpa vbe Babilọn nọkhua, nọ mudia ye ihe ugamwẹ ohoghe hia nọ rre uhunmwu otagbọn. Ma bẹghe ẹre wẹẹ, ẹmwẹ ne Jesu tae vbe sẹ.

9. De vbene ẹghẹ ne ima ye na ya lughaẹn ne ẹghẹ ọghe Ivbi Izrẹl kevbe ẹghẹ ọghe Ivbi Otu e Kristi ni ghaa rrọọ vbe avbe ukọ ọghe Jesu ghi wu nẹ?

⁹ “Ẹghẹ na gha na ya emwi hia khian ọghe ọgbọn.” Ẹghẹ ọghe ima kakabọ wa lughaẹn ne ẹghẹ ọghe Ivbi Izrẹl kevbe ẹghẹ ne imamwaemwi ọghe emwa okeke ya gba iko ọghe Ivbi Otu e Kristi, vbe avbe ukọ ghi wu nẹ. De emwi na tie ẹghẹ ọghe ima na? Ma mobọ tie ẹre “ẹdẹ okiekie” ọghe agbọn Esu na. (2Tim 3:1) Sokpan e Baibol gi ima rẹn wẹẹ, ẹghẹ nọ ru ekpataki sẹ ẹdẹ okiekie kevbe nọ tan sẹ ẹdẹ okiekie vbe suẹn vbe ẹghẹ ne ẹdẹ okieke ya suẹn. Te ẹghẹ na khian ya sẹ ẹghẹ ne Arriọba e Mẹzaia khian ya ya emwa nagbọn khian emwa ni gba, kevbe ẹghẹ nọ khian ya ya otagbọn na khian e paradais. Emwi na tie ẹghẹ na ọre “ẹghẹ na gha na ya emwi hia khian ọghe ọgbọn.” (Iwinna 3:21) Ukpo 1914 ẹre ẹghẹ na ya suẹn. De emwi ọgbọn nọ sunu vbe ukpo na? Ukpo na ẹre a ma Jesu Ọba vbe ẹrinmwi. Rhunmwuda ọni, e Jehova na ghi dọlegbe do gha mwẹ Ọba nọ ya zẹ ihe egbe nọ ke uniẹn Ọba ighẹ e Devid rre. Sokpan, ẹ i re ọna ọkpa ẹre Jehova ru. Vbọ ma he kpẹẹ vba, a na dọlegbe suẹn gha mu ugamwẹ ẹmwata gbọọ! (Aiz 2:​2-4; Ẹzik 11:​17-20) Imamwaemwi ọghe emwa okeke gha sẹtin dọlegbe muẹn rhia ra?

10. (a) De emwi ne Baibol we ọ khian sunu daa ugamwẹ ẹmwata vbe ẹghẹ ne ima ye na? (Aizaia 54:17) (b) Vbọzẹ ne avbe ẹmwẹ akhasẹ na, na rhie igiọdu ne ima?

¹⁰ Tie Aizaia 54:17. Gele mu ẹmwẹ akhasẹ na roro: “Emwi igbinna rhọkpa nọ gha sẹtin kuan ruẹ egbe i rrọọ”! Ẹmwẹ akhasẹ na wa sẹ vbe ẹdẹnẹrẹ. Ọ mwẹ ẹmwẹ ọvbehe nọ rhie igiọdu ne ọmwa, nọ rre uwu e Baibol, nọ wa vbe sẹ vbe ẹdẹnẹrẹ, ọ wẹẹ: “Mẹ ne Jehova ẹre ọ khian tobọ mwẹ ma emwa ruẹ emwi, I ghi rhie ẹfe kevbe ọfunmwegbe ne iran. Ẹmwata kevbe uhunmwu ẹmwẹ gha ya uwa wegbe. Wa gha fe vbe obọ . . . ohan.” (Aiz 54:​13, 14) Uhiẹn, Esu nọ re “osa ọghe agbọn na,” i khian sẹtin dobọ iwinna imamwaemwi ọghe eguọmwadia e Jehova yi. (2 Kọr 4:4) A mu ugamwẹ nọhuanrẹn gbọọ nẹ, emwi rhọkpa i khian sẹtin muẹn rhia. Te ọ khian gha rrọọ vbe etẹbitẹ. Emwi igbinna rhọkpa nọ gha sẹtin kuan ima egbe i rrọọ!

DE EMWI NỌ KHIAN SUNU?

11. De emwi nọ ya ima yayi wẹẹ, a i khian yan gbe oghẹn ne gbii vbe etẹn na hannọ zẹ hia gha ghi kpa gha rrie ẹrinmwi nẹ?

¹¹ De emwi nọ khian sunu vbe etẹn na hannọ  zẹ nọ ghi dekẹ gha kpa gha rrie ẹrinmwi nẹ? Yerre wẹẹ, Jesu ọre Ọsuohuan ọghe ima. Irẹn ẹre ọ vbe re uhunmwuta ọghe iko. Jesu khare wẹẹ: “Ọkaolotu ọkpa ẹre uwa mwẹ, ọni ọre Kristi.” (Mat 23:10) Te Jesu ne Ọba ọghe ima khian ye gha gbaroghe emwa rẹn. Ugbẹnvbe a miẹn wẹẹ, e Kristi ẹre ọ khaevbisẹ, esa i rrọọ ne erhuanegbe ẹre ni rre uhunmwu otagbọn na khian ya gha fian afianma. Ọghe ne ẹmwata, ma ma wa rẹn emwi hia vbekpa vbene Jesu Kristi khian ya gha dia emwa rẹn vbe ẹghẹ nii. Gi ima guan kaẹn ọkha eso vbe Baibol nọ gha ya ima rẹn wẹẹ, ọ ma khẹke ne ima gha fian afianma.

12. De vbene Jehova ya gbaroghe emwa rẹn hẹ (a) vbe Mozis ghi wu nẹ? (b) vbe ọ mu iwinna ọvbehe ne Ẹlaija? (Vbe ya ghee efoto.)

¹² Vbene Ivbi Izrẹl te la Otọ Na Ru Eyan Rẹn, e Mozis na wu. Vbọ ghi sunu daa emwa ọghe Osanobua? Te Jehova ghi bizu gbe emwa rẹn, vbe Mozis ne ọguọmwadia re ghi wu nẹ ra? Ẹo, hiehie. Te Jehova wa ye gha gbaroghe iran vbe ẹghẹ ne iran ya gha ya ẹkoata gae. Vbene Mozis te wu, e Jehova keghi tama e Mozis nọ zẹ e Jọsua nọ gha gbaroghe Ivbi Izrẹl. Ọwara ukpo nibun ẹre Mozis ya ma e Jọsua emwi. (Ẹks 33:11; Diut 34:9) Vbe deba ọni, emwa ọvbehe vbe gha rrọọ ni ghaa mu asanikaro, vbe na ghee, ọkaolotu ni ghaa gbaroghe emwa arriaisẹn, iyisẹn, ekigbesiyeha, kevbe igbe. (Diut 1:15) Te a wa gele gha gbaroghe emwa ọghe Osanobua. Ẹlaija wa rhie igiemwi esi yotọ vbe nọ dekaẹn na gha gbaroghe emwa ọghe Osanobua. Ukpo nibun ẹre Ẹlaija ya gha ru iyobọ ne Ivbi Izrẹl ne iran mieke na sẹtin gha ya ẹkoata ga e Jehova. Sokpan, ọ mwẹ asẹ ọkpa ne Jehova ya mu iwinna ọvbehe ne Ẹlaija, ọ na rhie ẹre gha rrie odẹ ahọ ọghe Juda. (2 Ọba 2:1; 2 Krọ 21:12) Te ọna ghi rhie ma wẹẹ, ọmwa rhọkpa ma gha rrọọ nọ ghaa gbaroghe emwa ni ya ẹkoata ga e Jehova vbe ẹwae igbe ọghe arriọba Izrẹl ra? Ẹo. Te Ẹlaija wa gha ma Ẹlaisia emwi vbe ọwara ukpo nibun. “Ivbi akhasẹ” vbe gha rre evba, ọ mwẹ esuku na na gha ma iran emwi. (2 Ọba 2:7) Rhunmwuda ọni, ikpia ni gbegba wa gha rrọọ, ni gha gbaroghe emwa ọghe Osanobua. Te Jehova ye gha ru emwi nọ gualọ, ọ na vbe gha gbaroghe emwa rẹn ni ya ekhọe hia gae.

13. De emwi ne Jehova we irẹn i khian ru zẹvbe nọ rre ebe Hibru 13:5b? (Vbe ya ghee efoto.)

¹³ Vbene ima na mwẹ igiemwi eva na vbe ekhọe, de emwi ne u yayi wẹẹ, ọ khian sunu vbe etẹn na hannọ zẹ ni ghi dekẹ gha kpa gha rrie ẹrinmwi nẹ? Esa i rrọọ ne ima khian ya kpokpo egbe. E Baibol gi ima rẹn ẹmwata ne uhunmwu ẹmwẹ na: E Jehova i khian yan gbe  emwa rẹn vbe uhunmwu otagbọn na. (Tie Hibru 13:5b.) Vbe na ghee Mozis kevbe Ẹlaija, etẹn na hannọ zẹ ni ghi dekẹ rẹn vbe nọ ru ekpataki sẹ hẹ na gha ma emwa ọvbehe emwi. Vbe ọwara ukpo nibun, te Ẹbu Nọ Su wa ma etẹn nikpia ni re ohuan ọvbehe emwi, ne iran mieke na sẹtin gha mu asanikaro. Vbe igiemwi, iran wa ru emwamwa owebe nibun na na ma avbe ediọn emwi, ya sẹ egbe avbe ọgbaroghe ọghe otako, Agbaziro Ọghe Abotu, etẹn ni siẹnro ughae iwinna ughughan vbe Bẹtẹl, kevbe emwa ọvbehe. Ẹbu Nọ Su wa vbe tobọ iran ma etẹn eso emwi, avbe etẹn na ẹre ọ ru iyobọ ne Agbaziro ughughan ọghe Ẹbu Nọ Su. Ẹ i re iwinna nekherhe ẹre avbe etẹn na ru vbe ugamwẹ e Jehova. Iran wa mu egbe ne iran khian ya gha gbaroghe avbe ohuan ọghe Kristi vbe etẹn na hannọ zẹ gha kpa gha rrie ẹrinmwi nẹ.

14. Vbọ re uhunmwu ẹmwẹ ọghe emwi ne ima he guan kaẹn sin?

¹⁴ Uhunmwu ẹmwẹ ọghe emwi ne ima ta dee sin ọre wẹẹ, etẹn na hannọ zẹ ni dekẹ gha kpa gha rrie ẹrinmwi nẹ vbọ ghaa bu ufomwẹ ọghe orughe nọkhua, te ugamwẹ ẹmwata khian ye gha khian hẹnẹhẹnẹ vbe uhunmwu otagbọn na. Ma kpọnmwẹ Jesu Kristi ne ọkaolotu ọghomwa, emwi rhọkpa i khian zẹdẹ la eguọmwadia e Jehova ban. Ẹmwata nọ wẹẹ, avbe agbẹnvbo ni ku uhunmwu kugbe nọ re Gọg ọghe Magọg, gha werriẹ aro nọ khọ da ima vbe ẹghẹ nii. (Ẹzik 38:​18-20) Sokpan, ovbi ẹghẹ kherhe ẹre ọna khian ya vbe otọ, iran i khian vbe sẹtin khọnmiotọ yan emwa ọghe Osanobua, te emwa ọghe Osanobua khian ye gha ga e Jehova. E Jehova gha miẹn emwa rẹn fan! Vbe umian ọkpa ne ukọ ighẹ e Jọn miẹn, ọ keghi bẹghe “oghẹn ne gbii” ni re ohuan ọvbehe ọghe Kristi. A na tama e Jọn wẹẹ, “oghẹn ne gbii” na “la orueghe nọkhua nii ladian.” (Arhie 7:​9, 14) Ọna ya ima rẹn wẹẹ, e Jehova gha miẹn emwa rẹn fan!

15-16. Zẹvbe nọ rre ebe Arhie Maan 17:​14, de emwi ne etẹn na hannọ zẹ khian ru vbe okuo Amagẹdọn, kevbe wẹẹ, vbọzẹ ne ọna na rhie igiọdu ne ima?

¹⁵ Ọrheyerriọ, emwa eso sẹtin gha roro ẹre wẹẹ: ‘De emwi ne etẹn na hannọ zẹ khian ru vbe iran gha sẹ ẹrinmwi?’ E Baibol wa rhie ewanniẹn ye inọta na. Ọ gi ima rẹn wẹẹ avbe  arriọba gha “gu Oteghe Ohuan nii khọn.” Sokpan, ọkpa i khian gbe ifuẹn ne iran. E Baibol khare wẹẹ: Oteghe Ohuan nii “gha khọnmiotọ yan iran.” De emwa nọ khian ru iyobọ nẹẹn? Ako nii vbe kha wẹẹ, iran “na tiere, na hannọ zẹ kevbe ni mudia ẹse.” (Tie Arhie Maan 17:14.) De emwa na guan kaẹn na? Etẹn na hannọ zẹ ni rhiọ kpaegbe ẹre a guan kaẹn! Nọnaghiyerriọ, etẹn hia na hannọ zẹ gha ghi kpa gha rrie ẹrinmwi nẹ, vbọ ghaa bu ufomwẹ ọghe orueghe nọkhua, iwinna nokaro ne iran khian ru ọre, ne iran deba Jesu Kristi khọn. Iwinna nekpataki wa na khin! Vbene etẹn na hannọ zẹ eso ke do khian Osẹe Jehova, emwa ni wa gbinna ẹre iran ghaa khin. Ivbiyokuo ẹre eso kue gha khin. Sokpan, iran na ghi do khian Ivbi Otu e Kristi ọghe ẹmwata, emwa ọfunmwegbe ẹre iran ghi khin. (Gal 5:22; 2 Tẹs 3:16) Iran ma ghi gha khọn okuo. Vbọrhirhighayehẹ, iran gha kpa gha rrie ẹrinmwi nẹ, iran ghi deba Jesu Kristi kevbe avbe odibosa khọnmiotọ yan avbe eghian ọghe Osanobua vbe okuo Amagẹdọn.

¹⁶ Muẹn roro, etẹn na hannọ zẹ eso khian ọmaẹn nẹ, iran ma ghi vbe wegbe vberriọ. Sokpan a gha huẹn iran kpaegbe gha rrie ẹrinmwi, iran ghi do gha re emwa orhiọn nẹi sẹtin wu ni mwẹ ẹtin, ni khian deba Jesu Kristi nọ re Ọkaolotu iran khọn vbe okuo Amagẹdọn. Okuo Amagẹdọn gha ghi fo nẹ, iran ghi deba Jesu Kristi ru iyobọ ne emwa nagbọn ya do khian emwa ni gbae. Ma bẹghe ẹre nẹ wẹẹ, ẹghẹ ne iran khian ya gha rre ẹrinmwi ẹre iran khian na gele ru iyobọ ne etẹn iran sẹ ẹghẹ ne iran na gha rre uhunmwu otagbọn na!

17. Vbe ima ya rẹn wẹẹ, eguọmwadia Osanobua hia gha miẹn uhunmwu vbe okuo Amagẹdọn?

¹⁷ Ọkpa vbe usun ohuan ọvbehe ẹre uwẹ khin ra? De emwi nọ khẹke ne u ru vbe okuo Amagẹdọn gha suẹn? Ọna ọre emwi nọ khẹke ne u ru: Mu ẹtin yan e Jehova, u ghi vbe gha lele adia ọghẹe. Vba ya ọna kha? E Baibol khare wẹẹ: “Uwa la uwu owa uwa, . . . ne uwa khui urho ke egbe. Uwa ya lẹre nẹ kherhe, ohu mwẹ te do dọyọ.” (Aiz 26:20) Emwi rhọkpa i khian ru eguọmwadia e Jehova ni rre ẹrinmwi kevbe ni rre uhunmwu otagbọn na vbe ẹghẹ nii. Vbe na ghee ukọ e Pọl, ma wa mwẹ ilẹkẹtin wẹẹ, “arriọba, ra emwi ni rrọọ nian, ra emwi ni dee vbe odaro . . . i khian sẹtin wannọ ima hin ahoẹmwọmwa ọghe Osanobua rre.” (Rom 8:​38, 39) Ghẹ mianmian wẹẹ: e Jehova hoẹmwẹ ruẹ, kevbe wẹẹ, ẹ i khian sẹ ruẹ rae ẹdẹ!