Ọdiọn ẹre erha mwẹ ghaa khin vbe United Church of Canada. Uzọla uzọla, ọ ghi wẹẹ ne imẹ vbe ọtẹn mwẹ nokhuo gha rrie Sunday school. Ma gha ghi zobọ nẹ, ma ghi ya deba erha mwẹ vbe uwu esọsi vbe odẹ ẹgogo 11:00 vbe owiẹ. Ọ ghaa rre ẹghẹ avan, ma ghi lele iye ima gha rrie Ọgua Arriọba. Uhukpa ma wa ya bẹghe alughaẹn nọ rre ugamwẹ eva na.

Iye mwẹ keghi suẹn gha kporhu ma e Bob Hutcheson kevbe ọvbokhan rẹn ighẹ Marion; ọse ẹre iran hia wa khin kotọ gha dee. Iran na vbe do la odẹ ẹmwata. Vbe ukpo 1958, I keghi lele ọdọ vbe amwẹ na kevbe ivbi iran nikpia eha gha rrie Asikoko Ọghe Etẹn Ni Ke Ẹvbo Ughughan Rre na ya ikpẹdẹ ẹrẹnrẹn do, ne uhunmwuta ẹre khare wẹẹ, Divine Will. Ọ ma gha khuẹrhẹ ne iran rhie mwẹ lele egbe gha rrie asikoko nii, sokpan asikoko nii rre usun emwi ne I i khian sẹtin mianmian vbe ẹdagbọn mwẹ.

Vbe I waan dee, ugbo na na koko emwi irri ẹre ima ghaa dia, te aranmwẹ na gbaroghe wa gha yẹẹ mwẹ. Ẹre I na ghi gha hoo ne I yo owebe nọ yo, ne I ya ruẹ vbe na ya gbaroghe aranmwẹ ni khuọnmwi. Iye mwẹ keghi mu ẹmwẹ na ma ọdiọn ọkpa vbe iko ne ima ye. Ọdiọn nii keghi ye mwẹ ẹre rre wẹẹ, “ẹdẹ okiekie” ẹre ima ye. Ọ na ghi nọ mwẹ deghẹ ọ gha ya mwẹ sikẹ e Jehova, vbe I gha ya gbe ukpo eso vbe owa ebe nọ yo. (2 Tim 3:1) Rhunmwuda ọni, I na ghi kha wẹẹ, I i khian ghi yo owa ebe nọ yo.

Ẹghẹ hia ẹre I ya gha muẹn roro, emwi ne I khian ya ẹdagbọn mwẹ ru, vbe I gha ladian nẹ vbe owebe ne ukpogieva. Agharhemiẹn wẹẹ, te I wa gha ladian vbe ikporhu vbe uzọla uzọla, iwinna ikporhu ma gha rhiẹnrhiẹn mwẹ; I na gha roro ẹre wẹẹ, I i khian sẹtin ru iwinna arọndẹ. Na kha na, erha mwẹ nẹi re Osẹe Jehova kevbe ọtiọnrẹn nokpia na gha tama mwẹ wẹẹ, ne I ya winna vbe kọmpini nọkhua ọkpa nọ rre Toronto na na winna vbe ẹghẹ hia. Okpọmwa ẹre ọtiẹn erha mwẹ ghaa khin vbe isiwinna nii, rhunmwuda ọni, I na ghi suẹn gha winna vba.

I na ghi suẹn gha rhie asọn ba avan ya winna vbe Toronto,  I na vbe gha gu emwa ni rre uwu agbọn mu obọ, rhunmwuda ọni, I ma ghi sẹtin gha yo iko kevbe ikporhu vbe ẹghẹ hia. Erha mwẹ nọkhua nẹi re Osẹe Jehova ẹre I ka gu dia, sokpan vbe ọ ghi wu, I na ghi gha gualọ ehe ne I gha dia.

Te Ọtẹn Nokpia Hutcheson vbe ọvbokhan rẹn ni lele gha rrie asikoko nọkhua vbe ukpo 1958 wa yevbe evbibiẹ mwẹ. Iran na ghi rhie mwẹ la owa, iran na vbe ru iyobọ mẹ ya sikẹ e Jehova sayọ. Vbọ ghi rre ukpo 1960, mẹ vbe ovbi iran nokpia na tie ẹre John keghi dinmwiamẹ. I ghi bẹghe ẹre wẹẹ, e John suẹn iwinna arọndẹ, I keghi rhie egbe ye iwinna ikporhu sayọ. Aro etẹn ni rre iko ne I ye keghi dae wẹẹ, I wa mwẹ alaghodaro; vbene ẹghẹ ya khian, iran na ghi zẹ mwẹ, ne I gha re Ọgbaroghe Ọghe Owebe Ukhamwosa (Theocratic Ministry School servant). a

Vbọ ghi rre ukpo 1966, I keghi rhie ọtẹn nokhuo ọkpa na tie ẹre Randi Berge. Arọndẹ nọ wa ya oyaya kporhu ẹre nọ; te ọ wa gha hoo nọ ya ga vbe ehe na na gualọ iyobọ. Te ọgbaroghe ọghe otako ọghe ima wa gha mwẹ ẹghẹ ne imẹ vbe ọvbokhan mwẹ, ọ na gha rhie igiọdu ne ima, ne ima ya ga vbe iko nọ rre Orillia vbe Ontario. Ẹre ima na ghi si gha rrie odọ.

Ma ghi wa sẹ Orillia, I keghi deba ọvbokhan mwẹ vbe iwinna arọndẹ ọghe ẹghẹ hia. Oyaya ẹre imẹ ghi vbe ya gha kporhu vbene ọvbokhan mwẹ vbe gha ye! Ugbẹnvbe I ghi rhie egbe ye iwinna arọndẹ nẹ, I na ghi sẹtin suẹn gha ya e Baibol ma emwa emwi vbe odẹ ne iran gha ya rẹn otọ re; ọna keghi ya mwẹ gha ghọghọ. Vbe I ghi sẹtin ru iyobọ ne ọdọ vbe amwẹ ọkpa ya khian eguọmwadia e Jehova, ọyẹnmwẹ nọ ghaa sẹ mwẹ, i gia gie.

Ma ghi sẹ e Toronto, I keghi miẹn ọtẹn nokpia ọkpa na tie ẹre Arnold MacNamara; ọkpa vbe usun etẹn ni ghaa mu asanikaro vbe Bẹtẹl ghaa nọ. Ọ keghi nọ mwẹ deghẹ ima gha hoo ne ima ru iwinna arọndẹ ne kpataki. Ọwara ọkpa nii, I na wẹẹ: “Ẹẹn! Ehe na rhirhi wẹẹ, ne ima gha rrie, ma gha yo, sokpan nẹ ghẹ gha re Quebec!” Emwi nọ ya mwẹ kha vberriọ ọre rhunmwuda  aro ne Ivbi e Canada ni zẹ Ebo ya ghee emwa ni rre ako na na zẹ e French vbe Quebec, rhunmwuda, te emwa wa gha gbe olighi vbe ikinkin nii. Vbe ẹghẹ na kha na, ọ ghaa mwẹ emwa ni ghaa kha wẹẹ, iran hoo na wannọ e Quebec hin e Canada rre.

Arnold na wanniẹn mwẹ wẹẹ, “E Quebec ọkpa ẹre abotu ghi gie avbe arọndẹ ne kpataki yo vbe ẹghẹ na nian.” Ẹre I na ghi wa kha wẹẹ, I gha yo. I rẹnrẹn wẹẹ, ọvbokhan mwẹ ighẹ Randi hoo nọ ya ga vbe evba. Okiekie, ẹre I ghi ya rẹn wẹẹ, owẹ nọ khẹke ẹre I zẹ vbe ẹghẹ nii!

Vba ghi ya uzọla isẹn ma ima e French nẹ, mẹ vbe ọvbokhan mwẹ kevbe ọdọ vbe amwẹ ọkpa kegha rrie ẹvbo na tie ẹre Rimouski; odẹ ekẹn (northeast) ọghe Montreal ẹre ẹvbo na ye, okhian ibiriki 336 ẹre nọ. Vbe ẹghẹ na kha na, emwi wa ye bun nọ ye khẹke ne ima ruẹ vbe French; te ọna wa dewarorua vbe ẹghẹ ne I na gha tie ayawewe vbe iko, ne I gha te ya kha wẹẹ, ‘etẹn nibun na gie ke Austria rre gha rrie asikoko nọ dee na,’ I na ya loo ẹmwẹ ọvbehe nọ khọ e Austria vbe urhuẹvbo e French. Emwi ne I ghi ta ọre wẹẹ, ‘etẹn nibun ni gha rrie asikoko nọ dee na, ugomugo (ostrich) ẹre iran khin.’

Vbe ima rre ehe ne ima na ga vbe Rimouski, etẹn nikhuo enẹ ni ma he rọnmwẹ ọdọ, keghi do deba ima enẹ ni ka rre evba; Ọtẹn Nokpia Huberdeau vbe ọvbokhan rẹn kevbe ivbi iran nikhuo eva na vbe rre. Huberdeau vbe ọvbokhan rẹn keghi mu owa nọkhua nọ mwẹ ughugha ihinrọn; arọndẹ hia ni rre evba ẹre ọ koko gba gha ha igho owa nii. E White House ẹre ima ghaa tie owa nii, rhunmwuda na na ya ẹmu nọfua pẹnt odaro nene owa kevbe orrẹ nọ rrọọ. Odẹ orhunmwu 12 ya sẹ 14 ẹre ọ mobọ gha die owa nii ya. Rhunmwuda ne imẹ vbe ọvbokhan mwẹ ighẹ Randi na gha re arọndẹ ne kpataki, owiẹ, avan kevbe ota ẹre ima ya gha ladian vbe ikporhu; rhunmwuda ọni, te ima wa gha ghọghọ wẹẹ, ẹghẹ hia ẹre ima ya miẹn emwa ne ima gba winna vbe ikporhu. Ọ gha khọnrẹn ne oni kakabọ gha fi, ra ne isonorhọ gha dele, te iran ye deba ima ladian vbe ẹghẹ ota.

Vbene ima kevbe avbe arọndẹ nikẹre ghi sikẹ egbe sẹ, ma na do yevbe ẹgbẹe ọkpa. Ugbẹnso, ma ghi wa koko erhẹn, ma ghi tota lẹga ẹre, ma ghi fẹko gha rri ibota vba; deghẹ ima ma na ru ọni, ma ghi koko gba le evbare. Ọkpa vbe etẹn ni rre evba gua wa kpee ẹgiọn vbe emaba, rhunmwuda ọni, ota ota vbe ẹdẹ Satọde, ma ghi gha so ihuan, ma ghi vbe gha gbe.

Emwa nibun ni rre Rimouski wa gha rhie ehọ ne ima ta yi! Vbe nọ te sẹ ukpo isẹn vba, emwa nibun ne ima gu ruẹ e Baibol na dinmwiamẹ, te ọna wa gha ya ima ghọghọ. Emwa ni ghi gha ya iyẹn wewe vbe iko ọghe ima keghi do gha re odẹ orhunmwu 35.

Ma wa miẹn emwi nibun ruẹ vbe Quebec zẹvbe emwa ni kporhu iyẹn nọ maan. Ma bẹghe vbene Jehova ya gha ru iyobọ ne ima hẹ vbe ikporhu, kevbe vbe nọ ya gha kpemehe evba ya yin agbọn ne ima. Ẹ i vbe re ọni ọkpa, ma na do hoẹmwẹ emwa ni zẹ French; ẹvbo ne iran zẹ kevbe vbene iran ya ru emwi na vbe do gha yẹẹ ima. Nian, te odẹ ne ivbi ẹvbo ọvbehe ya ru emwi ghi vbe yẹẹ ima.—2 Kọr 6:13.

Ma ghi wa ghee, abotu na wẹẹ ne ima kpa gha rrie ẹvbo na tie ẹre Tracadie nọ rre odẹ ekẹn (east) ọghe eghute nọ rre New Brunswick. Ọna ma zẹdẹ gha khuẹrhẹ, rhunmwuda, te ima da ha osa ye owa ne ima mu, I vbe gha winna vbe ẹdẹ eso vbe uzọla vbe esuku ọkpa. Deba ọni, te emwa eso ne ima gu ruẹ e Baibol da suẹn gha ya iyẹn wewe; vbe ẹghẹ na kha na, iwinna wa khian vbe obọ vbe Ọgua Arriọba ne ima ghaa bọ.

Ma na mu ẹmwẹ na ye erhunmwu, erhunmwu erhunmwu ẹre ima wa gha na vbe ufomwẹ uzọla nii; vbe iyeke ọni, ma na gha rrie Tracadie ne ima ya ghee vbene evba ye hẹ. Te ẹvbo na wa lughaẹn ne Rimouski. Ẹre ima na ghi wẹẹ ima gha yo, ugbẹnvbe a miẹn wẹẹ, evba ẹre Jehova wẹẹ ne ima gha rrie. Ma keghi mu ẹdagbọn ima ye Jehova obọ, Jehova na gele ru iyobọ ne ima ya la ọlọghọmwa ughughan ne ima miẹn gberra. (Mal 3:10) Ne Randi na kakabọ hoẹmwẹ e Jehova, nọ na mu ọghe emwa ọvbehe karo, nọ na ya emwa ọvbehe giẹ kevbe nẹi na rherhe mu ohu, ẹre ọ si ẹre ne okhian nii ma na lọghọ ima gbe.

Ọdiọn ọkpa ẹre ọ ghaa rre iko na gie ima gha rrie; eni ẹnrẹn ọre Robert Ross. Arọndẹ ẹre irẹn vbe ọvbokhan  rẹn ighẹ Linda ka gha khin vba; iran ghi biẹ ovbi iran nokaro nẹ, iran na wa dia evba nii ya. Agharhemiẹn wẹẹ, iran ghaa koko ovbi iran nokpia ne kherhe, te iran wa gha ya obọ esi mu emwa, oyaya ẹre iran vbe ya gha kporhu; te igiemwi ọghe iran wa rhie igiọdu ne imẹ vbe ọvbokhan mwẹ.

Ma ghi gbe ukpo eva nẹ vbe Tracadie zẹvbe arọndẹ, abotu keghi gbẹn ebe gie ima, iran na wẹẹ, ne ima do gha ru iwinna ọgbaroghe ọghe otako; ma ma te zẹdẹ ya aro ye ọna hiehie. Ukpo ihinrọn ẹre ima gbe vbe otako na na zẹ Ebo, vbe iyeke ọni, a na mu ima gha rrie otako na na zẹ e French vbe Quebec. Ẹghẹ ke ẹghẹ ne I ya ya ọta guan, ọgbaroghe ọghe odin (district overseer) ọghe ima vbe Quebec na tie ẹre Léonce Crépeault ghi wa tian mwẹ yọ. Sokpan ọ gha ghi tian mwẹ nẹ, ọ ghi vbe nọ mwẹ wẹẹ, “De emwi ne u gha ru, ne emwa mieke na kakabọ miẹn emwi ruẹ vbe ọta ruẹ?” b Emwi nọ ghaa ru na, ẹre ọ ru iyobọ mẹ ya sẹtin gha rhie avbe olika ẹmwẹ ni rre ọta mwẹ ladian kevbe ne I gha ya ọta mwẹ guan vbe odẹ ne emwa gha ya rẹn otọ re.

Ọkpa vbe usun iwinna ne I he ru ne I i khian sẹtin mianmian, ọre iwinna na mu mẹ vbe Asikoko Nọkhua Ọghe Etẹn Ni Ke Ẹvbo Ughughan Rre, na do vbe Montreal vbe ukpo 1978, ne uhunmwuta ẹre khare wẹẹ “Victorious Faith.” Ugha na na ru emwamwa evbare ẹre I na gha winna. Orhunmwu 80,000 ẹre ima ghaa mwẹ vbe ekhọe wẹẹ ọ gha rrie asikoko nii; vbe na khian ya koko iran keghi wa lughaẹn ne vbe na ka ru ẹre dee yi. Te emwi hia wa fi werriẹ fẹfẹfẹ, ke emwi na khian ya le evbare nii, ke aro evbare na khian le ne iran kevbe odẹ na khian vbe ya le ẹre. Ma ghaa mwẹ imọto nikhua ni rrie odẹ 20, ne ima ghaa loo zẹvbe fridge (refrigerated trailers); Avbe fridge na ma vbe gha winna ẹse ugbẹnso. Ma te gha hoo ne ima ya mwamwa ọgbẹlẹzẹ ne ima khian loo ya do asikoko nii yotọ, sokpan rhunmwuda ne iran na loo ẹre ya ku iku isasegbe vbe ẹdẹrriọ, ogiasọn ẹre ima ghi ya sẹtin la ọgbẹlẹzẹ nii. Na kha na, te ọ te khẹke ne ima koko erhẹn ya le evbare owiẹ vbene ẹdẹ te gbe! Agharhemiẹn wẹẹ, egbe wọọ ima nẹ, ma na ye gha winna; I wa miẹn emwi nibun ruẹ vbe obọ etẹn ne ima gba gha winna, rhunmwuda, emwa ni wegbe obọ, ni mwẹ ẹwaẹn, ni ya emwa ọvbehe giẹ kevbe nẹi rherhe mu ohu ẹre iran khin. Ma na do kakabọ sikẹ egbe, ọse ẹre ima ye khin do fi ebanban. U miẹn ọyẹnmwẹ nọ ghaa sẹ ima, ne ima na sẹtin do asikoko nọkhua ne kpataki na vbe Quebec, vbe ikinkin na na gha zẹ etẹn ima kpokpo vbe odẹ ukpo 1940 ya mu 1950!

I wa miẹn emwi nibun ruẹ vbe obọ emwa ne ima gba gha siẹnro emwamwa asikoko, vbe asikoko nọkhua ughughan na do vbe Montreal. Ọ mwẹ ukpo ọkpa  ne Ọtẹn Nokpia David Splane nọ ghi re ọkpa vbe Ẹbu Nọ Su ya gha re convention overseer. Vba khian ghi do asikoko ọvbehe, a na mu iwinna nii mẹ. Sokpan, Ọtẹn Nokpia David Splane na wa ya egbe hia kue yọ.

Ọ ghi rre ukpo 2011, vbe imẹ vbe ọvbokhan mwẹ ghi gbe ukpo 36 nẹ vbe iwinna ọgbaroghe ọghe otako, abotu na wẹẹ ne I do gha re ọmamwaemwi vbe Owebe Ọghe Avbe Ediọn Ni Rre Iko (School for Congregation Elders). Vbe nọ te gba vbe ukpo eva, e bẹd ughughan ne ima vbiẹ re kegha re 75, sokpan ma ma gbe I ma rẹn hiehie. Vbe ufomwẹ ọghe dọmwadẹ uzọla, ediọn ni rrie owebe nii ghi gha ghọghọ, rhunmwuda, iran bẹghe vbene Ẹbu Nọ Su ya hoo ne iran kakabọ sikẹ e Jehova hẹ.

Vbene ẹghẹ ya khian, otu na wẹẹ ne I suẹn gha ma etẹn emwi vbe Owebe Ọghe Etẹn Ni Kporhu Iyẹn Nọ Maan (School for Kingdom Evangelizers). Etẹn ni rrie owebe nii gha wa muẹn roro, vbene iran khian ya tota vbe klasi gha ruẹ emwi vbe ọwara ughaẹdẹ ihinrọn, vbene iran khian ya gha loo odẹ ughaẹdẹ eha vbe ota ota ya ru iwinna na mu ne iran vbe esuku kevbe vbene iran khian ya mu egbe ọta enẹ ra isẹn na wẹẹ ne iran ya guan vbe uzọla uzọla, egbe ghi wa wọọ iran. Mẹ vbe ọtẹn nọkpa nọ vbe re ọmamwaemwi vbe owebe nii, ghi tama iran wẹẹ, ẹ i re ẹtin obọ iran ẹre iran khian ya ru ẹre, sokpan, e Jehova gha ru iyobọ ne iran. I i khian sẹtin mianmian vbe nọ ghaa ye etẹn ni rrie owebe na hẹ, vbe iran ghi do bẹghe ẹre wẹẹ, emwi ne iran te roro wẹẹ, iran i khian sẹtin ru, te iran ghi sẹtin ru ẹre, rhunmwuda, ne iran na mu ẹtin yan e Jehova.

Ọmwa nọ mwẹ ẹghẹ ne emwa ọvbehe ẹre iye mwẹ ghaa khin. Ọna wa ru iyobọ ne emwa nibun nọ gu ruẹ e Baibol ya khian Osẹe Jehova. Ọna wa vbe ru iyobọ ne erha mwẹ; ọ na do gha hoo nọ rẹn odẹ ẹmwata. Vbọ ma he kpẹẹ vba, iye mwẹ na wu; vbọ ghi rre ikpẹdẹ eha nọ wu, erha mwẹ kegha die Ọgua Arriọba do danmwehọ ọta azagba. Te ọna wa kpa ima odin. Erha mwẹ ghi suẹn iko nẹ, ọ ma ghi dobọ yi; erriọ ẹre ọ wa gha ru ẹre vbe ọwara ukpo 26. Agharhemiẹn wẹẹ, erha mwẹ ma dinmwiamẹ, ediọn keghi tama mwẹ wẹẹ, irẹn ẹre ọ ka sẹ iko vbe uzọla uzọla.

Igiemwi esi ẹre iye mwẹ rhie yotọ ne imẹ vbe etẹn mwẹ nikhuo. Etẹn nikhuo eha ẹre I mwẹ, iran kevbe ọdafẹn iran wa ya ekhọe hia ga e Jehova. Eva vbọ ga vbe abotu. Ọkpa rre abotu nọ rre Portugal, nọkpa ga vbe abotu nọ rre Haiti.

Arọndẹ ne kpataki ẹre imẹ vbe ọvbokhan mwẹ ighẹ Randi ghi khin; e Hamilton vbe Ontario ẹre ima na ghi ga. Vbe ẹghẹ ne ima na gha re ọgbaroghe ọghe otako, ma gha mu otuẹ sẹ iko, ma ghi vbe lele etẹn ya miẹn emwa ne iran ka kporhu ma kevbe emwa ne iran gu ruẹ e Baibol. Sokpan nian, te ima ghi vbe mwẹ emwa ne ima tobọ ima gu ruẹ e Baibol; ọyẹnmwẹ wa vbe sẹ ima vbe ima gha bẹghe vbene iran tobọ iran ghi ya hoẹmwẹ e Jehova hẹ. Zẹvbe ne ima ya gbegbe etẹn ni rre iko ne ima ghi ye na, ma keghi do bẹghe vbene Jehova ya ru iyobọ ne iran hẹ, vbe emwi ghaa maan ne iran kevbe vbe emwi gha wegbe mu iran; ọna wa rhie igiọdu ne ima.

I gha ya yerre vbene etẹn nibun ya gha mwẹ ẹghẹ ne ima hẹ kevbe iyobọ ne iran ru ne ima, I ghi wa gha ghọghọ. Rhunmwuda ọni, ma keghi hia ne ima gi emwa ọvbehe rẹn wẹẹ, ma mwẹ ẹmwẹ iran vbe orhiọn, ma ghi gha rhie igiọdu ne iran, ne iran ya ẹdagbọn iran ga e Jehova vbene ẹtin iran sẹ. (2 Kọr 7:6, 7) Ọ ghaa mwẹ ọtẹn nokpia ọkpa vberriọ, ọvbokhan rẹn, ovbi ẹre nokpia kevbe ovbi ẹre nokhuo kegha ru iwinna arọndẹ ọghe ẹghẹ hia. I na ghi nọ ọtẹn nokpia nii evbọzẹe nọ ma na deba ẹgbẹe ọre vbe iwinna arọndẹ. Ọ na wẹẹ, irẹn ẹre ọ koko iran eha ni ru arọndẹ. Ẹre I na ghi nọ rẹn wẹẹ, “Uwẹ a ma sẹtin koko iran, vbene Jehova gha ya koko iran?” I na ghi tama rẹn wẹẹ, orhunmwu ọkpa i rri evbare nọ rhiẹnrhiẹn, ọ gha deba iran, ọ gha bẹghe orhiẹnrhiẹn nọ rrọọ. Vbọ ghi rre uki ehan vba, ọ na rhie obọ ye iwinna arọndẹ.

Te imẹ vbe ọvbokhan mwẹ khian gha tama avbe orre ni dee vbekpa “iwinna ọyunnuan” ughughan ne Jehova he ru; ma vbe ya aro yọ wẹẹ, te iran khian ya ẹdagbọn iran ga e Jehova, iran ghi vbe gha ghọghọ, vbe nọ vbe ghaa ye ne ima.—Psm 71:17, 18.