E Baibol ma tama ima. Sokpan ọ mwẹ emwi kpataki eso ne Baibol tae, ọ gha kẹ, ena rre usun emwi nọ si ẹre ne Josẹf vbe Meri ma na kpa hin e Bẹtlẹhẹm rre vbe ẹghẹ nii.

Odibosa ọkpa keghi tama e Meri wẹẹ, ọ gha hanmwa, ọ ghi vbe biẹ. Vbe ẹghẹ ne odibosa na ya ta ẹmwẹ na ma e Meri, e Josẹf vbe Meri ye gha rre Nazarẹt vbe Galili. Ẹvbo na ẹre Josẹf ke rre. (Luk 1:26-31; 2:4) Vbe ẹghẹ eso ghi gberra nẹ, vbe iran ghi ke Igipt rre nẹ, iran na dọlegbe gha rrie Nazarẹt. Evba ẹre Jesu na waan, te a wa vbe rẹn ọnrẹn zẹvbe Ovbi e Nazarẹt. (Mat 2:19-23) Rhunmwuda ọni, a ghaa ta ẹmwẹ e Jesu, e Josẹf kevbe Meri, e Nazarẹt ẹre ọ wa lae ima ekhọe.

Ọ mwẹ okhuo ọkpa na tie ẹre Ẹlizabẹt, nọ ghaa rre Juda, ọtiẹn e Meri vbe uwu ẹgbẹe ẹre ghaa nọ. Ẹlizabẹt ẹre ọ ghaa re ọvbokhan e Zẹkaraia ne ohẹn, irẹn ẹre ọ vbe biẹ e Jọn ne Ọ Dinmwi Ọmwa Ye Amẹ. (Luk 1:5, 9, 13, 36) E Meri keghi ya tuẹ Ẹlizabẹt vbe Juda, ọ na vbe dia evba ya vbe uki eha. Iyeke ọni, ọ na werriegbe gha rrie Nazarẹt. (Luk 1:39, 40, 56) Ọna ẹre ọ si ẹre ne Meri na wa rẹn otọ e Juda.

Vbe ẹghẹ eso ghi gberra nẹ, e Josẹf keghi lele adia nọ khare wẹẹ, ne emwa ya “gbẹn eni ye otọ.” Rhunmwuda ọni, e Josẹf keghi ke Nazarẹt gha rrie Bẹtlẹhẹm, nọ re “ẹvbo e Devid.” A vbe tae yotọ wẹẹ, ẹvbo na ẹre a khian na biẹ e Mẹzaia. (Luk 2:3, 4; 1 Sam 17:15; 20:6; Mai 5:2) Vbe Meri ghi biẹ e Jesu nẹ vbe evba nii, e Josẹf ma wẹẹ ne Meri mu e Jesu na da biẹ, ne iran werriegbe mu okhian gha rrie Nazarẹt, rhunmwuda ẹi re otọ ne emwa. Iran na ye gha rre Bẹtlẹhẹm, ke Bẹtlẹhẹm gha rrie Jerusalẹm kegha re odẹ ibiriki 6 (odẹ 9 km). Rhunmwuda ọni, ẹi khian lọghọ ne iran sẹtin mu ovbi iran gha rrie ọgua Osa kevbe ne iran zọ ese nọ khẹke ne iran zọ.​—Lẹv 12:2, 6-8; Luk 2:22-24.

Odibosa ka tama e Meri wẹẹ, ọmọ nọ biẹ na gha mu ẹkete ọghe Devid, ọ ghi vbe “rri Ọba.” Ọ gha kẹ, e Meri vbe Josẹf rẹnrẹn wẹẹ, ọ khẹke na biẹ e Jesu vbe ẹvbo e Devid. (Luk 1:32, 33; 2:11, 17) A sẹtin vbe miẹn wẹẹ, iran ghaa roro ẹre wẹẹ, ọ gha maan sẹ, ne iran dia evba ya, a te miẹn wẹẹ, Osanobua tama iran emwi ne iran khian ghi ru.

Ma ma rẹn inu ẹghẹ ne iran he gbe vbe Bẹtlẹhẹm vbe ẹghẹ ne ọbo eso ni tie orhọnmwẹ ya do tuẹ iran. Vbe ẹghẹ na kha na, owa ẹre iran ghaa ye, ọvbokhan ẹre Jesu ghaa khin, ẹi wa re ọmọ obọ. (Mat 2:11) Ọ khọ wẹẹ, ne iran gha te ya werriegbe gha rrie Nazarẹt, iran na wa fẹko dia e Bẹtlẹhẹm ya, sẹrriọ wẹẹ, evba na ghi do gua iran egbe ro.

E Hẹrọd keghi kha wẹẹ, “na gbele emọ ikpia hia ni rre ukpo eva gha die otọ, vbe Bẹtlẹhẹm.” (Mat 2:16) Odibosa ọkpa keghi do gu e Josẹf guan vbekpa ẹmwẹ na, ẹre Josẹf vbe Meri na ghi mu e Jesu lẹẹ gha rrie Igipt, evba nii ẹre iran ghi gha ye, a te miẹn wẹẹ, e Hẹrọd wu. Ọ ghi sẹ ẹghẹ e Josẹf vbe ẹgbẹe ọre na fẹko gha rrie Nazarẹt. Vbọzẹ ne iran ma na werriegbe gha rrie Bẹtlẹhẹm? Rhunmwuda ovbi Hẹrọd ighẹ Akilọs nọ mwẹ ekhọe atosi, ẹre ọ ghaa kha yan e Judia vbe ẹghẹ nii, vbe deba ọni, odibosa ọkpa vbe tama iran ne iran ghẹ yo odọ. E Josẹf gha gele sẹtin koko e Jesu vbe Nazarẹt, nọ do gha re ọmwa nọ ga Osanobua vbe odẹ ọghe ẹmwata.​—Mat 2:19-22; 13:55; Luk 2:39, 52.

Ọ khọ wẹẹ, e Josẹf wu nẹ, a te miẹn wẹẹ, e Jesu ya arrọọ ọghẹe zọ ese, ne ẹkpotọ mieke na kie ne emwa ya gha rrie ẹrinmwi. Rhunmwuda ọni, a gha huẹn e Josẹf kpaegbe vbe uhunmwu otagbọn na. Ẹghẹ nii, ẹkpotọ ghi kie ne emwa nibun ya rẹn ọnrẹn, iran ghi vbe nọ ọnrẹn ọta vbekpa evbọzẹe ne irẹn vbe Meri na ye gha rre Bẹtlẹhem vba biẹ e Jesu nẹ.