De emwa ne ebe Psalm 12:7 guan kaẹn, vbe ọ khare wẹẹ, “U gha gbogba ga iran,” iran ne “agbọn zẹ ọre ẹtin” ne uviẹn ọnrẹn 5 guan kaẹn nọ ra, ra “ẹmwẹ ọghe Jehova” vbe uviẹn ọnrẹn 6 ẹre ọ guan kaẹn?

Ẹmwẹ na ta sẹ emwa rhie ẹre ma wẹẹ, emwa ẹre a guan kaẹn vbe ako na.

Ebe Psalm 12:​1-4 khare wẹẹ, “A i ghi miẹn emwa ẹmwata.” Nian gi ima guan kaẹn ẹmwẹ nọ rre ebe Psalm 12:​5-7, ne ima ya unu kaẹn ban vbe inọta nii.

Uviẹn ọnrẹn 5 gi ima rẹn emwi ne Osanobua ta vbekpa emwa ne agbọn zẹ ọre ẹtin. Ọ wẹẹ irẹn gha miẹn iran fan.

Uviẹn ọnrẹn 6 na vbe rhie tẹ wẹẹ, “nọ gia mu ẹtin yan, ẹre ẹmwẹ ọghe Jehova khin,” ọ na wẹẹ, te iran yevbe ‘esiliva na ya erhẹn kpe.’ Ivbi Otu e Kristi hia rẹnrẹn wẹẹ, ẹmwata ne uhunmwu ẹmwẹ ẹre ọna wa khin.​—Psm 18:30; 119:140.

Nian gi ima vbe zẹ iro yan uviẹn ọnrẹn 7, ọ khare wẹẹ: “Eo Jehova, u gha degue iran. Ne u vbe viọ iran lẹre, ne egbe emwa vberriọ vbe etẹbitẹ.” De emwa nọ re “iran” na guan kaẹn vbe ako na?

Rhunmwuda ne uviẹn ọnrẹn 6 na sunu ye “ẹmwẹ ọghe Jehova,” emwa eso keghi roro ẹre wẹẹ, ẹmwẹ ọghe Jehova, ọre “iran” na guan kaẹn vbe ako na. Ma rẹnrẹn wẹẹ, e Jehova gbogba ga Ẹmwẹ ọghẹe nẹ agharhemiẹn wẹẹ, emwa nibun te hia ne iran mu awua yọ ne emwa ghẹ ghi tie Baibol, iran na vbe gha hoo ne iran wabọ ọre rua.​—Aiz 40:8; 1 Pit 1:25.

Vbọrhirhighayehẹ, ẹmwata ne uhunmwu ẹmwẹ ẹre ọ wa rre uviẹn ọnrẹn 5. E Jehova ka gbaroghe “emwa ne agbọn zẹ ọre ẹtin” kevbe emwa na zẹ “kpokpo,” te ọ khian ye gha ru iyobọ ne iran.​—Job 36:15; Psm 6:4; 31:​1, 2; 54:7; 145:20.

Nọnaghiyerriọ, gha re “iran” na guan kaẹn vbe uviẹn ọnrẹn 7?

Ma gha ghee avbe uviẹn ọvbehe vbe ebe Psalm 12, ma gha bẹghe ẹre wẹẹ, emwa ọre ẹmwẹ na ighẹ “iran” guan kaẹn vbe uviẹn ọnrẹn 7.

Ebe Psalm 12:1 guan kaẹn “emwa ẹmwata,” a sẹtin miẹn wẹẹ emwa dan ta ohoghe ma iran. Iyeke ọni, a keghi gi ima rẹn wẹẹ, e Jehova gha guọghọ emwa dan na, ni rhuọ. Ebe ọsian na gi ima rẹn wẹẹ, ma gha sẹtin gha mwẹ ilẹkẹtin wẹẹ, Osanobua gha gbaroghe emwa rẹn rhunmwuda, ẹmwẹ nọ gia mu ẹtin yan ẹre ẹmwẹ ọghẹe khin.

Nọnaghiyerriọ, emwa ne emwa dan zẹ kpokpo, ne Jehova khian gbogba ga ẹre ẹmwẹ nii ighẹ ‘iran’ nọ rre uviẹn ọnrẹn 7 guan kaẹn.

A loo ẹmwẹ na ighẹ “iran” vbe uviẹn ọnrẹn 7, vbe avbe Baibol na ya obọ gbẹnnẹ ladian vbe urhuẹvbo Hibru. Vbene Greek Septuagint na loo “ima” igbava vbe uviẹn na, ọna rhie ma wẹẹ, emwa ẹmwata na zẹ kpokpo ẹre ako na guan kaẹn. Abọ nokiekie vbe uviẹn 7 khare wẹẹ, e Jehova gha gbogba ga “dọmwadẹ” emwa esi vbe obọ emwa dan. (Psm 12:​7, 8) Uviẹn 7 vbe Baibol na ke Hibru zedu ẹre ghee Aramaic Targums khare wẹẹ: “EO NỌYAẸNMWA, u gha gbogba ga emwa esi, u ghi miẹn iran fan vbe obọ orre dan na vbe etẹbitẹ. Izozo la emwa dan egbe, vbe na ghee ọkhọe na tie ẹre leech nọ si esagiẹn ọghe emwa nagbọn.” Ena hia rre usun emwi nọ rhie ẹre ma wẹẹ, ẹ i re ẹmwẹ ọghe Jehova ẹre ebe Psalm 12:7 guan kaẹn.

Nọnaghiyerriọ, uviẹn na rhie ilẹkẹtin ne “emwa ẹmwata” wẹẹ, Osanobua gha gbogba ga iran.