Ne ima mieke na sẹtin ru emwi nọ gha yẹẹ e Jehova te ọ khẹke ne ima gha mwẹ amuẹtinyan. Ọrheyerriọ, e Baibol gi ima rẹn wẹẹ, “emwa hia i khian sẹtin gha mwẹ amuẹtinyan.” (2 Tẹs 3:2) Ukọ ighẹ e Pọl ghi guan kaẹn emwa ni ghaa zẹ ọre kpokpo, ọ na we “emwa dan ne ekhọe iran wegbe” ẹre iran khin kevbe wẹẹ, Osanobua ẹre ọ khian miẹn irẹn fan vbe obọ iran. Sokpan ẹmwẹ ne ukọ ighẹ e Pọl ta na vbekpa amuẹtinyan vbe dekaẹn emwa ọvbehe. Emwa eso ma hoo ne iran yayi wẹẹ, Osa rrọọ nọ yi emwi hia. (Rom 1:20) Eso sẹtin gha kha wẹẹ, iran mwẹ amuẹtinyan rhunmwuda iran ya Osa yi. Sokpan ọna ọkpa ma sẹ nọ gha ya iran sẹtin ru emwi nọ gha yẹẹ e Jehova.

Te ọ wa gele khẹke ne ima yayi wẹẹ, e Jehova rrọọ kevbe wẹẹ, ọ gha san emwa hia ni mu ẹtin yan rẹn ẹse. (Hib 11:6) Amuẹtinyan keghi re ọkpa vbe usun ọmọ ne orhiọn nọhuanrẹn mọ. E Jehova gha sẹtin rhie orhiọn nọhuanrẹn ne ima vbe ima gha nọ rẹn vbe erhunmwu. (Luk 11:​9, 10, 13) Odẹ ọkpa ne kpataki ne ima gha ya miẹn orhiọn nọhuanrẹn, ọre vbe ima ghaa tie Baibol ne Osanobua ya orhiọn nọhuanrẹn dia emwa ya gbẹn. Iyeke ọni, ma ghi mu emwi ne ima tie roro, ma ghi vbe rhie ẹre ye uyinmwẹ. Ma gha ru ena hia, orhiọn nọhuanrẹn ọghe Jehova ghi ru iyobọ ne ima ya sẹtin gha ru emwi nọ yẹẹ e Jehova.