Vbọzẹ ne okpia nii ne Baibol ma sunu ye eni ẹnrẹn na kha wẹẹ, arevbukhu ọghe irẹn i khian sẹ ivbi irẹn obọ deghẹ irẹn na rhie Rut? (Rut 4:1, 6)

Vbe ẹghẹ nẹdẹ, okpia nọ rhie okhuo nẹ gha wu, vbe nẹi na mwẹ ọmọ, emwa sẹtin do gha nọ wẹẹ: De ọmwa nọ khian ghi rri otọ ẹre vbe ukhu? Vbọ khian ghi sunu daa uniẹn ọghẹe? Uhi e Mozis keghi rhie ewanniẹn ye avbe inọta na.

Deghẹ okpia nọ mwẹ otọ na wu, ra deghẹ ọmwa nọ ghi khian ovbiogue na khiẹn otọ ọre, vbọ khian ghi sunu daa otọ nii? Ọtiọnrẹn ra ọmwa ọvbehe nọ ghi sikẹ ọre sẹ vbe uwu ẹgbẹe sẹtin werriegbe dẹ otọ nii, ne otọ nii ghẹ mieke na wii ẹgbẹe ọghe iran.—Lẹv 25:23-28; Nọm 27:8-11.

De emwi ne iran khian ghi ru, ne uniẹn ọghe okpia nọ wu na ghẹ mieke na wii rua? Ọtiọnrẹn vbe uwu ẹgbẹe ghi rhie okhuo ne okpia na wu sẹ rae rọnmwẹ. Erriọ wa gha ye ne Rut. Okpia nii gha ghi rhie amwẹ ọtiọnrẹn nii rọnmwẹ, ọmọ ne iran rhirhi biẹ, ghi gha khuẹnniẹn eni ọtiọnrẹn nii nọ wu, ọmọ nii ẹre ọ khian ghi rri ukhu ọghe okpia nii nọ wu. Emwamwa na, ẹre ọ khian ghi zẹe wẹẹ, amwẹ okpia nọ wu nii i khian ghi gha rre ivbabọ.—Diut 25:5-7; Mat 22:23-28.

Gia guan kaẹn Naomi. Elimẹlẹk ẹre ọ ghaa re ọdafẹn ọnrẹn. Ọdafẹn ọnrẹn vbe ivbi ẹre eva nikpia ghi wu, ọ ma ghi gha mwẹ ọmwa rhọkpa nọ khian gha kpemehe nẹẹn. (Rut 1:1-5) E Naomi vbe Rut ghi werriegbe gha rrie Juda, ọ keghi tama e Rut nọ ya rinmwian e Boaz, nọ gu iran dẹ otọ ọghe iran werriegbe. Rhunmwuda, ọtiẹn Elimẹlẹk ẹre Boaz ghaa khin. (Rut 2:1, 19, 20; 3:1-4) Sokpan e Boaz rẹnrẹn wẹẹ, ọtiọnrẹn ọvbehe rrọọ nọ sikẹ Elimẹlẹk sẹ. E Baibol ma sunu ye eni enene okpia. Okpia nii ẹre ọ khian ghi tae, deghẹ irẹn gha hoo ne irẹn dẹ otọ nii werriegbe.—Rut 3:9, 12, 13.

Vbe okaro, okpia nii te wa mu egbe nọ ya ru iyobọ. (Rut 4:1-4) Agharhemiẹn wẹẹ, igho ọrhẹnrhẹn ẹre ọ khian zẹ ye otọ nii, ọ rẹnrẹn wẹẹ, e Naomi i khian ghi sẹtin biẹ ọmọ nọ gha rri otọ nii vbe ukhu, rhunmwuda ọ khian ọmaẹn nẹ. Okpia na ghee ẹre wẹẹ, igho irẹn ma gbe, rhunmwuda te otọ nii khian ghi khian ọghẹe vberriọ.

Sokpan okpia na ghi miẹn wẹẹ, e Rut rre otọ ne irẹn khian rhie, ọ na ghi wẹẹ, irẹn i ghi kun. Ọ na ghi kha wẹẹ: “Mẹ i khian ru vberriọ, rhunmwuda ọ gha rhie ma ighẹ ivbi mwẹ i khian sẹtin rri ọre vbe ukhu.” (Rut 4:5, 6) Vbọzẹ nọ na fi ekhọe werriẹ?

Okpia na ra ọmwa ọvbehe gha rhie Rut, ọ na ghi biẹ ọmọ okpia, ọmọ nii ẹre ọ khian ghi rri otọ ọghe Elimẹlẹk vbe ukhu. De vbene ọna khian ghi ya mu arevbukhu ọghe okpia na rhia hẹ? Agharhemiẹn wẹẹ e Baibol ma tama ima, sokpan gi ima guan kaẹn odẹ eso ne ọna gha ya sẹtin sunu.

• Okaro igho ne okpia nii zẹ ye otọ nii sẹtin wa la evba, rhunmwuda otọ nii i khian ghi gha re ọghẹe. Ọmọ okpia ne Rut biẹ ẹre ọ khian ghi rri otọ nii vbe ukhu.

• Nogieva, irẹn ẹre ọ khian ghi gha gbaroghe Naomi kevbe Rut.

• Nogieha, emọ ne Rut biẹ ne okpia na kevbe emọ ne okpia na mwẹ ọ ke rhie Rut rọnmwẹ, ẹre ọ khian gba ghae ukhu ne okpia na mwẹ.

• Nogienẹ, adeghẹ e Rut ọkpa ẹre ọ biẹ ne okpia na, ọmọ nii na vbe gha re okpia, ọmọ nii ẹre ọ khian rri ukhu Elimẹlẹk kevbe ọghe okpia na. Rhunmwuda ọni, ọ gha ghi wu, ọmọ nọ khuẹnniẹn eni Elimẹlẹk ẹre ọ khian ghi rri otọ ẹre vbe ukhu, nọ gha te ya gha re ovbi irẹn. Okpia na ma mu egbe nọ ya ru iyobọ ne Naomi, rhunmwuda ọ ma hoo ne arevbukhu ọghe irẹn wii irẹn. Ọ na ghi wẹẹ ne Boaz dẹ otọ nii werriegbe, rhunmwuda e Boaz ẹre ọ ghi zẹ lele irẹn vbe ẹgbẹe nii. E Boaz keghi ru vbene okpia nii khare, “nọ miẹn ehe na gha gbaroghe emwi ọmwa nọ wu nii vbe uwu ẹgbẹe ọre.”—Rut 4:10.

Ọghe enegbe ẹre ọkpa ẹre okpia nii wa gha mu roro, rhunmwuda ọ ma hoo ne eni irẹn kevbe arevbukhu ọghe irẹn wii. Vbene okpia na hia sẹ ne eni irẹn ghẹ wii, a ma ye rẹn eni na tie ẹre do fi ebanban. Ọ keghi ya obọ ẹre mu afiangbe nọ gha te sẹ ọre obọ fua. Uniẹn ọghe Boaz ẹre Mẹzaia, nọ re Jesu Kristi ghi la rre. U miẹn uyi nọkhua ne okpia na mu fua, rhunmwuda wẹẹ, ẹi mwẹ ekhọe na ya ru iyobọ ne emwa ọvbehe!—Mat 1:5; Luk 3:23, 32.