1-2. Vbọ mobọ sunu vbe emwa ghaa dinmwiamẹ, de emwi ne ima khian ziro yan vbe ako iruẹmwi na?

 ARO ruẹ he sẹ ọre ẹdẹ vbe emwa ghaa dinmwiamẹ ra? Ẹi mwẹ aro ruẹ ma dae wẹẹ, oyaya ẹre iran ya rhie ewanniẹn ye inọta eva na nọ iran re. Deba ọni, ẹgbẹe iran kevbe avbe ọse iran ghi wa gha ghọghọ. Etẹn na gha ghi wa ke uwu amẹ ladian, ọyẹnmwẹ ghi wa gha sẹ iran, etẹn nikẹre ghi vbe gha kpe obọ ne iran. A gha muẹn ye omwa, emwa arriaisẹn nibun ẹre ọ ya egbe iran fiohan ne Osanobua vbe uzọla uzọla, iran ghi vbe dinmwiamẹ zẹvbe ọkpa vbe Osẹe Jehova.

² Uwẹ vbe vbo? Adeghẹ u hoo ne u dinmwiamẹ, te u yevbe ukpa nọ baa vbe agbọn dan na, rhunmwuda, u hoo ne u ‘ga e Jehova.’ (Psm 14:1, 2) Ọre igbama ẹre u khin ra enọwanrẹn, ako iruẹmwi na gha wa ru iyobọ nuẹn. Sokpan, nọ ne ima ni dinmwiamẹ nẹ, ma hoo ne ima ga e Jehova uhiẹn ya fi etẹbitẹ. Nọnaghiyerriọ, wa gi ima ziro yan eha vbe usun emwi nọ ya ima ga e Jehova.

3. Vbọzẹ ne ẹmwata kevbe emwi esi na yẹẹ eguọmwadia e Jehova? (Psalm 119:128, 163)

³ E Jehova keghi tama emwa rẹn ne iran “hoẹmwẹ ẹmwata.” (Zẹk 8:19) E Jesu vbe rhie igiọdu ne erhuanegbe ẹre ne iran gha ru emwi esi. (Mat 5:6) Ọna rhie ma wẹẹ, ọ khẹke ne ima gha re emwa ne emwi esi na ru yẹẹ vbe ẹghẹ hia kevbe ni huanrẹn vbe odaro Osanobua. Ọmwa ne ẹmwata kevbe ne emwi esi na ru yẹẹ ẹre u khin ra? Ọmwa vberriọ ẹre ọ khẹke ne u gha khin. Ọ khẹke ne ohoghe kevbe emwi dan gha sọnnọ ruẹ. (Tie Psalm 119:128, 163.) Ọmwa ghaa ta ohoghe te ọ ya egbe taa Esu, nọ re ọmwa nọ kha yan agbọn na. (Jọn 8:44; 12:31) Ọkpa vbe usun emwi ne Esu wa rhiegba yi, ọre nọ gha ta ohoghe khian, nọ ya sa ọrho ye eni e Jehova. Ke ẹghẹ ne Setan ya sọtẹ vbe ogba ọghe Idẹni, ẹre ọ ya suẹn gha ta ohoghe khian vbekpa Osanobua. Esu kegha hoo ne emwa gha roro ẹre wẹẹ, Osa nọ rẹn ọghe enegbe ẹre ọkpa, nọ  ta ohoghe kevbe nọ ma hoo ne agbọn maan emwa nagbọn ẹre Jehova khin. (Gẹn 3:1, 4, 5) Rhunmwuda ohoghe ne Esu ta khian vbekpa e Jehova, te emwa ghi roro ẹre wẹẹ, ọmwa dan ẹre Jehova gele khin. Esu gha wa miẹn emwa ne ẹmwata i yẹẹ, ọ sẹtin ya iran khian emwa ni ghi fuẹn vbe uwu uyinmwẹ dan.—Rom 1:25-31.

4. De vbene Jehova ya rhie ẹre ma hẹ wẹẹ, irẹn ọre “Osa ọghe ẹmwata”? (Ghee efoto nọ rre ipapa 3.)

⁴ E Jehova ọre “Osa ọghe ẹmwata,” erriọ vbe ya ru iyobọ ne emwa ni hoẹmwẹ ọnrẹn, ne iran mieke na do rẹn odẹ ẹmwata. (Psm 31:5) Odẹ vbenian, ẹre Jehova ya ru iyobọ ne emwa rẹn, nọ zẹe ighẹ Esu ma sẹtin ya ohoghe bibi iran odẹ. E Jehova vbe ma ima re, ne ima gha re emwa esi kevbe ni ta ẹmwata. Ọna ẹre ọ si ẹre ne ima i na mu ẹkpẹn ne egbe ima fua, kevbe ne orhiọn ima na vbe sotọ. (Itan 13:5, 6) E Jehova he ru iyobọ vbenian nuẹn zẹvbe ne u ya gha ruẹ e Baibol ra? U ruẹ ọre nẹ wẹẹ, ilele ọghe Jehova ẹre ọ khian sẹtin ya agbọn maan emwa nagbọn ya sẹ egbe uwẹ tobọ uwẹ. (Psm 77:13) Rhunmwuda ọni, u hoo ne u gha ru emwi nọ yẹẹ Osanobua. (Mat 6:33) U hoo ne u gi emwa rẹn ẹmwata vbekpa Osanobua, ne iran vbe rẹn wẹẹ, ọmwa ohoghe ẹre Esu khin. Vbua khian ya sẹtin ru ọna hẹ?

5. Vbua khian ya rhie ẹre ma hẹ wẹẹ, ẹmwata kevbe emwi esi na ru yẹẹ ruẹ?

⁵ Ọ khẹke ne odẹ ne u ya loo ẹdagbọn ruẹ gha rhie ẹre ma wẹẹ, u ma yaeyi ohoghe ne Esu ta khian vbekpa e Jehova, kevbe wẹẹ, u hoo ne u sinmwi oseghe ne Jehova. Ọ vbe khẹke ne u gha ru emwi nọ yẹẹ e Jehova, ne u ya rhie ẹre ma wẹẹ, irẹn ẹre u hoo nọ gha kha yan ruẹ. Sokpan de vbene u khian ya sẹtin rhie ẹre ma hẹ wẹẹ, obọ ọghe Jehova ẹre u ye? U ghi na erhunmwu gie Jehova, vbe erhunmwu nii, u ghi ya ẹdagbọn ruẹ fiohan nẹẹn. U ghi vbe dinmwiamẹ ne u ya rhie ẹre ma vbe idagbo wẹẹ, u ya egbuẹ fiohan ne Jehova nẹ. Adeghẹ u na gi ẹmwata kevbe emwi esi na ru gha yẹẹ ruẹ, ọ gha gua ruẹ kpa ya dinmwiamẹ.

6. De emwi eso nọ rre ebe Psalm 45:4, nọ ya ima hoẹmwẹ e Jesu Kristi?

⁶ Vbọzẹ ne ima na hoẹmwẹ e Jesu Kristi? Ebe Psalm 45:4 wa guan kaẹn emwi eso nọ ya ima hoẹmwẹ e Jesu. (Tie ẹre.) Ọmwa ne ẹmwata yẹẹ ẹre Jesu khin, erriọ vbe ya mu egbe rriotọ, emwi esi na ru wa vbe yẹẹ ọre. Adeghẹ ẹmwata kevbe emwi esi na ru vbe yẹẹ ruẹ, ọni rhie ma wẹẹ, u hoẹmwẹ e Jesu Kristi. Te Jesu wa ya udinmwẹ sẹ osẹ ye ẹmwata, erriọ vbe ya  rhiegba ye emwi esi na ru. (Jọn 18:37) Sokpan, de vbene Jesu ya rhie ẹre ma hẹ wẹẹ, ọmwa nọ mu egbe rriotọ ẹre irẹn khin?

7. Vbọ mobọ mu ruẹ ekhọe vbe odẹ ne Jesu ya mu egbe rriotọ?

⁷ Uyinmwẹ ọghe Jesu gele rhie ẹre ma wẹẹ, ọmwa nọ mu egbe rriotọ ẹre nọ. Vbe igiemwi, ẹghẹ ọkpa ma gha rrọọ ne Jesu ya rhie uyi gie egbe ẹre, Erhae ẹre ọ wa gha rhie uyi na. (Mak 10:17, 18; Jọn 5:19) Vbọ ye ruẹ hẹ vbe ekhọe ne u na rẹn wẹẹ, e Jesu mu egbe rriotọ vbenian? Vbene ẹmwata, imuegberriotọ ọghe Jesu wa ya ima hoẹmwẹ ọnrẹn, ma vbe hoo ne ima gha lele ukpowẹ ọghẹe. Vbọzẹ ne Jesu na mu egbe rriotọ? Rhunmwuda, Erhae vbe mu egbe rriotọ, e Jesu wa hoẹmwẹ Erhae, ọ vbe hoo nọ gha ya egba taa ẹre. (Psm 18:35; Hib 1:3) Ma wa vbe hoo ne ima gu obọ e Jesu, rhunmwuda, vbene Erhae wa ya ru emwi, erriọ irẹn vbe ya ru emwi zẹẹ.

8. Vbọzẹ ne ima na hoẹmwẹ e Jesu zẹvbe Ọba ọghomwa?

⁸ Ma wa hoẹmwẹ e Jesu zẹvbe Ọba ọghomwa, rhunmwuda, irẹn ọre Ọba nọ ghi maan sẹ. E Jehova tobọre ẹre ọ ma e Jesu emwi, irẹn ẹre ọ vbe hannọ ọnrẹn zẹ nọ gha re Ọba. (Aiz 50:4, 5) Gele muẹn roro, ẹghẹ hia ẹre Jesu ya gha rhie ẹre ma wẹẹ, irẹn ya ekhọe hia hoẹmwẹ emwa ọvbehe. (Jọn 13:1) Ọ khẹke ne ima hoẹmwẹ e Jesu, rhunmwuda, irẹn ọre Ọba ọghomwa. E Jesu khare wẹẹ, emwa ni hoẹmwẹ irẹn ọre ọse irẹn. Odẹ ne iran khian ya rhie ẹre ma wẹẹ, iran gele hoẹmwẹ e Jesu ọre ne iran gha lele iyi ọghẹe. (Jọn 14:15; 15:14, 15) U miẹn egie ne ima ye, ne ima na re ọse ọghe Ovbi e Jehova!

9. De vbene idinmwiamẹ ọghe Ivbiotu e Kristi ya khọ ọghe Jesu hẹ?

⁹ Ọkpa vbe iyi ne Jesu yi ne erhuanegbe ẹre, ọre ne iran dinmwiamẹ. (Mat 28:19, 20) E Jesu ma wa yi iyi na kẹkan, te ọ wa vbe rhie igiemwi esi yotọ. Odẹ eso rrọọ ne idinmwiamẹ ọghe Jesu ya lughaẹn ne ọghe erhuanegbe ẹre. (Ya ghee ẹkpẹti na, “ Vbene Idinmwiamẹ Ọghe Jesu Ya Lughaẹn Ne Ọghe Ivbiotu E Kristi Hẹ.”) Sokpan, odẹ eso vbe rrọọ ne iran ya khọ egbe. Te Jesu dinmwiamẹ nọ ya rhie ẹre ma wẹẹ, ahoo ọghe Erha irẹn ẹre irẹn do ru. (Hib 10:7) Erriọ vbe ye vbe ẹdẹnẹrẹ, te erhuanegbe Jesu dinmwiamẹ, ne emwa mieke na rẹn wẹẹ, iran ya egbe iran fiohan ne Jehova nẹ. Ọghe Jehova ẹre iran ghi mu karo, ẹi re ọghe enegbe iran. Nọnaghiyerriọ, ukpowẹ ọghe Jesu ne Arowa iran, ẹre iran lele.

10. Vbọzẹ nọ na khẹke ne ahoẹmwọmwa ne ima mwẹ ne Jesu gua ima kpa ya dinmwiamẹ?

¹⁰ U ya ekhọe hia yayi wẹẹ, e Jesu ọre ukpọmọkpa ọghe Jehova, ẹko vbe sẹ ruẹ ọyẹnmwẹ rhunmwuda, irẹn ẹre Jehova zẹ nọ gha re Ọba ọghomwa. U vbe rẹn wẹẹ, e Jesu mu egbe rriotọ kevbe wẹẹ, vbene Erhae ya ru emwi, erriọ vbe ya ru emwi zẹẹ. U vbe ruẹ ọre wẹẹ, e Jesu rhie evbare ne emwa ne ohanmwẹ ghaa gbe, ọ rhie ifuẹko ne emwa ni iro han rẹn, ọ na vbe mu emwa ni khuọnmwi egbe rran. (Mat 14:14-21) U vbe bẹghe vbene ọ ya su iko ọghe Ivbiotu e Kristi hẹ vbe ẹdẹnẹrẹ. (Mat 23:10) U wa vbe mwẹ ilẹkẹtin wẹẹ, zẹvbe Ọba ọghe Arriọba Osanobua, e Jesu gha ru enọ sẹ ena ne ima vbe odaro. Vbua khian ya rhie ẹre ma hẹ wẹẹ, u hoẹmwẹ e Jesu? U ghi gha ya egbe taa ẹre. (Jọn 14:21) U gha sẹtin ru ọna, adeghẹ u na ya egbuẹ fiohan ne Jehova, u na vbe dinmwiamẹ.

11. De emwi nọ wa mobọ zẹe ne ima na dinmwiamẹ, vbua gu kha vberriọ?

¹¹ De emwi nọ wa mobọ zẹe ne ima na dinmwiamẹ? E Jesu gi ima rẹn iyi ọghe Osanobua nọ ghi ru ekpataki sẹ, ọ khare wẹẹ: “Te u gha vbe ya otọ ẹko ruẹ hia, arrọọ ruẹ hia, ekhọe ruẹ hia kevbe ẹtin ruẹ hia hoẹmwẹ e Jehova ne Osanobua ruẹ.” (Mak 12:30) Uwẹ gele hoẹmwẹ e Jehova vbenian ra?

12. Vbọzẹ ne ima na hoẹmwẹ e Jehova? (Ghee efoto nọ rre ipapa 6.)

¹² Emwi nibun wa rrọọ nọ ya ima hoẹmwẹ e  Jehova. Vbe igiemwi, u ruẹ ọre nẹ wẹẹ, obọ e Jehova ọre “arrọọ hia ke rre” kevbe wẹẹ, “ẹse nọ maan hia kevbe ọhẹ hia nọ gbae” obọ ọre ẹre ọ ke rre. (Psm 36:9; Jems 1:17) Emwi hia fẹẹrẹ ne ima ghi sọyẹnmwẹ ọnrẹn nẹ, e Jehova ne Osa nọ mwẹ ahoẹmwọmwa kevbe nọ zẹ emwi obọ, ẹre ọ yae ru ima ẹse.

13. Vbọzẹ ne izọese adẹwerriegbe na re ẹse ọhẹ nai miẹn egbọre?

¹³ Ma gha zẹ unu ga egbe, ẹi sẹ ima ya kpọnmwẹ e Jehova nọ na gie Ovbi ẹre gha dee nọ do wu ne ima. Vbe ima gu kha vberriọ? Muẹn roro, te Jehova vbe Jesu wa kakabọ gu obọ egbe. Uhiẹn e Jesu khare wẹẹ: “Evbavba hoẹmwẹ mwẹ,” ọ na vbe kha wẹẹ, “I hoẹmwẹ Evbavba.” (Jọn 10:17; 14:31) Vbe ọwara ukpo nibun ẹre iran eva ya gha rrọọ kugbe, rhunmwuda ọni, te iran eva wa kakabọ sikẹ egbe. (Itan 8:22, 23, 30) Nian, muẹn roro vbe nọ gha da e Jehova hẹ, vbe ọ ghee Ovbi ẹre zẹvbe nọ ya gha rri oya, iyeke ọni, a na vbe gbe ẹre rua. E Jehova hoẹmwẹ emwa nagbọn kevbe uwẹ tobọ uwẹ, sẹrriọ wẹẹ, ọ na gie Ovbi ẹre gha dee, nọ do wu nuẹn, ne uwẹ kevbe emwa nagbọn nikẹre sẹtin gha mwẹ arrọọ ọghe etẹbitẹ. (Jọn 3:16; Gal 2:20) Vbọ ghi zẹe ne ima i khian na hoẹmwẹ Osanobua?

14. De odẹ nọ ghi maan sẹ ne ima gha ya sẹtin loo ẹdagbọn ima?

¹⁴ Zẹvbe ne u ya gha ruẹ emwi vbekpa e Jehova, u na vbe gha hoẹmwẹ ọnrẹn sayọ. Vbene ẹmwata, u wa hoo ne u gha re ọsie Osanobua ke ẹghẹ na ya fi etẹbitẹ. U gha gele sẹtin ru vberriọ.  Ọ rhie igiọdu nuẹn, ne u gha ru emwi nọ gha ya irẹn gha sọyẹnmwẹ. (Itan 23:15, 16) Ẹi re ẹmwẹ ne unu ọkpa ẹre ọ khẹke ne ima ya gha ru ọna, ọ khẹke nọ vbe gha rhie egbe ma vbe uyinmwẹ ima. Ọ khẹke nọ gha rhie egbe ma vbe ẹdagbọn ima wẹẹ, ima gele hoẹmwẹ e Jehova. (1 Jọn 5:3) Ọna ọre odẹ nọ ghi maan sẹ, ne ima gha ya sẹtin loo ẹdagbọn ima.

15. De vbene u khian ya rhie ẹre ma hẹ wẹẹ, u hoẹmwẹ e Jehova?

¹⁵ Vbua khian ya rhie ẹre ma hẹ wẹẹ, u hoẹmwẹ e Jehova? Vbe okaro, u ghi na erhunmwu gie ẹre, vbe erhunmwu nii, u ghi ya egbuẹ fiohan nẹẹn. (Psm 40:8) Iyeke ọni, u ghi dinmwiamẹ, ne u ya rhie ẹre ma vbe idagbo wẹẹ, u ya egbuẹ fiohan ne Jehova nẹ. Zẹvbe ne ima ka tae sin, ẹdẹ oghọghọ ẹre ẹdẹ na dinmwiamẹ khin, ẹdẹrriọ wa kakabọ ru ekpataki. Ke ẹdẹ ne ẹdẹrriọ kpa, ọghe Jehova ẹre u khian ghi gha mu ye okaro, ẹi re ọghe enegbe ruẹ. (Rom 14:8; 1 Pit 4:1, 2) U sẹtin gha roro ẹre wẹẹ, ẹi khuẹrhẹ na do sẹtin zẹ owẹ vberriọ. Vbene ẹmwata, ẹi gele khuẹrhẹ. Sokpan, u gha dinmwiamẹ, afiangbe ne u khian lae miẹn i gia gie. Vbe ima gu kha vberriọ?

16. Zẹvbe nọ rre ebe Psalm 41:12, de vbene Jehova khian ya fiangbe emwa ni ya ẹdagbọn iran gae?

¹⁶ Osa nọ zẹ emwi obọ ẹre Jehova khin. Emwi ke emwi ne ima rhie ne Jehova, ọ gha khian rhie ne ima werriegbe, ọ ghi rhie ba ẹre. (Mak 10:29, 30) Agharhemiẹn wẹẹ, agbọn ọwiẹyi ẹre ima ye, e Jehova gha ru iyobọ nuẹn ya gha sọyẹnmwẹ ẹdagbọn ruẹ, ẹkun ghi vbe sẹ ruẹ otọ. Sokpan, ọ ma fo ye evba. Okhian ne ima suẹn rẹn vbe ẹdẹ ne ima dinmwiamẹ i mwẹ ufomwẹ. Ke etẹbitẹ ya sẹ etẹghori, te ima khian ye gha ga Erha mwa ighẹ e Jehova. Erriọ ahoẹmwọmwa ne ima mwẹ nẹẹn khian vbe ya gha wegbe sayọ. Vbe na ghee Jehova, ma ghi vbe gha rrọọ vbe etẹbitẹ.—Tie Psalm 41:12.

17. De emwi ne ima khian sẹtin rhie ne Jehova ne irẹn i mwẹ?

¹⁷ U gha ya egbuẹ fiohan ne Jehova, u na vbe dinmwiamẹ, ẹkpotọ ghi do kie nuẹn ya rhie emwi ọkpa ne kpataki ne Jehova. Ẹi re avbiẹ emwi e Jehova he ru ne ima, emwi hia fẹẹrẹ ne ima sọyẹnmwẹ ọnrẹn, obọ ọre ẹre ọ ke rre. Sokpan, ọ mwẹ emwi ne ima gha sẹtin rhie ne Jehova nọ re Osa nọ yi agbọn yi ẹrinmwi ne irẹn i mwẹ, ọni ọre  ugamwẹ ne ima ya ekhọe hia rhie nẹẹn. (Job 1:8; 41:11; Itan 27:11) Odẹ ọvbehe rrọọ nọ maan sẹ ọna, ne ima gha ya sẹtin loo ẹdagbọn ima ra? Vbe nai na gbawawẹ, ahoẹmwọmwa ne u mwẹ ne Jehova ẹre ọ khẹke nọ gha re emwi okaro, nọ khian gua ruẹ kpa ya dinmwiamẹ.

18. De inọta eso nọ khẹke ne u nọ egbuẹ re?

¹⁸ Uwẹ mu egbe ne u khian ya dinmwiamẹ ra? Uwẹ ọkpa ẹre ọ khian sẹtin zẹ ewanniẹn ye inọta na. Sokpan, u sẹtin ka nọ egbuẹ wẹẹ, ‘Vbia ye khẹ?’ (Iwinna 8:36) Ghẹ mianmian emwi eha ne ima guan kaẹn vbe ako iruẹmwi na. Nokaro, ọ khẹke ne ẹmwata kevbe emwi esi na ru gha yẹẹ ruẹ. Nọ egbuẹ wẹẹ, ‘Mẹ hoo ne I gha rre agbọn na, vbe ẹghẹ ne emwa hia khian ya gha ta ẹmwata, iran ghi vbe gha ru emwi esi ra?’ Nogieva, ọ khẹke ne u hoẹmwẹ e Jesu Kristi. Nọ egbuẹ wẹẹ, ‘Mẹ hoo ne Ovbi Osanobua gha re Ọba ọghomwẹ ra, mẹ vbe lele igiemwi ọghẹe ra?’ Nogieha, nọ ghi wa sẹ ehia ọre wẹẹ, ọ khẹke ne u hoẹmwẹ e Jehova. Nọ egbuẹ wẹẹ, ‘Mẹ ya ekhọe hia ga e Jehova, ne ẹko mieke na gha rhiẹnrhiẹn ọnrẹn ra?’ Adeghẹ ẹn, ọre ewanniẹn ne u zẹ ye avbe inọta na, vbọ ghi zẹ ne u ma na he ye dinmwiamẹ? Vbọzẹ ne u na si egbe?—Iwinna 16:33.

19. Vbọzẹ nọ ma na khẹke ne u gi emwi rhọkpa si ruẹ ghee iyeke ne u ghẹ dinmwiamẹ? Ru igiemwi yọ. (Jọn 4:34)

¹⁹ Adeghẹ u ma he ye hoo ne u dinmwiamẹ, ẹmwẹ ne Jesu tae gha wa ru iyobọ nuẹn. (Tie Jọn 4:34.) E Jesu keghi ya ahoo ọghe Erhae ya gie evbare. Vbọzẹ? Rhunmwuda evbare wa maan vbe egbe ima. E Jesu rẹnrẹn wẹẹ, emwi ke emwi ne Jehova wẹẹ ne ima ru, nọ gha ya agbọn maan ima ẹre nọ. E Jehova ma hoo ne ima ru emwi ke emwi nọ gha si ikuanegbe ne ima. Sokpan, e Jehova gele hoo ne u dinmwiamẹ ra? Ẹẹn. (Iwinna 2:38) Nọnaghiyerriọ, gha mwẹ ilẹkẹtin wẹẹ, u gha dinmwiamẹ, u gha wa miẹn afiangbe nibun. A gha mu evbare ne rọgiọ ye odaro ruẹ ne u re, ẹre te u khian de yan evbare nii vbobọvbobọ? Nọnaghiyerriọ, ghẹ gi emwi rhọkpa si ruẹ ghee iyeke ne u ghẹ dinmwiamẹ.

20. De emwi ne ima khian ziro yan vbe ako iruẹmwi nọ ghi lele ọna?

²⁰ Vbọzẹ ne u na ye si egbe? Emwa eso sẹtin kha wẹẹ, “I ma he mu egbe.” Vbene ẹmwata, azẹ nọ ghi ru ekpataki sẹ, ne u gha ru vbe ẹdagbọn ruẹ, ọre ne u ya egbuẹ fiohan ne Jehova, ne u vbe dinmwiamẹ. Nọnaghiyerriọ, ọ khẹke ne u kakabọ muẹn roro, u ke ru azẹ vbenian, rhunmwuda, ọ gha rhie ẹghẹ u ke sẹtin gbegba, te u khian vbe loo ẹrhiọn yọ. Sokpan, adeghẹ u gele hoo ne u dinmwiamẹ, de emwi eso ne u gha ru, ne u ya mu egbe yotọ? Ma gha zẹ ewanniẹn ye inọta na, vbe ako iruẹmwi nọ ghi lele ọna.