1-2. Adeghẹ u ma he ye gbegba nọ gha dinmwiamẹ, vbọzẹ nọ ma na khẹke ne u gi egbe wọọ ruẹ? (Ghee efoto nọ rre odaro ebe na.)

 ADEGHẸ ọ rrọọ ruẹ orhiọn ne u dinmwiamẹ, emwi esi ẹre u hoo ne u ru. Uwẹ mu egbe nẹ nian, ne u ya dinmwiamẹ ra? Adeghẹ u mu egbe nẹ, avbe ediọn na vbe kpasẹ yọ, ghẹ gi emwi rhọkpa si ruẹ ghee iyeke, rhunmwuda, u gha wa miẹn afiangbe nibun zẹvbe ne u ya ga e Jehova.

² Ọmwa rhọkpa he tama ruẹ wẹẹ, ọ mwẹ emwi eso nọ ye khẹke ne u ru, u ke dinmwiamẹ ra? Ra uwẹ tobọ ruẹ ẹre ọ bẹghe ẹre wẹẹ, ọ mwẹ ako eso nọ na khẹke ne u gha mwẹ alaghodaro ra? Ọ ghaa yerriọ, ghẹ gi egbe wọọ ruẹ. U gha sẹtin zẹ owẹ nọ khẹke, ne u mieke na sẹtin dinmwiamẹ, ọ gha khọnrẹn ne u gha re igbama ra enọwanrẹn.

3. De inọta ne Ovbi Ẹtiopia ne ọka iwinna nọ e Filip re? De inọta ọvbehe nọ khẹke na zẹ ewanniẹn yi? (Iwinna 8:36, 38)

³ Tie Iwinna 8:36, 38. Ovbi Ẹtiopia ne ọka iwinna keghi nọ e Filip wẹẹ: “De emwi nọ gha da mwẹ yi ne I ghẹ dinmwiamẹ?” Te okpia na wa gha hoo nọ dinmwiamẹ, sokpan, ọ gele gbegba ra?

4. De vbene Ovbi Ẹtiopia na, ya rhie ẹre ma wẹẹ, irẹn hoo ne irẹn rẹn emwi sayọ?

⁴ Te Ovbi Ẹtiopia na “yo e Jerusalẹm ya ga Osanobua.” (Iwinna 8:27) Ọna rhie ma wẹẹ, agharhemiẹn wẹẹ, okpia na i re Ovbi e Ju, ugamwẹ Ivbi e Ju ẹre ọ ghaa ye. Ẹi mwẹ okpia na ma he ruẹ emwi nibun vbekpa e Jehova vbe abọ ọghe Evbagbẹn Nọhuanrẹn Na Ya Urhuẹvbo Hibru Gbẹn. Ọrheyerriọ, te ọ ye gha  hoo nọ rẹn e Jehova sayọ. Vbe ẹghẹ ne Filip ya miẹn okpia na vbe odẹ, de emwi ne okpia na ghaa ru? Te ọ ghaa tie ẹmwẹ akhasẹ ọghe Aizaia. (Iwinna 8:28) Avbe imamwaemwi ni dinmwi ẹre ọ wa gha tie. Ọka iwinna na, ma gha hoo ne irẹn wa rẹn avbe imamwaemwi ni khuẹrhẹ ọkpa, te ọ wa gha hoo ne irẹn rẹn emwi sayọ.

5. De vbene Ovbi Ẹtiopia na ya rhie emwi nọ ruẹ ye uyinmwẹ hẹ?

⁵ Ọmwa kpataki ẹre okpia na wa gha khin, e Kandes ne Oloi ọghe Ẹtiopia ẹre ọ ghaa winna na, irẹn ẹre ọ ghaa “gbaroghe aza” ọghẹe. (Iwinna 8:27) Ọna rhie ma wẹẹ, okpia na wa gha mwẹ iwinna nibun nọ ghaa ru. Ọrheyerriọ, te ọ ye mwamwa ẹghẹ yọ, nọ khian ya gha ga e Jehova. Gberra wẹẹ, okpia na wa gha hoo ne irẹn rẹn ẹmwata, te ọ vbe gha rhie emwi nọ ruẹ ye uyinmwẹ. Okpia na keghi ke Ẹtiopia gha rrie Jerusalẹm nọ ya ga e Jehova vbe ọgua Osa nọ rre evba. Okhian na i re nekherhe, ọ gha gbe igho kevbe ẹghẹ. Sokpan, okpia na ma gi ena rhọkpa da irẹn obọ yi, ne irẹn ghẹ ga e Jehova.

6-7. De vbene ahoẹmwọmwa ne Ovbi Ẹtiopia na ghaa mwẹ ne Jehova ya gha wegbe sayọ?

⁶ Ovbi Ẹtiopia na wa ruẹ emwi ne kpataki nibun vbe obọ e Filip, e Filip keghi gi ẹre rẹn wẹẹ, e Jesu ọre Mẹzaia. (Iwinna 8:34, 35) Okpia na ghi do rẹn emwi ne Jesu ru ne irẹn, ọ na wa mu ẹre ekhọe. De emwi nọ ghi ru? Te okpia na gha te wẹẹ, emwi ne irẹn he ruẹ, kevbe ne irẹn na miẹn ugamwẹ Ivbi e Ju yi wa sẹ irẹn ọkẹn. Sokpan, ọ ma ru vberriọ. Rhunmwuda ne ahoẹmwọmwa nọ mwẹ ne Jehova vbe Jesu na gha wegbe yọ, ọ na ghi wẹẹ irẹn gha dinmwiamẹ zẹvbe ọrhuanegbe ọghe Jesu. E Filip ghi bẹghe ẹre wẹẹ, ọ gele wa mu egbe, ọ na ghi dinmwi ẹnrẹn ye amẹ.

⁷ Adeghẹ u na lele igiemwi ọghe Ovbi Ẹtiopia na, u gha vbe sẹtin gbegba nọ gha dinmwiamẹ. Ẹghẹ nii, u ghi vbe sẹtin ya udinmwẹ kha wẹẹ, “De emwi nọ gha da mwẹ yi ne I ghẹ dinmwiamẹ?” Te Ovbi Ẹtiopia na, wa ye gha ruẹ emwi vbekpa e Jehova, ọ na vbe gha rhie emwi nọ ruẹ ye uyinmwẹ, ahoẹmwọmwa nọ mwẹ ne Jehova na vbe gha wegbe sayọ. Gi ima ziro yan vbene u gha ya sẹtin ya egbe taa okpia na, vbe odẹ eha na.

8. De vbene ẹmwẹ nọ rre ebe Jọn 17:3 ya kaan ruẹ hẹ?

⁸ Tie Jọn 17:3. Ẹmwẹ ne Jesu tae na, rhie igiọdu nuẹn ya suẹn gha ruẹ e Baibol ra? Ọ wa rhie igiọdu ne ima nibun. Sokpan, ẹmwẹ nọ rre ako nii vbe rhie igiọdu ne ima, ne ima ye gha ruẹ emwi ra? Ẹsẹsẹmwẹse. Vbe etẹbitẹ ya sẹ etẹghori, te ima khian ye gha ruẹ emwi vbekpa e Jehova nọ re Osa ọghe ẹmwata. (Asan 3:11) Zẹvbe ne ima ya ruẹ emwi sayọ, erriọ ima khian vbe ya gha sikẹ e Jehova sayọ.—Psm 73:28.

9. Vbọ khẹke ne ima ru, vbe ima gha ghi rẹn imamwaemwi nokaro nẹ?

⁹ Ne ọmwa do sẹtin rẹn e Jehova, avbe imamwaemwi ni khuẹrhẹ, ẹre ọ khian ka rẹn. Vbe elẹta ne ukọ e Pọl gbẹn gie etẹn ni re Ivbi e Hibru, ọ na gie avbe imamwaemwi na zẹvbe “imamwaemwi nokaro.” Ẹi re te Pọl ghaa hoo nọ kha wẹẹ, avbe “imamwaemwi” na ma ru ekpataki; te ọ yae gie ewẹn ne ọmobọ wẹn, nọ yae waan. (Hib 5:12; 6:1) Sokpan, te ọ vbe gha hoo nọ rhie igiọdu ne Ivbiotu e Kristi, ne iran gha mwẹ alaghodaro, ne iran mieke na rẹn avbe imamwaemwi ni dinmwi ni rre Ẹmwẹ Osanobua. Uwẹ gele hoo ne u rẹn avbe imamwaemwi ni dinmwi ni rre Baibol ra? U vbe hoo ne u gha mwẹ alaghodaro ra, ne u mieke na gha ruẹ emwi sayọ vbekpa e Jehova kevbe emwamwa ọghẹe ra?

10. Vbọzẹ ne ebe na tie na lọghọ emwa eso?

¹⁰ Nọ ne ima nibun, te ebe na tie yevbe ẹsọn. Erriọ vbe ye ne uwẹ ra? A ma ruẹ re vbe owebe odẹ nọ khẹke na ya gha tie ebe ra? Ebe na tie yẹẹ ruẹ ra, u vbe miẹn ere vbọ ra? Ra, te uwẹ ghee ẹre wẹẹ, ẹrherhe ruẹ i sẹtin mu ebe? Ọ ghaa yerriọ, yerre wẹẹ, ẹi uwẹ ọkpa. E Jehova gha sẹtin ru iyobọ nuẹn. Ọmwa nọ gbae nọ, irẹn ẹre ọ vbe re Ọmamwaemwi nọ sẹre.

11. De vbene Jehova ya rhie ẹre ma hẹ wẹẹ, irẹn ọre “Ọmamwaemwi Nọ Sẹre”?

¹¹ E Jehova wẹẹ irẹn ọre “Ọmamwaemwi Nọ Sẹre.” (Aiz 30:20, 21) Ọmamwaemwi nọ mwẹ izinegbe, nọ mwẹ ekhọe itohan kevbe amuroro ẹre Jehova khin. Ako ne ima na hia, ẹre irẹn rhie aro tua. (Psm 130:3) Ẹi tama ima, ne ima ya ru emwi nọ rẹnrẹn wẹẹ, ima i sẹtin ru. Yerre wẹẹ, irẹn ẹre ọ yi ẹrherhe ọghe ima, ẹse ọhẹ nọ hin usi nọ ya we ima ẹre nọ. (Psm 139:14) Te Jehova yi ima, ne ima gha hoo ne ima ruẹ emwi. Ayi ọghomwa hoo ne ima gha ruẹ emwi vbe etẹbitẹ, kevbe ne ima vbe gha sọyẹnmwẹ ọnrẹn. Nọnaghiyerriọ, ọ khẹke ne ima “gi ohanmwẹ” ọghe ẹmwata ni rre Baibol gha gbe ima. (1 Pit 2:2) Fian okhuo ne u rẹnrẹn wẹẹ, u gha sẹtin mu sẹ ne egbuẹ, u ghi vbe mwamwa ẹghẹ yọ, ne u khian ya gha tie Baibol. (Jọs 1:8) Vbe ẹtin e Jehova, u ghi do gha sọyẹnmwẹ e Baibol na tie, ọ ghi vbe gha yẹẹ ruẹ ne u gha ruẹ vbekpa Jehova sayọ.

12. Vbọzẹ nọ na khẹke ne ima gha tie vbekpa ẹdagbọn ọghe Jesu?

¹² Gha muẹn roro vbe ẹghẹ hia, ẹdagbọn ọghe Jesu Kristi. Adeghẹ ima hoo ne ima sẹtin gha ga e Jehova, katekate vbe ẹghẹ nọ wegbe ne ima ye na, ọ khẹke ne ima gha ya egba taa e Jesu. (1 Pit 2:21) E Jesu keghi tama erhuanegbe ẹre wẹẹ, iran gha miẹn ọlọghọmwa. (Luk 14:27, 28) Ọrheyerriọ, te ọ ye gha mwẹ ilẹkẹtin wẹẹ, iran gha musọe zẹvbe ne irẹn vbe ru ẹre. (Jọn 16:33) Hia ne u gha tie vbekpa ẹdagbọn ọghe Jesu, u ghi vbe hia ne u gha ya egbe taa ẹre vbe ẹdẹgbegbe.

13. Vbọ khẹke ne u gha nọ e Jehova re, vbọzẹ?

¹³ Adeghẹ ima na gha mwẹ irẹnmwi, ọ ma wa fo ye evba. Ọ khẹke ne irẹnmwi nii gua ima kpa, ya gha hoo ne ima rẹn vbekpa e Jehova sayọ, ne ahoẹmwọmwa ne ima mwẹ nẹẹn kevbe amuẹtinyan ọghomwa vbe gha wegbe yọ. (1 Kọr 8:1-3) Zẹvbe ne u ya ruẹ emwi sayọ, gha rinmwian e Jehova nọ ru iyobọ nuẹn, ne amuẹtinyan ọghuẹ gha wegbe yọ. (Luk 17:5) E Jehova wa họn egbe erhunmwu vbenian. Ma ghaa mwẹ amuẹtinyan, ma na vbe gha mwẹ irẹnmwi nọ gbae ọghe Osanobua, ọ gha ru iyobọ ne ima ya gha mwẹ alaghodaro.—Jems 2:26.

14. De vbene ukọ e Pita ya rhan otọ re hẹ wẹẹ, ọ khẹke ne ima gha rhie emwi ne ima ruẹ ye uyinmwẹ? (Ghee efoto nọ rre ipapa 11.)

¹⁴ Ukọ e Pita wa rhan otọ evbọzẹe nọ na khẹke ne Ivbiotu e Kristi gha rhie emwi ne iran ruẹ ye uyinmwẹ. Ọ keghi guan kaẹn okha ọghe Noa. E Jehova keghi tama e Noa wẹẹ, irẹn gha  ya okpamẹ fuẹn emwa dan ni ghaa rrọọ vbe ẹghẹ nii. Sokpan, agharhemiẹn wẹẹ e Noa rẹn ọnọna, ọ ma sẹ nọ gha miẹn irẹn vbe ẹgbẹe ọre fan. E Pita gi ima rẹn wẹẹ, vbene amẹ nii te suẹn gha rhọọ, ẹre Noa vbe ẹgbẹe ọre “ya gha ka okọ.” (1 Pit 3:20) Odẹ vbenian, ẹre Noa vbe ẹgbẹe ọre ya rhie emwi ne iran ruẹ re ye uyinmwẹ. (Hib 11:7) E Pita keghi ya emwi ne Noa ru na, ya gie idinmwiamẹ, ọ khare wẹẹ: “Idinmwiamẹ nọ miẹn uwa fan nian, ẹre a ya gie emwi nọ sunu vbe ẹghẹ nii.” (1 Pit 3:21) Nọnaghiyerriọ, a gha sẹtin ya iwinna ne uwa ru nian, ne uwa ya mu egbe yotọ khẹ idinmwiamẹ, ya gie iwinna ne Noa vbe ẹgbẹe ọre ru, vbe ọwara ukpo nibun ne iran ya gha ka okọ. De emwi eso nọ khẹke ne u ru, ne u mieke na gbegba nọ gha dinmwiamẹ?

15. De vbene ima khian ya rhie ẹre ma hẹ wẹẹ, ma gele roro iro fi uyinmwẹ werriẹ?

¹⁵ Ọkpa vbe usun emwi nọ khẹke ne u ru, ọre ne u roro iro fi uyinmwẹ werriẹ. (Iwinna 2:37, 38) Ma gha gele fi werriẹ, ọ ghi rhie egbe ma vbe uyinmwẹ ima. Uwẹ sẹ avbe uyinmwẹ ni sọnnọ e Jehova rae nẹ ra, vbe na ghee uyinmwẹ alama oghẹ, itaba na si, ẹmwẹ ekpọ na ta, kevbe ihẹn na tie? (1 Kọr 6:9, 10; 2 Kọr 7:1; Ẹfis 4:29) Adeghẹ u ma he ru vberriọ, hia ne u mu avbe uyinmwẹ vberriọ fua. Tama ọmwa nọ ma ruẹ emwi, ra ọkpa vbe ediọn ni rre iko ne u ye ne iran ru iyobọ nuẹn. Adeghẹ ọvbokhan ẹre u khin, kevbe wẹẹ, u ye rre owa evbibiẹ ruẹ, tama iran ne iran ru iyobọ nuẹn ne u sẹtin ban uyinmwẹ dan, ne u mieke na sẹtin gbegba nọ gha dinmwiamẹ.

16. De emwi eso nọ khẹke ne ima ru, ne ima mieke na sẹtin rhie egbe ye ugamwẹ e Jehova?

¹⁶ Ọ wa vbe khẹke ne u rhie egbe ye ugamwẹ e Jehova. Ọni nọ wẹẹ, u ghi gha yo iko vbe ẹghẹ hia, u vbe gha zẹ ewanniẹn. (Hib 10:24, 25) Adeghẹ a kpasẹ yọ ne u gha ladian vbe ikporhu, ghẹ yae rhẹghẹrẹ hiehie. Zẹvbe ne u ya ladian vbe ikporhu, u ghi gha sọyẹnmwẹ ọnrẹn sayọ. (2 Tim 4:5) Adeghẹ ọvbokhan ẹre u khin kevbe wẹẹ, u ye gu evbibiẹ ruẹ rre owa, nọ egbuẹ wẹẹ: ‘Evbibiẹ mwẹ ẹre ọ ye mwẹ ẹre rre, ne I mu egbe iko ra ikporhu ra? Ra imẹ ẹre ọ zẹ owẹ nokaro?’ Adeghẹ uwẹ ẹre ọ zẹ owẹ nokaro, te u rhie ẹre ma wẹẹ, u mu ẹtin yan e Jehova, u hoẹmwẹ ọnrẹn, kevbe wẹẹ, u gbọyẹmwẹ ye emwi hia nọ ru nuẹn. U gha ru ena hia, te u rhie ẹre ma wẹẹ, u “ya egbe fiohan ne Osanobua,”  kevbe wẹẹ, te u vbe ru izọhẹ gie ẹre. (2 Pit 3:11; Hib 13:15) Ma gha ya ekhoẹ hia ru izọhẹ gie Jehova, vbe na ma na gbagba ẹre ye ima egbe, ọ keghi ya ẹko rhiẹnrhiẹn e Jehova. (Yae taa 2 Kọrinti 9:7.) Erriọ ima wa hoo ne ima gha ru ẹre, rhunmwuda ọ keghi ya ima sọyẹnmwẹ, vbe ima ghaa ga e Jehova vbe odẹ nọ ghi maan sẹ.

17-18. De emwi ne kpataki nọ gha ru iyobọ nuẹn ya sẹtin dinmwiamẹ? Vbọzẹ? (Itan 3:3-6)

¹⁷ Zẹvbe ne u ya mu egbe ne u ya dinmwiamẹ, ẹi mwẹ u ma werriẹ aro daa edanmwẹ eso. Emwa eso sẹtin gha ya ruẹ gbogiẹ rhunmwuda ugamwẹ ọgbọn ne u ghi deba; iran sẹtin vbe gha zẹ ruẹ kpokpo. (2 Tim 3:12) Zẹvbe ne u ya hia ne u ban uyinmwẹ dan eso, a sẹtin miẹn wẹẹ, u ye zẹdia yin uyinmwẹ vberriọ. Iro sẹtin vbe han ruẹ, rhunmwuda u ma he ye sẹtin muẹn sẹ, okhuo ne u fian ne egbuẹ vbe ugamwẹ e Jehova. Ọ mwẹ emwi kpataki nọ gha ru iyobọ nuẹn ya sẹtin zin egbe. Vbe ọni a khin? Ahoẹmwọmwa ne u mwẹ ne Jehova ẹre nọ.

¹⁸ Vbene ẹmwata, ahoẹmwọmwa ne u mwẹ ne Jehova wa kakabọ ru ekpataki, ai miẹn emwi na ya gie ẹre. (Tie Itan 3:3-6.) Ahoẹmwọmwa nọ wegbe ne u mwẹ ne Jehova gha sẹtin ru iyobọ nuẹn ya mudia gbain vbe u ghaa rre uwu ọlọghọmwa. E Baibol wa mobọ guan kaẹn ahoẹmwọmwa nẹi beghe ne Jehova mwẹ ne eguọmwadia ẹre. Ahoẹmwọmwa na i fafa, ọ wegbe sẹrriọ wẹẹ, e Jehova i khian sẹtin yangbe eguọmwadia ẹre. (Psm 100:5) Te Jehova yi ima ne ima sẹtin gha ya egbe taa irẹn. (Gẹn 1:26) Nọnaghiyerriọ, vbe ima khian ya sẹtin gha rhie egbe ahoẹmwọmwa vbenian ma hẹ?

19. Vbua khian ya rhie ẹre ma hẹ wẹẹ, u gele gbọyẹmwẹ ye emwi hia ne Jehova he ru nuẹn? (Galatia 2:20)

¹⁹ Vbe okaro, gha mwẹ ekhọe ọkpọnmwẹ ẹse. (1 Tẹs 5:18) Gha nọ egbuẹ vbe ẹdẹgbegbe wẹẹ, ‘De vbene Jehova he ya rhie ẹre ma hẹ wẹẹ, irẹn hoẹmwẹ mwẹ?’ Iyeke ọni, u ghi kpọnmwẹ e Jehova vbe erhunmwu, ye dọmwadẹ emwi nọ he ru nuẹn. Vbe na ghee Pọl, u ghi vbe gha ghee ẹre wẹẹ, uwẹ tobọ ruẹ ẹre Jehova ru avbe ẹse na na, rhunmwuda ọ hoẹmwẹ ruẹ. (Tie Galatia 2:20.) Nọ egbuẹ wẹẹ, ‘Mẹ vbe hoo ne I gi e Jehova rẹn wẹẹ, I hoẹmwẹ ọnrẹn ra?’ Ahoẹmwọmwa ne u mwẹ ne Jehova, ẹre ọ khian ru iyobọ nuẹn ya mudia gbain vbe u ghaa rre edanmwẹ, ra ọlọghọmwa nọ rhirhi gha khin. Ọ gha vbe ru iyobọ nuẹn ya rhiegba ye ẹmwẹ ugamwẹ,  u ghi gha rhie ẹre ma vbe ẹdẹgbegbe wẹẹ, u hoẹmwẹ Erhaa nọ rre ẹrinmwi.

20. Vbọ demu na ya egbe fiohan ne Jehova? De vbe nọ ru ekpataki sẹ hẹ?

²⁰ Ọ gha ghi sẹ ẹghẹ, ahoẹmwọmwa ne u mwẹ ne Jehova ẹre ọ khian ghi gua ruẹ kpa, ya tama rẹn vbe erhunmwu wẹẹ, u khian ya egbuẹ fiohan nẹẹn. Erhunmwu ne kpataki ẹre ọna wa khin. Yerre wẹẹ, u gha ya egbuẹ fiohan ne Jehova nẹ, u gha sẹtin ya aro yọ wẹẹ, u gha sẹtin gha re ọghe Jehova vbe etẹbitẹ, ọ vbe rhie ma wẹẹ, ọ maan ra ọ khọọ, u i khian sẹ e Jehova rae. Ọna i re emwi na ru yangbe yangbe. Na do ya egbe fiohan ne Jehova, i zẹdẹ emwi na ya rhẹghẹrẹ. Ọghe ne ẹmwata, u gha ru azẹ nibun vbe ẹdagbọn ruẹ, eso ghi gha re nọ maan, sokpan, erhọkpa i rrọọ nọ gha maan sẹ azẹ ne u ru, vbe u ya egbuẹ fiohan ne Jehova. (Psm 50:14) Esu gha hia vbe odẹ ke odẹ ne ahoẹmwọmwa ne u mwẹ ne Jehova worua, ne u mieke na sẹ e Jehova rae. Ghẹ gi obọ e Setan ke ukhunmwu! (Job 27:5) Ahoẹmwọmwa nọ wegbe ne u mwẹ ne Jehova, ẹre ọ khian ru iyobọ nuẹn ya muẹn sẹ, eyan ne u ru vbe u ya egbuẹ fiohan ne Jehova, ẹre ọ khian vbe ya ruẹ gha sikẹ ọre sayọ.

21. Vbọzẹ ne ima gha na sẹtin kha wẹẹ, te ọmwa nọ dinmwiamẹ da suẹn gha ga e Jehova?

²¹ U gha ghi ya egbuẹ fiohan nẹ, u ghi gi ediọn ni rre iko ruẹ rẹn wẹẹ, u hoo ne u dinmwiamẹ. Ghẹ mianmian wẹẹ, u gha dinmwiamẹ nẹ, te u da suẹn gha ga e Jehova. Ugamwẹ ọghe Jehova i mwẹ ufomwẹ. Nọnaghiyerriọ, gi ahoẹmwọmwa ne u mwẹ ne Jehova gha re nọ wegbe. Gha fian okhuo ne egbuẹ, ne ahoẹmwọmwa ne u mwẹ ne Jehova gha wegbe sayọ vbe ẹdẹgbegbe. Ena gha gua ruẹ kpa, ne u ya dinmwiamẹ. U i khian sẹtin ghọghọ vbe ẹdẹrriọ! Sokpan, u ghi kọe ye orhiọn wẹẹ, te u da wa suẹn. Gi ahoẹmwọmwa ne u mwẹ ne Jehova kevbe Ovbi ẹre gha wegbe sayọ, ke ẹghẹ na ya fi etẹbitẹ!