Izọese adẹwerriegbe ọghe Jesu ẹre ọ kie ẹkpotọ yọ, ne Jehova mieke na sẹtin ya orukhọ ọghe ima bọ ima. (Ẹfis 1:7) Ọrheyerriọ, e Baibol khare wẹẹ: Osanobua “zin egbe lele emwa nagbọn,” ọni ẹre ọ si ẹre nọ na gha “ya orukhọ ne iran ru vbe ẹghẹ nọ gberra bọ iran,” a te miẹn we Jesu do wu ye orukhọ ọghe iran. (Rom 3:25) Ọ gha gia na kha wẹẹ, Osa nọ bu ohiẹn ata ẹre Jehova khin, agharhemiẹn wẹẹ, ọ ghaa yabọ emwa vbe ẹghẹ ne Jesu ma na he do wu ne emwa nagbọn ra?

Vbe aro e Jehova, vbe ẹghẹ ne irẹn ya ru eyan nii wẹẹ, “Ovbi” irẹn gha rre do wu ne emwa nagbọn, te ọ yevbe na miẹn wẹẹ ọ sunu nẹ. (Gẹn 3:15; 22:18) Osanobua wa rẹn wẹẹ, ọ gha sẹ ẹghẹ, Ovbi ẹre ighẹ Jesu gha ya ekhọe obọ re rhie egbe ladian do wu ne emwa nagbọn. (Gal 4:4; Hib 10:​7-10) Vbe Jesu rre agbọn na, e Jehova rhie asẹ ne Jesu nọ ya gha ya orukhọ ọghe emwa bọ emwa, a te miẹn we ọ wu ne iran. Jesu rẹnrẹn wẹẹ, irẹn gha sẹtin ya orukhọ ọghe emwa bọ iran rhunmwuda izọese adẹwerriegbe ne irẹn khian ru vbe odaro, ọni ẹre ọ si ẹre nọ na sẹtin gha yabọ emwa ni mu ẹtin yan rẹn.​—Mat 9:​2-6.