1. De ọta ne eguọmwadia e Jehova eso sẹtin gha nọ?

 Ọ KEGHI fu ima ẹko rre ne ima na rẹn wẹẹ, e Jehova miẹn eguọmwadia ẹre hia yi! E Baibol khare wẹẹ: “E Jehova sẹ ọyẹnmwẹ ye ẹmwẹ emwa rẹn.” (Psm 149:4) Vbọrhirhighayehẹ, ugbẹnso egbe sẹtin wọọ emwa eso sẹrriọ wẹẹ, iran ghi gha nọ wẹẹ, ‘E Jehova gele miẹn mwẹ yi ra?’ Eguọmwadia e Jehova eso ni ghaa ya ẹkoata gae vbe ẹghẹ nẹdẹ, wa vbe gha mwẹ egbe iziro vbenian.​—1 Sam 1:​6-10; Job 29:​2, 4; Psm 51:11.

2. De emwa ne Jehova miẹn yi?

² E Baibol gi ima rẹn wẹẹ, e Jehova gha sẹtin miẹn emwa ni ma gba yi. Vbe ọna khian ya sẹtin sunu hẹ? Ma ghi mu ẹtin yan Jesu Kristi, ma ghi vbe dinmwiamẹ. (Jọn 3:16) Ma gha ru ọna, te ima rhie ẹre ma vbe idagbo wẹẹ, ma roro iro fi uyinmwẹ werriẹ nẹ kevbe wẹẹ, ma yan ma Osanobua nẹ wẹẹ, ahoo ọghẹe ẹre ima khian ghi gha ru vbe ẹdagbọn ima. (Iwinna 2:38; 3:19) Ẹko wa rhiẹnrhiẹn e Jehova vbe ima gha ru ena hia ne ima mieke na do gha re ọsiọre. Adeghẹ ima na ye gha ga e Jehova, zẹvbe ne ima yan rẹn vbe ima ya egbe fiohan nẹẹn, e Jehova ghi miẹn ima yi, ọ ghi vbe gha ghee ima zẹvbe ọsiọre ne kankankan.​—Psm 25:14.

3. De emwi ne ima khian zẹ iro yan?

³ Sokpan vbọ ya emwa eso roro ẹre wẹẹ, e Jehova ma miẹn iran yi? De vbene Jehova ya rhie ẹre ma wẹẹ, irẹn miẹn ima yi? De emwi nọ khian ru iyobọ ne Ovbi Otu e Kristi, nọ mieke na gele ya ekhọe hia yayi wẹẹ, e Jehova miẹn ọnrẹn yi?

EMWI NỌ YA EMWA ESO RORO ẸRE WẸẸ, E JEHOVA MA MIẸN IRAN YI

4-5. De emwi nọ khẹke ne ima kọ ye orhiọn vbe ima ghaa roro ẹre wẹẹ, ma i mwẹ esa ne ima ye?

⁴ Ke egbe ọvbokhan kpa ẹre ima nibun ke suẹn gha roro ẹre wẹẹ, ma i mwẹ esa ne ima ye. (Psm 88:15) Ọtẹn nokpia ọkpa na tie  ẹre Adrián khare wẹẹ: “Te I wa gha roro ẹre wẹẹ, I i mwẹ esa ne I ye. I wa ye yerre wẹẹ, I ghaa na erhunmwu vbe ẹghẹ nọ gberra ne Jehova gi ẹgbẹe mwẹ lae Paradais, agharhemiẹn wẹẹ I ghaa roro ẹre wẹẹ, I ma maan sẹ nọ gha lae Paradais.” E Tony na ma koko vbe odẹ ẹmwata na khare wẹẹ: “Ọ ma gha mwẹ ẹghẹ ọkpa ne evbibiẹ mwẹ ya tama mwẹ wẹẹ, iran hoẹmwẹ mwẹ, ra iran ya mwẹ hio. Ọna keghi ya mwẹ gha roro ẹre wẹẹ, ẹ i mwẹ emwi ne I khian ru nọ gha yẹẹ iran.”

⁵ Adeghẹ ima na gha roro ẹre vbe ugbẹnso wẹẹ, ma i mwẹ esa ne ima ye, ọ khẹke ne ima gha yerre wẹẹ, e Jehova ẹre ọ tobọre si ima kẹ egbe. (Jọn 6:44) Ọ mwẹ uyinmwẹ esi ne Jehova bẹghe vbe egbe ima, ne ima tobọ ima i bẹghe, e Jehova vbe rẹn emwi nọ rre ima ekhọe. (1 Sam 16:7; 2 Krọ 6:30) Nọnaghiyerriọ, ma gha sẹtin gha mwẹ ilẹkẹtin wẹẹ, aro nọ ghaan ẹre Jehova gele ya ghee ima zẹvbe nọ khare.​—1 Jọn 3:​19, 20.

6. De vbene orukhọ ne Pọl ru vbe ẹghẹ nọ gberra, ya gha kpokpo ẹre vbe orhiọn hẹ?

⁶ Ma nibun ru emwi eso vbene ima te la odẹ ẹmwata na, nọ wa ye ya ekhọe ima bu abe gbe ima. (1 Pit 4:3) Uhiẹn, emwa ni wa vbe ga e Jehova ke ẹghẹ gha dee wa vbe mwẹ emwi eso ne iran gu suan. Ekhọe ruẹ vbe zẹdia bu abe gbuẹ ra? Adeghẹ erriọ nọ, gi orhiọn ruẹ sotọ, rhunmwuda eguọmwadia e Jehova nibun wa vbe werriẹ aro daa egbe ọlọghọmwa vbenian. Vbe igiemwi, ọ ma zẹdẹ gha khuẹrhẹ ne ukọ e Pọl vbe ọ ghaa muẹn roro avbe abakuru ughughan nọ ru. (Rom 7:24) Ẹmwata nọ wẹẹ, ukọ ighẹ e Pọl roro iro fi uyinmwẹ werriẹ, ọ na vbe dinmwiamẹ. Ọrheyerriọ, ọ na kha wẹẹ, irẹn “ẹre ọ ghi kanmwa sẹ vbe uwu avbe ukọ hia” kevbe wẹẹ, irẹn “ẹre ọ ghi khọọ sẹ” vbe uwu emwa orukhọ hia.​—1 Kọr 15:9; 1 Tim 1:15.

7. Vbọ khẹke ne ima kọ ye orhiọn vbe nọ dekaẹn orukhọ ne ima ru vbe ẹghẹ nọ gberra?

⁷ Erha mwa nọ rre ẹrinmwi yan rẹn wẹẹ, irẹn gha yabọ ima deghẹ ima na roro iro fi uyinmwẹ werriẹ. (Psm 86:5) Nọnaghiyerriọ, adeghẹ ima na gele gbe I ma rẹn ye orukhọ ne ima ru, ma gha sẹtin yayi we Jehova yabọ ima nẹ, zẹvbe nọ khare wẹẹ, irẹn gha ru ẹre.​—Kọl 2:13.

8-9. Vbọ khian ru iyobọ ne ima, ne ima ghẹ gha roro ẹre wẹẹ, emwi ne ima sẹtin ru, i khian sẹtin ya ẹko rhiẹnrhiẹn e Jehova?

⁸ Ma hia wa hia vbene ẹtin ima sẹ ne ima mieke na sẹtin gha ga e Jehova. Vbọrhirhighayehẹ, emwa eso keghi roro ẹre wẹẹ, ẹ i mwẹ vbene iran khian hia sẹ hẹ, e Jehova i khian miẹn iran yi. Ọtẹn nokhuo ọkpa na tie ẹre Amanda khare wẹẹ: “Ẹ i mwẹ vbene I gha hia sẹ hẹ, I ghi ye gha roro ẹre wẹẹ, I ma he ru sẹ. Rhunmwuda ọni, I na gha hia vbe ẹghẹ hia, ne I gha ru emwi ne I rẹnrẹn wẹẹ, ẹtin mwẹ i khian sẹ. Deghẹ I ma na musọe, ekhue egbe mwẹ ghi wa gha mu mwẹ, I ghi vbe gha roro ẹre wẹẹ, e Jehova i khian miẹn mwẹ yi.”

⁹ Vbọ khian ru iyobọ ne ima, ne ima ghẹ gha roro ẹre wẹẹ, ma i khian sẹtin ru emwi nọ gha ya ẹko rhiẹnrhiẹn e Jehova? Yerre wẹẹ, Osa nọ mwẹ amuroro ẹre Jehova khin. Ẹ i we ne ima ru emwi ne ima i khian sẹtin ru. Ọ wa gbọyẹmwẹ ye emwi hia ne ima ru nẹẹn, sokpan nọ gha re vbene ẹtin ima sẹ. Vbe gha muẹn roro, igiemwi ọghe emwa ni rre Baibol, ni ya ekhọe hia ga e Jehova. Gia guan kaẹn igiemwi ọghe Pọl. E Pọl keghi rhiegba ye ugamwẹ e Jehova vbe ọwara ukpo nibun, ọ mu okhian la ibriki arriaisẹn nibun, ọ na vbe mu iko nibun gbọọ. Ọ mwẹ ẹghẹ eso ne Pọl ma ya sẹtin ru sayọ vbe iwinna ikporhu vbe nọ ka ru, te ọni ghi rhie ma wẹẹ, e Jehova ma ghi miẹn ọnrẹn yi ra? Hiehie. Ọ na ye gha ru vbene ẹtin ẹnrẹn sẹ, e Jehova na vbe fiangbe ẹre. (Iwinna 28:​30, 31) Vbe nọ vbe gha ye ne Pọl, a sẹtin vbe miẹn wẹẹ, ma i sẹtin ru emwi eso ne ima te ka ru vbe ugamwẹ e Jehova. Sokpan, ẹ i re ọni ẹre Jehova ghee, emwi nọ ya ima ru emwi ne ima ru, ẹre Jehova ghee. Nian,  gi ima guan kaẹn odẹ eso ne Jehova ya rhie ẹre ma wẹẹ, irẹn miẹn ima yi.

DE VBENE JEHOVA YA RHIE ẸRE MA WẸẸ, IRẸN MIẸN IMA YI?

10. Deghẹ ima hoo ne ima họn vbe Jehova ghaa tama ima wẹẹ, irẹn miẹn ima yi, de emwi nọ khẹke ne ima ru? (Jọn 16:27)

¹⁰ Ọ loo e Baibol. Te Jehova wa gualọ ẹkpotọ nọ khian ya rhie ẹre ma wẹẹ, irẹn miẹn emwa ne irẹn hoẹmwẹ ọnrẹn yi. Evbagbẹn Nọhuanrẹn gi ima rẹn igbava ne Jehova tama Ovbi ẹre ighẹ Jesu wẹẹ, irẹn hoẹmwẹ ọnrẹn kevbe we irẹn miẹn ọnrẹn yi. (Mat 3:17; 17:5) U gha hoo ne Jehova tama ruẹ wẹẹ, irẹn miẹn ruẹ yi ra? E Jehova i wa ke ẹrinmwi gu ima guan, Ẹmwẹ ọghẹe nọ re Baibol ẹre ọ ya gu ima guan. Ma ghaa tie ẹmwẹ nọ rre Ebe Enẹ Ni Ta Okha Ọghe Jesu, ọ ghi yevbe na miẹn wẹẹ, ma wa họn vbe Jehova tama ima wẹẹ, irẹn miẹn ima yi. (Tie Jọn 16:27.) Vbene Erhae ya ru emwi, erriọ Jesu wa ya ru emwi zẹẹ. Nọnaghiyerriọ, ma gha tie vbekpa vbene Jesu ya tama erhuanegbe ẹre ni ghaa mwẹ amuẹtinyan we irẹn miẹn iran yi, agharhemiẹn wẹẹ, emwa ni ma gba ẹre iran khin, ọ ghi yevbe na miẹn wẹẹ, e Jehova ẹre ọ wa gu ima guan.​—Jọn 15:​9, 15.

11. Ma ghaa werriẹ aro daa ọlọghọmwa, ọ rhie ma wẹẹ, e Jehova ma ghi miẹn ima yi ra? (Jems 1:12)

¹¹ Ọ kpemehe emwi ne ima gualọ. E Jehova wa hoo nọ ru iyobọ ne ima, odẹ ọkpa nọ ya ru ọna ọre nọ na kpemehe emwi ne ima gualọ. Ugbẹnso, e Jehova sẹtin kue yọ ne ima rri oya zẹvbe nọ ghaa ye ne Job. (Job 1:​8-11) Ma ghaa werriẹ aro daa edanmwẹ, ọ ma rhie ma wẹẹ, e Jehova ma ghi miẹn ima yi. Nọghayayerriọ, edanmwẹ keghi kie ẹkpotọ ne ima ya rhie ẹre ma vbene ima hoẹmwẹ Osanobua sẹ hẹ, kevbe vbene amuẹtinyan ne ima mwẹ daa ẹre wegbe sẹ hẹ. (Tie Jems 1:12.) Ma ghaa rre uwu ọlọghọmwa ẹ i mwẹ ma ma bẹghe vbene Jehova ya rhie ẹre ma wẹẹ, irẹn hoẹmwẹ ima zẹvbe nọ ya ru iyobọ ne ima ya sẹtin zin egbe.

12. Vbe ima miẹn ruẹ vbe igiemwi ọghe Dmitrii?

¹² Gi ima guan kaẹn ọtẹn nokpia ọkpa na tie ẹre Dmitrii nọ rre Asia. Ọ ma ghi gha mwẹ iwinna, ọ ma vbe miẹn iwinna ọvbehe vbe ọwara uki nibun. Rhunmwuda ọni, ọ keghi rhiegba ye iwinna ikporhu sayọ nọ ya rhie ẹre ma wẹẹ, irẹn mu ẹtin yan e Jehova. Uki nibun na do gberra, sokpan, ọ ma ye miẹn iwinna. Ọ na vbe suẹn gha khuọnmwi, sẹrriọ wẹẹ, ọ ma ghi sẹtin gha zẹ obọ zẹ owẹ. Ọ na do gha roro ẹre wẹẹ, irẹn i re ọdọ esi, irẹn i vbe re erha nọ rẹn enegbe, ọ  na vbe gha gbawawẹ deghẹ e Jehova ye miẹn irẹn yi. Vbe akota ọkpa, ovbi ẹre nokhuo keghi print emwi nọ rre ebe Aizaia 30:15 ye ebe, emwi nọ rre ako na khare wẹẹ: “Uwa hẹko mu ẹtin yan mwẹ. Ẹghẹ nii, uwa gha wegbe, uwa ghi vbe gha re ne ẹkun sẹ ọre otọ.” Ọ na rhie ẹre gha die eke ne erhae lovbiẹ yi, ọ na kha wẹẹ, “Baba, ẹghẹ ke ẹghẹ ne u ya roro iro, gha ye ako evbagbẹn nọhuanrẹn na rre.” E Dmitrii keghi do bẹghe ẹre wẹẹ, e Jehova wa ye gbaroghe ẹgbẹe ọre, iran mwẹ evbare, ukpọn kevbe ehe ne iran dia. Ọ khare wẹẹ, “emwi nọ wa khẹke ne I ru, ọre ne I hẹko mu ẹtin yan e Jehova.” U ghaa rre egbe ọlọghọmwa vbenian, gha mwẹ ilẹkẹtin wẹẹ, e Jehova gha gbaroghe ruẹ kevbe wẹẹ, ọ gha ru iyobọ nuẹn ya sẹtin zin egbe.

13. De emwa ne Jehova gha sẹtin loo ya gi ima rẹn wẹẹ, irẹn hoẹmwẹ ima, kevbe wẹẹ, vbe ọ ya ru ẹre hẹ?

¹³ Ọ loo etẹn ne ima gba ga. Odẹ ne Jehova ya loo etẹn ya ru iyobọ ne ima vbe rhie ẹre ma wẹẹ, ọ miẹn ima yi. Vbe igiemwi, ọ sẹtin gu emwa ọvbehe kpa ya ta ẹmwẹ nọ gha rhie igiọdu ne ima, vbe ẹghẹ ne ima ya gualọe zẹẹ. Ọna ọre emwi nọ wa sunu daa ọtẹn nokhuo ọkpa nọ rre Asia, vbe ẹghẹ nọ na gha rre uwu ọlọghọmwa nọ wegbe. Ọ ma ghi gha mwẹ iwinna, ọ na vbe gha khuọnmwi. Ọdafẹn ọnrẹn na vbe ru orukhọ nọ wegbe, ọ ma ghi gha ga zẹvbe ọdiọn vbe iko. Ọ khare wẹẹ, “I ma rẹn emwi nọ si ẹre ne ena hia na gha sunu, I na gha roro ẹre wẹẹ, ọ gha kẹ, ọ mwẹ emwi eso ne I ma ru ẹse, nọ ya e Jehova fi iyeke gbe mwẹ.” Ọtẹn ima nokhuo na keghi rinmwian e Jehova nọ ru iyobọ ne irẹn ya rẹn wẹẹ, ọ ye miẹn irẹn yi. Vbe Jehova ya ru ọna hẹ? Ọtẹn na khare wẹẹ, “Avbe ediọn keghi gu mwẹ zẹ iro, iran na gu mwẹ rẹn wẹẹ, e Jehova wa hoẹmwẹ mwẹ.” Ẹghẹ eso ghi gberra nẹ, ọ na dọlegbe rinmwian e Jehova nọ ru iyobọ ne irẹn. Ọ khare wẹẹ, “Vbe ẹdẹrriọ, etẹn nikpia kevbe etẹn nikhuo eso ni rre iko ne I ye keghi gbẹn elẹta gu mwẹ. Zẹvbe ne I ya gha tie ẹmwẹ nọ rhie  igiọdu ne ọmwa ne iran gbẹn gu mwẹ, I na wa bẹghe ẹre wẹẹ, e Jehova họn erhunmwu mwẹ.” Vbene ẹmwata, ẹmwẹ igiọdu ne etẹn ima ta wa ya ima rẹn wẹẹ, e Jehova miẹn ima yi.​—Psm 10:17.

14. De odẹ ọvbehe ne Jehova ya gi ima rẹn wẹẹ, irẹn miẹn ima yi?

¹⁴ E Jehova keghi loo etẹn ima ya rhie adia ne ima vbe ẹghẹ ne ima ya gualọe zẹẹ, ọna ọre odẹ ọvbehe nọ ya rhie ẹre ma wẹẹ, irẹn miẹn ima yi. Vbe igiemwi, vbe ẹghẹ ọghe avbe ukọ, e Jehova keghi loo ukọ e Pol ya gbẹn elẹta 14 gie etẹn. E Pọl wa rhie adia ne avbe etẹn na vbe elẹta na, sokpan odẹ nọ ya ru ẹre rhie ẹre ma wẹẹ, ọ hoẹmwẹ iran. Vbọzẹ ne Jehova na we ne Pọl rhie adia vberriọ ne etẹn na? Erha nọ maan ẹre Jehova khin, ọ keghi dia ivbi ẹre “nọ ya hio ye odẹ.” (Itan 3:​11, 12) Nọnaghiyerriọ, a gha ya e Baibol dia ima ye odẹ, ọ rhie ma wẹẹ, e Jehova ye miẹn ima yi. (Hib 12:6) De emwi ọvbehe ni rhie ẹre ma wẹẹ, e Jehova miẹn ima yi?

EMWI ỌVBEHE NI RHIE ẸRE MA WẸẸ, E JEHOVA MIẸN IMA YI

15. De emwa ne Jehova rhie orhiọn nọhuanrẹn ọghẹe na, kevbe wẹẹ, vbọzẹ ne ọna na ya ima mwẹ ilẹkẹtin?

¹⁵ Emwa ne Jehova miẹn yi ẹre ọ rhie orhiọn nọhuanrẹn na. (Mat 12:18) Ma sẹtin nọ egbe ima wẹẹ, ‘Mẹ rhie ẹre ma ighẹ avbe uyinmwẹ ne orhiọn nọhuanrẹn ya ọmwa mwẹ ra?’ U bẹghe ẹre nẹ wẹẹ, eban ẹre u ghi mwẹ izinegbe sẹ vbe nọ ka gha ye, u ke do rẹn e Jehova ra? Ọghe ne ẹmwata, zẹvbe ne u ya rhie ẹre ma wẹẹ, u mwẹ avbe uyinmwẹ ne orhiọn nọhuanrẹn ya ọmwa mwẹ, ọ ghi gele do dewarorua wẹẹ, e Jehova miẹn ruẹ yi!​—Ya ghee ẹkpẹti nọ khare wẹẹ, “ Ọmọ Ne Orhiọn Nọhuanrẹn Mọ Ọre . . . ”

16. De emwa ne Jehova loo ya kporhu iyẹn nọ maan, kevbe wẹẹ, vbe ọna ye ruẹ hẹ vbe ekhọe? (1 Tẹsalonaika 2:4)

¹⁶ Ekhọe hia ẹre Jehova wa ya mu iwinna ikporhu iyẹn nọ maan ne emwa ne irẹn miẹn yi. (Tie 1 Tẹsalonaika 2:4.) Gi ima guan kaẹn afiangbe ne ọtẹn nokhuo ọkpa na tie ẹre Jocelyn miẹn rhunmwuda nọ na gha kporhu ma emwa ọvbehe. Ọ mwẹ ẹdẹ ọkpa ne iro han e Jocelyn vbe ọ rhiọrre vbe ovbe. Ọ khare wẹẹ, “Orhiọn ma zẹdẹ gha rrọọ mwẹ iwu, iro na wa han mwẹ, sokpan, I ghaa ru iwinna arọndẹ, ẹdẹrriọ ẹre ima vbe ya ladian vbe ikporhu. I keghi na erhunmwu gie Jehova, ẹre I na gha rrie ikporhu.” Vbe owiẹ nii, e Jocelyn keghi miẹn okhuo ọkpa na tie ẹre Mary vbe ikporhu, okhuo na keghi kue yọ na gha gu irẹn ruẹ e Baibol, okhuo nọ mwẹ ekhọe esi ẹre ghaa nọ. Uki eso ghi gberra  nẹ, e Mary keghi kha wẹẹ, te irẹn wa gha na erhunmwu ne Osanobua ru iyobọ ne irẹn, vbe Jocelyn do sobọ vbe ẹkhu irẹn. E Jocelyn ghi guan kaẹn emwi nọ sunu na, ọ na wẹẹ, “Ọ na yevbe na miẹn wẹẹ, te Jehova ghaa tama mwẹ wẹẹ, ‘I miẹn ruẹ yi.’” Ọghe ne ẹmwata, ẹ i re emwa hia ẹre ọ khian wa danmwehọ ima vbe ima gha kporhu ma iran. Sokpan, ọ khẹke ne ima gha mwẹ ilẹkẹtin wẹẹ, ẹko wa rhiẹnrhiẹn e Jehova vbe ima ghaa hia vbene ẹtin ima sẹ ne ima gha kporhu ma emwa ọvbehe.

17. De emwi ne u miẹn ruẹ vbe emwi ne Vicky tae vbekpa izọese adẹwerriegbe? (Psalm 5:12)

¹⁷ Emwa ne Jehova miẹn yi, ẹre ọ miẹn ere vbe izọese adẹwerriegbe ọghe Ovbi ẹre. (1 Tim 2:​5, 6) Sokpan, deghẹ ekhọe ima na gha tama ima we Jehova ma miẹn ima yi ghi vbo, agharhemiẹn wẹẹ, ma mu ẹtin yan izọese adẹwerriegbe kevbe wẹẹ, ma dinmwiamẹ nẹ? Yerre wẹẹ, ma i khian sẹtin wa mu ẹtin yan emwi ne ekhọe ima tama ima, sokpan ma gha sẹtin mu ẹtin yan e Jehova. Emwa ni mu ẹtin yan e Jehova ẹre Jehova ghee ẹre emwa esi, ọ vbe yan wẹẹ, irẹn gha fiangbe iran. (Tie Psalm 5:12; Rom 3:26) Ọtẹn nokhuo ọkpa na tie ẹre Vicky kegha muẹn roro vbene izọese adẹwerriegbe ru ekpataki hẹ. Ẹdẹ ọkpa, ọ ghi zẹ mu ẹmwẹ izọese adẹwerriegbe roro, ọ na kha wẹẹ: “Ẹ i re eban e Jehova ke mwẹ izinegbe vbe egbe mwẹ. . . . Ọrheyerriọ, ọ na yevbe te I ghaa tama rẹn wẹẹ, ‘u i khian sẹtin hoẹmwẹ ọmwa vbene imẹ ye. Izọese adẹwerriegbe ọghe Ovbuẹ i khian sẹtin gu orukhọ mwẹ.’” Rhunmwuda nọ na gha muẹn izọese adẹwerriegbe roro, ọ na do bẹghe ẹre wẹẹ, e Jehova hoẹmwẹ irẹn. Deghẹ ima na vbe gha ru vberriọ, ma gha bẹghe ẹre wẹẹ, e Jehova hoẹmwẹ ima kevbe wẹẹ, ọ miẹn ima yi.

18. De emwi ne ima yayi wẹẹ, e Jehova gha ru deghẹ ima ma gi ahoẹmwọmwa ne ima mwẹ nẹẹn fafa?

¹⁸ Ma sẹtin hia ne ima lele avbe adia na he guan kaẹn sin, sokpan, ugbẹnso, iro sẹtin ye han ima, ma ghi gha gbawawẹ deghẹ e Jehova ye miẹn ima yi. Ọ gha sunu vberriọ, ghẹ mianmian wẹẹ, emwa ne Jehova miẹn yi ọre, “emwa hia ni ma gi ahoẹmwọmwa ne iran mwẹ ne irẹn fafa.” (Jems 1:12) Ye gha sikẹ e Jehova, u ghi vbe hia ne u rhie aro sotọ, ne u mieke na bẹghe osẹ nọ rhie ẹre ma wẹẹ, ọ miẹn ruẹ yi. Ghẹ mianmian wẹẹ, Osanobua “ma rree ne ọmwa rhọkpa vbe uwu ima.”​—Iwinna 17:27.