1. De afiangbe ne ima sọyẹnmwẹ ọnrẹn, rhunmwuda ne ima na rre otu e Jehova?

 EGIE nọkhua ẹre ima wa ye ne ima na re ọkpa vbe otu e Jehova vbe ẹghẹ nọ wegbe ne ima wa ye na. Te agbọn Esu na wa rhia yọ rhia yọ, sokpan e Jehova keghi ya etẹn nikpia kevbe etẹn nikhuo ni re ẹgbẹe ọghe ima ni mwẹ akugbe ya ru iyobọ ne ima. (Psm 133:1) E Jehova wa ru iyobọ ne ima ya kakabọ gu obọ egbe. (Ẹfis 5:33–6:1) Ọ vbe rhie ẹwaẹn kevbe irẹnmwi ne ima, ne ima mieke na sẹtin gha mwẹ ọfunmwegbe nọ sẹ otọ ẹko.

2. Vbọ khẹke ne ima ru, kevbe wẹẹ vbọzẹ?

² Vbọrhirhighayehẹ, te ima gha hia vbe odẹ ke odẹ ne ima gha ya ẹkoata ga e Jehova. Vbọzẹ? Rhunmwuda, etẹn ima sẹtin ru emwi eso nọ sọnnọ ima. Egbe sẹtin vbe wọọ ima vbe ima gha ru abakuru, katekate deghẹ ima na gha ru ẹre yan egbe yan egbe. Ọ khẹke ne ima ye gha ga e Jehova (1) vbe ọtẹn ne ima gba ga gha ru emwi nọ sọnnọ ima, (2) vbe ọdafẹn ima ra ọvbokhan ima gha ru emwi nọ sọnnọ ima kevbe (3) vbe egbe gha wọọ ima rhunmwuda abakuru ne ima ru. Vbe ako iruẹmwi na, ma gha zẹ iro yan emwi eha ne ima sunu yi na. Ma gha vbe guan kaẹn emwi ne ima gha miẹn ruẹ vbe obọ eguọmwadia e Jehova.

GHẸ SẸ E JEHOVA RAE VBE ỌTẸN GHA RU EMWI NỌ SỌNNỌ RUẸ

3. De ọlọghọmwa ne eguọmwadia e Jehova werriẹ aro daa?

³ Ọlọghọmwa nọ rrọọ. Etẹn eso ne ima gba ga sẹtin gha mwẹ uyinmwẹ eso nọ sọnnọ ima. Eso sẹtin ru emwi eso ye ima aro, ra iran sẹtin vbe gha ya obọ dan mu ima. Avbe ediọn sẹtin ru abakuru. Ọna sẹtin ya emwa eso gha gbawawẹ deghẹ otu e Jehova gele na khin. Ne iran gha te ya deba etẹn gha ga e Jehova vbe  uwu akugbe, iran ghi gha lẹẹ ne etẹn ni ru iran khọọ, ra iran sẹtin kue dobọ iko na yo yi. (Zef 3:9) Ẹwaẹn rre emwi ne iran ru na ra? Gi ima guan kaẹn emwi ne ima gha miẹn ruẹ vbe obọ ọguọmwadia e Jehova nọ vbe werriẹ aro daa egbe emwi vbenian.

4. De ọlọghọmwa eso ne ukọ ighẹ e Pọl werriẹ aro daa?

⁴ Igiemwi nọ rre uwu e Baibol. Ukọ e Pọl wa rẹn wẹẹ, emwa ni ma gba ẹre etẹn ne iran gba ga ghaa khin. Vbe igiemwi, vbọ ghi khian Ovbi Otu e Kristi nẹ, emwa eso kegha roro ẹre wẹẹ, ọ ma he fi werriẹ. (Iwinna 9:26) Ọ ghi zẹ kpẹ, emwa eso na vbe gha ta ẹre ọtakhọ vbe iyeke, ne iran ya mu eni ẹnrẹn rhia. (2 Kọr 10:10) E Pọl vbe miẹn ọtẹn nokpia ọkpa nọ mu asanikaro, nọ ru abakuru nọ gha te ya emwa ọvbehe sẹ e Jehova rae. (Gal 2:​11, 12) E Mak ne ọsie Pọl ne kankankan keghi ru emwi nọ kakabọ da e Pọl. (Iwinna 15:​37, 38) E Pọl gha te sẹtin rhunmwuda avbe emwi nọ sunu na kha wẹẹ, irẹn i ghi gu etẹn ni ru emwi nọ sọnnọ irẹn mu obọ. Ọrheyerriọ, e Pọl na ye gha ya aro nọ maan ghee etiọnrẹn, ọ na vbe rhiegba ye ugamwẹ e Jehova. De emwi nọ ru iyobọ ne Pọl ya sẹtin ru vberriọ?

5. Vbo ru iyobọ ne Pọl nọ ma na gi egbe etẹn wọọ re? (Kọlọsi 3:​13, 14) (Vbe ya ghee efoto.)

⁵ E Pọl hoẹmwẹ etẹn nikpia kevbe etẹn nikhuo. Ahoẹmwọmwa ne Pọl ghaa mwẹ ne emwa ọvbehe ẹre ọ ru iyobọ nẹẹn, nọ ma na rhie aro tua ako ne iran i na hia, sokpan ọ na rhie aro tua uyinmwẹ esi ne iran mwẹ. Ahoẹmwọmwa ẹre ọ vbe ru iyobọ ne Pọl ya lele ibude ne irẹn tobọ irẹn rhie ne etẹn vbe ebe Kọlọsi 3:​13, 14. (Tie ẹre.) Gia guan kaẹn vbene Pọl ya yabọ e Mak hẹ. Agharhemiẹn wẹẹ, e Mak kpa sẹ e Pọl rae vbe ẹghẹ okaro ne Pọl ya mu okhian gha rrie ehe ughughan ya kporhu, e Pọl ma rhie emwi nọ sunu ye ekhọe. Vbe Pọl ghi gbẹn elẹta gie etẹn ni rre iko nọ rre Kọlọsi, ọ na tian e Mak zẹvbe ọmwa ne iran gba winna, ne irẹn ya aro nọ ghaan ghee, kevbe ọmwa nọ ‘wa fu irẹn ẹko rre.’ (Kọl 4:​10, 11) Vbe Pọl rre eghan vbe Rom, ọ na we na tama e Mak nọ do ru iyobọ ne irẹn. (2 Tim 4:11) Ọna ya ima rẹn wẹẹ, e Pọl ma gi egbe etẹn wọọ ẹre. Vbe ima miẹn ruẹ vbe obọ e Pọl?

6-7. Vbe ima khian ya rhie ẹre ma wẹẹ, ma ye hoẹmwẹ etẹn ima vbe iran gha ru emwi nọ sọnnọ ima? (1 Jọn 4:7)

⁶ Emwi ne ima miẹn ruẹ. E Jehova hoo ne ima gha rhie ẹre ma wẹẹ, ma hoẹmwẹ etẹn ima. (Tie 1 Jọn 4:7.) Adeghẹ etẹn ima na ru emwi nọ ma khẹke, ọ khẹke ne ima gha mwẹ ilẹkẹtin wẹẹ, ọ te rre iran ekhọe ne iran ru emwi ne Baibol khare kevbe wẹẹ, ẹ i re te iran mẹma ru emwi nọ sọnnọ ima. (Itan 12:18) Osanobua wa hoẹmwẹ emwa ni ya ẹkoata gae, agharhemiẹn wẹẹ, iran ru abakuru. Ẹ i yangbe ima vbe ima gha ru abakuru; ẹ i vbe rhie ẹmwẹ ima ye ẹko. (Psm 103:9) Te ọ wa kakabọ ru ekpataki ne ima gha  ya egbe taa Erha ima nọ ya ekhọe hia yabọ!​—Ẹfis 4:32–5:1.

⁷ Vbe yerre wẹẹ, zẹvbe ne agbọn Esu na ya sikẹ ufomwẹ, te ọ wa khẹke ne ima rhikhan mu etẹn ne ima gba ga. Ọ khẹke ne ima kọe ye orhiọn wẹẹ ukpokpo ne ima gha miẹn sẹtin tua sayọ. A sẹtin kue mu ima ye eghan rhunmwuda ne ima na ga e Jehova. Ọ gha sunu vberriọ, ma wa gualọ iyobọ etẹn ima. (Itan 17:17) Gi ima guan kaẹn emwi nọ sunu daa ọdiọn ọkpa nọ rre Spain, na tie ẹre Josẹf. a A keghi mu irẹn vbe etẹn ọvbehe khui ye eghan rhunmwuda ne iran ma na deba ivbiyokuo. Ọ khare wẹẹ: “Vbe ima rre eghan, te ima wa rherhe gha bẹghe abakuru ọghe etẹn, rhunmwuda efọnkpa ẹre ima hia ye. Te ima wa gha mu emwi ne etẹn ima ru wuo egbe, erriọ ima vbe ya gha ya ekhọe hia yabọ egbe. Ọna ẹre ọ wa ru iyobọ ne ima ya gha mwẹ akugbe, ma na vbe sẹtin gha ru iyobọ ne egbe. Emwa nibun ne ima gba gha rre eghan ma gha ga e Jehova. Ọ mwẹ asẹ ọkpa ne I ya kuan obọ mwẹ, a na ghi ya bandage gbalọe, rhunmwuda ọni, I ma ghi sẹtin tobọ mwẹ gha ru emwi eso. Sokpan ọkpa vbe uwu etẹn, keghi gu mwẹ gha họọ ukpọn, ọ na vbe gu mwẹ gha ru emwi ọvbehe. Te etẹn wa gele rhie ẹre ma wẹẹ, iran hoẹmwẹ mwẹ vbe ẹghẹ ne I wa ya gha gualọe zẹẹ.” Ọna ya ima rẹn wẹẹ, te ọ wa gele khẹke ne ima gu etẹn ima gha rrọọ vbe ọfunmwegbe nian!

GHẸ SẸ E JEHOVA RAE VBE ỌDAFẸN RUẸ RA ỌVBOKHAN RUẸ GHA RU EMWI NỌ SỌNNỌ RUẸ

8. De ọlọghọmwa ne avbe ọdọ vbe amwẹ werriẹ aro daa?

⁸ Ọlọghọmwa nọ rrọọ. A i miẹn owa ne ẹzọ i ye. E Baibol gi ima rẹn wẹẹ, “emwa ni ru orọnmwẹ gha họẹn vbe egbe.” (1 Kọr 7:28) Vbọzẹ? Orhunmwu eva ni ma gba ẹre ọ rọnmwẹ egbe, odẹ ughughan ẹre iran ya ru emwi, ugbẹnso ẹ i re emwi nọ yẹẹ ọna ẹre ọ yẹẹ nọkẹre. A sẹtin miẹn wẹẹ, ehe ughughan ẹre ọdọ vbe amwẹ ke rre, odẹ ughughan ẹre a vbe ya koko iran. Dọmwadẹ iran sẹtin gha mwẹ uyinmwẹ eso ne iran i khian bẹghe vbene iran te ru orọnmwẹ. Avbe emwi vbenian sẹtin si ẹzọ. Ne iran gha te ya ku uhunmwu kugbe dọlọ owa iran yi, iran sẹtin gha roro ẹre wẹẹ, ogieva iran ẹre ọ wa ru emwi nọ si ẹzọ vbe ẹghẹ hia, vbene iran na mianmian wẹẹ, iran tobọ iran vbe mwẹ abakuru. Rhunmwuda ọni, iran sẹtin do gha roro ẹre wẹẹ, iran gha wa sẹ egbe rae ra iran na sọ ebe orọnmwẹ ẹre ọ khian maan sẹ. Sokpan, ọna gha gele sọfurre ye ẹmwẹ nọ rre otọ ra? b Gi ima guan kaẹn emwi ne ima gha miẹn ruẹ vbe obọ ọguọmwadia e Jehova nọ zin egbe, vbe arowa ẹre ghaa yin uyinmwẹ nọ ma khẹke.

9. De ọlọghọmwa ne Abigẹl werriẹ aro daa?

⁹ Igiemwi nọ rre uwu e Baibol. E Nabal ẹre Abigẹl rọnmwẹ, e Baibol khare wẹẹ, ọmwa nọ khọọ, nọ yin vbe nọ rhirhi miẹn ẹre Nabal ghaa khin. (1 Sam 25:3) Ẹ i khian zẹdẹ gha khuẹrhẹ ne Abigẹl nọ sẹtin gu okpia vbenian gha rre owa ọkpa. Ẹkpotọ te kie ne Abigẹl ya lẹẹ fe okpia na ra? Ẹkpotọ te wa kie nẹẹn ya ru vberriọ, vbe Devid nọ khian gha re ọba ọghe Izrẹl, te do gbe ọdafẹn ọnrẹn rua, rhunmwuda nọ na rhovbiẹ e Devid vbe ikpia nọ viọ khian. (1 Sam 25:​9-13) Abigẹl gha te sẹtin wa lẹẹ, ọ ghi sẹ e Devid rae nọ gbe Nabal rua. Sokpan, ọ ma ru vberriọ, ọ keghi rinmwian e Devid nẹ ghẹ gbe Nabal rua. (1 Sam 25:​23-27) Vbọ ya Abigẹl ru ena hia?

10. De emwi ne ima yayi we ọ ru iyobọ ne Abigẹl, nọ ma na sẹ ọdafẹn ọnrẹn rae, uhiẹn vbe ọdafẹn ọnrẹn ma gha yin ẹse?

¹⁰ Abigẹl hoẹmwẹ e Jehova, ọ wa vbe gha hoo nọ rhie owẹ lele uhi ne Jehova yi, nọ dekaẹn  orọnmwẹ. Ẹ i mwẹ ọ ma rẹn vbekpa emwi ne Jehova tama Adam vbe Ivi, vbe ọ rhie Ivi ne Adam zẹvbe ọvbokhan rẹn. (Gẹn 2:24) Abigẹl rẹnrẹn wẹẹ, aro nọ ghaan ẹre Jehova ya ghee orọnmwẹ. Ọ hoo nọ ya ẹko rhiẹnrhiẹn e Jehova, ọ gha kẹ, ọna ẹre ọ gua ẹre kpa, ya hia vbe odẹ ke odẹ nọ ru emwi nọ gha miẹn igiowa ẹre fan, ya sẹ egbe ọdọ ẹre. Ọ keghi zẹ emwi ru vbobọvbobọ, ne Devid ghẹ mieke na gbe Nabal rua. Ọ na wa vbe mu egbe nọ ya rinmwian ye abakuru nọ ma ru. Ọghe ne ẹmwata, e Jehova wa hoẹmwẹ okhuo na, nọ mwẹ udinmwẹ, nọ ma rẹn ọghe enegbe ẹre ọkpa. De emwi ne ọdọ vbe amwẹ gha miẹn ruẹ vbe obọ Abigẹl?

11. (a) De emwi ne Jehova hoo ne avbe ọdọ vbe amwẹ gha ru? (Ẹfisọs 5:33) (b) Vbua miẹn ruẹ vbe odẹ ne Carmen ya hia ne ọfunmwegbe gha rre orọnmwẹ ọghẹe? (Vbe ya ghee efoto.)

¹¹ Emwi ne ima miẹn ruẹ. E Jehova hoo ne emwa ni ru orọnmwẹ nẹ rọnmwẹ egbe sẹ ota, ọ gha khọnrẹn wẹẹ, ọmwa ne iran rọnmwẹ i yin ẹse. Ọ wa ya ẹko rhiẹnrhiẹn e Jehova vbe ọ gha bẹghe ẹre wẹẹ, emwa ni ru orọnmwẹ nẹ hia ne iran dọlọ owa iran yi deghẹ ẹzọ na gha rre otọ, ẹko vbe rhiẹnrhiẹn ọnrẹn vbe iran ghaa mu ọghe ogieva iran karo, iran na vbe gha rhie ọghọ nẹẹn. (Tie Ẹfisọs 5:33.) Gia guan kaẹn igiemwi ọghe Carmen. Vbọ ghi rre odẹ ukpo ehan ne Carmen ru orọnmwẹ, Avbe Osẹe Jehova na suẹn gha ya e Baibol ma ẹre emwi, vbene ẹghẹ ya khian, ọ na dinmwiamẹ. Ọ khare wẹẹ, “Ẹko ma zẹdẹ gha rhiẹnrhiẹn ọdafẹn mwẹ yọ. Ọ na do gha gbọvo e Jehova, ọ na gha dae wẹẹ, ẹghẹ ne I gha te gha loo ne irẹn, ẹre I loo ne Jehova. Ọ ghi rhovbiẹ mwẹ, ọ ghi vbe gha kha wẹẹ, irẹn gha sẹ mwẹ rae.” Ọrheyerriọ, e Carmen ma kpa sẹ ọdọ ẹre rae. Vbe ọwara ukpo 50, te Carmen wa gha rhie ẹre ma wẹẹ, irẹn hoẹmwẹ ọdafẹn irẹn, ọ na vbe gha rhie ọghọ nẹẹn. E Carmen khare wẹẹ: “Vbene ẹghẹ ya gha khian, I na do gha hia ne I gha rẹn vbene emwi ye ọdafẹn mwẹ hẹ, I na vbe gha ya ẹwaẹn gu ẹre guan. Rhunmwuda ne I na rẹn wẹẹ, aro nọ ghaan ẹre Jehova ya ghee orọnmwẹ, I na hia vbene ẹtin mwẹ sẹ ne emwi rhọkpa ghẹ zagha orọnmwẹ ọghe ima. Ẹghẹ ọkpa i rrọọ nọ ya la mwẹ ekhọe ne I sẹ ọdafẹn mwẹ rae, rhunmwuda I hoẹmwẹ e Jehova.” c Ọlọghọmwa gha de rre vbe orọnmwẹ ruẹ, gha mwẹ ilẹkẹtin wẹẹ, e Jehova gha ru iyobọ nuẹn ne u sẹtin zin egbe.

GHẸ SẸ E JEHOVA RAE VBE EGBE GHA WỌỌ RUẸ RHUNMWUDA ABAKURU NE U RU

12. De ọlọghọmwa ne ima gha sẹtin werriẹ aro daa deghẹ ima na ru orukhọ nọ wegbe?

¹² Ọlọghọmwa nọ rrọọ. Egbe sẹtin wa wọọ ima vbe ima gha ru orukhọ nọ wegbe. E Baibol gi ima rẹn wẹẹ orukhọ ọghe ima sẹtin ya iro han  ima. (Psm 51:17) Ọ mwẹ ọtẹn nokpia ọkpa na tie ẹre Robert, ọwara ukpo nibun ẹre ọ ya gha hia nọ mieke na sẹtin suẹn gha ga zẹvbe ọguọmwadia iwinna. Sokpan, ọ keghi ru orukhọ nọ wegbe, ọ na do bẹghe ẹre wẹẹ, emwi ne irẹn ru wa sọnnọ e Jehova. Ọ khare wẹẹ, “Ekhọe mwẹ kegha fi mwẹ uwẹnrhiẹn, iyeke ọni, iro na wa gba mwẹ ẹko hia. I keghi viẹ egbua, I na na erhunmwu gie Jehova. I wa ye yerre wẹẹ, I na gha roro ẹre wẹẹ, e Jehova i khian dọlegbe danmwehọ erhunmwu mwẹ. Vbọzẹ nọ khian na họn erhunmwu mwẹ ugbẹnvbe a miẹn wẹẹ, I ru emwi nọ sa ọrho ye eni ẹnrẹn.” Ma gha ru orukhọ, egbe sẹtin wa wọọ ima, sẹrriọ wẹẹ, ekhọe ima ghi gha tama ima wẹẹ, e Jehova fi iyeke gbe ima nẹ, rhunmwuda ọni, ma ghi gha roro ẹre wẹẹ, esa i ghi rrọọ ne ima khian ya gha gae. (Psm 38:4) Adeghẹ u mwẹ egbe iziro vbenian, u gha wa miẹn emwi ruẹ vbe obọ ọguọmwadia e Jehova ọkpa nọ ma gi egbe wọọ re, agharhemiẹn wẹẹ, ọ ru orukhọ nọ wegbe.

13. De orukhọ nọ wegbe ne ukọ ighẹ e Pita ru, de abakuru eso nọ ru vbe nọ te ru orukhọ nọ wegbe na?

¹³ Igiemwi nọ rre uwu e Baibol. Vbe asọn nọ gbe fi ẹdẹ ne Jesu wu, ukọ ighẹ e Pita keghi ru abakuru nibun nọ yae ru orukhọ nọ wegbe. Vbe okaro, e Pita na rhie ẹre ma wẹẹ, irẹn mu ẹtin yan egbe ẹre, ọ na gha rhuọ wẹẹ, te irẹn khian rhikhan mu Jesu, ọ gha khọnrẹn ne avbe ukọ nikẹre sẹ ẹre rae. (Mak 14:​27-29) Vbe iran rre ogba ọghe Gẹtsẹmani, e Pita ma kue ba odẹ. (Mak 14:​32, 37-41) Iyeke ọni, e Pita na vbe lẹẹ sẹ Jesu rae, vbe emwa rre do mu Jesu. (Mak 14:50) Vbe okiekie, e Pita keghi siẹn Jesu igbaha, ọ na we irẹn ma rẹn ọnrẹn, ọ na kue vẹn ihẹn ye ohoghe nọ ta na. (Mak 14:​66-71) De emwi ne Pita ghi ru, vbe ọ ghi rẹn vbene orukhọ ne irẹn ru na wegbe sẹ hẹ? Emwi nọ sunu na keghi dae, ọ na viẹ egbua, ọ gha kẹ, te ekhọe ẹre ghaa fi ẹre uwẹnrhiẹn. (Mak 14:72) Muẹn roro, vbe nọ gha balọ e Pita hẹ vbe ekhọe vbe ọ họn wẹẹ, a gbe Jesu ne ọsiọre rua. Ẹ i mwẹ ọna ma ya e Pita gha roro ẹre wẹẹ, irẹn i mwẹ esa ne irẹn ye!

14. Vbọ ru iyobọ ne Pita nọ na ye gha ga e Jehova? (Vbe ya ghee efoto.)

¹⁴ Emwi eso rrọọ nọ ru iyobọ ne Pita, nọ na ye gha ga e Jehova. Ọ ma zẹ egbe ẹre hin usun rre; ọ keghi bu etiọnrẹn ne iran gba ga, ẹ i mwẹ iran ma fu ẹre ẹko rre. (Luk 24:33) Vbe deba ọni, e Jesu nọ rhiọ kpaegbe nẹ keghi rhie egbe ma e Pita, ọ gha kẹ, te ọ rhie igiọdu nẹẹn. (Luk 24:34; 1 Kọr 15:5) Ọ ghi zẹ kpẹ, ne Jesu gha te ya gu ọsiọre gui ye emwi nọ ru, ọ na khama rẹn wẹẹ, irẹn gha mu iwinna nọ hin usi nẹẹn. (Jọn 21:​15-17) E Pita rẹnrẹn wẹẹ, orukhọ nọ wegbe ẹre irẹn ru, sokpan ọ na ye gha hia nọ gha ru emwi nọ ya ẹko rhiẹnrhiẹn e Jehova. Vbọzẹ?  Rhunmwuda, ọ ya ekhọe hia yayi wẹẹ, arowa irẹn ighẹ Jesu wa ye hoẹmwẹ irẹn. Etẹn ne iran gba ga wa vbe gha ru iyobọ ne Pita. De emwi ne ima gha miẹn ruẹ vbe igiemwi ọghe Pita?

15. De emwi ne Jehova hoo ne ima ya ekhọe hia yayi? (Psalm 86:5; Rom 8:​38, 39) (Vbe ya ghee efoto.)

¹⁵ Emwi ne ima miẹn ruẹ. E Jehova hoo ne ima ya ekhọe hia yayi wẹẹ, irẹn hoẹmwẹ ima kevbe wẹẹ, irẹn mu egbe ne irẹn ya yabọ ima. (Tie Psalm 86:5; Rom 8:​38, 39.) Ma gha ru orukhọ, ekhọe ima ghi gha fi ima uwẹnrhiẹn. Ọna ma de emwi nọ rhiae. Vbọrhirhighayehẹ, ọ ma khẹke ne ima gha roro ẹre wẹẹ, e Jehova ma ghi hoẹmwẹ ima kevbe wẹẹ, ẹ i khian ghi yabọ ima ẹdẹ. Deghẹ ima na gha mwẹ egbe iziro vbenian, ọ khẹke ne ima nọ iyobọ vbobọvbobọ. E Robert na ka guan kaẹn sin khare wẹẹ: “Emwi nọ ya mwẹ ru orukhọ ọre ne I na gha roro ẹre wẹẹ, I i sẹtin de fi edanmwẹ.” Ọ keghi bẹghe ẹre wẹẹ, ọ khẹke ne irẹn gu ediọn guan vbekpa ẹre. Ọ khare wẹẹ: “Vbe I ghi gu ediọn guan vbekpa ẹre nẹ, orhiọn mwẹ na wa sotọ, iran keghi ru iyobọ mẹ ya bẹghe ẹre wẹẹ, e Jehova gele wa hoẹmwẹ mwẹ. Avbe ediọn wa vbe hoẹmwẹ mwẹ. Iran keghi vbe ru iyobọ mẹ ya bẹghe ẹre wẹẹ, e Jehova ma yangbe mwẹ.” Adeghẹ ima na gele fi werriẹ, ọ khẹke ne ima gha mwẹ ilẹkẹtin wẹẹ, e Jehova ye hoẹmwẹ ima kevbe wẹẹ, ọ yabọ ima nẹ, ọ vbe khẹke ne ima gualọ iyobọ, ma ghi vbe hia ne ima ghẹ dọlegbe ru orukhọ nii. (1 Jọn 1:​8, 9) Ena hia gha ru iyobọ ne ima, ne ima ye gha ga e Jehova vbe ima gha ru orukhọ.

16. Vbọzẹ ne u na hoo ne u ye gha ga e Jehova?

¹⁶ E Jehova wa gbọyẹmwẹ ye ẹrhiọn ne ima loo ya gae vbe ẹghẹ nọ wegbe ne ima ye na. Vbe ẹtin e Jehova, ma gha sẹtin ye gha ga e Jehova vbe ima gha ru abakuru ra vbe emwa gha ru emwi nọ sọnnọ ima. Ma ghi hia ne ima gha rhie ẹre ma vbe ẹghẹ hia we ima hoẹmwẹ etẹn ima, ma ghi vbe gha yabọ iran vbe iran gha ru ima khọọ. Ma ghaa hia ne ima ru adọlọ vbe ima vbe ọmwa ne ima gba ru orọnmwẹ ghaa mwẹ egbe ẹzọ, te ima rhie ẹre ma wẹẹ, ma hoẹmwẹ Osanobua kevbe wẹẹ, ma ya aro nọ ghaan ghee orọnmwẹ. Ma gha ru orukhọ, ọ khẹke ne ima nọ e Jehova nọ ru iyobọ ne ima, deba ọni, ma ghi gha mwẹ ilẹkẹtin wẹẹ, ọ hoẹmwẹ ima kevbe wẹẹ, ọ yabọ ima nẹ, ma ghi vbe hia ne ima ye gha ga e Jehova. Ọ khẹke ne ima ya ekhọe hia yayi wẹẹ, e Jehova gha fiangbe ima, deghẹ ima ma “gi egbe wọọ ima vbọ gha de ọghe emwi esi na ru.”​—Gal 6:9.