1-2. De emwi nọ khẹke ne ọmwa ru vbe nọ te dinmwiamẹ?

 KE UKPO isẹn nọ gberra gha dee, emwa ni he dinmwiamẹ zẹvbe Osẹe Jehova gberra ẹbo ọkpa. Te enibun vbe uwu iran na, yevbe na ghee Timoti, nọ ghaa rrọọ vbe ẹghẹ nẹdẹ, “ke egbe ọvbokhan gha dee” ẹre a ya ma iran ẹmwata nọ rre uwu e Baibol. (2 Tim 3:​14, 15) Eso waan nẹ iran ke do rẹn e Jehova, eso vbe khian ọmaẹn nẹ. Vbe ẹghẹ eso nọ gberra, ọ mwẹ okhuo ọkpa ne Avbe Osẹe Jehova ghaa ma ẹre emwi, ukpo 97 ẹre ọ ya dinmwiamẹ!

² Deghẹ ọmwa na gu ruẹ e Baibol ẹre u khin ra te a biẹ ruẹ ye otu na, u suẹn gha mu egbe nẹ ne u khian ya dinmwiamẹ ra? Emwi esi ẹre u hoo ne u ru! Vbọrhirhighayehẹ, vbene u te dinmwiamẹ, ọ khẹke ne u ka ya egbuẹ fiohan ne Jehova nẹ. Vbe ako iruẹmwi na, ma gha guan kaẹn emwi na yae kha, na ya egbe fiohan ne Jehova. Ọ gha vbe ru iyobọ ne ima, ne ima ya rẹn evbọzẹe nọ ma na khẹke ne ima gha si egbe ghee iyeke, vbe ima gha gele mu egbe nẹ ne ima ya dinmwiamẹ.

VBA YAE KHA NA YA EGBE FIOHAN?

3. Ya unu kaẹn emwa eso ni ya egbe iran fiohan ne Jehova.

³ Vbe Baibol, a gha we ọmwa ya egbe fiohan ne Jehova, ọ rhie ma wẹẹ, ọ mwẹ iwinna ne kpataki nọ khian ru vbe ugamwẹ e Jehova. Agbẹnvbo na ya fiohan ne Jehova ẹre agbẹnvbo ọghe Izrẹl ghaa khin. Sokpan, ọ mwẹ emwa eso na ya fiohan ne Jehova vbe odẹ ne kpataki. Vbe igiemwi, ọ mwẹ “emwi itegbe . . . na gbẹnnẹ emwi yi ya fiohan,” ne Erọn ghaa yọ, emwi itegbe na keghi re igoru nọ fi wainwain nọ rre odaro ukugba nọ mu ye uhunmwu. Emwi itegbe ọghe igoru na rhie ẹre ma wẹẹ, ọ mwẹ iwinna ne kpataki nọ ru vbe ugamwẹ e Jehova zẹvbe  ogie ohẹn ọghe Ivbi Izrẹl. (Lẹv 8:9) Emwa na vbe ya fiohan ne Jehova vbe odẹ ne kpataki ẹre avbe Nazarait ghaa khin. Emwi na yae kha ighẹ ẹmwẹ ọghe Hibru nọ re nazirʹ, na ke zedu “Nazarait” ọre “Ọmwa Na Hannọ Zẹ” ra “Na Ya Fiohan.” Ọ mwẹ emwi eso ne Uhi e Mozis we ne avbe Nazarait ghẹ ru, nọ wa khẹke ne iran rhie owẹ lele.​—Nọm 6:​2-8.

4. (a) U gha ya egbuẹ fiohan ne Jehova, de emwi ne u yan rẹn wẹẹ, u khian ya ẹdagbọn ruẹ ru? (b) Vba yae kha ne ọmwa “mianmian enegbe ẹre”? (Vbe ya ghee efoto.)

⁴ U gha ya egbuẹ fiohan ne Jehova, ọrhuanegbe Jesu ẹre u khian ghi gha khin kevbe wẹẹ, ahoo ọghe Jehova ẹre u khian ghi mu karo vbe ẹdagbọn ruẹ. De emwi ne ọna demu? Jesu khare wẹẹ: “Adeghẹ ọmwaikọmwa hoo nọ lele mwẹ, wẹẹ nọ mianmian enegbe ẹre.” (Mat 16:24) Emwi ọvbehe na vbe yae kha ighẹ ẹmwẹ e Grik na ke zedu “nọ mianmian enegbe ẹre” ọre “ẹ i khian ghi gha ru ọghe enegbe ẹre.” U gha ya egbe fiohan ne Jehova nẹ, u i khian ghi gha ru emwi ke emwi nọ gbodan ghee ahoo ọghẹe. (2 Kọr 5:​14, 15) Ọna rhie ma wẹẹ, u i khian ghi gha ru “emwi ne egbe hoo,” vbe na ghee uyinmwẹ alama oghẹ. (Gal 5:​19-21; 1 Kọr 6:18) Te agbọn khian ghi gha lọghọ ruẹ, rhunmwuda we u gban egbe ne avbe emwi na ra? Ẹo, ẹ i khian lọghọ ruẹ, adeghẹ u na gele hoẹmwẹ e Jehova, u na vbe yayi wẹẹ, avbe ilele ọghẹe gha ya agbọn maan ruẹ. (Psm 119:97; Aiz 48:​17, 18) Ọtẹn nokpia ọkpa na tie ẹre Nicholas khare wẹẹ, “U sẹtin gha ghee avbe uhi ọghe Jehova zẹvbe ogba ọghe eghan nẹi gu ruẹ zẹ obọ zẹ owẹ, ra emwi na ya gbogba ga oduma, nẹ ghẹ mieke na sẹ eke ne u ye.”

5. (a) De vbene ọmwa ya ya egbe fiohan ne Jehova hẹ? (b) De alughaẹn nọ rre a ya egbe fiohan kevbe idinmwiamẹ? (Vbe ya ghee efoto.)

⁵ Vbua khian ya ya egbuẹ fiohan ne Jehova hẹ? U ghi tama rẹn vbe erhunmwu wẹẹ, irẹn ọkpa ẹre u khian gha ga kevbe wẹẹ, ahoo ọghẹe ẹre u khian mu karo vbe ẹdagbọn ruẹ.  U gha ru vberriọ, te u tama e Jehova wẹẹ, “otọ ẹko ruẹ hia, arrọọ ruẹ hia, ekhọe ruẹ hia kevbe ẹtin ruẹ hia” ẹre u khian ya hoẹmwẹ ọnrẹn. (Mak 12:30) Uwẹ ẹre ọ khian tobọ ruẹ na erhunmwu na gie Jehova, ẹ i re emwi na gu ọmwa ru. Sokpan, idagbo ẹre a na dinmwiamẹ; ọna ẹre ọ khian ghi ya emwa rẹn wẹẹ, u ya egbuẹ fiohan ne Jehova nẹ. Eyan ne u ru na, i re na ya ku, rhunmwuda ọni, te ọ khẹke ne u muẹn sẹ; ọna ọre emwi ne Jehova wa gualọ vbe obọ ruẹ.​—Asan 5:​4, 5.

VBỌZẸ NỌ NA KHẸKE NE U YA EGBUẸ FIOHAN NE JEHOVA?

6. De emwi nọ ya ọmwa ya egbe fiohan ne Jehova?

⁶ Ahoẹmwọmwa ẹre ọ wa mobọ re emwi nọ gua ima kpa ya ya egbe fiohan ne Jehova. Ẹ i re te ima wa gheghe hoẹmwẹ e Jehova, sokpan, “ẹwaẹn hia kevbe irẹnmwi ne orhiọn nọhuanrẹn ọghẹe rhie ne ọmwa” ẹre ọ ya ima hoẹmwẹ ọnrẹn. Ọni ọre avbe emwi ne ima ruẹ re vbekpa e Jehova nọ ghi do ya ima hoẹmwẹ ọnrẹn sayọ. (Kọl 1:9) Emwi ne u ruẹ re vbe Baibol keghi do ya ruẹ yayi wẹẹ, (1) e Jehova gele rrọọ, (2) e Jehova ẹre ọ yan e Baibol, kevbe wẹẹ (3) otu ọghẹe ẹre ọ ya ru ahoo ọghẹe vbe ẹdẹnẹrẹ.

7. De emwi eso nọ khẹke ne ima gha ru vbene ima te dinmwiamẹ?

⁷ Ọ khẹke ne emwa ni khian ya egbe fiohan ne Jehova rẹn avbe imamwaemwi nẹi lọghọ na rẹn otọ re, nọ rre uwu e Baibọl, iran ghi vbe gha ya uhi e Jehova ru emwi. Iran keghi hia vbene ẹtin iran sẹ, ne iran gha tama emwa ọvbehe emwi ne iran yayi. (Mat 28:​19, 20) Te ahoẹmwọmwa ne iran mwẹ ne Jehova ghi wegbe, iran vbe ya ekhọe hia yan wẹẹ, e Jehova ọkpa ẹre iran khian gha ga. Ẹ i re erriọ uwẹ  vbe ye? U gha gele hoẹmwẹ e Jehova vbenian, u i khian ye egbuẹ fiohan ne Jehova rhunmwuda wẹẹ, u hoo ne u ya ẹko rhiẹnrhiẹn ọmwa nọ ma ruẹ e Baibol ra evbibiẹ ruẹ; ra rhunmwuda wẹẹ u hoo ne u gua usun ro.

8. Ma ghaa gbọyẹmwẹ ye emwi ne Jehova he ru ne ima, vbọ khian ya ru iyobọ ne ima ya ya egbe fiohan nẹẹn hẹ? (Psalm 116:​12-14)

⁸ U gha gele gha muẹn roro, emwi hia ne Jehova he ru nuẹn, ẹ i re ọmwa ẹre ọ khian tama ruẹ ne u ya egbuẹ fiohan nẹẹn. (Tie Psalm 116:​12-14.) E Baibol khare wẹẹ, obọ e Jehova ẹre “ẹse nọ maan hia kevbe ọhẹ hia nọ gbae” ke rre. (Jems 1:17) Nọ ghi kpọlọ sẹ vbe uwu avbe ẹse na hia, ọre izọese adẹwerriegbe ọghe Ovbi ẹre ighẹ Jesu. Gele muẹn roro! Izọese adẹwerriegbe ẹre ọ zẹe ighẹ u sẹtin gha re ọsie Osanobua, ẹre ọ vbe zẹe ighẹ u ya aro ye arrọọ ọghe etẹbitẹ. (1 Jọn 4:​9, 10, 19) Odẹ ọkpa ne u gha ya rhie ẹre ma wẹẹ, u gbọyẹmwẹ ye emwi hia ne Jehova he ru nuẹn kevbe izọese adẹwerriegbe ọghe Jesu, nọ re ẹse ọhẹ nọ ghi hin usi sẹ, ọre ne u ya egbuẹ fiohan nẹẹn. (Diut 16:17; 2 Kọr 5:15) Iruẹmwi nogie 46 uhunmwu ẹmwẹ 4, vbe ebe na tie ẹre, Sọyẹnmwẹ Arrọọ Vbe Etẹbitẹ! rhan otọ vbene u gha ya sẹtin ru ọna hẹ, u gha vbe miẹn e vidio ọghe ifuanro eha vbe evba, nọ mwẹ uhunmwuta nọ khare wẹẹ, Gha Ya Emwi Ke Emwi Ne U Mwẹ Ru Izọhẹ Gie Osanobua.

U MU EGBE NẸ NE U YA YA EGBUẸ FIOHAN NE JEHOVA, NE U VBE DINMWIAMẸ RA?

9. Vbọzẹ nọ ma na khẹke ne ọmwa gha ya egbe ẹre gie emwa ọvbehe?

⁹ U sẹtin gha roro ẹre wẹẹ, u ma he mu egbe ne u khian ya ya egbuẹ fiohan ne Jehova kevbe ne u dinmwiamẹ. Ọ gha kẹ, ọ mwẹ afiwerriẹ eso nọ khẹke ne u ru, ne u mieke na gha lele ilele ọghe Jehova, ra a sẹtin miẹn wẹẹ, u ye hoo ne amuẹtinyan ruẹ wegbe sẹ vbe nọ ye. (Kọl 2:​6, 7) Emwa hia i re ọkpa, rhunmwuda ọni, emwa eso ne ima gu ruẹ e Baibol sẹtin rherhe gha mwẹ alaghodaro, sokpan eso i yerriọ, emọ hia i vbe re ọkpa, ẹ i re ukpo ne ọna ya dinmwiamẹ ẹre nọkẹre khian vbe ya dinmwiamẹ. Hia ne u rẹn afiwerriẹ eso nọ khẹke ne u ru vbe ẹdagbọn ruẹ, sokpan ghẹ ya egbuẹ gie emwa ọvbehe.​—Gal 6:​4, 5.

10. De emwi nọ khẹke ne u ru adeghẹ u na gha roro ẹre wẹẹ, u ma he ye mu egbe ne u khian ya dinmwiamẹ? (Vbe ya ghee ẹkpẹti nọ khare wẹẹ, “ Emwa Na Koko Vbe Odẹ Ẹmwata.”)

¹⁰ Ọ gha khọnrẹn wẹẹ, u bẹghe ẹre wẹẹ, u ma he mu egbe ne u ya ya egbuẹ fiohan ne Jehova, ghẹ gi egbe wọọ ruẹ, gi ẹre ye gha re emwi ne u hoo ne u ru. Rinmwian e Jehova nọ ru iyobọ nuẹn ya sẹtin ru afiwerriẹ nọ khẹke vbe ẹdagbọn ruẹ. (Fil 2:13; 3:16) Gha mwẹ ilẹkẹtin wẹẹ, e Jehova gha họn erhunmwu ruẹ, ọ ghi vbe ru iyobọ nuẹn.​—1 Jọn 5:14.

EVBỌZẸE NE EMWA ESO NA SI EGBE

11. De vbene Jehova khian ya ru iyobọ ne ima hẹ, ne ima mieke na sẹtin rhikhan muẹn?

¹¹ Emwa eso ni mu egbe ne iran ya ya egbe iran fiohan ne Jehova kevbe ne iran dinmwiamẹ, sẹtin ye gha si egbe. Iran sẹtin gha roro ẹre wẹẹ, ‘I gha ghi ru orukhọ nọ wegbe, a na ghi kan mwẹ fua vbe iko ghi vbo?’ Adeghẹ u na gha mwẹ egbe iziro vbenian, gha mwẹ ilẹkẹtin wẹẹ, e Jehova gha ru iyobọ nuẹn ne u “mieke na gha yin vbe odẹ nọ khẹke emwa [ọghẹe], odẹ vberriọ, [u] ghi gha ya ẹko rhiẹnrhiẹn ọnrẹn ẹsẹsẹmwẹse.” (Kọl 1:10) Ọ gha vbe rhie ẹtin nuẹn, ne u sẹtin gha ru emwi esi. E Jehova ka ru iyobọ vbenian ne emwa ọvbehe nẹ, ọ gha vbe ru ẹre nuẹn. (1 Kọr 10:13) Ọni ẹre ọ si ẹre na na miẹn wẹẹ, ibozẹghẹ emwa ẹre a kan fua vbe iko ọghe Ivbi Otu e Kristi. E Jehova wa ru iyobọ ne emwa rẹn, ne iran mieke na sẹtin mudia ẹse.

12. Vbe ima khian ya sẹtin gban egbe ne orukhọ nọ wegbe?

 ¹² Emwa ni ma gba ẹre ima hia khin, rhunmwuda ọni, ma keghi miẹn edanmwẹ nọ gha sẹtin ya ima ru orukhọ. (Jems 1:14) Sokpan, obọ ima ẹre ọ ye deghẹ ima gha de fi edanmwẹ nii. Ẹmwata nọ rrọọ ọre wẹẹ, uwẹ ẹre ọ khian tobọ ruẹ zẹ ne egbuẹ vbene u khian ya loo ẹdagbọn ruẹ hẹ. Emwa eso sẹtin gha kha wẹẹ, ọmwa i khian sẹtin dia egbe ẹre, ohoghe ọni khin, rhunmwuda u gha sẹtin dia iziro kevbe uyinmwẹ ruẹ. Uhiẹn, iziro dan gha kue la ruẹ ekhọe, u gha ye sẹtin dia egbuẹ, ne u ghẹ ru emwi nii. Ne u mieke na sẹtin ru ọna, te ọ khẹke ne u gha na erhunmwu vbe ẹdẹgbegbe. Gha tie Ẹmwẹ ọghe Osanobua vbe ẹghẹ hia. Gha yo iko. Gha ta emwi ne u yayi ma emwa ọvbehe. U ghaa ru ena hia vbe ẹghẹ hia, ọ gha ru iyobọ nuẹn ya sẹtin rhikhan mu e Jehova, zẹvbe ne u yan rẹn vbe u ya egbuẹ fiohan nẹẹn. Ghẹ vbe mianmian wẹẹ, e Jehova gha ru iyobọ nuẹn.​—Gal 5:16.

13. De igiemwi esi ne Josẹf rhie yotọ ne ima?

¹³ Ẹ i khian lọghọ ruẹ ne u sẹtin rhikhan mu e Jehova, deghẹ u na ka mu egbe ẹre yotọ emwi ne u gha ru, vbe u gha miẹn edanmwẹ. E Baibol gi ima rẹn emwa eso ni rhikhan mu e Jehova, agharhemiẹn wẹẹ, emwa ni ma gba ẹre iran ghaa khin. Vbe igiemwi, ọvbokhan e Pọtifa kegha hia nọ gu e Josẹf ru emwi ọdọ vbe amwẹ. Sokpan, e Josẹf ma zẹdẹ gha gbawawẹ vbekpa emwi nọ khẹke ne irẹn ru. E Baibol gi ima rẹn wẹẹ, e Josẹf “keghi he,” ọ na kha wẹẹ: “Vbia khian ghi gu ru emwi dan vberriọ hẹ yi, ne I fidọn ghee Osanobua?” (Gẹn 39:​8-10) Ọna ya ima rẹn wẹẹ, e Josẹf wa rẹn emwi nọ khian ru nẹ, okhuo na ke do danmwẹ ọnrẹn ghee. Ọna ẹre ọ si ẹre nọ ma na de ye edanmwẹ nii.

14. Vbọ khian ru iyobọ ne ima ya sẹtin gha gban egbe ne emwi nọ sọnnọ e Jehova?

¹⁴ Vbua khian ya ya egbe taa e Josẹf hẹ? U gha sẹtin mu egbe ẹre yotọ nian emwi ne u gha ru, deghẹ u na miẹn edanmwẹ. Hia ne u gha gban egbe ne emwi nọ sọnnọ e Jehova vbobọvbobọ, ghẹ kue zẹdẹ gha muẹn roro. (Psm 97:10; 119:165) Ẹghẹ nii, u gha ghi miẹn edanmwẹ, u i khian deyọ. U ghi rẹn emwi nọ khẹke ya ru, rhunmwuda u ka mu egbe ẹre yotọ nẹ.

15. De vbene ọmwa khian ya rhie ẹre ma hẹ wẹẹ, irẹn “ya ekhọe hia” gualọ e Jehova? (Hibru 11:6)

¹⁵ A sẹtin miẹn wẹẹ, u rẹnrẹn ighẹ u miẹn odẹ ẹmwata nẹ, kevbe wẹẹ, u hoo ne u ya  ekhọe hia ga e Jehova, sokpan, emwi ye rrọọ nọ ya ruẹ si egbe ghee iyeke, ne u ma na hoo ne u dinmwiamẹ. Ghẹ mianmian igiemwi ọghe Ọba ighẹ e Devid. Vbe na ghee Devid, rinmwian e Jehova wẹẹ: “Gualọ otọ mwẹ Osanobua, ne u rẹn vbene ekhọe mwẹ ye hẹ; danmwẹ mwẹ ghee, ne u rẹn iro ekhọe mwẹ. Gualọ otọ ẹre miẹn, a deghẹ emwi dan rre uwu imẹ, ne u su mwẹ la odẹ etẹbitẹ.” (Psm 139:​23, 24) E Jehova keghi fiangbe emwa hia ni “ya ekhọe hia gualọe.” Ne u na hia ne u ya egbuẹ fiohan nẹẹn, keghi rhie ẹre ma wẹẹ, u ya ekhọe hia gualọe.​—Tie Hibru 11:6.

YE GHA SIKẸ E JEHOVA

16-17. De vbene Jehova ya si emwa na koko vbe odẹ ẹmwata kẹ egbe hẹ? (Jọn 6:44)

¹⁶ Jesu khare wẹẹ, emwa ni hoo ne iran gha re erhuanegbe irẹn, e Jehova ẹre ọ si iran kẹ egbe. (Tie Jọn 6:44.) Gele muẹn roro, vbene ọna ya dekaẹn ruẹ hẹ. Ọ mwẹ emwi nọ maan ne Jehova dẹghe vbe egbe dọmwadẹ ima nọ yae si ima kẹ egbe. Ọ ghee dọmwadẹ ima zẹvbe “emwi ewe nọ hin usi” nai sẹtin ya igho dẹ. (Diut 7:6) Aro vberriọ ẹre Jehova ya ghee ruẹ.

¹⁷ A sẹtin miẹn wẹẹ, igbama na koko vbe odẹ ẹmwata na ẹre u khin. U sẹtin gha roro ẹre wẹẹ, rhunmwuda evbibiẹ ruẹ ẹre u na ga e Jehova, ẹ i re te Jehova si ruẹ. Sokpan, e Baibol khare wẹẹ: “Wa sikẹ Osanobua, rẹn gha vbe sikẹ uwa.” (Jems 4:8; 1 Krọ 28:9) U gha zẹ owẹ nokaro ya sikẹ e Jehova, irẹn tobọ irẹn ghi vbe sikẹ ruẹ. E Jehova i wa ghee ruẹ zẹvbe ọkpa vbe emwa rẹn kẹkan. Sokpan, ọ keghi si edọmwadẹ ima kẹ egbe, uhiẹn ya sẹ egbe emwa na koko vbe odẹ ọghe ẹmwata na. Ọmwa vberriọ gha zẹ owẹ nokaro ya sikẹ e Jehova, e Jehova ghi vbe sikẹ ọre, zẹvbe nọ rre ebe Jems 4:8.​—Yae tae 2 Tẹsalonaika 2:13.

18. De emwi ne ima khian guan kaẹn vbe ako iruẹmwi nọ ghi lele ọna? (Psalm 40:8)

¹⁸ U gha ya egbuẹ fiohan ne Jehova, u na vbe dinmwiamẹ, te u ya egbe taa Jesu. Jesu keghi ya ekhọe obọ re ya egbe ẹre fiohan ne Jehova, ọ na vbe mu egbe nọ ya ru emwi ke emwi ne Jehova we nọ ru. (Tie Psalm 40:8; Hib 10:7) Vbe ako iruẹmwi nọ ghi lele ọna, ma gha guan kaẹn emwi nọ gha ru iyobọ ne ima, ne ima mieke na sẹtin ye gha ya ekhọe hia ga e Jehova vbe ima gha dinmwiamẹ nẹ.