1-2. De afiangbe na miẹn vba gha dinmwiamẹ nẹ?

 TE ẸKO wa sẹ ọmwa ọyẹnmwẹ vbe ọmwa gha dinmwiamẹ, ọ ghi vbe do gha re ọkpa vbe ẹgbẹe ọghe Jehova. Egie nọkhua ẹre iran wa ye ne iran na ghi re ọsie Jehova, iran gha wa kue ye emwi ne ọsian ighẹ e Devid tae vbe ọ khare wẹẹ: “Afiangbe ọre ọghe iran ne uwẹ [ne Jehova] hannọ zẹ, ne u vbe viọ gha dee, do dia owa ruẹ nọhuanrẹn ya.”​—Psm 65:4.

² Ẹ i re emwa ne Jehova rhirhi miẹn, ẹre ọ wa viọ gha die owa ẹre. Zẹvbe ne ima ruẹ ọre vbe ako iruẹmwi nọ lae, emwa ni hoo ne iran gha re ọsiọre, ẹre Jehova si kẹ egbe. (Jems 4:8) U gha ya egbuẹ fiohan ne Jehova, u na vbe dinmwiamẹ, u ghi do sikẹ e Jehova vbe odẹ ne kpataki. Ẹghẹ nii, u gha sẹtin gha mwẹ ilẹkẹtin wẹẹ, ọ gha “rhurhẹ afiangbe yan ruẹ, sẹrriọ wẹẹ, u i khian gha vbabọ emwi rhọkpa.”​—Mal 3:10; Jer 17:​7, 8.

3. De emwi kpataki nọ khẹke ne Ivbi Otu e Kristi ni dinmwiamẹ nẹ ru? (Asan-Ibo 5:​4, 5)

³ U gha dinmwiamẹ, te u da wa suẹn gha ga e Jehova. Iyeke ọni, u ghi hia vbe odẹ ke odẹ, ne u muẹn sẹ eyan ne u yan rẹn vbe u ya egbe fiohan ne Jehova, uhiẹn, vbe u gha miẹn edanmwẹ. (Tie Asan-Ibo 5:​4, 5.) Zẹvbe ọrhuanegbe ọghe Jesu, u ghi hia vbe odẹ ke odẹ ne u gha lele igiemwi ne Jesu rhie yotọ, u ghi vbe gha ru emwi nọ we ne ima gha ru. (Mat 28:​19, 20; 1 Pit 2:21) Ako iruẹmwi na, gha ru iyobọ nuẹn ya sẹtin ru ọnọna.

YE “GHA LELE” JESU Ọ GHA KHỌNRẸN WẸẸ U MIẸN EDANMWẸ

4. Vba yae kha, na na we erhuanegbe Kristi mu “erhan irrioya”? (Luk 9:23)

⁴ U gha dinmwiamẹ nẹ, ghẹ gha roro ẹre wẹẹ, u i khian miẹn edanmwẹ. Uhiẹn, e Jesu khare wẹẹ, erhuanegbe irẹn gha mu  “erhan irrioya.” Ọghe ne ẹmwata, “ẹdẹgbegbe” ẹre iran khian ya gha ru ọnọna. (Tie Luk 9:23.) Te Jesu ghi ya ọna kha wẹẹ, te erhuanegbe irẹn khian gha rri oya vbe ẹghẹ hia ra? Hiehie. Sokpan, emwi ne Jesu ya ọna kha ọre wẹẹ, agharhemiẹn wẹẹ, iran gha miẹn afiangbe nibun, iran gha vbe miẹn edanmwẹ. Uhiẹn, iran sẹtin miẹn ọlọghọmwa nọ wegbe.​—2 Tim 3:12.

5. De afiangbe ne Jesu wẹẹ, emwa ni sẹ emwi eso rae rhunmwuda irẹn khian miẹn?

⁵ Ọ gha kẹ, emwa ruẹ vbe uwu ẹgbẹe zẹ ruẹ kpokpo, ra ọ mwẹ emwi eso ne u sẹ rae ne u mieke na sẹtin mu ugamwẹ e Jehova karo. (Mat 6:33) Adeghẹ erriọ nọ, gha mwẹ ọnrẹn vbe orhiọn wẹẹ, e Jehova bẹghe emwi hia ne u he ru ne irẹn. (Hib 6:10) A sẹtin miẹn wẹẹ, ẹmwẹ ne Jesu tae sẹ nẹ vbe egbuẹ, nọ na kha wẹẹ: “Ọmwa rhọkpa i rrọọ nọ sẹ owa rae, ra etẹn nikpia, ra etẹn nikhuo, ra iye, ra erha, ra emọ, ra otọ rhunmwuda mwẹ, kevbe rhunmwuda iyẹn nọ maan, nẹi khian miẹn ena hia werriegbe, igba iyisẹn (100) vbe ẹghẹ na nian​—owa, etẹn nikpia, etẹn nikhuo, iye, emọ, kevbe otọ, vbe uwu ukpokpo​—arrọọ ọghe etẹbitẹ ghi vbe sẹ ọre obọ vbe agbọn nọ dee.” (Mak 10:​29, 30) Ọghe ne ẹmwata, afiangbe ne u he miẹn, sẹ emwi ke emwi ne u he sẹ rae.​—Psm 37:4.

6. Vbọzẹ ne u khian na ye gha gu “emwi ne egbe gualọ” suan vbe u gha dinmwiamẹ nẹ?

⁶ Emwi ọvbehe ne u khian ye gha gu suan vbe u gha dinmwiamẹ nẹ, ọre “emwi ne egbe gualọ.” (1 Jọn 2:16) Rhunmwuda, ọmwa orukhọ ẹre u ye khin. Ugbẹnso, emwi nọ sunu daa e Pọl sẹtin vbe sunu daa ruẹ, e Pọl khare wẹẹ: “Ọghe ne ẹmwata, vbe uwu ekhọe mwẹ, uhi Osanobua te wa yẹẹ mwẹ, sokpan, ọ mwẹ uhi ọvbehe nọ rre uwu egbe mwẹ nọ gu uhi nọ rre ekhọe mwẹ khọn, nọ ghi do ya mwẹ khian ọviẹn ọghe uhi orukhọ nọ rrọ mwẹ egbe.” (Rom 7:​22, 23) Egbe sẹtin vbe wọọ ruẹ, ne u ya hia ne u ghẹ ru orukhọ. Vbọrhirhighayehẹ, u ghaa muẹn roro, eyan ne u yan rẹn vbe u ya egbuẹ fiohan ne Jehova, ọ ghi rhie ẹtin nuẹn ya sẹtin gban egbe ne edanmwẹ. Ẹmwata nọ rrọọ ọre wẹẹ, eyan na gha ru iyobọ nuẹn vbe u gha miẹn edanmwẹ. Odẹ vbo?

7. U gha ya egbe fiohan ne Jehova, vbọ khian ya ru iyobọ nuẹn ya sẹtin rhikhan muẹn hẹ?

⁷ U gha ya egbuẹ fiohan ne Jehova, emwi ne Jehova gualọ ẹre u khian ghi gha ru. Ọna rhie ma wẹẹ, u i khian ghi gha ru emwi ne egbuẹ gualọ, nọ sọnnọ e Jehova. (Mat 16:24) Rhunmwuda ọni, u gha miẹn edanmwẹ, u i khian gha ya urriẹdẹ muẹn roro emwi nọ khẹke ne u ru. Rhunmwuda, u rẹn emwi nọ khẹke ne u ru nẹ, ọni ọre ne u rhikhan muẹn e Jehova. Ẹghẹ nii, emwi rhọkpa i khian ya ruẹ rra uhi e Jehova. Ọ ghaa yerriọ, ọ rhie ma wẹẹ, igiemwi ne Job rhie yotọ ẹre u wa lele. Agharhemiẹn wẹẹ, ọ werriẹ aro daa edanmwẹ nọ wegbe, ọ na ye ya ekhọe hia kha wẹẹ: “I i khian sẹ Osanobua rae!”​—Job 27:5.

8. U ghaa muẹn roro erhunmwu ne u na vbe u ya egbuẹ fiohan ne Jehova, vbọ khian ya ru iyobọ nuẹn ya la edanmwẹ gberra hẹ?

⁸ U ghaa muẹn roro erhunmwu ne u na vbe u ya egbe fiohan ne Jehova, ọ ghi rhie ẹtin nuẹn ya sẹtin la edanmwẹ nọ rhirhi gha khin gberra. Vbe igiemwi, u gha gu okpia ra okhuo nọ ru orọnmwẹ nẹ gbe ọkiẹkiẹ ra? Hiehie. Rhunmwuda u ka tae nẹ vbe ekhọe wẹẹ, u i khian ru egbe emwi vberriọ. Adeghẹ u ma na kue ne iziro dan gbọzinian vbe ekhọe ruẹ, esa i rrọọ ne u khian ya gha hia ne u rhie ẹre hin ekhọe rre. Ẹghẹ nii, u ghi sẹtin “lẹẹ ne . . . ehe ne avbe emwa dan ye.” ​—Itan 4:​14, 15.

9. U ghaa muẹn roro erhunmwu ne u na vbe u ya egbuẹ fiohan ne Jehova, vbọ khian ya ru iyobọ nuẹn ya sẹtin mu ugamwẹ e Jehova karo hẹ?

⁹ Adeghẹ iwinna ne u miẹn i khian kie ẹkpotọ nuẹn ya gha yo iko vbe ẹghẹ hia ghi vbo?  Ọ gha sunu vberriọ, u rẹn emwi nọ khẹke ne u ru nẹ. Vbene u te miẹn iwinna vberriọ, u ka tae nẹ vbe ekhọe wẹẹ, u i khian ru egbe iwinna vberriọ. Ẹghẹ nii, u i khian gha roro ẹre wẹẹ, u gha sẹtin ru iwinna nii, ne u vbe mu ugamwẹ e Jehova karo. U gha muẹn roro vbene Jesu ya hia vbe odẹ ke odẹ nọ gha ru emwi nọ yẹẹ Erhae, ọ gha ru iyobọ nuẹn ne u sẹtin gban egbe ne emwi ke emwi nọ sọnnọ Osanobua vbobọvbobọ, rhunmwuda, irẹn ẹre u ya egbe fiohan na.​—Mat 4:10; Jọn 8:29.

10. De vbene Jehova khian ya ru iyobọ nuẹn, ne u mieke na ye “gha lele” Jesu vbe u gha dinmwiamẹ nẹ?

¹⁰ Ẹmwata nọ rrọọ ọre wẹẹ, edanmwẹ keghi kie ẹkpotọ nuẹn ya rhie ẹre ma wẹẹ, u hoo ne u ye “gha lele” Jesu. E Jehova gha wa fiangbuẹ zẹvbe ne u ya hia ne u ye gha lele Jesu. E Baibol khare wẹẹ: “Ọmwa nọ gia mu ẹtin yan ẹre Osanobua khin, ẹ i khian kue ne uwa miẹn edanmwẹ ne uwa i khian sẹtin zin egbe ẹre. Sokpan, vbe uwu edanmwẹ nii, ọ gha vbe kie odẹ ne uwa, ne uwa mieke na sẹtin zin egbe ẹre.”​—1 Kọr 10:13.

EMWI NỌ GHA RU IYOBỌ NUẸN NE U MIEKE NA YE GHA LELE JESU

11. De ọkpa vbe usun odẹ nọ ghi maan sẹ, ne u gha ya sẹtin gha lele Jesu? (Vbe ya ghee efoto.)

¹¹ Jesu ma zẹdẹ gha ye iwinna ugamwẹ ọghẹe ku, erriọ wa vbe ya gha na erhunmwu gie Jehova vbe ẹghẹ hia. (Luk 6:12) Ọghe ne ẹmwata, odẹ ọkpa nọ ghi maan sẹ ne u gha ya sẹtin gha lele Jesu, ọre ne u ye gha ru emwi nọ gha ya ruẹ sikẹ e Jehova sayọ. E Baibol khare wẹẹ: “Vbene ima he mwẹ alaghodaro sẹ na, wa gi ima ye rhie owẹ lele ukpowẹ ne ima la dee sin.” (Fil 3:16) Ke ẹghẹ ya fi ẹghẹ, ẹ i mwẹ u ma họn okha ọghe etẹn ni ru emwamwa eso, ne iran mieke na sẹtin ru sayọ vbe ugamwẹ e Jehova. Ọ gha kẹ, iran yo Owebe Ọghe Etẹn Ni Kporhu Iyẹn Nọ Maan Ọghe Arriọba ra iran si gha rrie  eke na na gualọ iyobọ etẹn. Adeghẹ u gha sẹtin fian okhuo vberriọ ne egbuẹ, hia ne u ru vberriọ. Te ọ wa gbe emwa ọghe Osanobua otiti ne iran ru sayọ vbe ugamwẹ e Jehova. (Iwinna 16:9) Adeghẹ ẹkpotọ ma he kie nuẹn ya ru sayọ vbe ugamwẹ e Jehova ghi vbo? Ghẹ gha roro ẹre wẹẹ, emwa ni sẹtin ru sayọ vbe ugamwẹ e Jehova maan sẹ ruẹ. Zẹvbe Ivbi Otu e Kristi, izinegbe keghi re emwi nọ wa ru ekpataki vbe ẹdagbọn ima. (Mat 10:22) Ghẹ mianmian wẹẹ, u ghaa hia vbene ẹtin ruẹ sẹ vbe ugamwẹ e Jehova, ẹko ghi gha rhiẹnrhiẹn e Jehova. Ọna keghi re odẹ ọkpa nọ ru ekpataki, ne u khian ya sẹtin ye gha lele Jesu vbe u gha dinmwiamẹ nẹ.​—Psm 26:1.

12-13. Vbọ khẹke ne u ru, adeghẹ u na bẹghe ẹre wẹẹ, u i ghi zọghae vbe ugamwẹ e Jehova? (1 Kọrint 9:​16, 17) (Vbe ya ghee ẹkpẹti nọ khare wẹẹ, “ Rhulẹ Sẹ Ufomwẹ.”)

¹² Vbọ khẹke ne u ru adeghẹ a na miẹn wẹẹ, erhunmwu ne u na i re nọ ke ekhọe rre ra u i ghi sọyẹnmwẹ iwinna ikporhu ọghuẹ? Adeghẹ a na vbe miẹn wẹẹ, u i ghi sọyẹnmwẹ e Baibol na tie ghi vbo? Emwi vbenian gha sunu vbe u gha dinmwiamẹ nẹ, ghẹ gha roro ẹre wẹẹ, orhiọn nọhuanrẹn ọghe Jehova i ghi gu ruẹ rrọọ. Emwa ni ma gba ẹre ima hia khin, kevbe wẹẹ, ẹ i re vbene emwi ye ima hẹ vbe ẹrẹna, ẹre ọ khian gha ye vbe akhuẹ. Adeghẹ u na bẹghe ẹre wẹẹ, u i ghi zọghae vbe ugamwẹ e Jehova, hia ne u gha mu igiemwi ọghe ukọ e Pọl roro. Agharhemiẹn wẹẹ, ọ hia re nọ gha ya egbe tae Jesu, ọ rẹnrẹn wẹẹ, ẹghẹ eso rrọọ ne irẹn i khian ya gha mwẹ aguakpa. (Tie 1 Kọrint 9:​16, 17.) Ọ khare wẹẹ: “Sokpan, adeghẹ I na ru ẹre, ọ gha khọnrẹn wẹẹ ọ ma ke ekhọe mwẹ rre, emwi nọ khẹke ne I ru nọ, rhunmwuda, iwinna na mu yọ mwẹ obọ nọ.” Ọna rhie ma wẹẹ, vbene emwi rhirhi de hẹ, te Pọl wa mu egbe nọ ya ru iwinna ugamwẹ ọghẹe, ọ gha khọnrẹn na miẹn wẹẹ, ọ mwẹ vbene emwi ye ẹre hẹ.

 ¹³ Erriọ vbe ye, ghẹ gi vbene emwi ye ruẹ hẹ, ya ruẹ ru azẹ nọ ma khẹke. Tama egbuẹ wẹẹ, u gha ru emwi nọ khẹke, ọ gha khọnrẹn wẹẹ, ẹ i te rrọọ ruẹ ekhọe. Adeghẹ u na gha hia ne u gha ru emwi nọ khẹke vbe ẹghẹ hia, vbene ẹghẹ ya khian, vbene u ya ghee emwi ghi do gha fi werriẹ. Rhunmwuda ọni, hia ne u gha ruẹ emwi ne egbuẹ, gha na erhunmwu, gha yo iko vbe ẹghẹ hia, u vbe gha kporhu, ena hia gha ru iyobọ nuẹn ne u ye gha lele Jesu vbe u gha dinmwiamẹ nẹ. Ọ gha wa vbe rhie igiọdu ne etẹn, vbe iran gha bẹghe vbene u ya rhiegba ye ugamwẹ e Jehova hẹ.​—1 Tẹs 5:11.

“WA YE GHA GUALỌ OTỌ EGBE UWA GHEE . . . WA GHI YE GHA HIA NE UWA RẸN ARO ỌMWA NE UWA GELE KHIN”

14. Vbọ khẹke ne u gha mu ukpa mu uwerhẹn ghee vbe ẹghẹ hia, kevbe wẹẹ vbọzẹ? (2 Kọrint 13:5)

¹⁴ Ọ gha wa ru iyobọ nuẹn, deghẹ u na gha hia vbe ẹghẹ hia ne u gualọ otọ egbuẹ ghee vbe u gha dinmwiamẹ nẹ. (Tie 2 Kọrint 13:5.) Ke ẹghẹ ya fi ẹghẹ, hia ne u mu ukpa mu uwerhẹn ghee ẹdagbọn ruẹ kevbe emwi ne u ru, ne u mieke na gele rẹn, deghẹ u na erhunmwu vbe ẹdẹgbegbe, deghẹ u ruẹ e Baibol ne egbuẹ, kevbe deghẹ u yo iko kevbe ikporhu. Hia ne u gualọ emwi ne u gha ru, nọ gha ya ruẹ gha sọyẹnmwẹ avbe emwi na sunu yi na, ne u vbe gha miẹn ere vbọ. Vbe igiemwi, u sẹtin nọ egbuẹ wẹẹ: ‘I gha sẹtin rhan otọ imamwaemwi ni rre Baibol, nẹi lọghọ na rẹn otọ re ma emwa ọvbehe ra? Emwi eso rrọọ ne I gha ru ra, nọ gha ya mwẹ gha sọyẹnmwẹ iwinna ikporhu iyẹn nọ maan ra? Erhunmwu nọ ke ekhọe rre ẹre imẹ na ra, erhunmwu ne I na vbe rhie ẹre ma wẹẹ, I ya ekhọe hia mu ẹtin yan e Jehova ra? I yo iko vbe ẹghẹ hia ra? Vbia khian ru ne I mieke na gha danmwehọ ẹse vbe I ghaa rre iko kevbe ne I vbe gha zẹ ewanniẹn?’

15-16. Vbua miẹn ruẹ vbe okha ọghe ọtẹn nokpia ọkpa vbe nọ dekaẹn na gha lẹẹ ne edanmwẹ?

¹⁵ Ọ vbe khẹke ne u rẹn ako ne u i na hia. Igiemwi ọghe ọtẹn nokpia ọkpa na tie ẹre Robert wa gi ima rẹn evbọzẹe ne ọna na ru ekpataki, ọ khare wẹẹ: “Vbe I rre ukpo 20, I kegha ru iwinna ọghe ovbi ẹghẹ kherhe. Vbe ima ghi zobọ nẹ vbe iwinna vbe ẹdẹ ọkpa, ọvbokhan okhuo ọkpa ne ima gba winna keghi tama mwẹ ne I gha die owa irẹn. Ọ na tama mwẹ wẹẹ, mẹ vbe irẹn ọkpa ẹre ọ khian gha rre owa, kevbe wẹẹ, ma gha wa sọyẹnmwẹ egbe ima. Vbe okaro, vbe ọwara uzọla eso, I na ka gha tama rẹn wẹẹ, I i khian miẹn obọ ya rre. Sokpan vbe okiekie, I na tama rẹn wẹẹ, I i rre, I na vbe gi ẹre rẹn evbọzẹe ne I na kha vberriọ.” E Robert keghi sẹtin la edanmwẹ na gberra,  ma wa tian ẹnrẹn. Sokpan, ọ ghi ya mu emwi nọ sunu nii roro, ọ na do bẹghe ẹre wẹẹ, ọ mwẹ odẹ ọvbehe nọ maan sẹ, ne irẹn gha te ya lae. Ọ khare wẹẹ: “I ma wa ya ekhọe hia tama rẹn vbobọvbobọ nii wẹẹ, I i khian rre, zẹvbe ne Josẹf lẹẹ ne ọvbokhan e Pọtifa. (Gẹn 39:​7-9) Uhiẹn, ọ wa kpa mwẹ odin wẹẹ, ọ ma khuẹrhẹ mẹ ya tama rẹn wẹẹ, I i khian rre. Emwi nọ sunu na ya mwẹ rẹn wẹẹ, ọ khẹke ne I sikẹ e Jehova sayọ.”

¹⁶ A sẹtin miẹn wẹẹ, u gha miẹn ako nọ khẹke ne u winna yan, adeghẹ u na mu ukpa mu uwerhẹn ghee egbuẹ vbene Robert ru ẹre. Uhiẹn, u gha ghi sẹtin la edanmwẹ gberra nẹ, nọ egbuẹ wẹẹ, ‘Ọ ghaa khuẹrhẹ mẹ ne I sẹtin la edanmwẹ nii gberra ra?’ U na bẹghe ẹre wẹẹ, ako rrọọ nọ khẹke ne u winna yan, ghẹ gi egbe wọọ ruẹ. Nọghayayerriọ, gha ghọghọ wẹẹ, u sẹtin rẹn ako ne u na vburriẹ. Muẹn ye erhunmwu, u vbe gha hia ne u gha ru emwi nọ gha yae gha khuẹrhẹ nuẹn, ne u gha ya ilele ọghe Jehova ru emwi.​—Psm 139:​23, 24.

17. Ne Robert na sẹtin mudia ẹse, de vbe nọ ya kaan eni e Jehova hẹ?

¹⁷ Emwi ọvbehe ye rrọọ ne ima gha miẹn ruẹ vbe obọ e Robert. Ọ khare wẹẹ: “Vbe I ghi sẹtin tama ọmọ okhuo nii ne ima gba winna wẹẹ, I i khian rre, ọ na tama mwẹ wẹẹ, ‘Te I we ne I wa danmwẹ ruẹ ghee, sokpan u ma deyọ!’ I na ghi nọ rẹn emwi nọ ya ẹmwẹ nii kha. Ọ na ghi khama mwẹ wẹẹ, ọse irẹn ọkpa tama irẹn wẹẹ, avbe igbama ni re Osẹe Jehova keghi lẹre ru emwi dan vbe ẹkpotọ gha kie ne iran. Ẹre ọ na ghi tama ọsiọre nii wẹẹ, irẹn gha danmwẹ mwẹ ghee. Ẹko keghi wa sẹ mwẹ ọyẹnmwẹ wẹẹ, I ma sa ọrho ye eni e Jehova.”

18. De emwi ne u hoo ne u ru vbe u gha dinmwiamẹ nẹ? (Vbe ya ghee ẹkpẹti nọ khare wẹẹ, “ Uhunmwuta Ne U Gha Wa Sọyẹnmwẹ Ọnrẹn.”)

¹⁸ U gha ya egbe fiohan ne Jehova, u na vbe dinmwiamẹ, te u rhie ẹre ma wẹẹ, u gha hia vbe odẹ ke odẹ ne u ghẹ sa ọrho ye eni e Jehova. Kọe ye orhiọn wẹẹ, e Jehova rẹn ọlọghọmwa ra edanmwẹ ne u la gberra. Ọ gha fiangbuẹ deghẹ u na sẹtin rhikhan muẹn. Gha mwẹ ilẹkẹtin wẹẹ, ọ gha ya orhiọn nọhuanrẹn ọghẹe ru iyobọ nuẹn. (Luk 11:​11-13) Vbe ẹtin e Jehova, u gha sẹtin ye gha lele Jesu vbe u gha dinmwiamẹ nẹ.