1, 2. (a) De emwi ne Jesu tama erhuanegbe ẹre vbe asọn nokiekie nọ gbe vbe agbọn? (Ghee efoto nọ rre omuhẹn.) (b) Vbọzẹe ne ọ na khẹke ne ima kọe ye orhiọn evbọzẹe ne ima na gele kporhu? (c) De emwi ne ima khian ziro yan vbe ako iruẹmwi na?

VBE asọn nokiekie ne Jesu gbe vbe agbọn, ẹghẹ nọ taẹn ẹre Jesu ya gu erhuanegbe ẹre guan. Ọ na gi iran rẹn wẹẹ irẹn gele hoẹmwẹ iran. Ọ na vbe zẹ erre ọghe erhan azara ma iran zẹ vbene ima miẹn ọnrẹn vbe ako iruẹmwi nọ gberra. Jesu keghi ya erre nii rhie igiọdu ne erhuanegbe ẹre ne iran kakabọ gha mọ ọmọ erhan, ọni nọ wẹẹ, ne iran gha ya izinegbe kporhu iyẹn nọ maan.—Jọn 15:8.

² E Jesu keghi tama erhuanegbe ẹre emwi ne iran gha ru, kevbe evbọzẹe ne ọ na khẹke ne iran ru ẹre. Ọ keghi gi iran rẹn evbọzẹe ne ọ na khẹke ne iran gha kporhu iyẹn nọ maan. Nọnaghiyerriọ, te ọ khẹke ne ima kọe ye orhiọn evbọzẹe ne ima na gele kporhu, rhunmwuda, ọna gha ya ima gha mwẹ ọghae vbe iwinna ikporhu iyẹn nọ maan nọ khian vbe “otọ agbọn hia.” (Mat 24:13, 14) Vbe ako iruẹmwi na, ma gha ziro yaẹn adia enẹ nọ rre Baibol, nọ rhiẹre ma wẹẹ te ọ khẹke ne ima ye gha kporhu iyẹn nọ maan. Ma gha vbe guan kaẹn emwi enẹ ne Jehova ya wee ima, nọ ru iyobọ ne ima ya gha ya izinegbe mọ ọmọ erhan.

3. (a) Vbọ ya ima kporhu, zẹvbe nọ rre ebe Jọn 15:8? (b) Vbe erre ọghe Jesu, de emwi ne avbe alimo mudia yi? Vbọzẹe ne a gha na kha wẹẹ igiemwi na gbe ye uviẹn?

³ Evbọ wa mobọ zẹe ne ima na kporhu iyẹn nọ maan ọre wẹẹ, ọ rhie uyi ne Jehova, ọ vbe ya eni ẹnrẹn khian nọhuanrẹn. (Tie Jọn 15:1, 8.) Yerre wẹẹ, vbe erre ọghe ọkemwiokọ, e Jehova keghi mudia ye ọmwa nọ yan ugbo alimo, Jesu na gha re erhan azara vbene erhuanegbe ẹre na gha re abọ re. (Jọn 15:5) Vbe erre na, alimo keghi mudia ye ọmọ erhan ne ehuanegbe Jesu mọ ra iwinna ikporhu iyẹn nọ maan ne iran ru. Jesu keghi gi erhuanegbe ẹre rẹn wẹẹ, iran ghaa mọ ọmo erhan, ẹre iran na rhie uyi gie Erha irẹn. Vbene ọyẹnmwẹ ya sẹ ọgbugbo vbe emwiokọ ọghẹe ghaa maan, erriọ iwinna ikporhu iyẹn nọ maan ne ima ya ekhọe hia rhiegbe yi vbe ya ya ẹko rhiẹnrhiẹn e Jehova.—Mat 25:20-23.

4. (a) De odẹ ne ima ya kpe eni Osanobua huan? (b) Vbọ ye hẹ vbe ekhọe ruẹ ne u na mwẹ ọghae vbe iwinna nọ ya eni Osanobua khian nọ huanrẹn?

⁴ De odẹ ne iwinna ikporhu iyẹn nọ maan ya kpe eni Osanobua huan? Vbene ẹmwata, eni nọ ghi huan sẹ eni hia ọre eni Osanobua. Ẹi ima ẹre ọ khian yae khian nọhuanrẹn. Akhasẹ ighẹ Aizaia keghi kha wẹẹ: “Yerre wẹẹ mẹ ne Nọyaẹnmwa ne Udazi, ọmwa nọhuanrẹn ọre imẹ khin.” (Aiz 8:13) Odẹ ọkpa ne ima ya ya eni Osanobua khian nọhuanrẹn ọre ne ima na ghee ẹre zẹvbe eni nọ hiunsi sẹ eni hia kevbe ne ima na gi emwa ọvbehe rẹn wẹẹ, eni Osanobua ẹre ọ gele huan sẹ eni hia. (Mat 6:9) Vbe igiemwi, ma ghaa tama emwa ọvbehe ẹmwata vbekpae Jehova, nọ dekaẹn akpa esiesi nọ mwẹ kevbe emwamwa nọ mwẹ ne emwa nagbọn, te ima sinmwi oseghe ne eni Osanobua, te ima vbe rhiẹre ma wẹẹ, ohoghe ẹre Esu bae Jehova re vbe ogba ọghe Idẹni. (Gẹn 3:1-5) Ma ghaa hia vbene ẹtin ima sẹ, ne ima gi emwa rẹn wẹẹ, e Jehova “sẹe ne ọ gha miẹn uyi kevbe ọghọ, kevbe ẹtin,” te ima ya eni ẹnrẹn khian nọ huanrẹn. (Arhie 4:11) Ukpo 16 ọre ye na ne ọtẹn nokpia Rune ke ru arọndẹ. Ọ keghi kha wẹẹ: “Ọ keghi re ukpamuyọmọ nọ hiunsi ne I na re ọsosẹ ọghe Ayi nọ yi agbọn yi ẹrinmwi. Ọna ẹre ọ zẹe ne I na rhiegba ye iwinna ikporhu iyẹn nọ maan.”

5. (a) Zẹvbe nọ rre ebe Jọn 15:9, 10, vbọzẹe ne ima na kporhu? (b) De vbene Jesu ya nianiaẹn ma erhuanegbe hẹ wẹẹ, te ọ khẹke ne iran gha mwẹ ẹbo izinegbe?

⁵ Tie Jọn 15:9, 10. Emwi nogieva nọ ya ima kporhu iyẹn nọ maan ọre ne ima na ya ekhọe hia hoẹmwẹ Jehova kevbe Jesu. (Mak 12:30; Jọn 14:15) Jesu keghi tama erhuanegbe ẹre ne iran gha “rre uwu ahoẹmwọmwa” ọghe irẹn. Vbọzẹe ne Jesu na kha vberriọ? Rhunmwuda, ne erhuanegbe Jesu mieke na sẹtin musọe, te ọ khẹke ne iran gha mwẹ ẹbo izinegbe. Ọna ẹre ọ zẹe ne Jesu na nianiaẹn inugba nọkhin vbe ebe Jọn 15:4-10 ne erhuanegbe ẹre gha “rre uwu ahoẹmwọmwa” ọghe irẹn.

6. De vbene ima khian ya gha rhiẹre ma wẹẹ, ma hoo ne ima gha rre uwu ahoẹmwọmwa ọghe Kristi?

⁶ De vbene ima khian ya gha rhiẹre ma wẹẹ, ma hoo ne ima gha rre uwu ahoẹmwọmwa ọghe Kristi, ne ima mieke na gha mwẹ akueyi ọghẹe? Ma ghi gha lele adia ọghẹe, ọni nọ wẹẹ, ma gha re emwa ni họn ẹmwẹ zẹvbe ne Jesu vbe họn ẹmwẹ ne erhae. E Jesu keghi kha wẹẹ: “Wa gha da uhi mwẹ yi, wa ghi gha rre uwu ahoẹmwọmwa mwẹ zẹ vbene imẹ da uhi Erha mwẹ yi ne imẹ na vbe gha rre uwu ahoẹmwọmwa rẹn.”—Jọn 13:15.

7. De vbene ahoẹmwọmwa ya kaẹn a họn ẹmwẹ hẹ?

⁷ E Jesu gi ima rẹn wẹẹ, ọmwa nọ họn  ẹmwẹ ne irẹn ẹre ọ gele hoẹmwẹ irẹn. Ọna ẹre ọ zẹe ne ọ na kha wẹẹ: “Ọmwa ne ọ rhirhi rhan obọ miẹn uhi mwẹ, ọ na vbe yae gha ru emwi, rẹn ọrọre ọmwa ne ọ hoẹmwẹ mwẹ.” (Jọn 14:21) E Jesu ẹre ọ waa ima iwinna ikporhu iyẹn nọ maan. Ma ghaa lele iyi na, te ima rhiẹre ma wẹẹ, ma hoẹmwẹ Erhae rhunmwuda, obọ Erhae ẹre iyi na ke rre. (Mat 17:5; Jọn 8:28) Ma ghaa ru ọna, e Jehova kevbe Jesu vbe gha rhiẹre ma wẹẹ, iran gele hoẹmwẹ ima.

8, 9. (a) De emwi ọvbehe nọ ya ima kporhu? (b) Vbọzẹe ne ẹmwẹ nọ rre ebe Ẹzikiẹl 3:18, 19 kevbe 18:23 na gu ima kpa ya kporhu?

⁸ Emwi nogieha nọ ya ima kporhu iyẹn nọ maan ọre wẹẹ, ma hoo ne ima ya obọ sekhae ne emwa rhunmwuda ẹdẹ ibuohiẹn sẹ otọ nẹ. E Baibol gi ima rẹn wẹẹ, erriọ e Noa vbe ya “kpe orhu” ma emwa vbe ẹghẹ nẹdẹ. (Tie 2 Pita 2:5.) Vbe ima ya rẹn hẹ? Rhunmwuda emwi ne Jesu khare: ‘Zẹvbe ne a miẹn wẹẹ, ọ te do sẹ ẹghẹ uromwẹ amẹ, emwa kegha re, iran na gha da, ikpia kevbe ikhuo na gha rọnmwẹ egbe, rhinrin ya sẹ ikpẹdẹ ne Noa la okọ zẹẹ. Iran ma rẹn enaye uromwẹ amẹ te do kpolo ehia gha rrie. Erriọ khian gha ye vbe Ovbi Ọmwa gha rre.’ (Mat 24:38, 39) Agharhemiẹn wẹẹ, emwa ma rhie ehọ ne Noa taa yi vbe ẹghẹ nii, te ọ ye gha ya igiuhunmwu ọghe ayobọsekhae wewe.

⁹ Evbọzẹe ne ima na kporhu iyẹn nọ maan vbe ẹdẹnẹrẹ, ọre wẹẹ, ma hoo ne emwa do rẹn emwamwa ne Osanobua mwẹ ne emwa nagbọn. Zẹvbe na ghee Jehova, ma hoo ne emwa miẹn odẹ ọghe ẹmwata yi, ne iran mieke na “diagbọnya.” (Ẹzik 18:23) Ne ima na kporhu iyẹn nọ maan, te ima kie ẹkpotọ ne emwa nibun ya do rẹn wẹẹ, Arriọba Osanobua sikẹ otọ nẹ kevbe wẹẹ, ọ gha do guọghọ agbọn Esu ne ima ye na.—Ẹzik 3:18, 19; Dan 2:44; Arhie 14:6, 7.

10. (a) Zẹ vbe nọ rre ebe Matiu 22:39, vbọzẹe ne ima na kporhu? (b) Ya unu kaẹn vbene Pọl vbe Sailas ya ru iyobọ ne eseghan vbe Filipai.

¹⁰ Emwi nogienẹ nọ ya ima ya izinegbe kporhu ọre ne ima na mwẹ ahoẹmwọmwa daa ogieva ima. (Mat 22:39) Ahoẹmwọmwa na, ẹre ọ ya ima mwẹ izinegbe vbe iwinna ikporhu iyẹn nọ maan. Vbọzẹe? Rhunmwuda ma rẹnrẹn wẹẹ, emwi gha fiwerriẹ vbe arrọọ ọghe emwa eso ne ẹi ka danmwehọ, iran sẹtin suẹn gha danmwehọ. Vbe igiemwi, ẹvbo ne a tie ẹre Filipai ẹre eghian na filo Pọl vbe Sailas fi eghan. Ọ ghi rre ogiasọn, igbohiotọ keghi mu ehe hia weghe vbe eghan nii, serriọ wẹẹ, urho hia na kie ye otọ. Ohan kegha mu eseghan wẹẹ, avbe oleghan lẹfua nẹ. Rhunmwuda ọni, te ọ khian ghi te gbe egbe ẹre rua, vbe Pọl go tie ẹre wẹẹ: “Ghẹ kuan egbuẹ, ma hia rre emwa!” Evba nii eseghan na nọ rẹn wẹẹ: “De emwi ne I gha ru ne I miẹn ehe na miẹn imiẹnfan?” E Pọl vbe Sailas na ghi tama rẹn wẹẹ: “Ya Nọyaẹnmwa Jesu Kristi yi,” u gha miẹn fan.—Iwinna 16:25-34.

11, 12. (a) Vbe ima miẹn ruẹ vbe okha ọghe eseghan? (b) Vbọzẹe ne ọ na khẹke ne ima rhiegba ye iwinna ikporhu iyẹn nọ maan?

¹¹ De vbene okha na ya kaẹn iwinna ikporhu ọghomwa hẹ? Yẹrẹro wẹẹ, vbe iyeke igbohiotọ nii, ẹre eseghan nii na fiwerriẹ.  Erriọ emwa nibun vbe ye vbe ẹdẹnẹrẹ, emwi nọ wegbe gha sunu daa iran, iran ghi suẹn gha danmwehọ. A sẹtin miẹn wẹẹ te a rhie iran obọ sotọ vbe iwinna, ọ sẹtin vbe gha re orhikhan ọghe orọnmwẹ nọ zaghae, emianmwẹ nọ wegbe ra uwu ọghe ọmwa ne iran hoẹmwẹ ọnrẹn. Emwi vbenian keghi ya iro han ọmwa. Ọ ghi ya emwa eso gha nọ ọta ne iran ma he ka nọ ẹdẹ. Iran sẹtin nọ wẹẹ, ‘Vbe arrọọ a demu? De emwi ne I gha ru ne I mieke na miẹnfan?’ Ma gha miẹn emwa vbenian vbe ikporhu, iran sẹtin danmwehọ iyẹn nọ maan vbe ẹghẹ okaro vbe arrọọ ọghe iran.

¹² Nọnaghiyerriọ, ma gha ya ekhọe hia rhiegba ye iwinna ikporhu iyẹn nọ maan, ẹre ima khian na sẹtin rhie ifuẹko ne iran vbe ẹghẹ ne iran ya gualọe zẹẹ. (Aiz 61:1) Ukpo 38 ẹre ọ he ye na, ne ọtẹn nokhuo Charlotte kegha rre iwinna ugamwẹ ẹghẹ hia. Ọ keghi kha wẹẹ: “Te emwa nibun wa bibi odẹ vbe ẹdẹnẹrẹ. Te ọ khẹke ne iran họn iyẹn nọ maan ọghe Arriọba.” Ejvor, nọ he gbe ukpo 34 vbe iwinna arọndẹ na vbe kha wẹẹ: “Vbe ẹdẹnẹrẹ, te iro ghi wa han emwa nibun. Ẹi erriọ ka ye. I gele hoo ne I ru iyobọ ne iran. Ọna ẹre ọ gua mwẹ kpa ya kporhu.” Vbene ẹmwata, ahoẹmwọmwa ne ima mwẹ dae ogieva ima wa sẹ ne ima na ya izinegbe kporhu.

13, 14. (a) De ẹse ọhẹ ne a guan kaẹn vbe ebe Jọn 15:11? (b) De vbene ọyẹnmwẹ nọ sẹ Jesu khian ya gha sẹ ima hẹ? (c) De vbene ọyẹnmwẹ nọ sẹ otọ ẹko ya ru iyobọ ne ima hẹ vbe iwinna ikporhu iyẹn nọ maan?

¹³ Vbe asọn nokiekie ne Jesu gbe vbe agbọn, ọ keghi ya unu kaẹn ẹse ọhẹ eso ni gha ya erhuanegbe ẹre gha mwẹ izinegbe vbe iwinna ikporhu iyẹn nọ maan. De ẹse ọhẹ ne a guan kaẹn na? De afiangbe ne ima gha miẹn vbọ?

¹⁴ Ẹse ọhẹ ọghe ọyẹnmwẹ. Iwinna nọkhua ne ima i sẹtin ru ra nọ wọọ ọmwa egbe ẹre iwinna ikporhu khin ra? Hiehie! Jesu ghi ze erre ọghe erhan azara nẹ, ọ na tama erhuanegbe ẹre wẹẹ, ọyẹnmwẹ ẹre ọ khian gha sẹ iran vbe iwinna ikporhu iyẹn nọ maan. (Tie Jọn 15:11.) Ọ keghi rhie ilẹkẹtin ne iran wẹẹ, ọyẹnmwẹ nọ sẹ irẹn ẹre ọ khian vbe gha sẹ iran. De odẹ nọkhin? Yerre wẹẹ, vbe erre ne Jesu tae, irẹn keghi mudia ye erhan azara, erhuanegbe ẹre na gha re abọ re. Erhan ẹre abọ erhan ke zọ ladian, nọnaghiyerriọ, inian erhan ẹre amẹ ke lae abọ erhan. Erriọ vbe ye ne ima ne Ivbiotu e Kristi. Ma ghaa lele ukpowẹ ọghe Kristi, ma ghi vbe gha sọyẹnmwẹ vbe ugamwẹ Osanobua zẹvbe na ghee Jesu. (Jọn 4:34; 17:13; 1 Pit 2:21) Ọ gberra ukpo 40 ne Hanne ke ru iwinna arọndẹ. Ọ keghi kha wẹẹ: “Ọyẹnmwẹ nọ sẹ mwẹ vbe ẹghẹ ke ẹghẹ ne I ya yo ikporhu i gia gie. Ọna ẹre ọ zẹe ne I na rhiegba ye ugamwẹ e Jehova.” Vbene ẹmwata, ọyẹnmwẹ nọ sẹ otọ ẹko keghi re usun emwi nọ zẹe ighẹ orhiọn i gbe ye ima iwu vbe iwinna ikporhu iyẹn nọ maan, uhiẹn vbe ima ghaa werriẹ aro daa isievẹn vbe ako ne ima na kporhu.—Mat 5:10-12.

15. (a) De ẹse ọhẹ ne ebe Jọn 14:27 guan kaẹn? (b) De vbene ọfunmwegbe ya ru iyobọ ne ima hẹ vbe iwinna ikporhu iyẹn nọ maan?

¹⁵ Ẹse ọhẹ ọghe ọfunmwegbe. (Tie Jọn 14:27.) Vbe asọn nokiekie ne Jesu gbe vbe agbọn, ọ na vbe tama erhuanegbe ẹre wẹẹ: “Ọfunmwegbe mwẹ ọre I ya we uwa.” De iyobọ ne ọfunmwegbe ọghe Kristi ye ne ima vbe iwinna ikporhu iyẹn nọ maan? Zẹ vbene ima ya ya izinegbe kporhu iyẹn nọ maan, ma keghi mwẹ ọyẹnmwẹ nọ sẹ otọ ẹko rhunmwuda ne ima na rẹn wẹẹ, ima ya ẹko rhiẹnrhiẹn e Jehova kevbe Jesu. (Psm 149:4; Rom 5:3, 4; Kọl 3:15) Ọtẹn nokpia Ulf, nọ he gbe ukpo 45 vbe iwinna ugamwẹ ọghe ẹghẹ hia keghi kha wẹẹ: “Iwinna ikporhu iyẹn nọ maan keghi ya egbe wọọ mwẹ, ọrheyerriọ, ọ keghi re iwinna nọ ya mwẹ sọyẹnmwẹ kevbe wẹẹ, te arrọọ mwẹ ghi mwẹ evbọ demu.” Ma kpọnmwẹ e Jehova ye ẹse ọhẹ ọghe ọfunmwegbe ne ọ ya wee ima.

16. (a)  De ẹse ọhẹ ne ebe Jọn 15:15 guan kaẹn? (b) De emwi nọ khẹke ne avbe ukọ gha ru, ne iran mieke na ye gha re ọsie Jesu?

 ¹⁶ Ẹse ọhẹ nọkhua nọ ne ima na re ọsie Jesu. Jesu ghi tama erhuanegbe ẹre nẹ wẹẹ irẹn hoo ne ọyẹnmwẹ nọ sẹ iran “gha re nọ sẹ otọ ẹko,” ọ keghi gi iran rẹn evbọzẹe ne ọ na khẹke ne iran gha mwẹ ahoẹmwọmwa ne ẹi re ọghe ọkẹnrẹn. (Jọn 15:11-13) Vbe iyeke ọni, Jesu na vbe khama iran wẹẹ: “Ọse mwẹ ọre I ghi tie uwa ẹre.” Vbene ẹmwata, na do gha re ọsie Jesu keghi re ẹse ọhẹ nọ hiunsi! Sokpan, vbọ khẹke ne avbe ukọ e Jesu gha ru, ne iran mieke na ye gha re ọsie ọre? Te ọ khẹke ne iran gha “mọ ọmọ” erhan. (Tie Jọn 15:14-16.) Vbe Jesu da suẹn gha kporhu, ọ na tama erhuanegbe ẹre ne iran ya kporhu wẹẹ: “Arriọba ẹrinmwi sẹ otọ foo.” Ukpo eva ghi gberra nẹ, ọ na wẹẹ ne iran gha mọ ọmọ erhan. (Mat 10:7) Ọ ghi rre asọn nokiekie ne ọ gbe vbe agbọn, ọ na ghi tama iran ne iran ya izinegbe gha winna iwinna ne irẹn mu ye iran obọ. (Mat 24:13; Mak 3:14) Sokpan, iwinna na i re nọ khẹkhẹ hiehie. Ọrheyerriọ, iran gha sẹtin musọe. Ne iran mieke na sẹtin musọe, ọ mwẹ ẹse ọhẹ ọvbehe nọ gha ru iyobọ ne iran.

17, 18. (a) De ẹse ọhẹ ne a guan kaẹn vbe ebe Jọn 15:16? (b) De vbene ẹse ọhẹ na ya ru iyobọ ne erhuanegbe Jesu hẹ? (c) De vbene ọ ya ru iyobọ ne ima hẹ vbe ẹdẹnẹrẹ?

¹⁷ Ẹse ọhẹ nọkhua nọ ne Osanobua na họn erhunmwu ne ima na. Jesu keghi kha wẹẹ: “Emwi ne uwa a rhirhi nọ Erha re vbe eni mwẹ, ọ gha rhie ẹre ne uwa.” (Jọn 15:16) Umiẹn vbene eyan na gha rhie igiọdu ne erhuanegbe Jesu hẹ! * Vbe ẹghẹ na kha na, erhuanegbe Jesu ma rẹn wẹẹ ọvbi ẹghẹ kherhe ẹre ọ ghi kẹ ne Jesu wu, sokpan iran gha miẹn iyobọ. E Jehova mu egbe ne ọ ya họn erhunmwu ne iran rhirhi gha na nọ dekaan iwinna ikporhu iyẹn nọ maan ọghe Arriọba. Asẹ nii, ẹre Jehova ya gele ru iyobọ ọyunnuan ne iran.—Iwinna 4:29, 31.

¹⁸ Erriọ vbe ye ne ima vbe ẹdẹnẹrẹ. Ma gha rhiegba ye iwinna ikporhu iyẹn nọ maan, ma vbe gha re ọsie Jesu. Yevbesọni, ma vbe gha mwẹ ilẹkẹtin wẹẹ, e Jehova mu egbe ne ọ ya ru iyobọ ne ima vbe ima gha werriẹ aro daa isievẹn vbe iwinna ikporhu iyẹn nọ maan. (Fil 4:13) Ọ keghi sẹ ima ọyẹnmwẹ ne ima na re ọsie Jesu kevbe ne Osanobua na họn erhunmwu ima. Afiangbe nọkhua na khin! Avbe ẹse ọhẹ na ẹre ọ ya ima mwẹ ẹbo izinegbe vbe iwinna ikporhu iyẹn nọ maan.—Jems 1:17.

19. (a) Vbọzẹe ne ima na ye kporhu iyẹn nọ maan? (b) Ne ima mieke na sẹtin ru iwinna ne Osanobua waa ima re sẹ ufomwẹ, vbọ khian ru iyobọ ne ima?

¹⁹ Vbe ako iruẹmwi na, ma ziro yan emwi enẹ nọ ya ima kporhu iyẹn nọ maan: ọ rhie uyi gie Jehova, ọ vbe ya eni ẹnrẹn khian nọhuanrẹn, odẹ ne ima ya rhiẹre ma nọ wẹẹ, ma hoẹmwẹ Jesu kevbe Erhae, odẹ ne ima ya ya obọ sekhae ne emwa nọ kevbe wẹẹ, ọ vbe rhiẹre ma wẹẹ, ma hoẹmwẹ ogieva ima. Ma vbe ruẹ vbekpae ẹse ọhẹ enẹ, ni ru iyobọ ne ima ya rhiegba ye iwinna ikporhu: ẹse ọhẹ ọghe ọyẹnmwẹ, ọfunmwegbe, ne ima na re ọsie Jesu kevbe ọghe erhunmwu ne Jehova họn. Vbene ẹmwata, ọyẹnmwẹ keghi wa sẹ e Jehova vbe ima ghaa ya ekhọe hia mọ ọmọ erhan.