1. Vbene Pita te wu, de emwi ne Jehova loo ẹre ya ru?

 UKỌ e Pita rẹnrẹn wẹẹ irẹn gha rherhe wu. Ọwara ukpo nibun ẹre ọ ya ga e Jehova, ọ deba Jesu winna, ọ kporhu vbe eke na ma he ka kporhu sẹ, ọ na vbe ga zẹvbe ọkpa vbe ẹbu nọ su. Sokpan, iwinna ọghe Pita ma he ye fo. Vbe odẹ ukpo 62-64 C.E., e Jehova na loo ẹre ya gbẹn elẹta eva—ọni ọre ebe 1 Pita kevbe 2 Pita. E Pita kegha mwẹ ọnrẹn vbe ekhọe wẹẹ, ebe eva na gha ru iyobọ ne Ivbi Otu e Kristi, uhiẹn vbe irẹn gha wu nẹ.—2 Pit 1:12-15.

2. Vbọzẹ na gha na sẹtin kha wẹẹ te ebe ne Pita gbẹn wa rre ye ẹghẹ?

² Ẹghẹ ne etẹn na “gha mwẹ ẹkorriaramwẹ . . . , rhunmwuda edanmwẹ ughughan” ne iran ghaa werriẹ aro daa, ẹre ukọ e Pita ya gbẹn elẹta eva nọ gbẹn. (1 Pit 1:6) Emwa dan na gha hoo ne iran ya imamwaemwi ohoghe mu etẹn rẹrẹ kevbe ne iran vbe gha yin uyinmwẹ nọ ma huan vbe uwu iko. (2 Pit 2:1, 2, 14) Ivbi Otu e Kristi ni ghaa rre Jerusalẹm gha rherhe miẹn “ufomwẹ emwi hia”—ọni ọre vbene ivbiyokuo e Rom khian ya guọghọ e Jerusalẹm hẹ, kevbe ọgua Osa nọ rre evba. (1 Pit 4:7) Ẹ i mwẹ avbe elẹta ne Pita gbẹn na ma ru iyobọ ne Ivbi Otu e Kristi ya zin egbe ọlọghọmwa ne iran ghaa ye, ọ ghi vbe mu iran egbe khẹ avbe ọlọghọmwa ni dee vbe odaro. b

3. Vbọzẹ nọ na khẹke ne ima gha tie ebe eva ne Pita gbẹn?

³ Agharhemiẹn wẹẹ, avbe etẹn ni ghaa rrọọ vbe ẹghẹ ọghe avbe ukọ, ẹre Pita gbẹn avbe elẹta na gie, e Jehova keghi rhie ẹre ba  ebe ni rre Baibol. Ebe ne Pita gbẹn gha vbe sẹtin ru iyobọ ne ima vbe ẹdẹnẹrẹ. (Rom 15:4) Agbọn nọ vuọn ne uyinmwẹ ọrhiae ẹre ima sẹ fi, ma vbe miẹn ọlọghọmwa ughughan nọ yae lọghọ ne ima sẹtin gha ga e Jehova. Deba ọni, ma gha rherhe werriẹ aro daa orueghe nọkhua, ọ gha kue wegbe sẹ ne Ivbi e Ju werriẹ aro daa vbe ẹghẹ na ya guọghọ e Jerusalẹm. Ma gha wa miẹn emwi ne kpataki ruẹ vbe nọ dekaẹn ọnọna vbe ebe eva ne Pita gbẹn. Avbe ebe na gha ru iyobọ ne ima, ya rhie aro ye odẹ gha khẹ ẹdẹ ọghe Jehova, ne ohan emwa nagbọn ghẹ gha mu ima kevbe ne ima gha mwẹ ahoẹmwọmwa nọ wegbe ne emwa hia. Ọ gha vbe ru iyobọ ne ediọn ya rẹn vbene ọ khẹke ne iran ya gha gbaroghe etẹn ni rre uwu iko, ne iran sẹtin mudia ẹse.

4. Zẹvbe nọ rre ebe 2 Pita 3:3, 4, de emwi nọ gha sẹtin ya ima gha gbawawẹ?

⁴ Emwa ni ma ya ẹmwẹ akhasẹ ni rre Baibol yi ẹre ọ lẹga ima. Emwa sẹtin gha zaan ima, rhunmwuda wẹẹ, ọ kpẹẹ re ne ima ghi ya aro yọ wẹẹ, agbọn na gha sẹ ufomwẹ. Emwa eso kue kha wẹẹ ufomwẹ na i khian rre. (Tie 2 Pita 3:3, 4.) Adeghẹ emwa ne ima kporhu ma, emwa ne ima gba winna, ra emwa ima vbe uwu ẹgbẹe, na gha ta egbe ẹmwẹ vbenian, ọ sẹtin do ya ima gha gbawawẹ. Ọ ghaa yerriọ emwi ne Pita tae gha ru iyobọ ne ima.

5. Vbọ khian ru iyobọ ne ima ya zin egbe khẹ ẹghẹ ne Jehova khian ya mu agbọn dan na sẹ ufomwẹ? (2 Pita 3:8, 9)

⁵ Emwa eso keghi roro ẹre wẹẹ, te Jehova ghi si obọ ghee iyeke nọ ya guọghọ agbọn dan na. Sokpan ẹmwẹ ne Pita tae ru iyobọ ne ima ya rẹn wẹẹ, vbene Jehova ya ka ẹghẹ wa kakabọ lughaẹn ne ọghe emwa nagbọn. (Tie 2 Pita 3:8, 9.) Nọ ne Jehova, te ukpo arriaisẹn ọkpa yevbe ikpẹdẹ ọkpa vbe aro ọre. E Jehova mwẹ izinegbe, ọ ma hoo ne ọmwa rhọkpa fuan. Sokpan, ọ gha sẹ ẹdẹ ne Jehova mwamwa yọ, ọ gha do mu ufomwẹ ye agbọn dan na. U miẹn uyi nọ mu ye ima egbe, ne ẹkpotọ na kie ne ima ya kporhu ma emwa ughughan, vbe ovbi ẹghẹ kherhe nọ ghi kẹ na.

6. Vbe ima khian ya rhie ẹdẹ ọghe Jehova “ye ekhọe” hẹ? (2 Pita 3:11, 12)

⁶ E Pita keghi rhie igiọdu ne ima, ne ima “rhie ẹre ye ekhọe” ẹdẹ ọghe Jehova. (Tie 2 Pita 3:11, 12.) Odẹ vbo? Ọ khẹke ne ima hia ne ima gha muẹn roro vbe ẹdẹgbegbe, avbe afiangbe ne ima khian sọyẹnmwẹ ọnrẹn vbe agbọn ọgbọn. Muẹn roro zẹvbe ne u ya hiọnrọn ẹhoho nọ hianrẹn, vbe u rri evbare ne egbe rran rẹn, vbe u gbe ọbokhian ne emwa na huẹn kpaegbe, u na vbe gha ma emwa ni ghaa rrọọ vbe ẹghẹ nọ kpẹẹ re vbene ẹmwẹ akhasẹ ni rre Baibol ya mwẹ amusẹ. U ghaa mu ena roro, ọ gha ru iyobọ nuẹn ya rhie aro ye odẹ gha khẹ ẹdẹ ọghe Jehova, u ghi vbe gha mwẹ ilẹkẹtin wẹẹ, ẹdẹ okiekie ma gele ye. Ne ima na ghi ‘rẹn nẹ nian’ wẹẹ ena hia gha sunu vbe odaro, emwa ni ma emwa ohoghe i khian sẹtin “bibi [ima] odẹ.”—2 Pit 3:17.

7. Ma ghaa mu ohan emwa nagbọn, de emwi nọ gha sẹtin si ye ima egbe?

⁷ Zẹvbe ne ima ya zin egbe khẹ ẹdẹ ọghe Jehova, erriọ ima vbe ya kporhu ma emwa ọvbehe. Sokpan, vbe ẹghẹ eso, ọ sẹtin gha lọghọ ima ne ima ya kporhu ma emwa. Vbọzẹ? Rhunmwuda, ohan emwa nagbọn sẹtin gha mu ima. Emwi vbenian wa vbe sunu daa e Pita. Vbe asọn na bu ohiẹn gbe Jesu, e Pita ma sẹtin rhie egbe ẹre ladian zẹvbe ọrhuanegbe Jesu, ọ na kue siẹn Jesu igbaha gbalaka! (Mat 26:69-75) Sokpan vbọ ghi zẹ kpẹẹ, e Pita ma ghi gha mu ohan, ọ na kue gbẹn gie etẹn wẹẹ: “Uwa ghẹ mu ohan emwi ne iran mu ohan rẹn, uwa ghẹ vbe gi emwi rhọkpa kpokpo uwa orhiọn.” (1 Pit 3:14) Ẹmwẹ ne Pita tae na, ya ima rẹn wẹẹ, ima gha sẹtin gha mwẹ udinmwẹ, ọ gha khọnrẹn wẹẹ, ima ka mu ohan emwa nagbọn.

8. Vbọ khian ru iyobọ ne ima, ne ima ghẹ gha mu ohan emwa nagbọn? (1 Pita 3:15)

 ⁸ Vbọ khian ru iyobọ ne ima, ne ima ghẹ mieke na gha mu ohan emwa nagbọn? E Pita khare wẹẹ: “Wa gha ya ọghọ ne Kristi vbe uwu ekhọe uwa.” (Tie 1 Pita 3:15.) Ọni nọ wẹẹ, te ọ khẹke ne ima gha ye egbe ima ẹre rre wẹẹ, Jesu ọre Nọyaẹnmwa kevbe Ọba ọghomwa kevbe wẹẹ, ọ wa vbe kakabọ mwẹ ẹtin. Adeghẹ ohan na gha mu ruẹ, ne u ya kporhu ma ọmwa vbe ẹkpotọ gha kie nuẹn, yerre wẹẹ Jesu ọre Ọba ruẹ. Muẹn roro wẹẹ, ọ tota ye ẹkete gha khavbisẹ vbe ẹrinmwi, vbene ọkhọngborrie odibosa na lẹga ẹre. Ghẹ mianmian wẹẹ, e Jesu mwẹ “asẹ hia ni rre ẹrinmwi kevbe agbọn na” kevbe wẹẹ ọ gu ima “rrọọ vbe ẹghẹ hia, rhinrin ya sẹ ufomwẹ agbọn.” (Mat 28:18-20) E Pita keghi rhie igiọdu ne ima, ne ima “mu egbe vbe ẹghẹ hia” ne ima ya sinmwi oseghe ne emwi ne ima yayi. U gha hoo ne u kporhu ma ọmwa vbe isiwinna, owebe, ra ẹghẹ ke ẹghẹ ne ẹkpotọ ya kie ra? Ka muẹn roro nẹ, ẹghẹ nọ khẹke ne u gha ya sẹtin ru vberriọ, u ghi vbe mu egbe emwi ne u khian ta yotọ. Na erhunmwu ne Osanobua rhie udinmwẹ nuẹn, u ghi vbe gha mwẹ ilẹkẹtin wẹẹ, e Jehova gha ru iyobọ nuẹn ne u ghẹ gha mu ohan emwa nagbọn.—Iwinna 4:29.

9. De asẹ ọkpa ne Pita ma ya rhie ahoẹmwọmwa ma? (Ghee efoto nọ rre ipapa 28.)

⁹ E Pita wa ruẹ vbe na ya rhie ahoẹmwọmwa  ma hẹ. Ọ ghaa rre evba, vbe Jesu khare wẹẹ: “Uhi ọgbọn ne I khian gbe ne uwa nian ọre wẹẹ, uwa gha hoẹmwẹ egbe; zẹvbe ne I hoẹmwẹ uwa, uwa ghi vbe gha hoẹmwẹ egbe vberriọ.” (Jọn 13:34) Ọrheyerriọ, vbe asẹ ọkpa, rhunmwuda ohan Ivbi e Ju nọ ghaa mu e Pita, ọ ma gu etẹn nẹi re Ivbi e Ju rri evbare. Ukọ e Pọl keghi gi e Pita rẹn wẹẹ, “uyinmwẹ okeke” ẹre ọ yinrin na. (Gal 2:11-14) E Pita keghi miẹn adia na yi, ọ na vbe ya abakuru nọ ru wan ne egbe. Vbe ebe eva nọ gbẹnnẹ, e Pita keghi nianniaẹn wẹẹ, ọ khẹke ne ima gha rhie ẹre ma wẹẹ, ma gele hoẹmwẹ etẹn ima, ẹ i re ne ima gha ya unu tae kẹkan.

10. Vbọ khian ru iyobọ ne ima ya gha mwẹ “ahoẹmwọmwa nẹi re ọghe okpunu” daa etẹn ima? Rhan otọ re. (1 Pita 1:22)

¹⁰ E Pita wẹẹ, ne ima gha mwẹ “ahoẹmwọmwa nẹi re ọghe okpunu” daa etẹn ima. (Tie 1 Pita 1:22.) Ma gha sẹtin rhie egbe ahoẹmwọmwa vbenian ma, adeghẹ ima na gha “ya imamwaemwi ọghe ẹmwata ru emwi.” Ọkpa vbe usun imamwaemwi na kha na ọre wẹẹ, “aro ọkpa ẹre Osanobua ya ghee emwa hia.” (Iwinna 10:34, 35) Ma i khian sẹtin kha wẹẹ, ma lele iyi ọghe Jesu nọ dekaẹn ahoẹmwọmwa, adeghẹ a na miẹn wẹẹ, emwa eso ẹre ima hoẹmwẹ ọnrẹn vbe iko, ne ima gha te ya hoẹmwẹ emwa hia. Vbene ẹmwata, ma gha sikẹ etẹn eso sẹ etẹn ọvbehe, zẹvbe nọ vbe gha ye ne Jesu. (Jọn 13:23; 20:2) Sokpan, e Pita ye ima ẹre rre wẹẹ, ọ khẹke ne ima gha mwẹ agiẹngiẹn daa etẹn hia, egbe agiẹngiẹn ne emwa vbe uwu ẹgbẹe mwẹ ne egbe.—1 Pit 2:17.

11. Vba yae kha na na wẹẹ, ne ima “hia vbe odẹ ke odẹ ne [ima] ya ekhọe hia hoẹmwẹ egbe”?

¹¹ E Pita rhie igiọdu ne ima, ne ima “hia vbe odẹ ke odẹ ne [ima] ya ekhọe hia hoẹmwẹ egbe.” Nọ na wẹẹ ne ima “hia vbe odẹ ke odẹ” rhie ma wẹẹ, te ima gha loo ẹrhiọn ne ima ya hoẹmwẹ emwa ọvbehe, uhiẹn deghẹ ọ na gha lọghọ ne ima ru vberriọ. Vbe igiemwi, gia kha wẹẹ, ọtẹn ru emwi nọ daa ima sẹ ugboloko. Emwi nọ khian gha rre ima ekhọe vbe ẹghẹ nii, ọre ne ima ru ẹre werriegbe, ẹ i re na rhie ahoẹmwọmwa ma. Sokpan, e Pita ruẹ ọre vbe obọ e Jesu wẹẹ, ma ghaa rria ikhi ne egbe ima, ẹ i ya ẹko rhiẹnrhiẹn Osanobua. (Jọn 18:10, 11) E Pita khare wẹẹ: “Wa ghẹ ya ọkhọ ha osa ọkhọ, ra na ya ihẹn ha osa ihẹn, sokpan wa gha ya erhunmwu afiangbe ha osa.” (1 Pit 3:9) Gi ahoẹmwọmwa nọ wegbe gua ruẹ kpa ya gha ya obọ esi mu emwa ni ru ruẹ khọọ, u ghi vbe gha mwẹ amuroro daa iran.

12. (a) Ma gha ya ekhọe hia hoẹmwẹ etẹn ima, de odẹ ọvbehe nọ gha ya sẹtin ru iyobọ ne ima? (b) De emwi ne u gha hia ne u gha ru, zẹvbe nọ rre vidio na, Preserve the Precious Gift of Unity?

¹² Vbe ebe nokaro ne Pita gbẹn, ọ keghi gi ima rẹn wẹẹ, ma gha “ya ekhọe hia hoẹmwẹ egbe,” ọ ghi ru iyobọ ne ima ya yabọ emwa vbe iran gha ru “orukhọ nibun” ghee ima. (1 Pit 4:8) Ọ gha kẹ, te Pita ya yerre, emwi ne Jesu ma re vbekpa ayabọ vbe ukpo nibun nọ gberra. Vbe ẹghẹ nii, e Pita na gha roro ẹre wẹẹ, ọmwa esi ẹre irẹn wa khin, adeghẹ irẹn na yabọ ọtẹn irẹn “igba ihinrọn.” Sokpan, e Jesu keghi ma e Pita kevbe ima hia fẹẹrẹ re wẹẹ, “igba ehairrọvbiyenẹ” ẹre ọ khẹke ne ima ya gha yabọ ọtẹn ima, ọni nọ wẹẹ, ẹ i mwẹ eke nọ sẹ. (Mat 18:21, 22) Adeghẹ ọ lọghọ ne u sẹtin lele adia na, ghẹ gi egbe wọọ ruẹ! Ọ zẹdia lọghọ ima hia, ne ima ya yabọ emwa ọvbehe. Emwi nọ ru ekpataki sẹ ọre wẹẹ, ọ khẹke ne u zẹ owẹ nọ khẹke nian, ne u yabọ ọtuẹn, ne u vbe gu ẹre ru adọlọ. c

13. De emwi eso nọ gha sẹtin yae gha lọghọ ne ediọn sẹtin gha gbaroghe etẹn ni rre iko?

¹³ E Pita ma mianmian ẹmwẹ ne Jesu tama rẹn, vbọ ghi rhiọ kpaegbe nẹ, Jesu keghi tama  rẹn wẹẹ: “Gha gbaroghe avbe ohuan mwẹ ne giẹrẹ.” (Jọn 21:16) Adeghẹ ọdiọn ẹre u khin, u rẹnrẹn wẹẹ, ẹmwẹ na wa vbe kaan ruẹ. Ọghe ne ẹmwata, ọ sẹtin gha lọghọ ne ediọn miẹn ẹghẹ ya gha ru iwinna ne kpataki na. Vbe okaro, te ọdiọn gha kpemehe ne ẹgbẹe ọre, ọ ghi hia ne ẹkun sẹ iran otọ, ọ ghi vbe gha ru iyobọ ne iran ya sikẹ e Jehova. Ediọn ẹre ọ vbe mu asanikaro vbe iwinna ikporhu, iran ghi vbe do mu egbe ọta na rhie ne iran vbe iko, asikoko nekherhe kevbe asikoko nọkhua. Ediọn eso vbe rre ugha na tie ẹre Hospital Liaison Committee, eso vbe winna lele Local Design/Construction Department. Vbene ẹmwata, iwinna ọrhẹnrhẹn ẹre ọ rre ediọn urhu!

14. De emwi nọ gha ru iyobọ ne ediọn ya gha gbaroghe ohuan ọghe Osanobua? (1 Pita 5:1-4)

¹⁴ E Pita keghi rhie igiọdu ne ediọn wẹẹ, “Wa gha gbaroghe avbe oghẹn ohuan ne Osanobua viọ ne uwa.” (Tie 1 Pita 5:1-4.) Adeghẹ ọdiọn ẹre u khin, ma rẹnrẹn wẹẹ, u hoẹmwẹ etẹn ni rre iko, u wa vbe hoo ne u gbaroghe iran. Vbọrhirhighayehẹ, ugbẹnso, rhunmwuda vbene iwinna ya bun vbe obọ ruẹ ra rhunmwuda wẹẹ egbe wọọ ruẹ, u sẹtin gha roro ẹre wẹẹ, u i khian miẹn obọ ya gha ru iwinna ediọn. Ọ ghaa yerriọ, vbọ khẹke ne u ru? Fannọ otọ ẹko ruẹ ma e Jehova. E Pita khare wẹẹ: “We ne ọmwaikọmwa nọ guan gha guan vbe odẹ nọ gha rhie ẹre ma wẹẹ, ẹmwẹ nọ ke obọ Osanobua rre ẹre ọ ta.” (1 Pit 4:11) Ọlọghọmwa ne etẹn eso mwẹ i khian sẹtin fo vbe agbọn Esu na. Sokpan yerre wẹẹ, Jesu Kristi nọ re “ogiete iran ne avbe ọsuohuan” gha sẹtin ru iyobọ ne etẹn, gberra vbene uwẹ gha ya sẹtin ru iyobọ ne iran. Ọ gha sẹtin ru iyobọ ne iran nian, ọ gha vbe ru iyobọ ne iran vbe agbọn ọgbọn. Emwi ne Osanobua gualọ vbe obọ avbe ediọn, ọre ne iran hoẹmwẹ etẹn, ne iran gha rhie igiọdu ne iran kevbe ne iran vbe gha re “igiemwi esi ne avbe oghẹn ohuan.”

15. De vbene ọdiọn ọkpa ya gbaroghe ohuan ọghe Jehova hẹ? (Ghee efoto nọ rre ipapa 30.)

¹⁵ Ọtẹn nokpia na tie ẹre William, nọ ga zẹvbe ọdiọn vbe ọwara ukpo nibun gha dee nian, wa rẹn vbene ọ ru ekpataki hẹ, na gha rhie igiọdu ne etẹn. Vbe COVID-19 ghi suẹn, irẹn kevbe ediọn ọvbehe na ghi wẹẹ, te iran khian gha hia ne iran sẹtin gha nọ ẹmwẹ etẹn ni rre ẹbu ọghe iran vbe uzọla uzọla. Ọtẹn na keghi rhan otọ evbọzẹe, ọ wẹẹ: “Etẹn ima nibun i mwẹ ọmwa nọ gu iran rre owa, rhunmwuda ọni, zẹvbe ne iran ya roro iro, iziro nọ ma gba sẹtin wa la iran ekhọe.” Ọtẹn ghaa mwẹ ọlọghọmwa, e William ghi fẹko gbehọkotọ gha danmwehọ ọtẹn na, nọ  mieke na rẹn vbe nọ gha ya sẹtin ru iyobọ nẹẹn hẹ. Iyeke ọni, ọ ghi ya gualọ ebe ra e vidio vbe wẹbsait ọghomwa, nọ gha rhie igiọdu ne ọtẹn na. E William keghi kha wẹẹ: “Ẹghẹ na, ẹre ọ khẹke na ya gha nọ ẹmwẹ etẹn, a ghi vbe gha rhie igiọdu ne iran. Ẹ i ẹrhiọn nekherhe ma loo ya ru iyobọ ne emwa ya do rẹn e Jehova; ẹrhiọn vberriọ ẹre ọ khẹke ne ima ne ediọn gha loo, na sẹtin ru iyobọ ne ohuan ọghe Jehova, ne iran ye gha rre odẹ ẹmwata na.”

16. De odẹ eso ne ima gha ya sẹtin zẹ owẹ lele emwi ne ima miẹn ruẹ vbe ebe eva ne Pita gbẹn?

¹⁶ Kherhe ẹre ima guan kaẹn, vbe usun emwi nibun ne ima gha miẹn ruẹ vbe ebe ne Pita gbẹn. Ọ gha kẹ, ako eso rrọọ ne u na ghee ẹre wẹẹ, ọ khẹke ne u gha mwẹ alaghodaro. Vbe igiemwi, u gha hoo ne u gha muẹn roro sayọ, avbe afiangbe ne ima khian sọyẹnmwẹ ọnrẹn vbe agbọn ọgbọn ra? U gha hoo ne u kporhu vbe isiwinna, owebe ra ẹghẹ ke ẹghẹ ne ẹkpotọ ya kie ra? U bẹghe ako eso nọ na khẹke ne u gha rhie ẹre ma wẹẹ, u gele ya ekhọe hia hoẹmwẹ etẹn ra? Ediọn, wa mu egbe ne uwa ya gha ya ekhọe hia gbaroghe ohuan ọghe Jehova ra? U gha gele mu ukpa mu uwerhẹn ghee egbuẹ, ẹ i mwẹ u ma miẹn ako eso nọ na khẹke ne u na gha mwẹ alaghodaro, ọ ghaa yerriọ, ghẹ gi egbe wọọ ruẹ. “Ọmwa nọ mwẹ ekhọe esi ẹre Enọyaẹnmwa khin,” ọ gha vbe ru iyobọ nuẹn ya gha mwẹ alaghodaro. (1 Pit 2:3) E Pita rhie ilẹkẹtin ne ima wẹẹ: “Osanobua . . . gha tobọ ẹre ma ruẹ emwi fo. Ọ gha ya ruẹ deziẹn, ọ gha ya ruẹ wegbe, ọ ghi vbe ya ruẹ khian nọ digiẹ.”—1 Pit 5:10.

17. Adeghẹ ima ma na gi egbe wọọ ima, ma na vbe kue ne Jehova ma ima emwi, de afiangbe ne ima khian miẹn?

¹⁷ Vbe okaro, e Pita kegha ghee egbe ẹre wẹẹ, irẹn ma sẹ, nọ gha mudia ke Jesu ne Ovbi Osanobua. (Luk 5:8) Sokpan, e Jehova vbe Jesu ghi ru iyobọ ne Pita, e Pita na ghi sẹtin lele Jesu sẹ ufomwẹ. Ọ na ghi gbegba nọ gha “la uwu Arriọba etẹbitẹ, ọghe Nọyaẹnmwa kevbe Ọmiọnmwafan mwa ighẹ Jesu Kristi.” (2 Pit 1:11) U miẹn afiangbe ne Pita miẹn! Vbe na ghee Pita, u ma na gi egbe wọọ ruẹ, u na kue ne Jehova ma ruẹ emwi, arrọọ ọghe etẹbitẹ gha vbe sẹ ruẹ obọ. ‘Imiẹnfan gha sẹ ruẹ obọ, rhunmwuda amuẹtinyan ne u mwẹ.’—1 Pit 1:9.