Erhuanegbe Jesu 70 ma gha rre evba vbe Jesu mu Ugie Evbare Ota Ọghe Enọyanmwa gbọọ, sokpan, ọ ma khẹke ne ima rhunmwuda ọni gha roro ẹre wẹẹ, Jesu ma miẹn iran yi, ra te iran yangbe ẹre. Te Jesu wa gha hoo nọ gu avbe ukọ ọghẹe ọkpa gha rrọọ vbe akota nii.

Erhuanegbe Jesu ẹre avbe ukọ 12 kevbe erhuanegbe 70 wa gha khin. Jesu ka zẹ orhunmwu 12 vbe uwu erhuanegbe nibun nọ mwẹ, ọ na gha tie iran avbe ukọ. (Luk 6:​12-16) E Galili ẹre ọ ghaa ye vbe ọ “si iran Iweva nii koko . . . ọ na ghi gie iran ladian, ne iran ya kporhu vbekpa Arriọba Osanobua, kevbe ne iran gha mu emwa egbe rran.” (Luk 9:​1-6) Ọ ghi sẹ ẹghẹ, vbe Jesu rre Judia, ọ “keghi zẹ emwa ọvbehe, iran kegha re orhunmwu ekigbesiyenẹ (70), ọ na gie iran ladian eveva.” (Luk 9:51; 10:1) Ọna rhie ma wẹẹ, Jesu mwẹ erhuanegbe ni ghaa kporhu vbe ehe ughughan.

Ọ gha kẹ, Ivbi e Ju ni ghi do khian erhuanegbe Jesu gha vbe gu ẹgbẹe ọghe iran do Ugie Alagberra ne iran do vbe ukpo ukpo. (Ẹks 12:​6-11, 17-20) Vbọ ghi bu ẹghẹ ne Jesu khian ya wu, Jesu vbe erhuanegbe ẹre keghi kpa gha rrie Jerusalẹm. Sokpan ọ ma tie avbe erhuanegbe ẹre ni rre Judia, Galili, kevbe Pẹria ne iran do deba irẹn do Ugie Alagberra. Ọ vẹ ne ima rẹn wẹẹ, e Jesu hoo nọ gu avbe ukọ ọghẹe ọkpa rri Evbare Ota na. Ọ tama iran wẹẹ: “Ọ kpẹẹ re ne I ke hoo ne I deba uwa rri evbare Alagberra na, a te miẹn wẹẹ I rri oya.”​—Luk 22:15.

Ọ mwẹ emwi nọ ya Jesu ru ọna. Te Jesu khian ghi wu zẹvbe “Oteghe Ohuan ọghe Osanobua nọ rhie orukhọ hin agbọn na rre.” (Jọn 1:29) E Jerusalẹm, ẹre ọna khian na sunu, nọ re eke na na ru izọese gie Jehova kotọ gha dee. Te Ugie Alagberra ghaa ye Ivbi Izrẹl rre wẹẹ, e Jehova ẹre ọ miẹn iran fan vbe Igipt, sokpan, izọese ne Jesu khian ru na sẹ ọni, rhunmwuda, te izọese na khian fan emwa nagbọn hia vbe obọ orukhọ kevbe uwu. (1 Kọr 5:​7, 8) Emwi ne Jesu ru na gha kie ẹkpotọ yọ ne avbe ukọ ọghẹe iweva gha rre usun emwa ni khian mu iko ọghe Ivbi Otu e Kristi gbọọ. (Ẹfis 2:​20-22) Gele gele, e Jerusalẹm ne ẹvbo nọhuanrẹn keghi mwẹ “okuta iweva (12) na ya gbe ẹyotọ, a keghi vbe gbẹnnẹ eni iweva (12) ọghe ukọ iweva (12) ọghe Oteghe Ohuan nii lele iran.” (Arhie 21:​10-14) Vbene ẹmwata, avbe ukọ ọghe Jesu wa mwẹ emwi kpataki ne iran khian ru vbe emwamwa ọghe Osanobua. Ẹ i khabẹ ne Jesu na gha hoo ne iran deba irẹn do Ugie Alagberra nokiekie kevbe Ugie Evbare Ota Ọghe Enọyanmwa nọ ghi mu gbọọ.

Erhuanegbe 70 kevbe avbe erhuanegbe Jesu ọvbehe ma deba Jesu rri Evbare Ota Ọghe Nọyaẹnmwa. Ọrheyerriọ, avbe erhuanegbe ẹre ni ya ekhọe hia ga e Jehova gha miẹn ere vbe ugie na ne Jesu mu gbọọ. Avbe erhuanegbe nii hia fẹẹrẹ na ghi hannọ zẹ, rre usun emwa ne Jesu gu ta ile wẹẹ, iran gha deba irẹn kha zẹvbe ne Jesu tama avbe ukọ ọghẹe vbe asọn nii.​—Luk 22:​29, 30.