Ẹn o. Sokpan ẹmwata ne uhunmwu ẹmwẹ wa rre ẹmwẹ ne Devid ta vbe ako na.

Gia ghee emwi nọ gbẹn ye ako na kevbe ako ọghe evbagbẹn nọhuanrẹn ọvbehe nọ vbe yevbe ọna, ọ khare wẹẹ: “I gha so ihuan urhomwẹ ghee ruẹ vbe etẹbitẹ, I gha viọ emwi ne I ve ye urhu guẹ ẹdẹgbegbe.” “Eo, e Jehova ne Osa mwẹ, I ya ekhọe mwẹ hia rho ruẹ. I gha rho eni ruẹ vbe etẹbitẹ.” “I gha rho ruẹ ẹdẹ kevbe ẹdẹdẹmwẹdẹ.”​—Psm 61:8; 86:12; 145:1, 2.

Vbe ẹghẹ ne Devid na gbẹn avbe ẹmwẹ na yotọ, ẹi re te ọ ghaa kha wẹẹ, irẹn i khian wu ẹdẹ. Ọ rẹnrẹn wẹẹ, emwa nagbọn gha wu rhunmwuda orukhọ ọghe iran, irẹn vbe rẹn wẹẹ, ọmwa orukhọ ẹre irẹn khin. (Gẹn 3:3, 17-19; Psm 51:4, 5) Ọ rẹnrẹn wẹẹ, eguọmwadia e Jehova nẹdẹ ni ya ẹkoata gae, vbe na ghee Ebraham, Aizik kevbe Jekọb vbe wu. Rhunmwuda ọni, ẹi mwẹ irẹn ma vbe wu vbe ẹdẹ ọkpa. (Psm 37:25; 39:4) Sokpan ẹmwẹ nọ ta vbe ebe Psalm 61:8, ya ima rẹn wẹẹ, irẹn gele hoo ne irẹn gha rhie urhomwẹ ne Osanobua vbe etẹbitẹ, vbene irẹn te ya wu.​—2 Sam 7:12.

Zẹvbe nọ rre ifiẹmwẹ na gbẹnnẹ ye omuhẹn ọghe ebe Psalms 18, 51 kevbe 52, ma bẹghe ẹre wẹẹ, emwi eso nọ sunu vbe ẹdagbọn e Devid, ẹre ọ gbẹn yotọ. Vbe ebe Psalm 23, e Devid keghi gie Jehova zẹvbe ọsuohuan nọ dia ọmwa, nọ ya egbe rọkhọ ọmwa kevbe nọ gbaroghe ọmwa. Egbe ọsuohuan vberriọ ẹre Devid wa vbe gha khin. Ọ wa vbe gha hoo nọ ya ‘ẹdagbọn rẹn hia’ ga Osanobua.​—Psm 23:6.

Yerre wẹẹ, e Jehova ẹre ọ loo e Devid ya gbẹnnẹ avbe ẹmwẹ na yotọ. Usun emwi nọ gbẹnnẹ yotọ, keghi re avbe ẹmwẹ akhasẹ ọghe emwi nọ khian sunu vbe odaro. Vbe igiemwi, vbe ebe Psalm 110, e Devid keghi guan kaẹn ẹghẹ ne Nọyaẹnmwa khian ya “tota ye oberhọmwa [ọghe Osanobua]” vbe ẹrinmwi, a ghi vbe rhie ẹtin nẹẹn. De emwi nọ khian ya ẹtin na ru? Te ọ khian yae guọghọ eghian ọghe Osanobua hia rua, ọ ghi vbe yae “bu ohiẹn avbe uhunmwu ẹvbo” ni rre uhunmwu otagbọn na. Uniẹn ọghe Devid ẹre Jesu ke rre, irẹn ọre Mẹzaia nọ khian ke ẹrinmwi gha kha yan agbọn na, irẹn ẹre ọ khian vbe gha re ‘ohẹn vbe ẹdẹdẹmwẹdẹ.’ (Psm 110:1-6) E Jesu vbe kha wẹẹ, irẹn ẹre ẹmwẹ akhasẹ nọ rre ebe Psalm 110 ghaa guan kaẹn, kevbe wẹẹ, ẹghẹ dee vbe odaro ne ẹmwẹ akhasẹ nii khian ya sẹ.​—Mat 22:41-45.

E Jehova ẹre ọ loo e Devid ya gbẹn ọnrẹn yotọ emwi nọ sunu vbe ẹghẹ ọre, kevbe emwi nọ khian sunu vbe odaro vba gha ghi huẹn ọnrẹn kpaegbe nẹ. Vbe ẹghẹ nii, ọ ghi sẹtin rhie urhomwẹ gie Jehova vbe etẹbitẹ. Ọna keghi ya ima rẹn wẹẹ, emwi nọ sunu vbe ẹghẹ ọghe Ivbi Izrẹl, kevbe emwi nọ khian sunu vbe odaro vbe Osanobua gha mu eyan rẹn hia sẹ nẹ, ẹre ebe Psalm 37:10, 11 kevbe 29 guan kaẹn.​—Ya ghee okhuẹn 8 ọghe uhunmwuta nọ khare wẹẹ, “U Gha Gu Mwẹ Gha Rre Paradais” nọ rre ebe Owa Ọkhẹ na.

Ebe Psalm 61:8 kevbe ako ọghe evbagbẹn nọhuanrẹn ni vbe yevbe ọre, gi ima rẹn wẹẹ, e Devid gele gha hoo nọ rhie urhomwẹ gie Jehova vbene irẹn te ya wu. Avbe ako na vbe gi ima rẹn, emwi ne Devid gha sẹtin ru, vbe Jehova gha ghi huẹn ọnrẹn kpaegbe nẹ vbe agbọn ọgbọn.