Uwẹ gbarokotọ tie avbe ebe Owa Ọkhẹ ọghe ukpo na ra? Adeghẹ erriọ nọ, hia ne u rhie ewanniẹn ye avbe inọta na:

De igiemwi ne Jehova rhie yotọ vbe nọ dekaẹn obọ na ya mu ikhuo?

Obọ ọkpa ẹre Jehova ya mu ikhuo kevbe ikpia. Osanobua danmwehọ ikhuo, ọ rẹn vbene emwi ye iran hẹ. Ọ vbe rẹn wẹẹ, iran gha sẹtin ru iwinna ne irẹn waa iran re.​—w24.01, ipapa 15-16.

Vbe ima khian ya ya emwi nọ rre ebe Ẹfisọs 5:7 ru emwi hẹ, nọ khare wẹẹ: “Wa ghẹ gu iran mu obọ”?

Ukọ ighẹ e Pọl keghi ya obọ sekhae ne ima, ne ima ghẹ gu emwa ni gha sẹtin ya ima rra uhi Osanobua mu obọ. Egbe emwa vbenian sẹtin gha re emwa ne ima gu mu obọ ghee mwẹ ghee ruẹ, ra ọ sẹtin vbe gha re emwa ne ima gu mu obọ vbe intanẹt.​—w24.03, ipapa 22-23.

De iyẹn ohoghe nọ khẹke ne ima gha lẹẹ na?

Te ọ khẹke ne ima gha lẹẹ ne avbe iyẹn eso ne ima ma rẹn eke nọ ke dee, ọ gha khọnrẹn na miẹn wẹẹ, obọ etẹn ẹre ọ ke rre. Ọ vbe khẹke ne ima gha begbe vbekpa avbe iyẹn ne emwa ne ima ma rẹn gie gie ima vbe efoni, vbe deba ọni, ọ ma khẹke ne ima gha danmwehọ avbe emwa okeke ni ba ru vbe na miẹn wẹẹ, iran hoo ne iran ruẹ e Baibol.​—w24.04, ipapa 12.

De emwi ne ima rẹnrẹn kevbe de emwi ne ima ma vbe rẹn vbe nọ dekaẹn vbene Jehova khian ya bu ohiẹn Ọba ighẹ Sọlomọn, emwa ni wulo vbe Sọdọm vbe Gomorra kevbe emwa ni wulo vbe ẹghẹ e Noa?

Ma ma wa rẹn deghẹ te Jehova bu ohiẹn iran zẹvbe emwa nẹi khian rhiọ kpaegbe. Sokpan, ma rẹnrẹn wẹẹ, e Jehova rẹn emwi hia kevbe wẹẹ, ọ vbe mwẹ itohan.​—w24.05, ipapa 3-4.

De ilẹkẹtin ne ima mwẹ rhunmwuda ne Osanobua na re “Okuta”? (Diut 32:4)

E Jehova gha sẹtin gha re ugue ọghe ima. Ma gha sẹtin mu ẹtin yan rẹn, rhunmwuda ọ gha ta ẹmwẹ, te ọ muẹn sẹ. E Jehova i fi werriẹ. Ẹ i fi werriẹ vbe odẹ nọ ya ru emwi, kevbe wẹẹ, emwi ke emwi nọ hoo nọ ru te ọ ru ẹre.​—w24.06, ipapa 26-28.

De emwi nọ gha ru iyobọ nuẹn ya gu obọ etẹn vbe iko ne u ghi ye nian?

Mu ẹtin yan e Jehova, ọ gha ru iyobọ nuẹn zẹvbe nọ ru iyobọ ne eguọmwadia ẹre vbe ẹghẹ nẹdẹ. Ghẹ gha ya iko ne u ka ye gie iko ne u ghi ye nian. Gha rhiegbe ye iwinna vbe iko ne u ghi ye nian, u ghi vbe gha gu etẹn ni rre iko ne u ye nian ru ọse.​—w24.07, ipapa 26-28.

De emwi ne ima miẹn ruẹ vbe erre eha ne Jesu zẹ vbe ebe Matiu uhunmwu ẹnrẹn 25?

Erre ọghe ohuan kevbe ẹwe rhie ẹre ma wẹẹ, te ọ khẹke na rhikhan mu e Jehova ya sẹ ufomwẹ. Erre ọghe uvbi ni ma rẹn okpia ni mwẹ ẹwaẹn kevbe ni kọẹn, rhie ẹre ma wẹẹ, te ọ khẹke na mu egbe yotọ, na vbe gha bodẹ. Vbene erre ọghe etalẹnt, na guan kaẹn vbe nọ ru ekpataki sẹ hẹ na wegbe obọ kevbe na rhiegba ye iwinna.​—w24.09, ipapa 20-24.

De vbene ughugha ọghe onurho na la lae ọgua Osa ne Sọlomọn bọe yo sẹ hẹ?

Avbe Baibol eso na ya obọ gbẹnnẹ ladian vbe ẹghẹ nẹdẹ ghi zedu 2 Krọnikol 3:​4, iran na kha wẹẹ, “ekiubit 120” ẹre ghaa nọ vbe uyomwẹ, ọni ọre ibata 175 (53 m). Sokpan, avbe Baibol ọvbehe na ya obọ gbẹnnẹ ladian keghi loo ekiubit “20” vbe ako na, ọni ọre ibata 30 (ra odẹ 9 m). Ọ khọ wẹẹ, ibata 30 ẹre uyomwẹ ọnrẹn gele gha khin rhunmwuda, egbe ekẹn ọnrẹn ma kakabọ gha mwẹ ẹmi.​—w24.10, ipapa 31.

A gha wẹẹ, “okhuo ọkpa” ẹre ọ khẹke ne ọguọmwadia iwinna gha mwẹ, vba yae kha? (1 Tim 3:12)

Ọna rhie ma wẹẹ, okhuo ọkpa ẹre ọ khẹke nọ rhie rọnmwẹ, ọ ma khẹke nọ gha mwẹ obọ vbe uyinmwẹ alama oghẹ. Sokpan ẹ i re ọni ọkpa. Ọ ma vbe khẹke ne aro ọre gha viẹn ye okhuo ọvbehe.​—w24.11, ipapa 19.

Vbọzẹ ne ima gha na sẹtin kha wẹẹ, ẹ i re emwi na khian gha ru vbe Ugie Evbare Ota Ọghe Enọyaẹnmwa ẹre ebe Jọn 6:53 guan kaẹn?

Vbe ebe Jọn 6:​53, Jesu keghi kha wẹẹ, te ọ khẹke ne emwa rri efun egbe irẹn, iran ghi vbe wọn vbe esagiẹn irẹn. Ukpo 32 C.E., ẹre Jesu ta ẹmwẹ na ma Ivbi e Ju ni ma mu ẹtin yan rẹn vbe Galili. Vbọrhirhighayehẹ, ukpo ọkpa ghi gberra nẹ, Jesu na mu Ugie Evbare Ota Ọghe Enọyaẹnmwa gbọọ. Emwa ni khian deba ẹre kha vbe ẹrinmwi ẹre Jesu ghaa guan kaẹn vbe ugie na.​—w24.12, ipapa 10-11.