Ẹvbo ne Ivbi e Philippine na do gha winna ẹre Mary vbe ọdafẹn ọnrẹn ighẹ e John a ye, iran wa miẹn Ivbi e Philippine ni bun kporhu ma. Vbe ẹghẹ ne emianmwẹ e COVID-19 ya gha vẹwae, e Mary keghi suẹn gha gu emwa ni bun vbe ẹvbo ẹre ruẹ e Baibol, ẹ i re ọni ọkpa, ọ vbe gha gu emwa ni rre ẹvbo ọvbehe ruẹ e Baibol. Vbe ọ ya ru ọna hẹ?

E Mary ghi nọ ọmwa nọ gu ruẹ e Baibol wẹẹ, “U rẹn ọmwa ọvbehe nọ gha hoo ne irẹn ruẹ e Baibol ra?” Iran gha we ẹẹn, ọ ghi we ne iran gie nene ọmwa ma irẹn. Ọta na wa mobọ gha biẹ ọmọ esi. Vbọzẹ? Rhunmwuda emwa ni gele gbọyẹmwẹ ye Ẹmwẹ Ọghe Osanobua wa hoo ne iran gie emwa iran vbe uwu ẹgbẹe kevbe avbe ọse iran rẹn emwi ne iran ruẹ vbe Baibol. De afiangbe nọ he lae miẹn rhunmwuda nọ na nọ ọta na?

Ọmwa ne Mary gu ruẹ e Baibol na tie ẹre Jasmin keghi gie orhunmwu enẹ ọvbehe ma e Mary, nọ gha gu iran ruẹ e Baibol. Emwi ne ọkpa vbe uwu iran enẹ na na tie ere Kristine ruẹ re yẹẹ ọre sẹrriọ wẹẹ, ọ na we ne Mary do gha gu irẹn ruẹ e Baibol igbava vbe uzọla. E Mary ghi nọ rẹn deghẹ ọ rẹn ọmwa ọvbehe nọ gha hoo nọ ruẹ e Baibol, e Kristine na kha wẹẹ, “Ẹn, I gha gie avbe ọse mwẹ ma ruẹ.” Vbe uwu uzọla eso, e Kristine keghi gie ọsiọre enẹ ma e Mary nọ gha gu iran ruẹ e Baibol. Ọ ghi zẹ kpẹẹ, e Kristine na vbe gie avbe ọsiọre ọvbehe ma e Mary, eso vbe uwu avbe ọsiọre na na vbe gie ọse iran ma e Mary, nọ gha gu iran ruẹ e Baibol.

E Kristine keghi vbe gha hoo ne ẹgbẹe ọre nọ rre Philippine vbe suẹn gha ruẹ e Baibol. Ẹre ọ na ghi gu ovbi ẹre nokhuo ighẹ Andrea guan. Vbe okaro, Andrea na tama egbe ẹre wẹẹ, ‘Otu dan ẹre Avbe Osẹe Jehova khin, iran ma ya e Jesu yi, Ile Nẹdẹ ọkpa ẹre iran vbe loo.’ Sokpan, a ghi gu ẹre ruẹ e Baibol uhukpa, ọ na fi iziro ọghẹe werriẹ. Vbe ẹghẹ na ya gha gu ẹre ruẹ emwi, ọ ghi kha wẹẹ, “Ugbẹnvbe a miẹn wẹẹ, e Baibol ẹre ọ tae, ẹmwata nọ!”

Vbene ẹghẹ ya khian, Andrea na vbe gie ọsiọre eva ọvbehe kevbe orhunmwu ọkpa ne iran gba winna ma e Mary, iran na vbe suẹn gha ruẹ e Baibol. Vbe Mary gu Andrea ruẹ e Baibol, ọ ma te rẹn wẹẹ, ọtiẹn erha Andrea nokhuo ighẹ Angela vbe gha danmwehọ, arhuaro ẹre nene okhuo khin. Vbọ ghi rre ẹdẹ ọkpa, Angela na khama Andrea nọ gu irẹn tama Mary wẹẹ, irẹn hoo ne irẹn gha ruẹ e Baibol. Te emwi ne Angela ghaa ruẹ wa gha yẹẹ ọre. Vbe uwu uki ọkpa kẹkan, Angela na wa rẹn ako ebe nọhuanrẹn ni bun ye uhunmwu, ọ na vbe gha hoo na gha gu irẹn ruẹ e Baibol igba enẹ vbe uzọla! Andrea keghi ru iyobọ nẹẹn, ọ na sẹtin gha loo videoconferencing ya deba iko vbe ẹghẹ hia.

Vbe Mary ghi bẹghe ẹre wẹẹ, ọdafẹn Kristine ighẹ Joshua ya ehọ viọ ẹmwẹ ne iran ta vbe ọ gu Kristine ruẹ e Baibol, Mary na ghi nọ rẹn deghẹ ọ  gha hoo nọ deba iran. E Joshua na ghi kha wẹẹ, “I gha wa gha danmwehọ uwa, sokpan ghẹ nọ mwẹ ọta rhọkpa, u gha nọ mwẹ ọta, I ghi wa kpa sẹ uwa rae.” Vbe ọ ghi rre ifuanro isẹn ne iran ya suẹn gha ruẹ e Baibol, ọta ne Joshua nọ rẹn na kue gberra ọghe Kristine, ọ ma kue vbe hoo ne iran dobọ iruẹmwi nii yi.

Ọta ne kuẹi ne Mary ghaa nọ keghi wa biẹ ọmọ esi, ọ na do gha gu emwa ni bun ruẹ e Baibol. Ọ keghi ru emwamwa ne etẹn ọvbehe gha gu enibun vbe uwu iran ruẹ e Baibol. Otọ ẹvbo enẹ ẹre Mary na suẹn gha gu emwa ruẹ e Baibol, a gha we na ka emwa hia nọ gu ruẹ e Baibol, iran ghi gha re orhunmwu 28.

E Jasmin nọ re ọmwa nokaro ne Mary gu suẹn gha ruẹ e Baibol, na guan kaẹn vbe okha na keghi dinmwiamẹ vbe April 2021. E Kristine keghi dinmwiamẹ vbe May 2022, ọ werriegbe bu ẹgbẹe ọre nẹ vbe Philippine. Orhunmwu eva ọvbehe ne Kristine gie ma e Mary vbe dinmwiamẹ nẹ. Angela keghi dinmwiamẹ vbe uki eso nọ lelẹe, ọ na vbe suẹn gha ga zẹvbe arọndẹ ọghe ẹghẹ hia. Ọdafẹn e Kristine ighẹ e Joshua kevbe ovbi iran nokhuo ighẹ Andrea, kevbe emwa ni bun ọvbehe ni vbe ruẹ e Baibol wa mwẹ alaghodaro.

Vbe ẹghẹ ọghe avbe ukọ ọghe Jesu, emwa ni bun wa mobọ gha kporhu ma emwa iran vbe uwu ẹgbẹe kevbe avbe ọse. (Jọn 1:41, 42a; Iwinna 10:24, 27, 48; 16:25-33) U gha sẹtin nọ emwa ne u gu ruẹ e Baibol kevbe emwa ọvbehe ni mwẹ ẹkorhiẹnrhiẹnmwẹ wẹẹ, “U rẹn ọmwa rhọkpa nọ gha hoo nọ ruẹ e Baibol ra?” Ọta ne kuẹi na ne ọmwaikọmwa gha sẹtin nọ, sẹtin wa kie ẹkpotọ yọ ne u ya suẹn gha gu emwa ni bun ruẹ e Baibol?