OWIẸ vbe ẹdẹ Wẹzde vbe January 24, 2018, a keghi ya iyẹn oghọghọ wewe ma etẹn ni ga vbe abotu ọghe United States kevbe Canada wẹẹ: A zẹ Ọtẹn Nokpia Kenneth Cook, Jr., zẹvbe ọkpa vbe usun Ẹbu Nọ Su ọghe Avbe Osẹe Jehova.

E Pennsylvania U.S.A. ẹre a na biẹ ọtẹn ne okpia Cook, evba ẹre ọ na vbe waan. Ọsiọre ọkpa ne iran gba yo owebe ẹre ọ gie odẹ ẹmwata ma rẹn vbe ọ ghi bu ẹghẹ nọ khian ya ladian vbe owebe nukpogieva. Ọ ghi rre June 7, 1980, Ọtẹn Nọkpia Cook na dinmwiamẹ. Ọ keghi suẹn iwinna arọndẹ ọghe ẹghẹ hia vbe September 1, 1982. Ukpo eva ghi gberra nẹ, otu na tie ẹre gha die Bẹtẹl. Ọ keghi suẹn gha iwinna vbe Bẹtẹl vbe Wallkill, New York, vbe October 12, 1984.

Vbe ukpo 25 nọ ghi lelẹe, Ọtẹn Nokpia Cook keghi ru winna ughughan vbe Bẹtẹl. Ọ winna vbe ugha ne a na print ebe kevbe ugha na tiẹre Bẹtẹl ọfisi. Ukpo 1996, ẹre ọ rhie okhuo. Jamie ẹre a tie ọvbokhan rẹn. Ọ keghi deba re gha ga vbe Bẹtẹl vbe Wallkill vbe iran ghi ru orọnmwẹ nẹ. Vbe December 2009, otu na gie iran eva gha rrie Watchtower Educational Center vbe Patterson, New York. Iran ghi sẹ evba, Ọtẹn Nokpia Cook na suẹn gha winna vbe Writing Correspondence Department. Vbe April 2016, iran na werriegbe gha die Wallkill. Sokpan vbe ọ ma he kpẹ vba, otu na vbe mu iran gha rrie Brooklyn, New York. Uki isẹn ghi vbe gberra nẹ, iran na gha die igiogbẹ ọghomwa nọ rre Warwick, New York. January 2017 ẹre otu zẹ Ọtẹn Nokpia Cook zẹvbe ọyobọ ọghe ọkpa vbe usun agbaziro ni ru iyobọ ne Ẹbu Nọ Su, na tie ẹre Writing Committee.