1. Vbọ khẹke ne ima ru ne ima mieke na ya ẹko rhiẹnrhiẹn e Jehova?

 GIA kha wẹẹ, u rhie emwi ọhẹ nọ wa kakabọ mose ne ọmwa ne u hoẹmwẹ ọnrẹn kevbe wẹẹ, emwi na gha wa gha mwẹ iyobọ nọkhua nọ ye ne ọmwa na. Ẹ i mwẹ ọ ma da ruẹ adeghẹ ọmwa na na wa ya rhie emwi nii hin, ọ ma zẹdẹ loo ẹre! Sokpan adeghẹ ọmwa na na gele loo emwi nii, ọ na vbe kpọnmwẹ ruẹ yọ, ọ gha wa ya ẹko rhiẹnrhiẹn ruẹ. Vbe ima hoo ne ima rhie ladian mwa? Te Jehova ya Ovbi ẹre zọ ese ne ima. Ọ gha wa ya ẹko rhiẹnrhiẹn e Jehova vbe ọ gha bẹghe ẹre wẹẹ, ma gbọyẹmwẹ ye ẹse na kevbe ahoẹmwọmwa nọ mwẹ daa ima, nọ yae kpemehe izọese adẹwerriegbe!​—Jọn 3:16; Rom 5:​7, 8.

 2. Vbe ima khian zẹ iro yan vbe ako iruẹmwi na?

² Sokpan zẹvbe ne ẹghẹ ya khian, a sẹtin miẹn wẹẹ, ma i khian ghi gha ghee izọese adẹwerriegbe zẹvbe emwi nọ hin usi. Ọ ghi yevbe na miẹn wẹẹ, te ima wa ya rhie ẹse ọhẹ ne Osanobua rhie ne ima ye efọnkpa. Ma ghọghọ we ima mwẹ ọnrẹn sokpan, ma i loo ẹre. Ne ọna ghẹ mieke na sunu, te ọ khẹke ne ima gha muẹn roro vbe ẹghẹ hia, emwi ne Osanobua kevbe Kristi ru ne ima. Ako iruẹmwi na gha ru iyobọ ne ima ya ru ọnọna. Ma gha zẹ iro yan vbene ima khian ya miẹn ere vbe izọese adẹwerriegbe vbe ẹghẹ na nian kevbe ẹghẹ nọ dee vbe odaro. Ma gha vbe guan kaẹn vbene ima khian ya rhie ẹre ma wẹẹ, ma gbọyẹmwẹ ye ahoẹmwọmwa ne Jehova mwẹ daa ima, katekate vbe ẹghẹ Ugie Ayere ne ima ye na.

VBENE IMA YA MIẸN ERE VBỌ NIAN

 3. De odẹ ọkpa ne ima ya miẹn ere vbe izọese adẹwerriegbe nian?

³ Ma miẹn ere vbe izọese adẹwerriegbe nẹ vbe ẹghẹ ne ima ye  na. Vbe igiemwi, rhunmwuda izọese adẹwerriegbe, e Jehova keghi ya orukhọ ọghe ima bọ ima. Ẹ i re esalẹbẹ ne Jehova ya orukhọ ọghe ima bọ ima. Sokpan, te ọ hoo nọ ru vberriọ. Ọsian ọkpa nọ gele gbọyẹmwẹ ye ayabọ ọghe Jehova khare wẹẹ: “Uwẹ maan ne ima e Jehova, u vbe mu egbe ne u ya ya orukhọ ọghe ima bọ ima.”​—Psm 86:5; 103:​3, 10-13.

 4. De emwa ne Jehova kpemehe izọese adẹwerriegbe na? (Luk 5:32; 1 Timoti 1:15)

⁴ Emwa eso keghi roro ẹre wẹẹ, iran ma sẹ ne Jehova gha yabọ. Ọghe ne ẹmwata, ma rhọkpa ma te sẹ. Ukọ ighẹ e Pọl rẹnrẹn wẹẹ, irẹn ma “sẹ na gha tie ẹre ukọ.” Ọrheyerriọ, ọ na kha wẹẹ: “Rhunmwuda ẹse ne kpataki ọghe Osanobua, ẹre I na re emwi ne I khin vbe ẹdẹnẹrẹ.” (1 Kọr 15:​9, 10) Ma gha roro iro fi uyinmwẹ werriẹ, e Jehova ghi yabọ ima. Vbọzẹ? Ẹ i re rhunmwuda we ọ khẹke nọ ru vberriọ, sokpan rhunmwuda ahoẹmwọmwa nọ mwẹ ne ima nọ. Adeghẹ u na gha roro ẹre wẹẹ, u ma sẹ ne Jehova gha yabọ, u ghi yerre wẹẹ, ẹ i re emwa nẹi mwẹ orukhọ ẹre Jehova kpemehe izọese adẹwerriegbe na, sokpan emwa ni roro iro fi uyinmwẹ werriẹ ẹre ọ kpemehe ẹre na.​—Tie Luk 5:32; 1 Timoti 1:15.

 5. Ma rhọkpa gha sẹtin kha wẹẹ, te ọ wa khẹke ne Jehova gha yabọ ima ra? Rhan otọ re.

⁵ Ọ ma khẹke ne ima gha roro ẹre wẹẹ, te ọ wa khẹke ne Jehova yabọ ima, rhunmwuda wẹẹ, ọ kpẹẹ re ne ima ke gae. Ẹmwata nọ wẹẹ, e Jehova gbọyẹmwẹ ye emwi hia ne ima he ru nẹẹn. (Hib 6:10) Te ọ ya Ovbi ẹre zọ ese ne ima vbe ọghe ọhẹ, ẹ i re te ọ yae ha osa ye emwi ne ima ru nẹẹn. Adeghẹ ima na gha roro ẹre wẹẹ, emwi ne ima ru ne Osanobua sẹ nọ gha yae yabọ ima, te ọ yevbe te ima ghi kha wẹẹ, uwu ọghe Kristi i mwẹ esa nọ ye.​—Yae taa Galetia 2:21.

 6. Vbọzẹ ne Pọl na rhiegba ye ugamwẹ e Jehova?

⁶ E Pọl rẹnrẹn wẹẹ, ẹ i re emwi ne irẹn ru ne Osanobua ẹre ọ khian zẹe we Osanobua gha yabọ irẹn. Vbọzẹ nọ na ye ya ekhọe hia rhiegba ye ugamwẹ e Jehova? Te ọ ru ẹre nọ ya rhie ẹre ma wẹẹ, irẹn gbọyẹmwẹ ẹse ne kpataki ne Jehova ru nẹẹn. (Ẹfis 3:7) Vbe na ghee Pọl, ma keghi rhiegba ye ugamwẹ e Jehova, ẹ i re rhunmwuda we ima hoo nọ rhunmwuda emwi ne ima ru tohan ima, sokpan te ima hoo ne ima gbọyẹmwẹ ye itohan ọghẹe.

 7. De odẹ ọvbehe ne ima ya miẹn ere vbe izọese adẹwerriegbe vbe ẹghẹ ne ima ye na? (Rom 5:1; Jems 2:23)

⁷ Odẹ ọvbehe ne ima ya miẹn ere vbe izọese adẹwerriegbe vbe ẹghẹ ne ima ye na ọre ne ima na sẹtin gu e Jehova ru ọse. a Zẹvbe ne ima ruẹ ọre vbe ako iruẹmwi nọ lae, ma ma gha re ọsie Osanobua vba biẹ ima. Rhunmwuda izọese adẹwerriegbe “ma gha sẹtin gu Osanobua gha rrọọ vbe ọfunmwegbe,” ma ghi vbe sẹtin sikẹ ọre.​—Tie Rom 5:1; Jems 2:23.

 8. Vbọzẹ nọ na khẹke ne ima gbọyẹmwẹ ye ẹkpotọ nọ kie ne ima ya gha na erhunmwu gie Jehova?

⁸ Gi ima guan kaẹn ẹkpotọ ọkpa nọ kie ne ima rhunmwuda ne ima na re ọsie Jehova, ọni ọre ne ima na sẹtin na erhunmwu. E Jehova họn erhunmwu ne eguọmwadia ẹre na vbe idagbo vbe iran gha si egbe koko, ọ vbe họn erhunmwu ne edọmwadẹ iran na vbe ẹkhokho. Ẹmwata nọ wẹẹ, erhunmwu mu ima orhiọn sotọ, sokpan, ọ vbe ya ima sikẹ e Jehova sayọ. (Psm 65:2; Jems 4:8; 1 Jọn 5:14) Vbe Jesu rre uhunmwu otagbọn na, te ọ wa gha na erhunmwu vbe ẹghẹ hia rhunmwuda ọ rẹnrẹn wẹẹ, e Jehova gha họn erhunmwu irẹn kevbe wẹẹ, erhunmwu na na gha ya irẹn sikẹ e Jehova sayọ. (Luk 5:16) Ma wa ghọghọ wẹẹ, rhunmwuda izọese adẹwerriegbe, ma gha sẹtin gha re ọsie Jehova, ma ghi vbe gha na erhunmwu gie ẹre!

 VBENE IMA KHIAN YA MIẸN ERE VBỌ VBE ODARO

 9. De vbene eguọmwadia e Jehova khian ya miẹn ere vbe izọese adẹwerriegbe hẹ vbe odaro?

⁹ De vbene eguọmwadia e Jehova khian ya miẹn ere vbe izọese adẹwerriegbe hẹ vbe odaro? Arrọọ ọghe etẹbitẹ gha sẹ iran obọ. Emwa ni bun keghi roro ẹre wẹẹ, ọna i khian sẹtin sunu, rhunmwuda ọ kpẹẹ re ne emwa nagbọn ke wulo. Sokpan, emwamwa ne Jehova mwẹ ne emwa nagbọn kotọ gha dee ọre ne iran gha rrọọ vbe etẹbitẹ. Akpawẹ Adam họn ẹmwẹ ne Osanobua, a i ghẹ te miẹn ọmwa nọ khian gha roro ẹre wẹẹ, a i khian sẹtin gha rrọọ vbe etẹbitẹ. Ma gha yerre wẹẹ, Ovbi ẹre nọ ghaan ẹre Jehova ya zọ ese ne ima, ọ gha ru iyobọ ne ima ya yayi wẹẹ, emwa nagbọn gha gele sẹtin gha rrọọ vbe etẹbitẹ, ọ gha khọnrẹn nọ gha lọghọ ne ima sẹtin ya ọna yi.​—Rom 8:32.

10. De emwi ne etẹn na hannọ zẹ kevbe ohuan ọvbehe ya aro yi?

¹⁰ Agharhemiẹn wẹẹ, afiangbe ne ima khian miẹn vbe odaro ẹre arrọọ ọghe etẹbitẹ khin, e Jehova hoo ne ima ke eban gha muẹn roro. Avbe etẹn na hannọ zẹ rẹnrẹn wẹẹ, iran gha sọyẹnmwẹ arrọọ vbe ẹrinmwi, vbe ẹghẹ ne iran khian ya deba Kristi gha kha yan uhunmwu otagbọn na. (Arhie 20:6) Avbe ohuan ọvbehe ya aro yọ wẹẹ, iran gha sọyẹnmwẹ arrọọ vbe uhunmwu otagbọn na, ẹghẹ nii, a i ghi miẹn akhiẹ ra obalọ. (Arhie 21:​3, 4) Ọkpa vbe usun emwa ni ya aro yọ wẹẹ, iran a gha rrọọ vbe etẹbitẹ ẹre u khin ra? Aro ọkpa ẹre Jehova ya ghee etẹn ni rrie ẹrinmwi kevbe ni khian gha rre uhunmwu otagbọn na! Rhunmwuda emwa nagbọn hia ẹre Osanobua gu yi uhunmwu otagbọn na. Nọnaghiyerriọ, te ima khian wa gele rri orhiẹnrhiẹn agbọn ẹsẹsẹmwẹse.

11-12. De afiangbe eso ne ima ya aro yi vbe Paradais? (Vbe ya ghee efoto.)

¹¹ Muẹn roro, vbene agbọn khian gha ye hẹ vbe Paradais vbe uhunmwu otagbọn na. Uwu vbe emianmwẹ ghi khian ọta nẹdẹ. (Aiz 25:8; 33:24) Emwi ke emwi nọ maan ne ima ghi gualọ, e Jehova gha kpemehe ẹre ne ima. De emwi eso nọ yẹẹ ruẹ ne u gha hoo ne u ruẹ vbekpa ẹre? Avbe aranmwẹ nọ ra? Vbe na ya kpee ẹgiọn nọ ra? Ra vbe na ya ru iwinna ona (art)? Vbe nai  na gbawawẹ, a gha wa gha gualọ emwa ni gua bọ owa kevbe avbe ọgbugbo. A gha vbe gha gualọ emwa ni khian gha le evbare, ni khian gha ru emadogua na ya winna, emwa ni khian gha kọ emwi ye ogba, iran ghi vbe gha gbaroghe ẹre. (Aiz 35:1; 65:21) Ugbẹnvbe a miẹn wẹẹ, etẹbitẹ ma khian ya gha rrọọ, u gha sẹtin ruẹ emwi ke emwi ne u hoo ne u ruẹ.

¹² Ma i khian sẹtin ghọghọ vbe emwa ima ni wulo nẹ gha rhiọ kpaegbe! (Iwinna 24:15) U gha wa miẹn ẹkpotọ ya gbarokotọ ghee evbayi ni bun ni gha ma ruẹ emwi vbekpa e Jehova, te ọna khian wa gha ya ruẹ sọyẹnmwẹ. (Psm 104:24; Aiz 11:9) Nọ ghi wa sẹ ehia, ekhọe hia ma khian ya gha ga e Jehova, vbene ekhọe ima i khian na gha bu abe gbe ima rhunmwuda orukhọ ne ima ru! U gha ya iyeke abọ muẹn avbe afiangbe na fua rhunmwuda “orhiẹnrhiẹn ọghe ovbi ẹghẹ kherhe na miẹn vbe orukhọ” ra? (Hib 11:25) A wa wua! Afiangbe ne ima khian miẹn vbe agbọn ọgbọn nọ dee sẹ emwi ke emwi ne ima gha sẹtin gha mwẹ vbe agbọn Esu na. Ghẹ mianmian wẹẹ, ẹghẹ dee, ne ima i khian ghi ya rhie aro ye odẹ gha khẹ avbe afiangbe na, rhunmwuda ọ gha sẹ ima obọ nẹ vbe ẹghẹ nii. Ena rhọkpa i ghẹ te sẹtin sunu akpawẹ e Jehova ma ya Ovbi ẹre zọ ese ne ima rhunmwuda ahoẹmwọmwa nọ mwẹ ne ima!

RHIE ẸRE MA WE U GBỌYẸMWẸ YE AHOẸMWỌMWA NE JEHOVA MWẸ NUẸN

13. Vbe ima khian ya rhie ẹre ma we ima gbọyẹmwẹ ye ahoẹmwọmwa ne Jehova mwẹ ne ima? (2 Kọrint 6:1)

¹³ Vbe ima khian ya rhie ẹre ma we ima gbọyẹmwẹ ye izọese adẹwerriegbe ne Jehova kpemehe ẹre? Ma ghi mu iwinna ọghẹe karo vbe ẹdagbọn ima. (Mat 6:33) Rhunmwuda, te Jesu wu “ne emwa ni rre agbọn ghẹ ghi gha rrọọ ne egbe iran, sokpan, iran ghi gha rrọọ ne ọmwa nii nọ wu ne iran, na vbe huẹn kpaegbe.” (2 Kọr 5:15) Emwi bun ne Jehova he ru ne ima, rhunmwuda ọni, ma gha ya ekhọe hia gae, te ima rhie ẹre ma wẹẹ, ma i re ọmwa ẹsoghodan.​—Tie 2 Kọrint 6:1.

14. Vbe ima khian ya mu ẹtin yan adia ọghe Jehova?

¹⁴ Ma gha vbe sẹtin rhie ẹre ma wẹẹ, ma gbọyẹmwẹ ye ahoẹmwọmwa ne Jehova mwẹ ne ima deghẹ ima na mu ẹtin yan adia ọghẹe. Odẹ vbo? Te ọ khẹke ne ima gha muẹn roro emwi ne Jehova hoo ne ima ru vbe ima gha khian ru azẹ nọ dekaẹn vbe nọ khẹke ne ima yo owebe sẹ hẹ, ra aro iwinna nọ khẹke ne ima ru. (1 Kọr 10:31; 2 Kọr 5:7) Ma ghaa rhie ẹre ma vbe emwi ne ima ru wẹẹ, ma mu ẹtin yan e Jehova, ma ghi do sikẹ ọre sayọ, amuẹtinyan ọghe ima ghi gha wegbe yọ. Ayayẹro ne ima mwẹ ghi vbe gha wegbe sayọ.​—Rom 5:​3-5; Jems 2:​21, 22.

15. Vbe ima khian ya rhie ẹre ma wẹẹ, ma gbọyẹmwẹ ye izọese adẹwerriegbe vbe ẹghẹ Ugie Ayere?

¹⁵ Odẹ ọvbehe ye rrọọ ne ima khian ya rhie ẹre ma we ima gbọyẹmwẹ ye ahoẹmwọmwa ne Jehova mwẹ ne ima. Ọni ọre ne ima hia ne ima rhie ẹre ma wẹẹ, ma gbọyẹmwẹ ye izọese adẹwerriegbe vbe ẹghẹ Ugie Ayere. Zẹvbe ne ima ya ru emwamwa ne ima mieke na gha rre Ugie Ayere, te ọ khẹke ne ima tie emwa  ọvbehe ne iran do deba ima do ugie na. (1 Tim 2:4) Gi emwa ne u gie na tie rẹn emwi na ru vbe Ugie Ayere. U sẹtin kpee vidio nọ mwẹ uhunmwuta nọ khare wẹẹ, Vbọzẹe Ne Jesu Na Wu? kevbe Yee Uwu Ọghe Jesu Rre nọ rre jw.org ma iran. Te ọ khẹke ne ediọn hia na miẹn wẹẹ, iran gie na tie emwa nẹi ghi yo iko ra ikporhu. U miẹn ọyẹnmwẹ nọ khian gha rre ẹrinmwi kevbe uhunmwu otagbọn na deghẹ eso vbe uwu avbe ohuan ọghe Jehova ni wiri na werriegbe bu ẹre gha dee! (Luk 15:​4-7) Ma ghaa rre Ugie Ayere te ọ khẹke ne ima gha tuẹ emwa hia katekate emwa ọgbọn ni rre ra emwa ni ma he rrie Ugie Ayere ke ẹghẹ nọ kpẹẹ re gha dee. Ma hoo ne orhiọn iran sotọ vbe iran gha rre!​—Rom 12:13.

16. Vbọzẹ nọ na khẹke ne ima rhiegbe ye ugamwẹ e Jehova sayọ vbe ẹghẹ Ugie Ayere?

¹⁶ U gha sẹtin rhiegbe ye ugamwẹ e Jehova sayọ vbe ẹghẹ Ugie Ayere ra? Ọna keghi re odẹ ọkpa ne u gha ya sẹtin rhie ẹre ma wẹẹ, u gbọyẹmwẹ ye emwi ne Osanobua kevbe Kristi ru ne ima. Vbene ima ya rhiegbe ye ugamwẹ e Jehova, erriọ ẹre ima khian ya gha bẹghe odẹ nọ ya ru iyobọ ne ima, ọna ghi ya ima do mu ẹtin yan rẹn sayọ. (1 Kọr 3:9) U ghi vbe hia ne u gha tie Baibol na tie vbe ẹghẹ Ugie Ayere nọ rre Ebe Ẹdẹ ra isama nọ rre ebe iwinna na loo vbe iko. U sẹtin kue ru ezanzan yan avbe ako ọghe Ebe Nọhuanrẹn na.

17. De emwi nọ ya ẹko rhiẹnrhiẹn e Jehova? (Vbe ya ghee ẹkpẹti nọ khare wẹẹ, “ Odẹ Eso Ne U Gha Ya Rhie Ẹre Ma We U Gbọyẹmwẹ Ye Ahoẹmwọmwa Ne Jehova Mwẹ Nuẹn.”)

¹⁷ A sẹtin miẹn wẹẹ, rhunmwuda vbene emwi ye ruẹ hẹ, u i khian wa sẹtin ru emwi hia na guan kaẹn vbe ako iruẹmwi na. Ọrheyerriọ, ghẹ mianmian wẹẹ, e Jehova i ya emwi ne u sẹtin ru gie ọghe emwa ọvbehe; ọ bẹghe ekhọe ruẹ. Ẹko wa rhiẹnrhiẹn e Jehova vbe u ghaa ya ekhọe hia rhie ẹre ma wẹẹ, u gbọyẹmwẹ ye izọese adẹwerriegbe, nọ ya ru ima ẹse.​—1 Sam 16:7; Mak 12:​41-44.

18. Vbọzẹ nọ na khẹke ne ima gha gbọyẹmwẹ ye emwi ne Osanobua kevbe Jesu Kristi ru ne ima?

¹⁸ Izọese adẹwerriegbe ẹre ọ zẹe ighẹ a gha sẹtin ya orukhọ ọghe ima bọ ima, ẹre ọ zẹe ighẹ ma sẹtin gu e Jehova ru ọse, ẹre ọ vbe zẹe ighẹ ma gha sẹtin ya aro yọ wẹẹ, ma a gha rrọọ vbe etẹbitẹ. Wa gi ima hia vbe ẹghẹ hia ne ima gha gbọyẹmwẹ ye ahoẹmwọmwa ne Jehova mwẹ ne ima, rhunmwuda ọna ẹre ọ zẹe ighẹ avbe afiangbe na gha sẹ ima obọ. (1 Jọn 4:19) Te ọ vbe khẹke ne ima gha rhie ẹre ma wẹẹ, ma gbọyẹmwẹ ye emwi ne Jesu ru ne ima, nọ na ya arrọọ ọghẹe zọ ese ne ima rhunmwuda ahoẹmwọmwa nọ mwẹ ne ima!​—Jọn 15:13.