Paul:Vbe November 1985, ma kegha rrie Liberia vbe West Africa, ọna ọre ako nokaro na gie ima gha rrie zẹvbe arọndẹ na gie yo isi; te ima wa gha ghọghọ! Okọ ẹhoho ne ima la re keghi tuorre vbe Senegal. Anne keghi kha wẹẹ, “Ughaẹdẹ ọkpa ẹre ọ ghi kẹ ne ima sẹ Liberia!” Sokpan ma keghi họn ayawewe ọkpa nọ khare wẹẹ: “Ekhẹn hia ni rrie Liberia wa tuorre vbe okọ ẹhoho na. Emwa eso gu arriọba khọn vbe evba nii, rhunmwuda ọni ma i khian sẹtin tuorre vbe Liberia.” Vbe ọwara ikpẹdẹ igbe nọ lelẹe, ma keghi ya tota ke avbe arọndẹ na gie yo isi ni rre Senegal, ma na ke evba gha họn iyẹn ọghe vbene emwa ya gha wulo vbe Liberia, arriọba na vbe we ne emwa ghẹ gha ladian vbe owa vbe ẹghẹ ota, iran na wẹẹ, ọmwaikọmwa nọ rra uhi na, a ghi ya osisi gbe ẹre rua.

Anne: Emwa ni wa kakabọ begbe ẹre ima wa khin. Uhiẹn vbe I ye re ọvbokhan, ọ mwẹ ovan ne emwa mu mẹ rhunmwuda ne I na kakabọ mu ohan. Te ohan kue mu mwẹ vbe I gha khian fian ukpo rra! Sokpan te ima wa ta mu olọ ya rẹn wẹẹ, ma gha yo eke na gie ima gha rrie.

Paul: Ẹdogbo ọkpa ẹre na biẹ imẹ vbe Anne vbe odẹ orrie ọghe England. Evbibiẹ mwẹ kevbe iye Anne wa kakabọ rhie igiọdu ne ima, ne ima ru arọndẹ, rhunmwuda ọni, ma ghi ladian nẹ vbe owebe, ma keghi suẹn iwinna arọndẹ. Ekhọe hia ẹre iran wa ya kue yọ ne ima rhiegbe ye iwinna ugamwẹ ẹghẹ hia. Vbe I ghi rre ukpo 19, a keghi gie na tie mwẹ ne I do ga vbe Bẹtẹl, Anne keghi do deba mwẹ vbe ukpo 1982, vbe ima ghi ru orọnmwẹ nẹ.

Anne: Te Bẹtẹl wa gha yẹẹ ima, sokpan emwi nọ wa rre ima ekhọe kotọ gha dee, ọre ne ima ya ga vbe eke na na gualọ iyobọ etẹn. Etẹn ni ka gha ga zẹvbe arọndẹ na gie yo isi ẹre ima gu gha winna vbe Bẹtẹl, ọna keghi ya ima gha hoo ne ima vbe ya ga zẹvbe arọndẹ na gie yo isi. Asọn asọn vbe ọwara ukpo eha, ẹre ima ya gha na erhunmwu vbekpa ọna, rhunmwuda ọni, ma ma sẹtin ghọghọ vbe a ghi gie na tie ima gha die eklasi nogie 79 ọghe Owebe Gilead vbe ukpo 1985. A keghi gie ima gha rrie Liberia vbe West Africa.

Paul: Ma keghi la okọ ẹhoho nokaro na kpasẹ yi nọ gha rrie Liberia. Te ohan wa gha mu emwa hia, a ma ye kue ne emwa gha khian ladian vbe ẹghẹ ota. Uhiẹn emwa gha họn owogho ọghe imọto nọ kakabọ la, orhiọn iran i ghi sotọ, iran ghi gha lẹẹ gbe egbe. Asọn asọn ẹre ima ya gha tie ako eso vbe ebe Psalm kugbe, ne orhiọn ima mieke  na sotọ. Sokpan te iwinna na wa gha yẹẹ ima. Arọndẹ na gie yo isi ẹre Anne ghaa khin, vbene imẹ na gha ga vbe Bẹtẹl, mẹ vbe John Charuk a ẹre ọ gba gha winna. Ẹ i re avbiẹ emwi ẹre I ruẹ re vbe obọ ọre, rhunmwuda, ọ kpẹẹ re nọ ke rre Liberia, ọ vbe rẹn vbene emwi ye hẹ ne etẹn ni rre evba.

Anne: Vbọzẹ ne Liberia na wa rherhe gua ima egbe ro? Rhunmwuda etẹn ima nikpia kevbe etẹn ima nikhuo ni ghaa rre evba. Obọ esi ẹre iran wa ya gha mu ima, emwa ni mwẹ amuẹtinyan ẹre iran wa vbe gha khin. Ma na do kakabọ sikẹ iran; iran na do yevbe na ghee ẹgbẹe ọghe ima. Ẹmwẹ igiọdu ne iran ghaa tama ima, wa gha rhie ẹrhiọn ye ima iwu. Te ikporhu iyẹn nọ maan wa gha rhiẹnrhiẹn vbe evba. U gha kporhu ma ọ yan owa, u ma na kpẹẹ, iran ghi gha mu ohu! Emwa wa mobọ guan kaẹn ẹmwẹ nọ dekaẹn e Baibol vbe abọ idunmwu. Ọmwa sẹtin wa khian bu iran ya deba iran. Ma wa gha mwẹ emwa nibun ne ima gu gha ruẹ e Baibol, sẹrriọ wẹẹ, ọ ma gha khuẹrhẹ ne ima sẹtin gha gu ehia ruẹ emwi. Te ẹko wa gele gha sẹ ima ọyẹnmwẹ!

Paul: Vbe ọwara ukpo enẹ, ọfunmwegbe kegha rrọọ, sokpan vbọ ghi rre ukpo 1989, okuo keghi mu sa. Vbe July 2, 1990, avbe emwa ni sọtẹ daa arriọba keghi do miẹn agbadia vbe ikinkin ni lẹga e Bẹtẹl. Vbe ọwara uki eha, ma ma sẹtin gu emwa ni rre ẹvbo ọvbehe guan, ya sẹ egbe etẹn ni rre igiogbẹ. Olighi kegha rre ehia, a ma ghi gha miẹn evbare re, a na vbe gha mu ikhuo nibun yagha. Erriọ ẹre ọ wa gha ye vbe ọwara ukpo 14 vbe ẹvbo na.

Anne: Ivbi ẹvbo eso kegha gbele ivbi ẹvbo ọvbehe rua. Emwa eso ni viọ emwi igbinna mwẹ obọ, kegha hẹ yo hẹ rre vbe idunmwu, te egbe ne iran mu wa lughaẹn ne ọghe emwa ọvbehe, iran na gha fu emwi viọ vbe dọmwadẹ owa ne iran la re. Nọ ne iran eso, iran ghaa gbele emwa, te ọ yevbe na miẹn wẹẹ, “ọkhọkhọ ẹre iran gbele.” Te ikun emwa ni wulo wa gha bun vbe dọmwadẹ ehe ne iran na mu emwi gbe odẹ, eso vbọ keghi sikẹ eke ne abotu ghaa ye. A gbele Avbe Osẹe Jehova nibun rua ni ghaa ya ekhọe hia ga e Jehova, uhiẹn ya sẹ egbe etẹn eva na gie yo isi.

Etẹn nibun keghi mu arrọọ ọghe iran ya ikpadede, iran na gha viọ ivbi ẹvbo ne emwa hoo ne iran gbelua lẹre. Erriọ ẹre avbe etẹn na gie yo isi kevbe ni ga vbe Bẹtẹl wa vbe gha ru ẹre. Avbe ughugha ni rre ototọ vbe Bẹtẹl ẹre etẹn eso ni lẹẹ hin owa rre ghaa vbiẹ, vbene eso na gha deba ima vbiẹ ughugha ọghe ima vbe odukhunmwu. Ma vbe ẹgbẹe ọkpa ẹre ọ gba gha vbiẹ ughugha ọghe ima, ihinrọn ẹre iran ghaa khin.

Paul: Ẹdẹgbegbe, ẹre avbe ivbiyokuo nii ya gha hia ne iran la uwu e Bẹtẹl, ne iran mieke na rẹn deghẹ ima viọ emwa lẹre. Orhunmwu enẹ ẹre ọ ghaa bodẹ ne ima: eva kegha la ewindo ghee orere, vbene eva nikẹre na gha rre onurho nọ rre orere. Deghẹ eva ni rre orere na viọ obọ ghee odaro, ọ rhie ma wẹẹ emwi hia wa maan.  Sokpan iran gha viọ obọ ghee iyeke, ọ rhie ma wẹẹ ohu wa mu avbe ivbiyokuo ni rre, rhunmwuda ọni iran ghi zẹgiẹ ya viọ avbe etẹn nii lẹre.

Anne: Uki nibun ghi gberra, ivbiyokuo eso ne ohu wa mu keghi ya ẹtin vbe iwegbe la uwu e Bẹtẹl. Mẹ vbe ọtẹn nokhuo ọkpa keghi khui egbe ye uwu isi akhuẹ, e cupboard ọkpa rre nene isi akhuẹ, nọ mwẹ ehe na lẹre yi. Ọtẹn nokhuo nii na fẹko khuakhua egbe ye uwu evba. Avbe ivbiyokuo nii keghi bu mwẹ gha die eke ne I ghaa ye vbe odukhunmwu, te iran hia wa viọ osisi mwẹ obọ. Vbene ohu ya gha mu iran, erriọ ẹre iran ya gha sobọ vbe onurho ọghe ima. Ọdafẹn mwẹ kegha rinmwian iran wẹẹ, “Wa lahọ, ọvbokhan mwẹ rre isi akhuẹ.” Vbe I ghi khui e cupboard ne ọtẹn nokhuo nii lẹre yi, ọna gha gbe owogho. I na dọlegbe suẹn gha mwamwa emwi hia vbene ọ ka ye, ọna keghi rhie ẹghẹ eso. I rẹnrẹn wẹẹ, ivbiyokuo nii gha suẹn gha roro emwi nọ si ẹre ne I ma na he ye ladian, rhunmwuda ọni ohan na suẹn gha mu mwẹ, egbe mwẹ hia na gha guọ. I na gha roro vbene I khian ya kie ẹkhu hẹ ne I bu iran. Ẹre I na fẹko na erhunmwu ye uwu ekhọe, ne Jehova ru iyobọ mẹ. Iyeke ọni, I na fẹko kie ẹkhu nii, I na tuẹ iran. Ẹre ọkpa vbe uwu iran na wa sua mwẹ hin odẹ rre, ọ na wa gha rrie eke ne cupboard nii ye, ọna kie ẹre, ọ na suẹn gha zanzan emwi hia ni rre uwu ẹre. Sokpan egbe na wa wọọ ọre, rhunmwuda ọ ma miẹn emwi rhọkpa. Ẹre irẹn vbe ihua ẹre nikẹre na ya zanzan avbe ughugha nikẹre, ya sẹ egbe ihie ọghe nene owa. Sokpan iran ma vbe miẹn emwi rhọkpa.

Paul: Vbe uki nibun, ma ma miẹn evbare re sẹ ọkẹn. Sokpan evbare orhiọn wa gha ru iyobọ ne ima. Ugbẹnso ma i miẹn evbare re vbe owiẹ, ebe ẹdẹ na tie vbe owiẹ owiẹ vbe Bẹtẹl, ẹre ima ya gha ru evbare owiẹ, te ọna wa gha rhie ẹrhiọn ye ima iwu.

Akpawẹ evbare fo vbe Bẹtẹl, ma na ghi ya gualọ vbe orere, egbọre te obọ gha te vba emwa ne ima viọ lẹre. Ugbẹnso, odẹ ọghe ọyunnua ẹre Jehova ya gha kpemehe ne ima, ọ ghi wa rre vbe ẹghẹ ne ima ya gualọe zẹẹ! E Jehova wa kpemehe emwi ne ima ghaa gualọ ne ima, ọ na vbe mu ima orhiọn sotọ.

Zẹvbe ne ọlọghọmwa ya gha tua yọ tua yọ, erriọ ẹre Ẹmwẹ ọghe Osanobua ya gha rhie ẹrhiọn ye ima iwu. Ugbugbẹhia ẹre etẹn ima ya gha rhie uhunmwu mwẹ atatabọ, sokpan te iran wa ye gha mwẹ amuẹtinyan nọ wegbe. Etẹn ima eso kue kha wẹẹ, te ọlọghọmwa ne iran zin egbe ẹre “mu iran egbe khẹ orueghe nọkhua.” Etẹn ni re igbama ni mwẹ udinmwẹ kevbe avbe ediọn keghi rhiegbe ladian ya ru iyobọ ne etẹn. Etẹn ni lẹẹ hin owa rre wa gha ru iyobọ ne egbe, iran na gha kporhu vbe eke ne iran ye. Iran na vbe ya emwi ne iran miẹn ru Ọgua Arriọba ne iran na gha do iko vbe uwu oha. Iko kevbe ikporhu wa ru iyobọ ne etẹn na ya sẹtin zin egbe ọlọghọmwa nọ wegbe ne iran ghaa ye. Vbe ẹghẹ ne ima na gha ghae evbare, ukpọn kevbe emwi ọvbehe na ya yin agbọn ne etẹn, etẹn nibun ma we ne ima viọ ukpọn ne iran, nọghayayerriọ, iran na we ne ima viọ ẹkpo ikporhu ne iran, emwi ne iran ru na wa kakabọ rhie igiọdu ne ima. Emwa ne iro han rẹn kevbe ne okuo ghaa ya agbọn lọghọ wa gha danmwehọ iyẹn nọ maan. Vbe uwu ena hia, te Avbe Osẹe Jehova wa gha sọyẹnmwẹ. Te ọna wa gha kpa emwa nibun odin; te etẹn wa gele gha baa vbe na ghee ukpa vbe uwu ebiebi. (Mat 5:​14-16) Te etẹn wa rhiegba ye ugamwẹ e Jehova, rhunmwuda ọni, ivbiyokuo eso na kue do khian Osẹe Jehova.

Paul: Igba isẹn ẹre ima kpa hin e Liberia rre, igbaha vbọ, na gha re ovbi ẹghẹ kherhe, vbene igbava vbọ, na gha re ukpo ohoho. Emwi ne ọtẹn nokhuo ọkpa nọ re arọndẹ na gie yo isi tae, wa gele rhan otọ vbene emwi ghaa ye ima hẹ vbe ima khian kpa, ọ khare wẹẹ: “Vbe ima rre Owebe Gilead, a keghi rhie igiọdu ne ima, ne ima ya ekhọe hia rhiegba ye ugamwẹ ọghe ima, erriọ ẹre ima wa gele ru ẹre zẹẹ. Rhunmwuda ọni, te ọ wa da ima sẹ ugboloko vbe ima khian sẹ etẹn rae vbe uwu ẹghẹ nọ wegbe na!” Ma wa kpọnmwẹ e Jehova wẹẹ, ma ye sẹtin gha ru iyobọ ne etẹn ni rre Liberia, vbe ima rre avbe ẹvbo ni sikẹ Liberia.

Anne: Vbe ima khian ghi kpa vbe May 1996, mẹ vbe ọdafẹn mwẹ kevbe etẹn eva keghi la imọto, ebe ughughan ni dekaẹn iwinna ima vbe Liberia ẹre ọ vuọn imọto na. Te ima ghaa hoo ne ima fi imọto na gha rrie eke ne okuo i ye vbe ẹvbo nii, ke eke ne ima ke kpa gha rrie eke ne ima rrie na gha sẹ ibiriki 10 (16 km). Vbe ima wa da kpa, emwa ni khọn kegha filo osisi ye ẹhoho. Ẹre iran na mu ima mudia, iran na silo ima eha ladian vbe uwu imọto, iran na ghi ya nene imọto mu ọdafẹn mwẹ kpa. Orrirri keghi gbe ku ima. Vbe udemwurri, ma na beghẹ ọdafẹn mwẹ vbe ọ khian dee, esagiẹn na gha lẹẹ kua vbe uharo ẹre. Ma te gha roro ẹre wẹẹ, te iran ya osisi fi ẹre, sokpan ma na ghi do bẹghe ẹre wẹẹ, akpawẹ te iran ya osisi fi ẹre, ẹ i ghẹ te sẹtin khian sẹ eke ne ima ye! Ọkpa vbe uwu iran nii, ẹre ọ kinmwi ẹnrẹn vbe ọ rhua ẹre ladian vbe uwu imọto. Ma kpọnmwẹ Osa wẹẹ, obọ ma kakabọ da ẹre.

Imọto ọkpa ọghe ivbiyokuo ghaa rre evba, emwa ne ohan ghaa mu ẹre ọ kun egbe ye uwu ẹre. Ẹre ima na dobọ mu imọto nii rhunmwuda, ọ vuọn nẹ. Ulẹ ọgbẹgbẹ ẹre draiva ya fi imọto nii kpa, kherhe ọ ghi kẹ ne ima dee fua, ma kegha rinmwiaẹn nọ mudia, sọkpan rhunmwuda ne ohan na gha muẹn, ọ ma mudia. Ma na ye dobọ mu enene imọto, sokpan ma ghi sẹ eke ne ima rrie, te ima ghaa guọ rhunmwuda, egbe hia wiẹn rua nẹ.

Paul: Ukpọn ima yanghan nẹ, erriọ ẹre ọ vbe ya gbiruẹn. Te ima ghi gha ghee egbe aro aro, rhunmwuda ma ma rẹn vbene ima ya sẹtin miẹn uhunmwu hẹ. Uwu irunmwu ẹre ima vbiẹ re vbe ọkpẹn helicopter ọkpa na ya osisi halọ uvun yi, u gha wa ghee helicopter na, ọ ghi yevbe na miẹn wẹẹ, kherhe ọ ghi kẹ nọ zagha fo. Helicopter na, ẹre ọ ghi mu ima gha rrie Sierra Leone vbe ẹdẹ ghi gbe. Ma wa kpọnmwẹ Osanobua we ima rre agbọn, sokpan orhiọn ima ma sotọ rhunmwuda etẹn ima ni rre Liberia.

Anne: Ma ghi sẹ Bẹtẹl nọ rre Freetown vbe Sierra Leone, etẹn keghi gbaroghe ima ẹsẹsẹmwẹse. Sokpan I na suẹn gha ye avbe emwi ni wegbe ni sunu vbe Liberia rre. Ẹdẹgbegbe ẹre ohan wa ya gha mu mwẹ wẹẹ, emwi sẹtin sunu daa mwẹ, I ma sẹtin gha roro emwi ẹse, emwi hia na wa gha mwẹ vbe nọ ye hẹ. I gha rhiọrre vbe asọn, egbe mwẹ ghi gha guọ zẹzẹzẹ rhunmwuda, ohan ghaa mu mwẹ wẹẹ, emwi nọ wegbe sẹtin wa sunu. I ma sẹtin gha hiọnrọn ẹse. Ọdafẹn mwẹ ghi si mwẹ kẹ egbe, ọ ghi gu mwẹ na erhunmwu. Ma ghi gha sihuan Arriọba, orhiọn mwẹ te do sotọ. I na gha roro ẹre wẹẹ, egbọre te I khian ghi suẹn gha mwẹmwẹ kevbe wẹẹ, I i khian ghi sẹtin ru iwinna arọndẹ na gie yo isi.

I i khian sẹtin mianmian emwi nọ ghi sunu. Vbe uzọla nii, a keghi viọ ebe iyẹn eva gie ima. Ọkpa vbọ na gha re Awake! ọghe June 8, 1996. Ọkpa vbe usun uhunmwuta nọ ghaa rre uwu ẹre kegha re “Emwi Ne U Gha Ru Vbe Osi Ghaa Si Ruẹ.” Ebe iyẹn na wa gele ya mwẹ rẹn emwi nọ si ẹre ne ohan na gha mu mwẹ. Nogieva na gha re The Watchtower ọghe May 15, 1996, uhunmwuta ọkpa nọ ghaa rre uwu ẹre kegha re “De Eke Ne Iran Na Miẹn Ẹtin?” Efoto ọghe ebalabala ne emwi bun ẹnrẹn ifuẹn ghaa rre uwu The Watchtower na. Uhunmwuta nii keghi rhan otọ ọre wẹẹ, zẹvbe ne avbe ebalabala ya rri evbare, iran ghi vbe sẹtin ye gha tin vbe emwi gha ru ifuẹn ọghe iran, e Jehova gha vbe sẹtin ya orhiọn nọhuanrẹn ọghẹe ru iyobọ ne ima, ne ima mieke na sẹtin ye gha ru iyobọ ne emwa ọvbehe vbe emwi nọ wegbe gha sunu daa ima. Te Jehova wa ya avbe ebe iyẹn na rhie ẹtin yọ mwẹ iwu vbe ẹghẹ ne I wa ya gualọe zẹẹ. (Mat 24:45) I keghi ru ezanzan yan avbe avbe uhunmwuta na, I na viọ ehia ye efọnkpa vbe eke ne I mwamwa ebe yi, iran wa gele ru iyobọ mẹ. Ẹghẹ eso ghi gberra nẹ, ohan ma ghi gha mu mwẹ.

Paul: Ma ghi kpa hin Liberia rre, ẹghẹ ke ẹghẹ ne ima ghi ya dọlegbe yo, te ọyẹnmwẹ wa gha sẹ ima. Ufomwẹ ọghe ukpo 2004 ẹre ọ gba vbe odẹ ukpo 20 ne ima he gbe vbe iwinna ugamwẹ ọghe ima. Okuo ne iran te gha khọn vbe evba keghi sẹ ufomwẹ. Ẹre a na gha ru emwamwa na ya suẹn owa na bọlọ vbe abotu. Sokpan vbene ima te rẹn, a na we ne ima suẹn iwinna ugamwẹ ọvbehe.

Ọna ma zẹdẹ gha khuẹrhẹ ne ima. Te ima wa ya ekhọe hia hoẹmwẹ etẹn ni rre Liberia, te iran ghi yevbe ẹgbẹe  ọghe ima, ma ma ghi hoo ne ima kpa sẹ iran rae. Vbe ima rrie Owebe Gilead, te ima kpa sẹ ẹgbẹe ima rae, ọna wa ya ima do bẹghe ẹre wẹẹ, e Jehova wa fiangbe ima vbe ima gha mu ẹdagbọn ima ye ọre obọ, rhunmwuda ọni, ma na ghi miẹn iwinna ugamwẹ na yi. E Ghana nọ ma vbe rre egbe ne Liberia ẹre ima ghi rrie.

Anne: Ma ghi gele viẹ vbe ima kpa hin e Liberia rre. Ọ keghi wa kpa ima odin vbe ọdiọn ọkpa nọ fuẹro na tie ẹre Frank, nọ vbe khian enọwanrẹn nẹ tama ima wẹẹ: “Ọ khẹke ne uwa mianmian ima!” Ọ na ghi rhie tẹ wẹẹ: “Ma rẹnrẹn wẹẹ, uwa i khian sẹtin mianmian ima, sokpan, ọ khẹke ne uwa ya ekhọe hia rhiegba ye iwinna ugamwẹ ne uwa khian ghi gha ru nian. Obọ e Jehova ẹre ọ ke rre, rhunmwuda ọni, wa gbaroghe etẹn ni rre odọ.” Ọna keghi wa rhie igiọdu ne ima, ọ na vbe mu ima egbe khẹ eke ne ima ghi rrie nian, rhunmwuda ma ma rẹn ọmwa rhọkpa vba, ma ma vbe rẹn vbene a ru emwi hẹ vba.

Paul: Vbọrhirhighayehẹ, vbene ima te rẹn, ma hoẹmwẹ etẹn ni rre Ghana nẹ. Avbe Osẹe Jehova wa gha bun vba! Ma wa miẹn emwi ruẹ vbe obọ avbe ọse ima na vbe odẹ ne iran ya rhikhan mu e Jehova. Vbe ima ghi gbe ukpo 13 nẹ vbe Ghana, emwi ọvbehe keghi sunu. Otu na we ne ima ya ga vbe abotu nọ rre East Africa vbe Kenya. Agharhemiẹn wẹẹ, ẹmwẹ etẹn ni rre Ghana ghaa da ima, ma wa rherhe gu obọ etẹn ni rre Kenya. Vbe na ghee Ghana kevbe Liberia, eke na na gualọ iyobọ ẹre Kenya ne ima ghi na ga wa khin.

Anne: Emwi nọ wegbe wa sunu daa mwẹ nẹ ke ukpo nibun gha de nian, erriọ ẹre ohan wa vbe kakabọ gha mu mwẹ. Emwi nọ wegbe gha sunu daa ruẹ, u na vbe gha rre eke na na khọn, ọ sẹtin si emianmwẹ, ọ sẹtin wa ya iro han ọmwa, ọ sẹtin vbe ya ohan gha mu ọmwa. E Jehova i khian wa gbogba ga ima vbe odẹ ọghe ọyunnuan ne emwi vbenian ghẹ sunu daa ima. Uhiẹn do fi ebanban, I gha họn vba gha fi osisi, ibiẹ hia ghi wa gha ru mwẹ woo, obọ mwẹ ghi wa zeze. Sokpan I wa miẹn iyobọ nọ khẹke vbe emwi hia ne Jehova ya ru iyobọ ne ima, vbe na ghee etẹn ne ima gba ga. I vbe do bẹghe ẹre nẹ wẹẹ, ma ghaa ruẹ emwi ne egbe ima, ma na gha na erhunmwu, ma na vbe gha yo iko kevbe ikporhu, e Jehova ghi ru iyobọ ne ima ya sẹtin ye gha ru iwinna ugamwẹ ima.

Paul: Ọmwa sẹtin nọ ruẹ wẹẹ, “Iwinna ugamwẹ ne u ye yẹẹ ruẹ ra?” Ẹvbo ne u na ga sẹtin wa gha mose, sokpan emwi sẹtin wa fi werriẹ, emwi nọ wegbe sẹtin vbe sunu vbe ẹghẹ na ma ro a ma kọ. Nọnaghiyerriọ, de emwi nọ khẹke nọ yẹẹ ima sẹ, ẹvbo ne ima na ga nọ ra, ra ẹmwẹ etẹn ni ghaan ni rre ẹvbo ne ima na ga? Etẹn ima ni ghaan nọ. Ekhọe ọkpa ẹre ima hia mwẹ, agharhemiẹn wẹẹ, ehe ughughan ẹre ima ke rre. Ma kegha roro wẹẹ, te a gie ima ne ima ya rhie igiọdu ne iran, sokpan ẹmwata nọ rrọọ ọre wẹẹ, iran wa vbe rhie ẹrhiọn ye ima iwu.

Te Jehova ya etẹn ima vbe uhunmwu otagbọn hia ru ima ẹse, ẹgbẹe ọkpa ẹre ima khin. Iko ne ima rhirhi gha ye, ẹgbẹe ọkpa ẹre ima khin, ma ghaa rre uwu ẹbu iran, ọ ghi yevbe na miẹn wẹẹ, owa ẹre ima ye. Ma wa mwẹ ilẹkẹtin wẹẹ, ma gha mu ẹtin yan e Jehova, ọ gha rhie ẹtin ne ima ya sẹtin zin egbe ọlọghọmwa nọ rhirhi gha khin.​—Fil 4:13.