Emwi Nọ Gha Ru Iyobọ Nuẹn Ya Gha Ruẹ Emwi Vbe Ẹghẹ Hia
Ọ ZẸDIA lọghọ ruẹ ne u gha ruẹ e Baibol ne egbuẹ vbe ẹghẹ hia ra? U vbe zẹdia roro ẹre wẹẹ, u i sọyẹnmwẹ iruẹmwi e Baibol ruẹ ra? Ọ gha kẹ, ọ zẹdia ye vberriọ ne ima hia vbe ugbẹnso. Sokpan, muẹn roro emwi eso ne ima ru vbe ẹghẹ hia, vbe na ghee ne ima na khuẹ egbe ima. Agharhemiẹn wẹẹ, ọ rhie ẹghẹ kevbe ẹrhiọn ne ima ya sẹtin kpe egbe ima huan, sokpan egbe keghi rọkhọ ima vbe ima gha ru vberriọ! Erriọ vbe ye, iruẹmwi e Baibol keghi yevbe amẹ ne rọkhọ nọ kpe egbe ima huan. (Ẹfis 5:26) Gia guan kaẹn emwi eso nọ gha sẹtin ru iyobọ ne ima:
Ru emwamwa yotọ. E Baibol na ruẹ ne egbe ọmwa rre usun “avbe emwi ni ru ekpataki sẹ” nọ ma khẹke ne Ovbi Otu e Kristi bizugbe. (Fil 1:10) Ne u ghẹ mieke na mianmian emwamwa ne u ru yotọ, u sẹtin gbẹnnẹ ọnrẹn ye eke ne u gha na rherhe gha bẹghe ẹre, vbe na ghee noticeboard, u sẹtin vbe sikaẹn ye fridge. Ra u sẹtin vbe mu alarm ye efoni ruẹ nọ ye ruẹ re rre, ọ ke sẹ ẹghẹ ne u mwamwa yọ.
Mwamwa iruẹmwi ruẹ vbe odẹ ne u rẹnrẹn wẹẹ, u gha ya miẹn ere vbọ. Ọ khuẹrhẹ nuẹn ne u loo ẹghẹ nọ taẹn ya ruẹ emwi ra? Ra ovbi ẹghẹ kherhe ẹre u ya ruẹ emwi ne egbuẹ? Uwẹ ẹre ọ rẹn nọ maan nuẹn sẹ, rhunmwuda ọni, ru emwamwa nọ gha ru iyobọ nuẹn. Deghẹ ọ ma khọn ruẹ ne u ruẹ emwi vbe ẹghẹ ne u mwamwa yọ, u sẹtin hia ne u ruẹ emwi vbe ifuanro igbe. Ọ gha khọnrẹn we ovbi ẹghẹ kherhe ẹre u ya ruẹ emwi, ọ maan sẹ u ma zẹdẹ ruẹ hiehie. Egbọre u gha ghi suẹn gha ruẹ emwi nẹ, ẹ i ghi khọn ruẹ ne u dobọ yi.—Fil 2:13.
Mwamwa uhunmwuta ne u khian ruẹ yotọ. Adeghẹ ọ na sẹ ẹghẹ ne u khian ya ruẹ emwi, u ke suẹn gha gualọ emwi ne u khian ruẹ, ọ ghi yevbe na miẹn wẹẹ, u i “loo ẹghẹ [ruẹ] ẹse.” (Ẹfis 5:16) U gha sẹtin gbẹnnẹ dọmwadẹ uhunmwuta ra ebe ne u gha hoo ne u ruẹ yotọ ra? Adeghẹ inọta rhọkpa na la ruẹ ekhọe, u ghi gbẹn ọnrẹn yotọ. U gha ghi ruẹ emwi fo nẹ, u sẹtin gbẹnnẹ avbe uhunmwuta ọvbehe ne u gha hoo ne u ruẹ vbekpa re.
Gha ru afiwerriẹ. Hia ne u gha ru afiwerriẹ eso, vbe igiemwi, u sẹtin ru afiwerriẹ ye ẹghẹ ne u mwamwa ne u khian ya ruẹ emwi ra uhunmwuta ne u hoo ne u ruẹ vbekpa re. Emwi nọ ru ekpataki sẹ ọre ne u gha ruẹ emwi vbe ẹghẹ hia, ẹ i re ẹghẹ ne u hoo ne u ya ruẹ emwi, ra vbene iruẹmwi ruẹ kpẹẹ sẹ hẹ, ra uhunmwuta ne u ruẹ re.
Ma wa miẹn afiangbe nibun deghẹ ima na gha ruẹ emwi vbe ẹghẹ hia. Ma ghi do kakabọ sikẹ e Jehova, ma ghi vbe gha yin ẹse, kevbe wẹẹ, egbe ghi vbe rọkhọ ima.—Jọs 1:8.