U gha hoo ne u kakabọ miẹn ere vbe u ghaa ruẹ emwi ne egbuẹ ra? Avbe emwi ne ima khian guan kaẹn na gha ru iyobọ nuẹn:

• Gualọ ehe nọ maan. U sẹtin gualọ ehe nọ mose, nọ vbe ye khuẹrhẹ kevbe ne ukpa vbe ye. U sẹtin tota ye odaro etebul, ra u sẹtin gha rrie orere vbe eke ne egbe gha na fu ruẹ rre.

• Gualọ ehe nọ divbiẹ. Jesu keghi na erhunmwu vbe “owiẹ fioro” vbe “ehe nọ divbiẹ.” (Mak 1:35) Adeghẹ u ma miẹn ehe nọ divbiẹ, u sẹtin tama ẹgbẹe ruẹ ra emwa ne uwa gba rre owa vbekpa ẹghẹ ne u mwamwa yọ ne u khian ya gha ruẹ emwi ne egbuẹ, u ghi tama iran, ne iran rhie ẹghẹ nuẹn ya ruẹ emwi.

• Rhie aro tua emwi ne u hoo ne u ruẹ. Ghẹ gi emwi rhọkpa rhie ruẹ ekhọe hin emwi ne u ruẹ rre. Deghẹ efoni ra etablẹt ẹre u loo ya ruẹ emwi, u sẹtin muẹn ye silent ra airplane mode, nẹ ghẹ mieke na rhie ruẹ ekhọe hin emwi ne u ruẹ rre. Adeghẹ emwi rhọkpa na la ruẹ ekhọe nọ khẹke ne u ru, vbe ẹghẹ ne u ya ruẹ emwi, u ghi gbẹn ọnrẹn yotọ, u gha ghi ruẹ emwi fo nẹ, u ghi ya ru ẹre. Deghẹ ekhọe ruẹ i rre emwi ne u ruẹ, u sẹtin kpaegbe, u ghi khian lẹga ra u ghi niẹn egbe kherhe.