1. De emwi nọ khẹke ne ima kọ ye orhiọn kevbe wẹẹ, de ilẹkẹtin ne ima mwẹ?

 Ọ KHẸKE ne ima kọe ye orhiọn wẹẹ, a gha zẹ ima kpokpo zẹvbe ne ima ya kporhu iyẹn nọ maan. Ukpokpo na sẹtin kue tua sayọ vbe odaro. (Dan 11:44; 2 Tim 3:12; Arhie 16:21) Sokpan, ọ khẹke ne ima gha mwẹ ilẹkẹtin wẹẹ, e Jehova gha ru iyobọ nọ khẹke ne ima. Vbọzẹ? Rhunmwuda ke ẹghẹ gha dee, ẹre Jehova ya ru iyobọ ne eguọmwadia ẹre, ya sẹtin musọe vbe iwinna nọ waa iran re, ọ gha khọnrẹn nọ gha re iwinna nọ lọghọ. Gi ima guan kaẹn emwi eso nọ sunu daa akhasẹ ighẹ Ẹzikiẹl, nọ ghaa kporhu ma Ivbi e Ju ni rre imu vbe Babilọn.

2. De vbene Jehova ya gie emwa ni ghaa rre ẹdogbo ne Ẹzikiẹl na kporhu, vbe ima khian ziro yan vbe ako iruẹmwi na? (Ẹzikiẹl 2:3-6)

² De aro emwa ni ghaa rre ẹdogbo ne Ẹzikiẹl na gha kporhu? E Jehova keghi gie iran zẹvbe emwa ni “zẹ utun vbe ehọ,” ni “ze vbe ẹkokoudu,” kevbe “emwa ni sọtẹ.” Te iran wa gha yin vbe na ghee igban nọ su ọmwa kevbe ekpakpahuangan. Ẹi khabe ne Jehova na tama Ẹzikiẹl inugba nọ khin wẹẹ: “Ghẹ gi ohan iran muẹn”! (Tie Ẹzikiẹl 2:3-6.) Ọ mwẹ emwi eha nọ ru iyobọ ne Ẹzikiẹl ya sẹtin musọe vbe iwinna ikporhu ọghẹe: (1) E Jehova ẹre ọ gie ẹre, (2) orhiọn nọhuanrẹn ọghe Osanobua keghi rhie ẹtin nẹẹn kevbe wẹẹ, (3) Ẹmwẹ Ọghe Osanobua keghi yae gha mwẹ amuẹtinyan nọ wegbe. De vbene emwi eha na ya ru iyobọ ne Ẹzikiẹl hẹ? De vbene ọ vbe ya ru iyobọ ne ima vbe ẹdẹnẹrẹ?

3. De ẹmwẹ eso ne ima gha sẹtin kha wẹẹ, ẹre ọ rhie igiọdu ne Ẹzikiẹl, kevbe wẹẹ, de vbene Jehova ya gi ẹre rẹn wẹẹ, irẹn gha ru iyobọ nẹẹn?

³ E Jehova keghi tama Ẹzikiẹl wẹẹ: “I gha gie ruẹ.” (Ẹzik 2:3, 4) Ẹi mwẹ ọna ma rhie igiọdu ne Ẹzikiẹl. Vbọzẹ ne ima na kha vberriọ? Ẹi mwẹ ọ ma yerre wẹẹ, e Jehova ka ta ẹmwẹ vbenian  ma e Mozis kevbe Aizaia ne akhasẹ ọghẹe, vbe ẹghẹ nọ ya mu iwinna ne iran. (Ẹks 3:10; Aiz 6:8) Ẹzikiẹl wa vbe rẹn vbene Jehova ya ru iyobọ ne akhasẹ eva na, agharhemiẹn wẹẹ, iwinna iran ma gha khuẹrhẹ. Rhunmwuda ọni, vbe Jehova ghi tama Ẹzikiẹl igba eva wẹẹ: “I gha gie ruẹ,” ọ kegha mwẹ ilẹkẹtin wẹẹ, e Jehova gha ru iyobọ ne irẹn. Ẹmwẹ na ighẹ, “E Jehova keghi gu mwẹ guan” wa ladian inugba nọ khin vbe ebe Ẹzikiẹl. (Ẹzik 3:16) Yevbesọni, ẹi re avbiẹ inugba ẹre Ẹzikiẹl vbe kha wẹẹ, “E Jehova keghi werriegbe gu mwẹ guan.” (Ẹzik 6:1) Ena wa ya Ẹzikiẹl rẹn wẹẹ, e Jehova ẹre ọ gie irẹn. Vbe deba ọni, rhunmwuda ne Ẹzikiẹl na gha re ovbi ohẹn, ọ gha kẹ, erhae vbe tama rẹn vbekpa vbene Jehova ya gha tama avbe akhasẹ ọghẹe wẹẹ, irẹn gha ru iyobọ ne iran. Te Jehova wa tama Aizik, e Jekọb, kevbe Jerimaia wẹẹ: “I rrọọ yaba ruẹ.”​—Gẹn 26:24; 28:15; Jer 1:8.

4. De emwi ne ima gha sẹtin kha wẹẹ, ẹre ọ rhie igiọdu ne Ẹzikiẹl?

⁴ Ivbi Izrẹl gha rhie ehọ ne Ẹzikiẹl ta yi ra? E Jehova keghi kha wẹẹ: “Ọkpa i rre Ivbi Izrẹl nọ gha hoo nọ danmwehọ ruẹ rhunmwuda, iran ma hoo ne iran danmwehọ mwẹ.” (Ẹzik 3:7) Rhunmwuda ne Ivbi Izrẹl ma na rhie ehọ ne Ẹzikiẹl ta yi, te iran he ẹmwẹ ye Jehova obọ. Ọna keghi ya Ẹzikiẹl rẹn wẹẹ, ẹi re wẹẹ te irẹn ma ru iwinna irẹn ẹse, ẹre ọ si ẹre ne iran ma na danmwehọ. E Jehova keghi tama Ẹzikiẹl wẹẹ, ẹmwẹ akhasẹ ọghe ibuohiẹn nọ ta gha ghi sẹ nẹ, Ivbi Izrẹl “gha rẹn wẹẹ akhasẹ te rre ehe ne iran ye.” (Ẹzik 2:5; 33:33) Ẹi mwẹ ọna ma rhie igiọdu ne Ẹzikiẹl ya sẹtin ru iwinna ikporhu ne Jehova waa ẹre.

5. De emwi nọ khian ru iyobọ ne ima zẹvbe nọ rre ebe Aizaia 44:8?

⁵ Ọ wa vbe rhie igiọdu ne ima, ne ima na rẹn  wẹẹ, e Jehova ẹre ọ gie ima. Egie nọkhua ma wa ye, ne ima na re “Osẹe” Jehova. (Aiz 43:10) U miẹn uyi nọkhua na mu ye ima egbe! Zẹvbe ne Jehova tama Ẹzikiẹl wẹẹ: “Ghẹ gi ohan muẹn,” e Jehova vbe tama ima, ne ima “ghẹ fian afianma.” Vbọzẹ nọ ma na khẹke ne ima gha mu ohan emwa ni zẹ ima kpokpo? Vbe na ghee Ẹzikiẹl, e Jehova ẹre ọ gie ima, ọ wa vbe rre ima iyeke.​—Tie Aizaia 44:8.

6. (a) De emwi ne Jehova ta, nọ ya ima rẹn wẹẹ, ọ rre ima iyeke? (b) De emwi nọ fu ima ẹko rre vbe ẹdẹnẹrẹ?

⁶ E Jehova vbe gi ima rẹn wẹẹ, irẹn rre ima iyeke. Vbe igiemwi, vbene Jehova te kha wẹẹ: “Wa ọre osẹe mwẹ,” ọ na kha wẹẹ: “U ghaa la uwu ẹzẹ nọ dinmwi khian, I gha mudia kuẹ, ọlọghọmwa ruẹ I khian gbe ruẹ uhunmwu, u ghaa la uwu erhẹn khian, u i khian giẹn, ibavbaro nọkhua ne u miẹn, i khian kuan ruẹ.” (Aiz 43:2) Ugbẹnso, zẹvbe ne ima ya ru iwinna ikporhu iyẹn nọ maan, ma wa miẹn ọlọghọmwa nọ yevbe na ghee okpe amẹ kevbe erhẹn. Sokpan, e Jehova gha ru iyobọ ne ima, ne ima ye gha ru iwinna na. (Aiz 41:13) Zẹvbe nọ ghaa ye vbe ẹghẹ Ẹzikiẹl, emwa nibun vbe ẹdẹnẹrẹ i vbe rhie ehọ ne ima ta yi. Sokpan ọni ma rhie ma wẹẹ, ima i ru iwinna ikporhu iyẹn nọ maan na ẹse. Ọ wa fu ima ẹko rre, erriọ vbe ya rhie ẹrhiọn ye ima iwu, ne ima na rẹn wẹẹ, ẹko wa rhiẹnrhiẹn e Jehova, rhunmwuda ne ima na ru iwinna ikporhu na, vbene egbe i na wọọ ima. Ukọ e Pọl khare wẹẹ: “Osanobua gha san dọmwadẹ ọghẹe ẹse zẹvbe nọ winnaẹn.” (1 Kọr 3:8; 4:1, 2) Ọ mwẹ ọtẹn nokhuo ọkpa, ọ kpẹẹ re nọ ke ru iwinna arọndẹ, ọ khare wẹẹ: “Ọ keghi ya mwẹ sọyẹnmwẹ, ne I na rẹn wẹẹ, e Jehova gha san ima ẹse ye iwinna ne ima ru.”

7. De vbene ọ ghaa ye Ẹzikiẹl hẹ, ẹghẹ ke ẹghẹ nọ ya mu umian nii roro? (Ghee efoto nọ rre odaro ebe na.)

⁷ Aro Ẹzikiẹl wa da ẹre wẹẹ, orhiọn nọhuanrẹn ọghe Osanobua ọre ẹtin nọ sẹ ehia. Vbe umian ne Ẹzikiẹl miẹn, ọ keghi bẹghe vbene orhiọn nọhuanrẹn ya gha ru iyobọ ne avbe odibosa. Ọ vbe bẹghe ẹre wẹẹ, vbene ikẹkẹ okuo ọghe Osanobua kpọlọ sẹ, orhiọn nọhuanrẹn ọghe Osanobua ẹre ọ ghaa muẹn khian. (Ẹzik 1:20, 21) De emwi ne Ẹzikiẹl ghi ru vbe ọ bẹghe ẹre? Ọ khare wẹẹ: “Ugbẹnvbe I ghi miẹn ọna, I keghi de mu aro rhu otọ.” Ọ keghi gbe orrirri ku Ẹzikiẹl sẹrriọ wẹẹ, ọ na de mu aro rhu otọ. (Ẹzik 1:28) Ẹghẹ ke ẹghẹ ne Ẹzikiẹl ya mu umian na roro, ẹi mwẹ ọ ma yae gha mwẹ ilẹkẹtin wẹẹ, orhiọn nọhuanrẹn ọghe Osanobua gha ru iyobọ ne irẹn ya sẹtin musọe vbe iwinna ikporhu ọghe irẹn.

8-9. (a) Vbọ ghi sunu daa Ẹzikiẹl vbe Jehova tama rẹn wẹẹ, nọ kpaegbe? (b) De emwi ọvbehe ne Jehova ru, nọ ya ru iyobọ ne Ẹzikiẹl, nọ mieke na sẹtin ru iwinna ikporhu ọghẹe?

⁸ E Jehova keghi tama Ẹzikiẹl wẹẹ: “Ovbi ọmwa, kpaegbe mudia ighẹ I khian gu ruẹ guan.” Orhiọn nọhuanrẹn ọghe Osanobua kevbe ẹmwẹ ne Jehova tama Ẹzikiẹl na, ẹre ọ ghi ru iyobọ nẹẹn ya sẹtin kpaegbe. Ẹzikiẹl khare wẹẹ: “Orhiọn Osanobua keghi la uwu imẹ, ọ keghi mu mwẹ mudia.” (Ẹzik 2:1, 2) Ọ ghi sẹ ẹghẹ, Ẹzikiẹl na gele bẹghe obọ e Jehova vbe ẹdagbọn ọnrẹn, ọni ọre orhiọn nọhuanrẹn ọghe Osanobua, erriọ wa vbe gha ye vbe uwu ẹghẹ nọ ya ru iwinna ikporhu ne Jehova wa ẹre. (Ẹzik 3:22; 8:1; 33:22; 37:1; 40:1) Orhiọn nọhuanrẹn ọghe Osanobua wa ru iyobọ ne Ẹzikiẹl, nọ mieke na sẹtin kporhu ma Ivbi Izrẹl ni “ze vbe udu kevbe ni zẹ utun vbe ehọ.” (Ẹzik 3:7) E Jehova keghi tama Ẹzikiẹl wẹẹ: “Mẹ gha ru ẹre ne uwẹ vbe ze vbe ẹkokoudu kevbe ne u wegbe zẹ vbene iran ye. I gha ru ẹre ne uwẹ ye gbain zẹvbe utete okuta kevbe nọ kaka zẹvbe edaiamọn, ghẹ gi ohan avbe etẹ nii muẹn.” (Ẹzik 3:8, 9) Te ọ yevbe ne Jehova ghaa tama Ẹzikiẹl wẹẹ: ‘Ghẹ gi ohan muẹn, ọ gha khọnrẹn wẹẹ iran zẹ utun vbe ehọ.’

 ⁹ Ke ẹghẹ nii kpa, orhiọn nọhuanrẹn ọghe Osanobua kegha gu Ẹzikiẹl rrọọ. Ẹzikiẹl khare wẹẹ: “Orhiọn Osanobua keghi wa ya ẹtin nọkhua hin yan mwẹ.” Ọ sẹ uzọla ọkpa nọ rhie re, Ẹzikiẹl ke do rẹn otọ uhunmwu ne Jehova gie ẹre, nọ mieke na sẹtin tae ma Ivbi Izrẹl. (Ẹzik 3:14, 15) Iyeke ọni, Osanobua keghi tama rẹn nọ gha rrie uwu iya. Ọ ghi sẹ evba, “orhiọn Osanobua keghi la uwu [egbe ẹre].” (Ẹzik 3:23, 24) Ena hia, ẹre ọ ghi ru iyobọ ne Ẹzikiẹl, nọ mieke na sẹtin suẹn iwinna ikporhu ọghẹe.

10. De emwi nọ khian ru iyobọ ne ima ya sẹtin ru iwinna ikporhu na kevbe wẹẹ, vbọzẹ ne ima na gualọ iyobọ na?

¹⁰ De emwi nọ khian ru iyobọ ne ima, ne ima mieke na sẹtin ru iwinna ikporhu na? Ne ima mieke na rẹn ewanniẹn ọghe inọta na, gi ima dọlegbe guan kaẹn emwi nọ sunu daa Ẹzikiẹl. Ọ ke suẹn gha kporhu, orhiọn nọhuanrẹn keghi rhie ẹtin nẹẹn. Erriọ wa vbe ye vbe ẹdẹnẹrẹ, ma i mwẹ ẹtin ne egbe ima, orhiọn nọhuanrẹn ọghe Osanobua, ẹre ọ zẹe ighẹ ima sẹtin ru iwinna ikporhu na. Vbe ima gu kha vberriọ? Rhunmwuda te Esu wa hia vbe odẹ ke odẹ nọ da obọ iwinna ikporhu na yi. (Arhie 12:17) Emwa eso sẹtin gha roro ẹre wẹẹ, ima ma sẹ emwi rhọkpa vbe eke ne Esu ye. Sokpan te ikporhu ne ima kpee wa ya ima khọn miẹn otọ yan Esu! (Arhie 12:9-11) Odẹ vbo? Ẹghẹ ke ẹghẹ ne ima ya kporhu, te ima rhie ẹre ma wẹẹ, ohan Esu i mu ima, erriọ obọ ima vbe ya ke ukhunmwu ne ọghe Esu. Te ima wa ye sẹtin kporhu iyẹn nọ maan, ọ gha khọnrẹn wẹẹ, emwa zẹ ima kpokpo. Vbe ima miẹn ruẹ vbe ọna? Ọ ya ima rẹn wẹẹ, orhiọn nọhuanrẹn ọghe Osanobua ẹre ọ rhie ẹtin ne ima kevbe wẹẹ, e Jehova rre ima iyeke.​—Mat 5:10-12; 1 Pit 4:14.

11. De iyobọ ne orhiọn nọhuanrẹn ọghe Osanobua gha sẹtin ru ne ima, de emwi ne ima gha ru ne Osanobua mieke na ye gha rhie ẹre ne ima?

¹¹ De emwi ọvbehe ne ima miẹn ruẹ vbe odẹ ne Jehova ya ru iyobọ ne Ẹzikiẹl, nọ mieke na sẹtin ru iwinna ikporhu ọghẹe? Orhiọn nọhuanrẹn ọghe Osanobua gha sẹtin ru iyobọ ne ima, ne ima mieke na sẹtin werriẹ aro  daa ukpokpo ne ima rhirhi miẹn vbe ikporhu. (2 Kọr 4:7-9) De emwi nọ ghi khẹke ne ima ru ne Osanobua mieke na rhie orhiọn nọhuanrẹn ne ima? Ọ khẹke ne ima gha na erhunmwu vbe ẹghẹ hia, ma ghi mu ẹtin yan e Jehova wẹẹ, ọ gha họn erhunmwu ima. E Jesu tama erhuanegbe ẹre wẹẹ: “Wa gha nọ, . . . wa gha gualọ, . . . wa gha so obọ.” Rhunmwuda, e Jehova “gha rhie orhiọn nọhuanrẹn ne iran hia ni nọ rẹn.”​—Luk 11:9, 13; Iwinna 1:14; 2:4.

12. Zẹvbe nọ rre ebe Ẹzikiẹl 2:9–3:3, de eke ne ebe na kiri na ke rre, de emwi nọ rre uwu ẹre?

¹² Orhiọn nọhuanrẹn ọghe Osanobua wa rhie ẹtin ne Ẹzikiẹl, sokpan ọ ma fo ye evba, Ẹmwẹ Ọghe Osanobua vbe yae gha mwẹ amuẹtinyan nọ wegbe. Vbe umian ne Ẹzikiẹl miẹn, ọ keghi bẹghe obọ nọ da ebe na kiri yi. (Tie Ẹzikiẹl 2:9–3:3.) De eke ne ebe na kiri na ke rre? Vbọ rre uwu ẹre? Vbọ ya rhie igiọdu ne Ẹzikiẹl hẹ? Ẹkete ọghe Osanobua ẹre ọ ke rre. Ọ gha kẹ, ọkpa vbe uwu avbe odibosa enẹ ne Ẹzikiẹl ka bẹghe ẹre Jehova loo ya rhie ebe na kiri na ne Ẹzikiẹl. (Ẹzik 1:8; 10:7, 20) Ẹmwẹ Osanobua ẹre ọ rre uwu ẹre, ọni ọre igiuhunmwu ọghe ibuohiẹn ne Ẹzikiẹl khian tama Ivbi Izrẹl ni sọtẹ. (Ẹzik 2:7) Obọ eveva ọghe ebe na kiri na, ẹre a gbẹn igiuhunmwu na yi.

13. De vbene Jehova wẹẹ ne Ẹzikiẹl ru ebe na kiri nii hẹ, vbọzẹ nọ na gha rhiẹnrhiẹn?

¹³ E Jehova keghi tama Ẹzikiẹl nọ rri ebe na kiri nii, ọ na wẹẹ nọ rri ọre “vuọn ẹko.” Gele gele, Ẹzikiẹl na rri ebe na kiri nii hia fo. Vbe ima miẹn ruẹ vbe ọna? Ọ khẹke ne Ẹzikiẹl rẹn otọ uhunmwu ne Jehova gie ẹre gie Ivbi Izrẹl. Ọ vbe khẹke nọ ya ekhọe hia yaeyi, nọ mieke na sẹtin si agbada vbe unu tae ma Ivbi Izrẹl. Ọ mwẹ emwi ọvbehe nọ vbe sunu, nọ wa kpa ọmwa odin. Ẹzikiẹl keghi bẹghe ẹre wẹẹ, ebe na kiri nii wa “rhiẹnrhiẹn zẹvbe owọn.” (Ẹzik 3:3) Vbọzẹ? Te ẹko wa gha rhiẹnrhiẹn Ẹzikiẹl ne Jehova na mu uyi ye ọre egbe, kevbe nọ na loo ẹre zẹvbe ọmwa ne irẹn ya zẹ ihe egbe. (Psm 19:8-11) Te Ẹzikiẹl wa ya ekhọe hia gbọyẹmwẹ yọ ne Jehova na miẹn irẹn yi zẹvbe akhasẹ ọghẹe.

14. De emwi nọ ru iyobọ ne Ẹzikiẹl nọ mieke na sẹtin ru iwinna na mu ye ọre obọ?

¹⁴ Ọ ghi sẹ ẹghẹ, e Jehova keghi tama Ẹzikiẹl wẹẹ: “Gbehọkotọ ẹsẹse ne u danmwehọ ẹmwẹ hia ne I tama ruẹ.” (Ẹzik 3:10) Te Jehova ya ọna tama Ẹzikiẹl wẹẹ, nẹ ghẹ mianmian emwi hia na gbẹn ye ebe na kiri nii, nọ vbe gha mu ehia roro. Ẹzikiẹl ghi ru vberriọ, ọ keghi yae gha mwẹ amuẹtinyan nọ wegbe. Ebe na kiri nii, vbe yae rẹn otọ uhunmwu ne Jehova gie ẹre nọ ya tama Ivbi Izrẹl. (Ẹzik 3:11) Ugbẹnvbe a miẹn wẹẹ Ẹzikiẹl rẹn otọ uhunmwu ne Osanobua gie ẹre kevbe wẹẹ, ọ vbe ya ekhọe hia yaeyi, te irẹn ghi mu egbe nọ khian ya ru iwinna ne Osanobua waa ẹre.​—Yae taa Psalm 19:14.

15. De emwi nọ khẹke ne ima “gbehọkotọ” danmwehọ ẹre, deghẹ ima hoo ne ima musọe vbe iwinna ikporhu ọghe ima?

¹⁵ Deghẹ ima hoo ne ima vbe musọe vbe iwinna ikporhu iyẹn nọ maan ọghe ima, te ọ khẹke ne ima gha ru emwi nọ gha ya amuẹtinyan ọghe ima wegbe sayọ. Ọ khẹke ne ima “gbehọkotọ” danmwehọ emwi hia ne Jehova tama ima. E Baibol ẹre Jehova loo ya gu ima guan vbe ẹdẹnẹrẹ. Vbọ khẹke ne ima ru ne Ẹmwẹ Ọghe Osanobua mieke na ye gha dia emwi ne ima ru kevbe emwi ne ima mu roro?

16. De vbene ọ khẹke ne ima ya gha tie Ẹmwẹ Ọghe Osanobua hẹ? De emwi ne ima gha ru ne ima mieke na rẹn otọ re?

¹⁶ Ma gha rri evbare, evbare nii na la ima egbe, ẹre ọ khian na sẹtin ru iyobọ ne ima, erriọ Ẹmwẹ Osanobua khian vbe ru iyobọ ne  ima, deghẹ ima na gha tie ẹre, ma na vbe gha mu emwi ne ima tie roro. Ọ khẹke ne ima kọe ye orhiọn emwi ne ima miẹn ruẹ vbe umian ọghe ebe na kiri ne Ẹzikiẹl miẹn. E Jehova hoo ne ima rri Ẹmwẹ ọnrẹn “vuọn ẹko,” ọni nọ wẹẹ, ọ hoo ne ima rẹn otọ re ẹsẹsẹmwẹse. Emwi nọ khian ru iyobọ ne ima, ne ima mieke na sẹtin ru ọna, ọre erhunmwu, ma ghi gha tie Baibol, ma ghi vbe gha mu emwi ne ima tie roro. Emwi nokaro nọ khẹke ne ima ru vbe ima gha khian tie Ẹmwẹ ọnrẹn, ọre ne ima na erhunmwu ne ekhọe ima mieke na gha rre emwi ne ima khian tie. Iyeke ọni, ma ghi suẹn gha tie ẹre. Ma ghi vbe rhie ẹghẹ ya mu emwi ne ima tie roro. De afiangbe ne ima khian ghi lae miẹn? Vbene ima ya mu emwi ne ima tie roro, erriọ ima khian ya gha rẹn otọ emwi ne ima tie, amuẹtinyan ọghe ima ghi vbe gha wegbe sayọ.

17. Vbọzẹ nọ na khẹke ne ima gha mu emwi ne ima tie vbe Baibol roro?

¹⁷ Vbọzẹ nọ na khẹke ne ima gha tie Baibol kevbe ne ima gha mu emwi ne ima tie roro? Ma gha ru vberriọ, ọ gha ru iyobọ ne ima, ne ima mieke na sẹtin kporhu vbe ẹghẹ ne ima ye na. Ọ gha kẹ, ma gha vbe ya igiuhunmwu ọghe ibuohiẹn nọ wegbe wewe vbe odaro, emwi ne ima tie vbe Baibol ẹre ọ khian vbe ru iyobọ ne ima. Ma gha vbe gha muẹn roro vbe ẹghẹ hia, aro ọmwa ne Jehova khin, ọ ghi ru iyobọ ne ima ya gha sikẹ ọre sayọ. Ẹghẹ nii, ma ghi gha mwẹ ọyẹnmwẹ nọ sẹ otọ ẹko, orhiọn ima ghi vbe sotọ.​—Psm 119:103.

18. De emwi ne emwa ni rre ẹdogbo ne ima na kporhu khian do rẹn vbe okiekie, vbọzẹ?

¹⁸ Ma i re akhasẹ vbene Ẹzikiẹl ghaa ye, ọrheyerriọ, te ima khian ye gha ya Ẹmwẹ Osanobua wewe, a te miẹn wẹẹ, e Jehova tama ima ne ima dobọyi. Ọ gha sẹ ẹghẹ ibuohiẹn, emwa ni rre ẹdogbo ne ima na kporhu i khian sẹtin kha wẹẹ, ma ma ya obọ sekhae ne iran, ra ne iran kha wẹẹ Osanobua ma ka iran yọ. (Ẹzik 3:19; 18:23) Nọghayayerriọ, iran ghi gele do rẹn wẹẹ, Ẹmwẹ Osanobua ẹre ima ya gha wewe.

19. De emwi nọ khian ru iyobọ ne ima ya sẹtin musọe vbe iwinna ikporhu ọghe ima?

¹⁹ De emwi nọ khian ru iyobọ ne ima ya sẹtin musọe vbe iwinna ikporhu ọghe ima? Emwi eha nọ ru iyobọ ne Ẹzikiẹl, ẹre ọ khian vbe ru iyobọ ne ima. Ma keghi kporhu rhunmwuda e Jehova ẹre ọ gie ima, orhiọn nọhuanrẹn ọghẹe ru iyobọ ne ima kevbe wẹẹ, Ẹmwẹ ọnrẹn ya ima mwẹ amuẹtinyan nọ wegbe. Vbe ẹtin e Jehova, te ima khian ye gha kporhu, ma ghi vbe sẹtin zin egbe “ya sẹ ufomwẹ.”​—Mat 24:13.