Emwi na yae kha na vẹn ihẹn, ọre “na si agbada vbe unu ta emwi na khian ru, ra na ru eyan wẹẹ, a gha ru emwi eso. Emwa mobọ ya eni Osanobua vẹn ihẹn. Ai ya ihẹn na vẹn gbe akiyẹyẹ.” Emwa eso ya ẹmwẹ ne unu vẹn ihẹn, eso vbe gbẹn ọnrẹn yotọ.

Emwa eso sẹtin gha kha wẹẹ, ọ ma khẹke na gha vẹn ihẹn, rhunmwuda ne Jesu na kha wẹẹ: “Uwa ghẹ zẹdẹ vẹn ihẹn hiehie . . . Uwa wa gi ‘Ẹẹn’ ọghe uwa gha re ẹẹn, ‘Ẹn o’ ọghe uwa ghi vbe gha re ẹn o, rhunmwuda, emwi nọ gberra enena, obọ ọmwa dan nii ẹre ọ ke rre.” (Mat 5:​33-37) E Jesu wa rẹn wẹẹ, Uhi e Mosis kue yọ ne Ivbi Izrẹl gha vẹn ihẹn kevbe wẹẹ, eguọmwadia e Jehova nẹdẹ wa vbe gha vẹn ihẹn. (Gẹn 14:​22, 23; Ẹks 22:​10, 11) Ọ wa vbe rẹn wẹẹ, e Jehova tobọre vbe vẹn ihẹn. (Hib 6:​13-17) Nọnaghiyerriọ, ẹi re te Jesu wẹẹ, na ghẹ zẹdẹ vẹn ihẹn hiehie. Nọghayayerriọ, te ọ ghaa ya obọ sekhae ne emwa, ne iran ghẹ gha vẹn ihẹn ye emwi nọ ma sẹ emwi. Ma gha ta ẹmwẹ ra ma gha ru eyan, ọ khẹke ne ima muẹn sẹ, rhunmwuda, ọni ọre emwi ne Jehova wa gualọ.

Vbọ khẹke ne u ru, deghẹ a na wẹẹ ne u vẹn ihẹn? Vbe okaro, u ghi gia miẹn wẹẹ, ihẹn ne u khian vẹn nii, u gha sẹtin muẹn sẹ. Deghẹ u rẹnrẹn wẹẹ, ui khian sẹtin muẹn sẹ, ghẹ zẹdẹ vẹn ihẹn nii. E Baibol khare wẹẹ: “A ma zẹdẹ ve emwi ẹre ọ maan sẹ a ghi ve nẹ, a ma ghi ru ẹre.” (Asan 5:5) Nogieva, u ghi vbe gualọ ilele eso ni rre Baibol nọ dekaẹn ihẹn ne u khian vẹn nii, ẹghẹ nii, uwẹ ẹre ọ khian ghi ya ekhọe obọ ruẹ ta emwi ne u khian ru. De usun ilele na guan kaẹn na?

Ihẹn eso rrọọ ne Osanobua kpasẹ yi. Vbe igiemwi, Avbe Osẹe Jehova keghi ru eyan ma egbe vbe ẹdẹ orọnmwẹ. Eyan ne iran ru nii, rhie ẹre ma wẹẹ, te iran vẹn ihẹn ma egbe. Vbe odaro Osanobua kevbe emwa ni rrie ugie orọnmwẹ nii, ọdafẹn ovbiọha kevbe ovbiọha ghi yan ma egbe wẹẹ, te iran khian hoẹmwẹ egbe, iran ghi vbe gha rhie ọghọ ne egbe ya sẹ ota. (Ẹmwẹ ne emwa eso ta vbe ẹdẹ orọnmwẹ sẹtin lughaẹn ne ọna, sokpan te iran ye vbe vẹn ihẹn vbe odaro Osanobua.) Iran gha ru eyan na nẹ, iran ghi do gha re ọdọ vbe amwẹ; ọna rhie ma wẹẹ, te iran khian rọnmwẹ egbe ya sẹ ota. (Gẹn 2:24; 1 Kọr 7:39) Te emwamwa na wa deyọ. Osanobua wa vbe kpasẹ yọ.

Ihẹn eso rrọọ ne Osanobua ma kpasẹ yi. Ọ ma khẹke ne Ovbiotu e Kristi vẹn ihẹn wẹẹ, te irẹn khian ya emwi igbinna sinmwi oseghe ne ẹvbo irẹn, ra nọ vẹn ihẹn wẹẹ, irẹn i khian ghi ga Osanobua. Ọ gha ru vberriọ, te ọ rra uhi Osanobua. Ivbiotu e Kristi i re “ọghe agbọn na,” rhunmwuda ọni, ma i gbe olighi vbe ẹvbo, ma i vbe mwẹ obọ vbe okuo.​—Jọn 15:19; Aiz 2:4; Jems 1:27.

 Ovbiotu e Kristi gha sẹtin zẹ ne egbe ẹre, deghẹ irẹn gha vẹn ihẹn eso, ra irẹn i khian ru vberriọ. Ugbẹnso, vbene ima te ru eyan, te ọ khẹke ne ima ka mu ukpa mu uwerhẹn ghee ẹmwẹ ne Jesu tae, vbe ọ khare wẹẹ, “wa rhie emwi ne ọre ọghe Nọgbaisi nẹẹn, ne uwa vbe rhie ne ọre ọghe Osanobua ne Osanobua.”​—Luk 20:25.

Gia kha wẹẹ, Ovbiotu e Kristi rhie obọ ye ebe wẹẹ, irẹn hoo ne irẹn do gha re ọmọ otọ vbe ẹvbo ọvbehe, ra ne irẹn gha mwẹ passport nọ gha sẹtin ya irẹn gha rrie ẹvbo ọvbehe, sokpan ọ na ghi do bẹghe ẹre wẹẹ, te ọ khẹke ne irẹn vẹn ihẹn, ne irẹn ya rhie ẹre ma wẹẹ, irẹn ya ẹvbo nii ike. Deghẹ a na miẹn wẹẹ, ihẹn nọ khian vẹn nii ma gua ilele ọghe Osanobua ro, ekhọe re i khian kue nọ ru vberriọ. Sokpan arriọba ẹvbo nii sẹtin kue yọ nọ fi ẹmwẹ eso werriẹ, ne ekhọe re ghẹ mieke na gha bu abe gbe ẹre, vbe ọ gha ghi vẹn ihẹn nii nẹ.

Ihẹn na fi werriẹ vbenian, sẹtin gua ẹre ro emwi nọ rre ebe Rom 13:​1, nọ khare wẹẹ: “Ọ kere ne emwa hia gha họn ẹmwẹ ne avbe ukọ ẹvbo.” Ọ ghaa yerriọ, Ovbiotu e Kristi sẹtin kha wẹẹ, ọ ma de emwi nọ rhiae deghẹ irẹn na vẹn ihẹn vberriọ, rhunmwuda, Osanobua wẹẹ ne ima ru vberriọ.

Ovbiotu e Kristi ẹre ọ khian tobọre zẹ ne egbe ẹre, vba gha wẹẹ nọ ya emwi vẹn ihẹn ra nọ ru emwi eso vbe ọ gha khian vẹn ihẹn. Vbe ẹghẹ nẹdẹ, te Ivbi e Rom kevbe Ivbi e Scythian wa gha ya umozo ọghe iran vẹn ihẹn, ọna rhie ma wẹẹ, te iran ghaa ya eni osa ọghe okuo ne iran ga vẹn ihẹn, ne iran ya rhie ẹre ma wẹẹ, ẹmwẹ ne iran ta, ẹmwata nọ. Te Ivbi e Grik ghaa viọ obọ ghee odukhunmwu, vbe iran gha khian vẹn ihẹn, rhunmwuda iran yayi wẹẹ, osa rre ẹrinmwi nọ bẹghe emwi hia ne iran ru, kevbe nọ họn emwi hia ne iran ta, kevbe wẹẹ, ọ gha vbe bu ohiẹn emwa nagbọn hia.

Ọ ma khẹke ne ọguọmwadia e Jehova ya afiala ra emwi ke emwi nọ dekaẹn ugamwẹ ohoghe vẹn ihẹn. Vbua khian ru, deghẹ a na tama ruẹ vbe ekọtu ne u viọ obọ yan e Baibol, ne u vẹn ihẹn wẹẹ ẹmwata ẹre u taa? Ọ gha sunu vberriọ, u sẹtin vẹn ihẹn nii; rhunmwuda e Baibol guan kaẹn eguọmwadia e Jehova eso ni viọ obọ yan emwi ya vẹn ihẹn. (Gẹn 24:​2, 3, 9; 47:​29-31) Sokpan ghẹ mianmian wẹẹ, odaro Osanobua ẹre u na vẹn ihẹn nii wẹẹ, ẹmwata ẹre u tae. A gha nọ ruẹ ọta rhọkpa, ọ khẹke ne u ta ẹmwata.

Ima ma hoo ne ima khian oghian e Jehova, rhunmwuda ọni, vbene ima te vẹn ihẹn, te ọ khẹke ne ima ka muẹn ye erhunmwu nẹ; ma ghi vbe hia ne ihẹn nii ghẹ ya ima rhie owẹ gberra ilele ni rre Baibol, ra ne ima vẹn ihẹn nọ gha ya ekhọe ima gha bu abe gbe ima. U gha vẹn ihẹn, u ghi muẹn sẹ, rhunmwuda evba ve, te a hae.​—1 Pit 2:12.