“Iran hoẹmwẹ emwa hia, iran wa vbe gha ya obọ esi mu avbe ekita mwẹ. Vbe ẹdẹ ọkpa, okhuo ọkpa na tie ẹre Elaine, ẹre ọ mudia ke uhanhan ne iran waa ebe yi, ọ keghi viọ e biskit ne avbe ekita mwẹ. Ke ẹghẹ nii kpa, iran gha ghi gha sikẹ eke ne Avbe Osẹe Jehova mudia yi, iran i hoo ne iran gberra evba, rhunmwuda iran ya aro yọ wẹẹ, iran gha miẹn e biskit re vba.

“Erriọ ẹre ọ wa gha ye vbe ọwara uki eso. Ẹghẹ hia ẹre iran wa ya gha rhie biskit ne avbe ekita mwẹ, mẹ na vbe gha danmwehọ iran kherhe kherhe. I ma wa hoo ne I sikẹ iran gbe. Vbe ẹghẹ na kha na, I gberra ukpo 70 nẹ. I ma vbe rẹn emwi ne Avbe Osẹe Jehova yayi. Ẹi re avbiẹ esọsi ẹre I he yo, sokpan, iran ma miẹn abọ ẹbo ya gba ẹbo. Ẹre I na ghi kha wẹẹ, I wa tobọ mwẹ gha tie Baibol, ẹre ọ wa maan sẹ.

“Vbe uwu ẹghẹ na, I vbe gha miẹn Avbe Osẹe Jehova vbe ehe ughughan, ne iran na mudia ke uhanhan ne iran waa ebe yi. Te iran hia wa sẹ oyaya mu ọmwa. E Baibol ẹre iran wa ya gha zẹ ewanniẹn ye inọta ne I rhirhi nọ, rhunmwuda ọni, I na ghi suẹn gha ya emwi ne iran ta yi.

“Ẹdẹ ọkpa, Elaine na nọ mwẹ wẹẹ, ‘Uwẹ yayi wẹẹ, te Osanobua ya avbe aranmwẹ ru ima ẹse ra?’ I na kha wẹẹ, ‘Ẹẹn, I wa yayi!’ Ẹre Elaine na tie ebe Aizaia 11:​6-9 ma mwẹ. Ako na wa mu mwẹ ekhọe. I na ghi gha hoo ne I rẹn sayọ, sokpan, I ma ye gha miẹn iran ebe.

“Ẹghẹ hia ẹre imẹ vbe Elaine kevbe Brent ne arowa re, ghi ya gha ziro yan e Baibol. Ẹghẹ ne ima ya gha guan ma taan gbe, sokpan, I wa gha miẹn ere vbọ. Iran na wẹẹ ne I ya tie ebe Matiu ya sẹ ebe Iwinna, ne I mieke na rẹn, emwi na yae kha ne ọmwa gha re Ovbiotu e Kristi ọghe ata. I gele ru vberriọ. Vbọ ma he kpẹẹ vba, vbe ukpo 2016, I na ghi wẹẹ ne Elaine vbe Brent gha gu mwẹ ruẹ e Baibol.

“Iruẹmwi e Baibol kevbe iko na yo vbe Ọgua Arriọba uzọla uzọla na wa gha gbe mwẹ otiti. Te ọyẹnmwẹ wa gha sẹ mwẹ rhunmwuda, emwi ne I ghaa ruẹ kegha re ẹmwata nọ gele rre Baibol. Ukpo ọkpa ghi gberra nẹ kherhe, I na ghi dinmwiamẹ zẹvbe Osẹe Jehova. Ukpo 79, ẹre I ghi ye nian, I wa rẹn wẹẹ, odẹ ẹmwata ẹre I ye. Afiangbe nọkhua wa nọ mẹ, ne Jehova na rhie mwẹ ba ọmọ koko.”