E Jehova keghi tama Ivbi Izrẹl wẹẹ, ne iran gha re emwa ni huanrẹn. Ne iran mieke na sẹtin ru ọna, ọ keghi gbe uhi ne iran wẹẹ: “Ghẹ gha na iyẹn ohoghe khian vbekpa emwa ruẹ. Ghẹ ru emwi ke emwi nọ gha mu arrọọ ọghe ọmwa ọvbehe ye ikpadede. Mẹ ọre Jehova.”​—Lẹv 19:​2, 16, NW.

Odẹ ọvbehe na gha ya ta ẹmwẹ na ighẹ “ghẹ ru emwi ke emwi nọ gha mu arrọọ ọghe ọmwa ọvbehe ye ikpadede,” vbe urhuẹvbo ọghe Hibru ọre, “ghẹ werriẹ aro daa arrọọ ọghe ọmwa ọvbehe.” Sokpan vba ya ẹmwẹ na kha? Vbe ebe Ivbi e Ju ọkpa ghi rhan otọ ebe Lẹvitikọs, ọ na wẹẹ: “Ẹmwẹ nọ rre uviẹn na . . . lọghọ na rẹn otọ ẹre, rhunmwuda, a ma mobọ rẹn otọ itan ọghe Hibru na loo ro mwa; vbe Hibru, ẹmwẹ na ighẹ ‘ghẹ werriẹ aro daa ẹre’ ẹre ọ vbe re ‘ghẹ mudia ke ẹre.’”

Emwa eso ni rri egie ebe ghee ẹre wẹẹ, ifiẹmwẹ nọ rre uviẹn 16 vbe dekaan emwi na tae vbe uviẹn 15. Ako nii wẹẹ: “Gha re ne ọ ta ẹmwata kevbe uhunmwu ẹmwẹ; u ghaa bu ohiẹn, ghẹ yaba ovbiogue, ra ne u mu ohan enọfe.” (Lẹv 19:15) Deghẹ erriọ nọ, emwi na ya uhi nọ rre uviẹn 16 kha ọre wẹẹ, ne emwa ọghe Osanobua ghẹ fi ibeleku vbe owa ẹzọ, ne iran ghẹ do ẹki ogberhu, ne iran ghẹ rẹrẹ ọmwa vbe uwu ẹgbẹe ra ne iran gha fi eki. Ẹmwata nọ wẹẹ, ọ ma khẹke ne ima gha mwẹ obọ vbe emwi vbenian, sokpan, odẹ ọvbehe ye rrọọ ne ima gha ya rhan otọ uhi nọ rre uviẹn 16.

Vbe omuhẹn ọghe uviẹn 16, Osanobua keghi tama Ivbi Izrẹl ne iran ghẹ gha na iyẹn ohoghe khian vbekpa ogieva iran. Ẹmwata nọ wẹẹ, a ghaa na iyẹn ọmwa, ọ sẹtin zẹ ẹbe, sokpan ọmwa ghaa ta ohoghe khian vbekpa ọmwa, ọni ẹre ọ khọọ sẹ, rhunmwuda, te ọ mu eni ọmwa nii rhia. (Itan 10:19; Asan 10:​12-14; 1 Tim 5:​11-15; Jems 3:6) Ọmwa gha mu eni ọmwa rhia, ra ọ na sẹ osẹ ohoghe gbe ẹre, emwi ne ọ ru nii, sẹtin mu arrọọ ọghe ọmwa nii ye ikpadede. Yerre wẹẹ, rhunmwuda ne emwa na sẹ osẹ ohoghe gbe Nabọt, ẹre ọ si uwu nọ kẹ ọre, agharhemiẹn wẹẹ, ọ ma te rẹn ọkpa rẹn eva. (1 Ọba 21:​8-13) Zẹvbe ne ima bẹghe ẹre vbe abọ nogieva ọghe ebe Lẹvitikọs 19:​16, NW, ọmwa ghaa na iyẹn ohoghe khian vbekpa ọmwa, ọ sẹtin mu arrọọ ọghe ọmwa nii ye ikpadede.

Deba ọni, ọmwa nọ khẹko ọmwa, ẹre ọ na iyẹn ohoghe khian vbekpa ẹre. Ebe 1 Jọn 3:15 khare wẹẹ: “Ọmwakọmwa ne ọ khu iwu ọtiọnrẹn, izigha nọ, wa rẹnrẹn wẹ izigha i mwẹ arrọọ ne ẹ i fo vbe uwu irẹn.” Ọ vbe khẹke ne ima yẹrẹro wẹẹ, vbe iyeke Jehova ghi gbe uhi nọ rre uviẹn 16 ma Ivbi Izrẹl nẹ, ọ na wẹẹ: “Ghẹ mwẹ irhiaẹko ghe ọmwa rhọkpa.”​—Lẹv 19:17.

Nọnaghiyerriọ, uhi nọ rre ebe Lẹvitikọs 19:​16, NW keghi ye Ivbiotu e Kristi rre wẹẹ, ọ ma khẹke ne iran gha na iyẹn ohoghe khian vbekpa ọmwa. Ma ghaa mu eni ọmwa rhia, te ima rhie ẹre ma wẹẹ, ma khẹko ẹre. Ọ ma zẹdẹ khẹke ne ima ne Ivbiotu e Kristi gha khẹko emwa hiehie.​—Mat 12:​36, 37.