AKO IRUẸMWI 5
“Uhunmwuta Ọghe Ikpia Hia Ọre Kristi”
“Uhunmwuta ọghe ikpia hia ọre Kristi.”—1 KỌR 11:3, NW.
IHUAN 12 E Jehova Ne Osa Ne Udazi
OLIKA ẸMWẸ ỌGHE AKO IRUẸMWI NA *
1. De emwi eso nọ ya uhunmwuta ẹgbẹe eso loo asẹ ọghe iran ghee ihan?
U GHA họn ẹmwẹ na ighẹ “uhunmwuta,” de emwi nọ la ruẹ ekhọe? Nọ ne ikpia eso, obọ ne emwa ya mu ikhuo kevbe emọ vbe ẹvbo iran ra vbe ẹgbẹe iran, ẹre iran vbe ya mu ọvbokhan iran kevbe ivbi iran. Ọtẹn nokhuo ọkpa na tie ẹre Yanita, nọ rre Europe khare wẹẹ, “Vbe ẹdogbo ne I ye, te emwa roro ẹre wẹẹ ikhuo i re emwi rhọkpa vbe eke ne ikpia ye, rhunmwuda ọni, te ọ khẹke na gha ghee iran zẹvbe eviẹn. Te iziro na wa gbọzinian vbe ekhọe iran.” Ọtẹn nokpia ọkpa na tie ẹre Luke vbe United States khare wẹẹ, “Erha emọ eso keghi maa ivbi iran nikpia re wẹẹ, ọ ma khẹke ne ikhuo gha guan vbe eke ne ikpia ye, rhunmwuda, ẹmwẹ ne iran ta i mwẹ emwi nọ gia ya ru.” Sokpan, ẹi re obọ vbenian ẹre Jehova hoo ne ikpia ya gha mu ikhuo. (Yae taa Mak 7:13.) Nọnaghiyerriọ, de vbene okpia khian ghi ya sẹtin gha re uhunmwuta ẹgbẹe nọ maan?
2. Vbọ khẹke ne avbe uhunmwuta ẹgbẹe kọ ye orhiọn? Vbọzẹe?
2 Okpia ghaa hoo nọ gha re uhunmwuta ẹgbẹe nọ maan, ọ khẹke nọ ka rẹn emwi ne Jehova gualọ vbe obọ re. Ọ ghi rẹn evbọ ya e Jehova ru emwamwa ne ẹgbẹe gha mwẹ uhunmwuta. Sẹ ehia, ọ ghi vbe rẹn vbene ọ khian ya ya egbe tae Jehova kevbe Jesu hẹ. Vbọzẹe nọ na khẹke nọ kọ ena hia ye orhiọn? Rhunmwuda, ọ mwẹ asẹ ne Jehova rhie ne avbe uhunmwuta ẹgbẹe; ọ vbe hoo ne iran loo asẹ na ẹse.—Luk 12:48b.
VBENE JEHOVA YA MWAMWA ẸGBẸE ỌRE NI RRE ẸRINMWI KEVBE AGBỌN
3. De emwi ne ebe 1 Kọrinti 11:3, NW gi ima rẹn vbekpa emwamwa ọghe uhunmwuta?
3 Tie 1 Kọrinti 11:3, NW. Ako na ya ima rẹn odẹ ne Jehova ya mwamwa ẹgbẹe ọre ni rre uhunmwu otagbọn kevbe ẹrinmwi. E Jehova ọre uhunmwuta nọ ghi sẹ ehia, rhunmwuda ọni, emwa hia ni rre agbọn vbe ẹrinmwi, ototọ re, ẹre iran ye. E Jehova vbe rhie asẹ ne emwa eso. Sokpan, ugbẹnvbe a miẹn wẹẹ ototọ e Jehova ẹre iran ye, te iran gha vbe loo asẹ nii vbene Jehova gualọe yi, vbe ẹi re erriọ, e Jehova gha nọ iran. (Rom 14:10; Ẹfis 3:14, 15) Vbe igiemwi, e Jehova rhie asẹ ne Jesu, nọ gha re uhunmwuta ọghe iko, rhunmwuda ọni, te Jesu gha vbe loo asẹ nii vbe odẹ ne Jehova gualọe yi. (1 Kọr 15:27) E Jehova vbe rhie asẹ ne ọdọ, nọ gha re uhunmwuta ọghe ọvbokhan rẹn kevbe ivbi ẹre, sokpan te ọ khẹke nọ loo asẹ na vbe odẹ ne Jehova kevbe Jesu gualọe yi, vbe ẹi re erriọ, iran gha nọ rẹn.—1 Pit 3:7.
4. De asẹ ne Jehova kevbe Jesu mwẹ?
4 E Jehova ọre Uhunmwuta ọghe ẹgbẹe ọghẹe ni rre ẹrinmwi kevbe agbọn, rhunmwuda ọni, ọ mwẹ asẹ nọ ya yi uhi ne ivbi ẹre, ọ vbe mwẹ asẹ nọ ya bu ohiẹn iran deghẹ iran ma lele uhi nii. (Aiz 33:22, NW ) Erriọ vbe ye, ne Jesu na re uhunmwuta iko, ọ vbe mwẹ asẹ nọ ya yi uhi, kevbe nọ ya bu ohiẹn emwa ni ma lele uhi nii.—Gal 6:2; Kọl 1:18-20.
5. De asẹ ne uhunmwuta ẹgbẹe nọ re Ovbiotu e Kristi mwẹ? Asẹ na mwẹ eke nọ sẹ ra? Rhan otọ re.
5 Vbene Jehova kevbe Jesu ye, uhunmwuta ẹgbẹe nọ re Ovbiotu e Kristi mwẹ asẹ nọ ya ru azẹ ne ẹgbẹe ọre. (Rom 7:2; Ẹfis 6:4) Vbọrhirhighayehẹ, asẹ ọghẹe mwẹ eke nọ sẹ. Vbe igiemwi, ilele ni rre Baibol ẹre ọ khẹke nọ gha lele, vbe ọ ghaa yi uhi ne ẹgbẹe ọre. (Itan 3:5, 6) Uhunmwuta ẹgbẹe i vbe mwẹ asẹ nọ ya yi uhi ne emwa ọvbehe nẹi re ẹgbẹe ọre. (Rom 14:4) Emọ gha kpa hin owa rre vbe iran gha waan nẹ, iran i ghi rre ototọ asẹ ọghe erha iran, sokpan iran gha ye gha rhie ọghọ nẹẹn.—Mat 19:5.
VBỌ YA E JEHOVA RU EMWAMWA ỌGHE UHUNMWUTA?
6. Vbọ ya e Jehova ru emwamwa ọghe uhunmwuta?
6 Ahoẹmwọmwa ne Jehova mwẹ ne ẹgbẹe ọre, ẹre ọ yae ru emwamwa ọghe uhunmwuta. Te ọ yae ru ima ẹse. Emwamwa na ẹre ọ zẹe ighẹ emwi hia khian hẹnẹhẹnẹ vbe ẹgbẹe ọghe Jehova. (1 Kọr 14:33, 40) Olighi vbe otighi ẹre ọ gha te gha rre ẹgbẹe ọghe Jehova akpawẹ emwamwa na i rrọọ. Vbe igiemwi, ai ghẹ te rẹn ọmwa nọ khian gha ta ẹmwẹ nọ sẹ; dọmwadẹ ọghẹe ẹre ọ gha te gha zẹ ọghe obọ re ru.
7. Zẹvbe nọ rre Ẹfisọs 5:25, NW, 28, e Jehova hoo ne ikpia gha ya obọ yẹnyẹn ọvbokhan iran mu otọ ra?
7 Ugbẹnvbe a miẹn wẹẹ, te Jehova ya emwamwa ọghe uhunmwuta ru ima ẹse, vbọ ghi zẹe ne ikhuo nibun na roro ẹre wẹẹ, te ọdafẹn iran ya obọ yẹnyẹn iran mu otọ? Rhunmwuda, ilele na do vba vbe otọ, ẹre ikpia nibun lele, ne iran gha te ya gha lele ilele ọghe Jehova nọ dekaẹn ẹgbẹe. Ne ikpia eso na vbe rẹn ọghe enegbe iran ọkpa, iran sẹtin gha ya obọ dan mu ọvbokhan iran. Vbe igiemwi, ọdọ sẹtin gha ya obọ yẹnyẹn ọvbokhan rẹn mu otọ, ne emwa mieke na gha ghee ẹre wẹẹ, irẹn ẹre ọ gele re “ọdafẹn nọ yan owa.” Ọ sẹtin gha roro ẹre wẹẹ, ugbẹnvbe a miẹn wẹẹ, irẹn i khian sẹtin kpikpi ọvbokhan irẹn nọ hoẹmwẹ irẹn, irẹn gha sẹtin ru ẹre nọ gha mu ohan irẹn. Ẹghẹ nii, ohan i khian gi ẹre gha he ẹmwẹ ye irẹn obọ. * Okpia nọ mwẹ iziro vbenian i sẹtin rhie ọghọ nọ khẹke ne ọvbokhan rẹn vbene Jehova gualọe yi.—Tie Ẹfisọs 5:25, NW, 28.
DE VBENE OKPIA KHIAN YA SẸTIN GHA RE UHUNMWUTA ẸGBẸE NỌ MAAN?
8. De vbene okpia khian ya sẹtin gha re uhunmwuta ẹgbẹe nọ maan?
8 Okpia gha sẹtin gha re uhunmwuta ẹgbẹe nọ maan, deghẹ ọ na gha ya egbe tae Jehova kevbe Jesu vbe odẹ ne iran ya loo asẹ ọghe iran. Gia guan kaẹn akpa eva ne Jehova kevbe Jesu mwẹ, kevbe vbene uhunmwuta ẹgbẹe gha ya rhie avbe akpa na ma, vbe obọ nọ ya mu ọvbokhan rẹn kevbe ivbi ẹre.
9. De vbene Jehova ya rhie ẹre ma wẹẹ, irẹn mu egbe rriotọ?
9 Imuegberriotọ. E Jehova ẹre ọ ghi mwẹ ẹwaẹn sẹ vbe agbọn vbe ẹrinmwi; ọrheyerriọ, te ọ ye rhie ehọ ne eguọmwadia ẹre ta yi. (Gẹn 18:23, 24, 32) Vbe igiemwi, ọ mwẹ asẹ ọkpa nọ khian na ru azẹ eso, ọ keghi kie ẹkpotọ ne emwa ni rre ototọ re ya ta emwi nọ rre iran ekhọe. (1 Ọba 22:19-22) Agharhemiẹn wẹẹ ọmwa nọ gbae, ẹre Jehova khin, ẹi yaro yọ wẹẹ te ima khian gha ru emwi zẹvbe emwa ni gbae vbe ẹghẹ na nia. Nọghayayerriọ, ọ keghi ru iyobọ ne ima ya musọe vbe ugamwẹ ọghẹe, agharhemiẹn wẹẹ emwa ni ma gba ẹre ima khin. (Psm 113:6, 7) Uhiẹn, e Baibol gie Jehova zẹvbe ‘ọyọmwabọ.’ (Psm 27:9; Hib 13:6) Ọba e Devid khare wẹẹ, imuegberriotọ ọghe Jehova, ẹre ọ zẹe ighẹ irẹn sẹtin ru iwinna nọ hin okhuan na waa irẹn ẹre.—2 Sam 22:36, NW.
10. De vbene Jesu ya rhie ẹre ma wẹẹ, irẹn mu egbe rriotọ?
10 Gia ziro yan igiemwi ọghe Jesu. Ọ keghi kpe owẹ ọghe erhuanegbe ẹre, agharhemiẹn wẹẹ irẹn ọre Arowa iran. Vbọzẹe ne Jehova na wẹẹ na gbẹn emwi ne Jesu ru na ye Baibol? Ọkpa vbọ ọre wẹẹ, ne emwa hia gha lele igiemwi esi na, ya sẹ egbe avbe uhunmwuta ẹgbẹe. Jesu tobọre khare wẹẹ: “Igiemwi ọre I rhie ne uwa, wa ghi gha ru vbene I ru ẹre ma uwa na.” (Jọn 13:12-17) Agharhemiẹn wẹẹ, Jesu ghaa mwẹ ọdakha, ọ ma yaro yọ wẹẹ te emwa khian gha ga irẹn vbene a ga ọba. Nọghayayerriọ, irẹn kegha ga emwa ọvbehe.—Mat 20:28.
Uhunmwuta ẹgbẹe gha sẹtin rhie ẹre ma wẹẹ irẹn mwẹ imuegberriotọ kevbe ahoẹmwọmwa, deghẹ ọ na gha ru iwinna owa kevbe ọ na gha kpemehe ne ẹgbẹe ọre vbe odẹ ọghe orhiọn (Ghee okhuẹn 11, 13)
11. De emwi ne uhunmwuta ẹgbẹe gha miẹn ruẹ vbe odẹ ne Jehova kevbe Jesu ya rhie ẹre ma wẹẹ, iran mu egbe rriotọ?
11 Emwi ne ima miẹn ruẹ. Uhunmwuta ẹgbẹe gha sẹtin rhie ẹre ma vbe odẹ ughughan wẹẹ, irẹn mu egbe rriotọ. Vbe igiemwi, ẹi khian wa yaro yọ wẹẹ, te ọvbokhan rẹn kevbe ivbi ẹre khian gha ru emwi nọ gbae vbe ẹghẹ hia. Ọ keghi rhie ẹghẹ ne ẹgbẹe ọre ya ta emwi nọ rre iran ekhọe, ọ gha khọnrẹn wẹẹ emwi ne iran ta ma gua ọghẹe ro. Okhuo ọkpa na tie ẹre Marley, vbe United States khare wẹẹ: “Ẹi re ẹghẹ hia ẹre iziro mwẹ kevbe ọghe ọdafẹn mwẹ ya gua egbe ro. Sokpan I wa rẹn wẹẹ, aro nọ ghaan ẹre ọ ya ghee mwẹ, rhunmwuda, ọ ke ru azẹ rhọkpa, ọ ghi ka nọ mwẹ vbene I ghee ẹre hẹ. I gha vbe ta vbene I ghee ẹre hẹ, ẹi vbe tilae rua.” Deba ọni, ọdọ nọ mu egbe rriotọ wa mu egbe nọ ya gha ru iwinna owa, ọ gha khọnrẹn ne emwa ni rre ẹdogbo ọghẹe gha roro ẹre wẹẹ, ikhuo ẹre ọ khẹke nọ gha ru iwinna vberriọ. Ọna i mobọ khuẹrhẹ. Vbọzẹe? Ọtẹn nokhuo ọkpa na tie ẹre Rachel khare wẹẹ: “Vbe eke ne I ke rre, deghẹ okpia na gha gu ọvbokhan rẹn kpe ọkpan ra ọ na gha gu ẹre dọlọ owa yi, emwa ni rre ẹdogbo nii kevbe emwa rẹn vbuwe ẹgbẹe ghi gha kha wẹẹ ‘ọviẹn okhuo’ nọ. Iran ghi gha roro ẹre wẹẹ, ọvbokhan rẹn ẹre ọ ta ẹmwẹ nọ sẹ vbe owa.” Adeghẹ iziro vbenian ẹre emwa mwẹ vbe ẹdogbo ne u ye, yerre wẹẹ, Jesu kpe owẹ ọghe erhuanegbe ẹre agharhemiẹn wẹẹ, emwa ghaa ghee emwi nọ ru nii zẹvbe iwinna ọviẹn. Uhunmwuta ẹgbẹe nọ maan i danmwehọ eghanghanghan, sokpan emwi nọ ru ekpataki nẹẹn, ọre nọ gha ru emwi nọ gha ya ọvbokhan rẹn vbe ivbi ẹre gha ghọghọ. Vbọ gberra imuegberriotọ, de akpa ọvbehe nọ khẹke ne uhunmwuta ẹgbẹe nọ maan gha mwẹ?
12. De emwi ne Jehova vbe Jesu ru rhunmwuda ne iran na hoẹmwẹ ima?
12 Ahoẹmwọmwa. Ahoẹmwọmwa ẹre ọ gua e Jehova kpa ya ru emwi hia nọ ru. (1 Jọn 4:7, 8) Odẹ ọkpa nọ ya rhie ẹre ma wẹẹ irẹn hoẹmwẹ ima, ọre nọ na ya e Baibol kevbe otu ọghẹe koko ima vbe odẹ ọghe orhiọn. Ọ vbe ru emwi ughughan ne ima, nọ gha ya orhiọn ima sotọ; ọni ẹre ọ si ẹre nọ na gi ima rẹn vbe ẹghẹ hia wẹẹ, irẹn hoẹmwẹ ima. E Jehova vbe kpemehe emwi ikpakpa ne ima; ọ keghi “viọ emwi hia ne ima wọrhọwọrhọ ne a ya gha zọmọ.” (1 Tim 6:17) Ma gha ru abakuru, ọ ghi dia ima ye odẹ, sokpan ọni ma wẹẹ nẹ ghẹ ye hoẹmwẹ ima. Ahoẹmwọmwa ne Jehova mwẹ ne ima, ẹre ọ yae gie Ovbi ẹre gha dee nọ do dẹ ima werriegbe. Te Jesu vbe hoẹmwẹ ima, ẹre ọ zẹe nọ na wu ne ima. (Jọn 3:16; 15:13) Nọ ne emwa ni da imudiase ọghe iran yi, emwi rhọkpa i rrọọ nọ gha sẹtin wannọ iran hin ahoẹmwọmwa ọghe Jehova kevbe Jesu rre.—Jọn 13:1; Rom 8:35, 38, 39.
13. Vbọzẹe nọ na khẹke ne uhunmwuta ẹgbẹe gha rhie ẹre ma wẹẹ irẹn hoẹmwẹ ẹgbẹe ọre? (Vbe ya ghee ẹkpẹti nọ khare wẹẹ, “ Okpia Nọ Da Rhie Okhuo—Vbọ Khian Ya Ọvbokhan Ruẹ Gha Rhie Ọghọ Nuẹn?”)
13 Emwi ne ima miẹn ruẹ. Te ọ khẹke ne uhunmwuta ẹgbẹe gi ahoẹmwọmwa gha dia re vbe emwi hia nọ ru. Vbọzẹe ne ọna na ru ekpataki? Ukọ e Jọn khare wẹẹ: “Adeghẹ ọmwa . . . ma hoẹmwẹ ọtiọnrẹn [ra ẹgbẹe ọre] ne ọ dẹghe, ẹi ra sẹtin hoẹmwẹ Osanobua ne irẹn i dẹghe.” (1 Jọn 4:11, 20) Te ọ khẹke ne okpia nọ gele hoẹmwẹ ẹgbẹe ọre, nọ vbe hoo nọ ya egbe tae Jehova kevbe Jesu gha kpemehe emwi orhiọn kevbe emwi ikpakpa ne ẹgbẹe ọre, ọ ghi vbe gha ru emwi nọ gha ya orhiọn iran sotọ. (1 Tim 5:8) Ọ ghi gha maa ivbi ẹre emwi, ọ ghi vbe gha rhie adia ne iran vbe ẹghẹ nọ khẹke. Ọ vbe khẹke nọ gha ru azẹ nọ gha rhie uyi gie Jehova kevbe nọ gha maan ne ẹgbẹe ọre. Gia ziro yan vbene uhunmwuta ẹgbẹe gha ya sẹtin ya egbe tae Jehova kevbe Jesu zẹvbe nọ ya ru ena hia.
EVBỌ KHẸKE NE UHUNMWUTA ẸGBẸE GHA RU
14. De vbene uhunmwuta ẹgbẹe ya kpemehe ne ẹgbẹe ọre vbe odẹ ọghe orhiọn?
14 Gha kpemehe ne ẹgbẹe ruẹ vbe odẹ ọghe orhiọn. Vbe na ghee Erhae, te Jesu wa gha ya evbare orhiọn koko emwa ni rre ototọ re. (Mat 5:3, 6; Mak 6:34) Erriọ vbe ye, evbọ khẹke nọ ru ekpataki ne uhunmwuta ẹgbẹe sẹ, ọre nọ gha kpemehe ne ẹgbẹe ọre vbe odẹ ọghe orhiọn. (Diut 6:6-9) Ọni nọ wẹẹ, ọ ghi hia ne irẹn vbe ẹgbẹe ọre gha tie Baibol vbe ẹghẹ hia, kevbe ne iran gha ru erria yan rẹn, iran ghi gha yo iko kevbe ikporhu, iran ghi vbe hia ne asikẹgbe ne iran gu e Jehova mwẹ gha wegbe sayọ.
15. De emwi ne uhunmwuta ẹgbẹe gha ru, nọ gha ya orhiọn ẹgbẹe ọre sotọ?
15 Gha ru emwi nọ gha ya orhiọn ẹgbẹe ruẹ sotọ. Te Jehova wa gha sirra emwa ọvbehe tama e Jesu wẹẹ irẹn hoẹmwẹ ọnrẹn. (Mat 3:17) Te Jesu wa gha gi erhuanegbe ẹre rẹn wẹẹ irẹn hoẹmwẹ iran, vbe ẹmwẹ nọ ta kevbe emwi nọ ru. Erriọ erhuanegbe ẹre vbe ya gha tama rẹn wẹẹ iran hoẹmwẹ ọnrẹn. (Jọn 15:9, 12, 13; 21:16) Uhunmwuta ẹgbẹe gha sẹtin rhie ẹre ma vbe uyinmwẹ ọnrẹn wẹẹ irẹn hoẹmwẹ ọvbokhan rẹn kevbe ivbi ẹre; odẹ ọkpa nọ khian ya ru ọna, ọre nọ hia ne iran gha ruẹ e Baibol kugbe zẹvbe ẹgbẹe. Ọ ghi vbe gha tama iran wẹẹ irẹn hoẹmwẹ iran kevbe wẹẹ irẹn i ya ẹmwẹ iran ku. Ọ ma vbe de emwi nọ rhiae deghẹ ọ na vbe sirra emwa ọvbehe gha tian iran vbe ẹghẹ nọ khẹke.—Itan 31:28, 29.
Uhunmwuta ẹgbẹe ghaa hoo nọ ya ẹko rhiẹnrhiẹn e Jehova, te ọ gha kpemehe emwi ikpakpa ne ẹgbẹe ọre (Ghee okhuẹn 16)
16. De emwi ọvbehe nọ khẹke ne uhunmwuta ẹgbẹe ru? Vbọ khian ya ya ẹwaẹn ru ọna hẹ?
16 Gha kpemehe emwi ikpakpa ne ẹgbẹe ruẹ. Ẹghẹ hia ẹre Jehova ya gha kpemehe emwi ikpakpa ne Ivbi Izrẹl, uhiẹn ya sẹ ẹghẹ ne iran ya gha rri oya ye isọtẹ ọghe iran. (Diut 2:7; 29:5) Erriọ e Jehova vbe ya kpemehe emwi na ya yin agbọn ne ima vbe ẹdẹnẹrẹ. (Mat 6:31-33; 7:11) Jesu vbe ya evbare koko emwa ni ghaa lelẹe khian. (Mat 14:17-20) Ọ vbe mu emwa nibun egbe rran. (Mat 4:24) Uhunmwuta ẹgbẹe ghaa hoo nọ ya ẹko rhiẹnrhiẹn e Jehova, te ọ gha kpemehe emwi ikpakpa ne ẹgbẹe ọre. Sokpan te ọ khẹke nọ ya ẹwaẹn ru ọna, na ghẹ do miẹn wẹẹ, ẹmwẹ iwinna, ẹre ọ ghi wa muẹn sẹrriọ wẹẹ, ẹi ghi miẹn obọ ya gha gbaroghe ẹgbẹe ọre vbe odẹ ọghe orhiọn, kevbe wẹẹ ẹi ghi vbe mwẹ ẹghẹ ne iran.
17. De odẹ ne Jehova kevbe Jesu ya maa ima emwi? De odẹ ne iran vbe ya rhie adia ne ima?
17 Gha maa iran emwi. E Jehova keghi maa ima emwi, erriọ ẹre ọ vbe ya dia ima, rhunmwuda ọ hoo ne agbọn maan ima. (Hib 12:7-9) Erriọ e Jesu vbe ya maa emwa ni rre ototọ re emwi, vbe odẹ ọghe ahoẹmwọmwa. (Jọn 15:14, 15) Ọ keghi rhie adia ne ọmwa vbe ẹghẹ nọ khẹke, sokpan ọ ghi ru ẹre vbe odẹ ne khuẹrhẹ. (Mat 20:24-28) Ọ rẹnrẹn wẹẹ, ma gha zẹdia gha ru emwi nọ ma deyọ, rhunmwuda emwa ni ma gba ẹre ima khin.—Mat 26:41.
18. De emwi ne uhunmwuta ẹgbẹe nọ maan kọ ye orhiọn?
18 Uhunmwuta ẹgbẹe nọ ya egbe tae Jehova kevbe Jesu i khian wa yaro yọ wẹẹ, te ọvbokhan rẹn kevbe ivbi ẹre khian gha ru emwi nọ gbae vbe ẹghẹ hia. Rhunmwuda ọni, ẹi khian “gha khọ mu iran.” (Kọl 3:19) Nọghayayerriọ, ọ ghi ya “ọghọ vbe ute” dia iran, zẹvbe nọ rre ebe Galatia 6:1; ọ ghi vbe yerre wẹẹ, irẹn tobọ irẹn vbe ru abakuru. Vbe na ghee Jesu, ọ rẹnrẹn wẹẹ, odẹ nọ ghi maan sẹ na ya maa emwa emwi, ọre na gha rhie igiemwi esi yotọ.—1 Pit 2:21.
19-20. De vbene uhunmwuta ẹgbẹe khian ya sẹtin ya egbe tae Jehova kevbe Jesu hẹ, vbọ gha de ọghe azẹ na ru?
19 Ghẹ gha ru azẹ nọ gha maan ne uwẹ ọkpa. E Jehova keghi ru azẹ nọ gha rhie ere ne emwa ọvbehe. Vbe igiemwi, te Jehova ọkpa gha te sẹtin gha rrọọ, sokpan te irẹn hoo ne emwa ọvbehe gha sọyẹnmwẹ arrọọ vbene irẹn ye, ọni ẹre ọ si ẹre nọ na yi iran. Ọmwa rhọkpa i rrọọ nọ gha te sẹtin kpikpi e Jehova nọ gie Ovbi ẹre gha dee nọ do wu ye orukhọ ima. Ekhọe obọ re, ẹre ọ ya ru vberriọ, nọ mieke na ru iyobọ ne ima. Jesu vbe gha ru azẹ nọ gha rhie ere ne emwa ọvbehe. (Rom 15:3) Vbe igiemwi, ọ keghi loo ẹghẹ nọ te khẹke nọ ya hẹwẹ, ya maa emwa ni gbẹbu emwi.—Mak 6:31-34.
20 Uhunmwuta ẹgbẹe nọ maan rẹnrẹn wẹẹ, ne ọmwa ru azẹ nọ gha maan ne emwa hia vbuwe ẹgbẹe i re emwi nọ khuẹrhẹ; sokpan emwi nọ bi ye ọre izabọ nọ, rhunmwuda ọni, ẹi yae rhẹghẹrẹ. Ọ gha khian ru azẹ, ẹi wa gheghe dekun ẹnrẹn ru, ra nọ ru ẹre vbene ọ wa ya rre ọre ekhọe. Nọghayayerriọ, ọ ghi gi e Jehova dia ẹre, vbe azẹ nọ khian ru nii. * (Itan 2:6, 7) Ẹghẹ nii, ọ ghi sẹtin ru azẹ nọ gha maan ne emwa hia vbuwe ẹgbẹe.—Fil 2:4.
21. Vbe ima khian ziro yan vbe ako iruẹmwi nọ ghi lele ọna?
21 Iwinna ne Jehova mu ne avbe uhunmwuta ẹgbẹe i re iwinna nekherhe; ọ hoo ne iran ru iwinna na ẹse, vbe ẹi re erriọ, ọ gha nọ iran. Sokpan, ọdọ ghaa hia vbe odẹ ke odẹ, nọ gha lele igiemwi ọghe Jehova kevbe Jesu, ọ gha sẹtin gha re uhunmwuta ẹgbẹe nọ maan. Ọvbokhan rẹn na vbe gha ru emwi nọ bi ye ọre egbe, orọnmwẹ nii gha rhiẹnrhiẹn gbe! Ugbẹnvbe a miẹn wẹẹ, ọdọ ọre uhunmwuta ẹgbẹe, de aro nọ khẹke ne ikhuo ya gha ghee ọdafẹn iran? De isievẹn eso ne ikhuo werriẹ aro daa? Ma gha ziro yan avbe inọta na, vbe ako iruẹmwi nọ ghi lele ọna.
IHUAN 16 Rho E Jehova Vbe Ovbi Ẹre Nọ Hannọ Zẹ
^ okhuẹn 5 Okpia gha rhie okhuo nẹ, ọ ghi khian uhunmwuta ẹgbẹe. Vbe ako iruẹmwi na, ma gha ziro yan vbene Jehova ya mwamwa ẹgbẹe ọre ni rre agbọn kevbe ẹrinmwi, evbọzẹe ne Jehova na ru emwamwa ọghe uhunmwuta kevbe emwi ne ikpia gha miẹn ruẹ vbe igiemwi ọghe Jehova kevbe Jesu. Vbe ako iruẹmwi nọ ghi lele ọna, ma gha ziro yan emwi ne ọdọ vbe amwẹ gha miẹn ruẹ vbe igiemwi ọghe Jesu kevbe igiemwi ọvbehe ni rre Baibol. Vbe ako iruẹmwi nọ ghi vbe lele ọni, ma gha guan kaẹn vbene etẹn nikpia khian ya gha loo asẹ ne iran mwẹ vbuwe iko.
^ okhuẹn 7 Ikueta eso rrọọ ne okpia na ya obọ dan mu ọvbokhan rẹn, ọ ghi kue gha gbe ẹre; e vidio eso vbe rrọọ ne a na ya emwi vbenian gbọdẹn ne emwa mieke na gha giẹ yọ, a vbe miẹn emwi vbenian tie vbe ebe eso. Ọ gha kẹ, ena rre usun emwi nọ ya emwa nibun roro ẹre wẹẹ, ọ ma de emwi nọ rhiae deghẹ okpia na gha ya obọ yẹnyẹn ọvbokhan rẹn mu otọ.
^ okhuẹn 20 U ghaa hoo ne u rẹn sayọ vbekpae vbene a ya ru azẹ nọ maan hẹ, ya ghee uhunmwuta nọ khare wẹẹ, “Make Decisions That Honor God,” nọ ladian vbe The Watchtower ọghe April 15, 2011, ipapa 13-17.
