ỌTẸN nokhuo na tie ẹre Sylviana nọ re arọndẹ nọ rre odẹ ukpo 25 keghi kha wẹẹ: “Avbe ọse mwẹ ghaa taa emwi ẹwaẹn ne iran he miẹn vbe ehe ne a na kakabọ gualọ iyobọ ọghe arọndẹ, ọ wa vbe gha khọn mwẹ ne I lele iran gha khian. Sokpan I ma yayi wẹẹ I gha sẹtin ru iwinna vberriọ.”

Uwẹ vbe mwẹ egbe ekhọe ọghe Sylviana ra? Ọ sẹtin gha rrọọ ruẹ orhiọn ne u ya ru iyobọ vbe ehe ne etẹn i ye, ne a na wa gualọ iyobọ etẹn. Ọ ghaa yerriọ, u sẹtin vbe gha muẹn roro deghẹ u gha gele sẹtin ru vberriọ. Deghẹ u mwẹ iziro vbenian, gha mwẹ ilẹkẹtin! E Jehova ru iyobọ ne arriaisẹn emwa nibun ya sẹtin khọnmiotọ yan ọlọghọmwa eso ni te gha si iran ghee iyeke. Ma gha ziro yan vbene Jehova ya ru iyobọ ne etẹn eso ni do kporhu vbe Madagascar. Ukpogienẹ ẹre Madagascar na zẹ vbe uhunmwu otagbọn hia vbe otọ ẹvbo nọ ghi kpọlọ sẹ ne amẹ gbodin lẹga.

Ke odẹ ukpo igbe nọ gberra gha dee, etẹn ni ya iyẹn wewe kevbe arọndẹ ni gberra 70 ni ke otọ ẹvbo 11 * rre, ẹre ọ he rre do kporhu vbe Madagascar. Emwa nibun wa danmwehọ ikporhu iyẹn nọ maan vbe Madagascar erriọ iran vbe ya rhie owẹ lele emwi ne iran ruẹ vbe Baibol. Etẹn nibun vbe Madagascar wa vbe rhiegba ye iwinna ikporhu iyẹn nọ maan. Nibun vbọ kpa gha rrie ehe ọvbehe vbe otọ ẹvbo nii, ne iran mieke na ya ikporhu iyẹn nọ maan Ọghe Arriọba vẹwae. Gia guan kaẹn eso vbọ.

Louis kevbe Perrine keghi re ọdọ vbe amwẹ ni rre odẹ ukpo 35. Iran na ke France ne ẹvbo iran si gha rrie Madagascar. Ọ kpẹre nọ kegha rre iran orhiọn ne iran kpa gha rrie otọ ẹvbo ọvbehe ya kporhu iyẹn nọ maan sokpan e Perrine kegha si egbe. Ọ keghi kha wẹẹ: “Te ohan ehe ni ma rẹn ẹdẹ wa gha mu mwẹ. Osi na gha si mwẹ rhunmwuda ẹgbẹe mwẹ, iko, owa, ehe hia ne ima rẹnrẹn kevbe emwamwa hia ni gua ima obọ ro ne ima khian sẹrae. Vbene ẹmwata, osi ra ohan nọ ghaa mu mwẹ ọre idobo nọ ghi kpọlọ sẹ nọ ghaa si mwẹ ghe iyeke.” Ọ ghi rre ukpo 2012, Perrine keghi zẹ emwi ru. Irẹn vbe arowa re ne Louis na kpa gha rrie Madagascar. Te ọtẹn nokhuo na ghi gbe I ma rẹn rhunmwuda azẹ nọ ru ra? Hiehie! Ọ keghi kha wẹẹ: “Emwi ẹwaẹn hia ne ima miẹn keghi re nọ ya amuẹtinyan ọghe ima wegbe sayọ. E Jehova ma zẹdẹ sẹ ima rae.” Louis keghi rhie tẹ wẹẹ:  “Orhunmwu igbe ne ima gu ruẹ e Baibol ẹre ọ rrie Ugie Ayere nokaro ne ima do vbe Madagascar.”

Vbọzẹe ne ẹtin ma na fo iran vbe ọlọghọmwa rhiegbe ma? Iran keghi rinmwian e Jehova vbe erhunmwu nọ rhie ẹrhiọn ye iran iwu ne iran mieke na sẹtin zinegbe. (Fil 4:13) Louis keghi kha wẹẹ: “E Jehova wa họn erhunmwu ima. ‘Ọfunmwegbe Osanobua’ ẹre ọ ya ima sẹtin rhie aro tua ọyẹnmwẹ ne ima miẹn vbe iwinna ugamwẹ. Avbe ọse ima vbe owa, wa vbe gha ya elẹta kevbe e-mail rhie igiọdu ne ima.”—Fil 4:6, 7; 2 Kọr 4:7.

E Jehova wa fiangbe Louis kevbe Perrine ye izinegbe ne iran mwẹ rẹn. Louis keghi kha wẹẹ: “Vbe October 2014, ma na yo owebe ne a tie ẹre Bible School for Christian Couples * vbe France. Owebe nii keghi re ẹsọhẹ ne ima i sẹtin mianmian ẹdẹ.” Iran ghi ladian vbe owebe nii, iran ma sẹtin ghọghọ vbe otu dọlegbe gie iran gha rrie Madagascar.

Odẹ ukpo 55 ẹre ọdọ vbe amwẹ ne a tie ẹre Didier kevbe Nadine ghaa ye vbe iran ke France si gha rrie Madagascar. Didier keghi kha wẹẹ: “Ma ka ru iwinna arọndẹ ma ke suẹn emọ na biẹlẹ. Emọ eha ma mwẹ, iran ghi waan nẹ, ma na zẹ ọre vbe iro ne ima ya ru iwinna ugamwẹ ọghe ẹghẹ hia vbe otọ ẹvbo ọvbehe.” Nadine ne ọvbokhan rẹn keghi kha wẹẹ: “I te gha si egbe rhunmwuda ọ ghaa da mwẹ ne I khian na kpa sẹ ivbi mwẹ rae, sokpan iran keghi tama ima wẹẹ: ‘Wa ghaa rrie ehe ne a na gualọ iyobọ etẹn, te ima khian gha ye uwa hio.’ Ẹmwẹ nii keghi rhie ẹrhiọn ye ima iwu, ma na ghi kpa gha rrie Madagascar. Agharhemiẹn wẹẹ ehe ne ima ye nia ma zẹdẹ sikẹ ehe ne ivbi ima ye, ma ye sẹtin gu iran guan vbe ẹghẹ hia. Ọna wa sẹ ima ọyẹnmwẹ.”

Urhuẹvbo e Malagasy wa lọghọ Didier kevbe Nadine na ruẹ rhunmwuda, iran i ghi re ibiẹka. Nadine keghi muẹnmuẹn ogiẹ tae wẹẹ: “Ma i ghi re emọ ukpo 20.” Vbe iran ghi ya sẹtin ruẹ ọre hẹ? Iran na ka deba iko ọghe urhuẹvbo e French. Iran ghi mu egbe ne iran khian ya ruẹ urhuẹvbo nii nẹ, iran na gha rrie iko ọghe urhuẹvbo e Malagasy. Nadine keghi kha wẹẹ: “Emwa nibun ne ima miẹn vbe ikporhu keghi gbọyẹmwẹ ye iruẹmwi e Baibol. Iran gha kpọnmwẹ ima vbe ima gha kporhu ma iran nẹ. Ọna yevbe ne I rre imina. Te ena wa ya iwinna arọndẹ sẹ imẹ ọyẹnmwẹ. Oghọghọ ẹre I ya rhiọrre owiẹ owiẹ, rhunmwuda, oghọghọ ne ẹi gia gie ẹre I miẹn vbe ikporhu.”

Ọtẹn nokpia Didier na muẹnmuẹn ogiẹ vbe ọ yerre emwi nọ sunu vbe ọ suẹn gha ruẹ urhuẹvbo e Malagasy. Ọ wẹẹ: “Vbe I siẹnro abọ ọghe inọta vbe ewanniẹn vbe iko vbe ẹdẹ ọkpa, etẹn na wa gha zẹ ewanniẹn sokpan I ma rẹn otọ emwi ne iran ghaa taa. I na wa gha kpọnmwẹ iran ye ewanniẹn hia ne iran zẹ. I ghi kpọnmwẹ ọtẹn nokhuo ọkpa ye ewanniẹn ne ọ zẹ, etẹn ni tota ye iyeke na gha ya obọ gbekhakha ma mwẹ wẹẹ ewanniẹn nọ zẹ ma gba. I na ghi giẹgiẹ tie ọtẹn nokpia ọvbehe. Ughaghe ewanniẹn nọ gbae ẹre ọtẹn nokpia nii zẹ.”

Vbe asikoko ne a do vbe 2005 ẹre Thierry vbe Nadia ne amwẹ ọnrẹn na ghee ikueta nọ mwẹ uhunmwuta na  “Pursue Goals That Honor God.” Igiemwi esi ọghe Timoti ẹre ikueta nii rhiema. Ọ keghi mu ọdọ vbe amwẹ na ekhọe sẹrriọ wẹẹ, iran na ru azẹ ne iran gha rrie ehe ne a na gualọ iyobọ etẹn. Ọtẹn nokpia Thierry keghi kha wẹẹ: “Ikueta nii ghi fo nẹ, vbe etẹn ye kpe obọ, I na sikẹ ọvbokhan mwẹ nọ rẹn wẹẹ, ‘De ehe ne ima gha yo?’ Ọvbokhan mwẹ na wẹẹ ọni irẹn wa vbe mu roro na.” Vbe iyeke ọni, iran na suẹn gha ru emwamwa. Nadia keghi kha wẹẹ: “Ma na gha fẹko fian emwi ne ima mwẹ kanmwa a te miẹn wẹẹ ehia na do gua ẹkpo enẹ ne a mu ye ehe.”

Ukpo 2006 ẹre iran ghi sẹ Madagascar. Awarọkpa nii, ẹre iran wa ya suẹn gha sọyẹnmwẹ iwinna ikporhu iyẹn nọ maan. Nadia keghi kha wẹẹ: “Emwa ne ima miẹn vbe ikporhu wa ya ima sọyẹnmwẹ.”

Etẹn na keghi werriẹ aro daa isievẹn vbe ukpo ehan ghi gberra nẹ. Marie-Madeleine nọ re iye Nadia keghi miẹn odekun vbe France. Ọ na dee bun obọ, ọ na vbe va uhunmwu. Thierry vbe Nadia ghi gu ọbo ebo nọ gbaro ghe iye Nadia guan nẹ, iran na wẹẹ nọ gha die Madagascar. Vbe ẹghẹ ne a kha na, iye Nadia sẹ ukpo 80 nẹ, ọrheyerriọ, ekhọe hia ẹre ọ ya kue ye itie nii. Te ọtẹn nokhuo na ghi gha gbe I ma rẹn wẹẹ irẹn ghẹ bu ivbi ẹre gha rrie Madagascar ra? Ẹo. Ọ keghi kha wẹẹ: “Emwi vbe gha lọghọ ugbẹnso rhunmwuda ẹvbo ni ke rre lughaẹn ne Madagascar. Agharhemiẹn wẹẹ egbe khian ọmaẹn nẹ, I ye mwẹ esa ne I ye vbe iko. Emwi nọ wa vbe ya mwẹ ghọghọ ọre wẹẹ, ne I na do gu ivbi mwẹ dia, ma mu idobo ye iwinna ugamwẹ ọghe iran nọ wa biẹ ọmọ esi vbe otọ ẹvbo na.”

Riana keghi re ọtẹn nokpia nọ rre odẹ ukpo 22. Odin ne otọ na maan emwi okọ na tie ẹre Alaotra Mangoro, nọ rre odẹ ọlarre owẹn ọghe Madagascar ẹre ọ na waan. Ọ wa rẹn ebe rhunmwuda ọni, ọ kegha hoo nọ yo owebe nọ yo. Avbe Osẹe Jehova ghi suẹn gha maa re emwi vbe Baibol, ọ na fi ekhọe werriẹ. Ọ keghi kha wẹẹ: “I keghi hia ni rherhe ladian vbe owebe nogieva. I na yan ma e Jehova wẹẹ, ‘I ma na gbokhuẹre vbe edanmwẹ nokiekie, I wa suẹn iwinna arọndẹ.’” Ọ ghi gele ladian nẹ, ọ na mu eyan rẹn sẹ. Irẹn vbe ọtẹn nokpia ọkpa nọ vbe arọndẹ na gba mu owa, ọ na miẹn iwinna ọghe ovbi ẹghẹ kherhe, erriọ ya suẹn iwinna arọndẹ. Ọ wẹẹ: “Ọna ọre azẹ nọ ghi maan sẹ ne I ru.”

Evbibiẹ Riana kevbe etiọnrẹn ma rẹn emwi nọ si ẹre ne ọ ma na ghi kue yo owebe nọ yo. Riana keghi kha wẹẹ: “Erha mwẹ, ọtien erha mwẹ kevbe ọtien iye mwẹ kegha gbagba re yọ mwẹ egbe ne I yo owebe nọ yo sokpan I ma zẹdẹ hoo ne emwi rhọkpa mu idobo ye iwinna arọndẹ ne I ru.” Vbe ọ ma he kpẹ vba, e Riana na suẹn gha ru emwamwa nọ gha rrie ehe ne a na gualọ iyobọ etẹn. Vbọ ya iziro na la re ekhọe? Ọ keghi kha wẹẹ: “Avbe oyi keghi gbe urho la ughugha ima, iran na viọ emwi mwẹ nibun. Emwi nọ sunu nii keghi ya mwẹ yerre, emwi ne Jesu tae vbekpae emwi ewe ne a ‘si koko ye ẹrinmwi.’ I na ghi ta mu olọ yan rẹn wẹẹ, I gha hia ne I do gha re ọmwa nọ fe vbe odẹ ọghe orhiọn.” (Mat 6:19, 20) Riana na si gha rrie ehe ne amẹ i na rherhe rhọ vbe odẹ ahọ ọghe Madagascar. Ke ehe ne irẹn ka ye gha rrie evba, ọ sẹ ibiriki 800. Ọ yevbe ne a ke Eko rrie Kano. Odin nii ẹre Ivbi Antandroy ke rre. Vbọzẹe ne ọ na gha rrie evba?

Uki ọkpa ọre he ye ne Riana suẹn gha gu ikpia eva ne ivbi Antandroy ruẹ e Baibol, vbe avbe oyi do rra re. Ọ keghi ruẹ ifiẹmwẹ eso vbe urhuẹvbo nii. Ọ na vbe do rẹn wẹẹ emwa nibun vbe odin nii, ma he họn ikporhu iyẹn nọ maan ọghe Arriọba. Riana keghi kha wẹẹ: “I keghi na erhunmwu gie Jehova nọ ru iyobọ mẹ, ne I sẹtin ya kporhu vbe ehe ne a na zẹ urhuẹvbo e Tandroy.”

Isievẹn ẹre Riana ka wa werriẹ aro daa vbe ọ sẹ evba. Ọ ma miẹn iwinna. Okpia ọkpa na tama rẹn wẹẹ: “Vbọ ya ruẹ gha die emwa? Te emwa ke ediran kpa ya gha gualọ iwinna vbe ehe ne uwẹ ke gha dee.” Uzọla eva ghi gberra nẹ, Riana na gha rrie asikoko odin. Igho rhọkpa ma ghi gha gu ẹre vbe ọ kpa hin owa rre, iro na han rẹn. Ọ ghi rre ẹdẹ nokiekie ọghe asikoko odin nii, ọtẹn nokpia ọkpa na zin igho yọ re umẹkpo. Igho nii ẹre ọ ghi miẹn ya gha rrie owa, ọ na vbe sẹ ọre ya suẹn ẹki e yogọt. Riana keghi kha wẹẹ: “E Jehova keghi ru iyobọ mẹ vbe ẹghẹ nọ khẹke ne I mieke na sẹtin ye gha ru iyobọ ne emwa ni ma he rẹn ọnrẹn.” Te iwinna wa vbe kpọ kua vbe iko. Riana na vbe kha wẹẹ: “Ẹghẹ hia ẹre I ya ya ọta azagba guan. Uzọla eveva ẹre ọ ya sẹ mwẹ egbe. E Jehova gele wa ya otu ọghẹe maa mwẹ emwi.” Do fi ebanban, Riana ye ru iyobọ ne emwa nibun ni hoo  ne iran ruẹ vbekpae Jehova, vbe odin ne a na zẹ urhuẹvbo Tandroy vbe Madagascar.

E Jehova keghi rhie ilẹkẹtin ne ima wẹẹ, ‘ọmwaikọmwa ne ọ ghi nọ afiangbe vbe otọe nii, Osanobua ẹmwata gha fiangbẹe.’ (Aiz 65:16) E Jehova gha fiangbe ima deghẹ ima hia re vbe odẹ ke odẹ ne ima ya ru sayọ vbe ugamwẹ ọghẹe. Yerre wẹẹ ima ka guan kaẹn Sylviana vbe omuhẹn ban. Irẹn ẹre ọ khare wẹẹ irẹn ma yayi ighẹ irẹn gha sẹtin ya kporhu vbe ihe ọvbehe. Vbọzẹe ne ọ na kha vberriọ? Ọ keghi kha wẹẹ: “Owẹ iye ọmwa mwẹ keghi ya Z (9 cm) tẹkpu sẹ owẹ erha ọmwa mwẹ, rhunmwuda ọni, te I fi owẹ, vbene i tẹ khian kherhe, egbe wọọ mwẹ nẹ.”

Vbe ukpo 2014, Sylviana vbe ọtẹn nokhuo ne iran gba rre iko ọkpa, ne a tie ẹre Sylvie Ann na koko gha rrie igue ọkpa. Arọndẹ ẹre ọtẹn nokhuo na khin. Ke ẹvbo iran gha rrie igue nii, ọ rree sẹ ibiriki 53. Agharhemiẹn wẹẹ ọ ma gha khuẹrhẹ, Sylviana ye sẹtin ru emwi nọ rrọọ ekhọe. E Jehova wa fiangbe ẹrhiọn nọ loo ro. Ọ keghi kha wẹẹ: “Ọ ghi rre odẹ ukpo ọkpa ne I he gbe vbe igue ne ima kpa gha rrie, okhuo ọkpa ne a tie ẹre Doratine, ne I ghaa gu ruẹ e Baibol keghi dinmwiamẹ vbe asikoko ọghe otako.”

Emwi ẹwaẹn ọghe etẹn na, ni ya kporhu vbe ehe ne a na gualọ iyobọ etẹn rhiẹre ma wẹẹ, ma gha hia ne ima ru sayọ vbe ugamwẹ e Jehova, agharhemiẹn wẹẹ ima werriẹ aro daa isievẹn, ma ghi gele do miẹn ẹmwata nọ rre ebe Aizaia vbe arrọọ ọghe ima nọ khare wẹẹ: “I gha ya uwa wegbe, I gha yi uwa obọ.” (Aiz 41:10) Ọna keghi ya ima sikẹ e Jehova sayọ. Yevbesọni, ma ghaa ya ekhọe hia rhiegbe ladian vbe ako ne ima ye ra vbe otọ ẹvbo ọvbehe, te ima yae mu egbe khẹ iwinna ne ima khian ru vbe agbọn ọgbọn. Didier, ne ima ka guan kaẹn sin keghi kha wẹẹ, “ma gha ya kporhu vbe ako ne a na gualọ iyobọ etẹn, te ima yae mu egbe khẹ iwinna nọ dee vbe odaro.” Ma yaro yọ wẹẹ, etẹn ima nibun gha vbe ya ekhọe hia rhiegbe ladian!