AKO IRUẸMWI 4
Evbọzẹe Ne Ima Na Do Ugie Ayere
“Wa gha ru ọna ya ye mwẹ rre.”—LUK 22:19.
IHUAN 20 U Ya Ovbuẹ Ne Ukpọmọkpa Zọ Ese Ne Ima
OLIKA ẸMWẸ ỌGHE AKO IRUẸMWI NA *
1-2. (a) De ẹghẹ ne ẹmwẹ ọmwa ima ne ọ wu mobọ ya la ima ekhọe? (b) Vbe asọn nọ gbe fi ẹdẹ ne Jesu wu, de emwi ne ọ wẹẹ, ne erhuanegbe ẹre gha ru?
ADEGHẸ ọmwa ima na wu, ẹi mwẹ vbene ọ khian kpẹẹ sẹ hẹ, ma i khian sẹtin mianmiaẹn ẹdẹ. Ẹghẹ ke ẹghẹ nọ ya gba vbe ukpo ọvbehe ne ọ wu, ẹmwẹ ọnrẹn ghi dọlegbe fian ima re.
2 Vbe ukpo ukpo, ma kevbe ẹbo emwa nibun ni rre ehe ughughan vbe uhunmwu otagbọn na, keghi si egbe koko do ugie ayere ọghe orhunmwu ọkpa ne ima kakabọ hoẹmwẹ ọnrẹn; ọni ọre Jesu Kristi. (1 Pit 1:8) Te ima ru ọna, ne ima ya ye ẹre rre ighẹ uwu ne ọ wu ne ima, ne ọ ya miẹn ima fan vbe obọ orukhọ kevbe uwu. (Mat 20:28) Te Jesu wa gha hoo ne erhuanegbe ẹre ye uwu ọghẹe rre. Vbe asọn nọ gbe fi ẹdẹ ne ọ wu, ọ keghi gu iran rri evbare ne kpataki, vbe iyeke ọni, ọ na tama iran wẹẹ: “Wa gha ru ọna ya ye mwẹ rre.”—Luk 22:19.
3. De emwi ne ima khian guan kaan vbe ako iruẹmwi na?
3 Ibozẹghẹ emwa ni ya aro yọ wẹẹ, ẹrinmwi ẹre iran rrie, do Ugie Ayere vbe ukpo ukpo. Erriọ ẹre ọkhọngborrie emwa ni ya aro yọ wẹẹ, uhunmwu otagbọn na ẹre iran khian gha ye, vbe rrie Ugie na. Vbe ako iruẹmwi na, ma gha guan kaan evbọzẹe ne oghẹn eva na, na do Ugie na vbe ukpo ukpo. Ma gha vbe guan kaan, ere ne ima gha miẹn vbe ima ghaa do Ugie Ayere. Nia, gi ima guan kaan evbọzẹe ne etẹn na hannọ zẹ na do Ugie Ayere.
EVBỌZẸE NE ETẸN NA HANNỌ ZẸ NA RRIE UGIE AYERE
4. Vbọzẹ ne etẹn na hannọ zẹ na rri eka, ne iran na vbe wọn vbe ayọn na ghae vbe Ugie Ayere?
4 Vbe ukpo ukpo, etẹn na hannọ zẹ gha rrie Ugie Ayere, iran keghi rri eka, erriọ ẹre iran vbe ya wọn vbe ayọn na ghae. Vbọzẹ ne iran na ru vberriọ? Ne ima mieke na rhie ewanniẹn ye inọta na, gi ima guan kaan emwi nọ sunu vbe asọn nokiekie ne Jesu gbe vbe agbọn. Vbe Jesu vbe erhuanegbe ẹre ghi rri evbare ọghe Alagberra nẹ, e Jesu keghi gu erhuanegbe ẹre rri evbare ne kpataki; ọna ẹre a ghi do gha tie ẹre Evbare Ota Ọghe Nọyaẹnmwa. E Jesu keghi ghae eka ne ukọ ẹre owọrọ ni ghaa gu ẹre rre evba, ọ na vbe sa ayọn ne iran wọn. E Jesu keghi tama iran vbekpa ile eva na gu iran ta; nokaro ọre ile ọghe ọgbọn, nogieva ọre ile ọghe Arriọba. * (Luk 22:19, 20, 28-30) Ile eva na keghi kie ẹkpotọ ne iran kevbe ibozẹghẹ emwa ọvbehe, ne iran gha re ọba kevbe ohẹn vbe ẹrinmwi. (Arhie 5:10; 14:1) Etẹn na hannọ zẹ ni ghi dekẹ vbe agbọn na, na gu ta ile eva na, ẹre ọ khian sẹtin rri eka na ghae vbe Ugie Ayere, iran ẹre ọ vbe wọn vbe ayọn nii.
5. De emwi ne etẹn na hannọ zẹ mwẹ vbe ekhọe, vbekpa avbe afiangbe ni khẹ iran vbe odaro?
5 Emwi ọvbehe nọ ya etẹn na hannọ zẹ rrie Ugie Ayere ọre wẹẹ: Ọ keghi kie ẹkpotọ ne iran ya muẹn roro, avbe afiangbe ni khẹ iran vbe ẹrinmwi. Egbe nẹi sẹtin kẹkẹ ẹre Jehova khian ya fiangbe iran, iran ghi do gha re emwa orhiọn nẹi sẹtin wu. Deba ọni, iran ghi deba e Jesu Kristi gha kha; nọ ghi wa sẹ ehia ọre wẹẹ, iran ghi gha bẹghe Jehova ghee aro mwẹ ghee aro ruẹ! (1 Kọr 15:51-53; 1 Jọn 3:2) Etẹn na hannọ zẹ rẹnrẹn wẹẹ, agharhemiẹn wẹẹ, afiangbe nibun wa khẹ iran vbe ẹrinmwi, te ọ khẹke ne iran ga e Jehova sẹ ufomwẹ ne avbe afiangbe na mieke na sẹ iran obọ. (2 Tim 4:7, 8) Ẹghẹ ke ẹghẹ ne iran ya muẹn roro, avbe afiangbe ni khẹ iran, ẹko ghi wa gha rhiẹnrhiẹn iran. (Tai 2:13) Emwa ni khian yin agbọn na vbe vbo? (Jọn 10:16) Vbọzẹ ne iran na rrie Ugie Ayere?
EVBỌZẸE NE EMWA NI KHIAN YIN AGBỌN NA NA RRIE UGIE AYERE
6. Vbọzẹ ne emwa ni khian yin agbọn na, na yo Ugie Ayere vbe ukpo ukpo?
6 Emwa ni khian yin agbọn na gha rrie Ugie Ayere, iran i rri eka, iran i vbe wọn vbe ayọn na ghae, sokpan te iran yevbe ekhẹn ni rrie ughe. Ukpo 1938, ẹre emwa ni ya aro yọ wẹẹ, agbọn na ẹre iran khian gha ye, suẹn gha rrie Ugie Ayere. The Watchtower ọghe March 1, 1938 khare wẹẹ: “Emwi nọ khẹke ẹre nọ, ne [emwa ni khian yin agbọn na] gha rrie Ugie Ayere, ne iran do bẹghe emwi nọ sunu. . . . Ọ khẹke nọ vbe gha re ẹghẹ oghọghọ ne iran.” Zẹvbe ne avbe ọse kevbe ẹgbẹe ni rrie ugie orọnmwẹ ye, erriọ ẹre etẹn ni khian yin agbọn na vbe ye, vbe iran gha rrie Ugie Ayere.
7. Vbọzẹ ne emwa ni khian yin agbọn na, na hoo ne iran danmwehọ ọta na ya guan vbe Ugie Ayere?
7 Emwa ni khian yin agbọn na vbe muẹn roro, avbe afiangbe ni khẹ iran vbe odaro. Iran wa hoo ne iran danmwehọ ọta na khian ya guan vbe Ugie Ayere, rhunmwuda, vbe ọta nii, a mobọ guan kaan emwi ne Kristi kevbe orhunmwu 144,000 ni khian deba ẹre kha, khian ru ne emwa nagbọn ni mudia ẹse, vbe Ukpo Arriaisẹn Ọkpa ne iran khian ya kha. E Jesu kevbe emwa ni khian deba ẹre kha, gha ya uhunmwu otagbọn khian e paradais, iran ghi ru iyobọ ne emwa nagbọn ya khian emwa ni gbae. Ẹghẹ ke ẹghẹ ne ẹbo emwa ni rrie Ugie Ayere ya muẹn roro, ẹmwẹ akhasẹ ni rre ebe Aizaia 35:5, 6; 65:21-23; kevbe ebe Arhie Maan 21:3, 4, ọ keghi gbe iran otiti. Iran ghaa muẹn roro, vbene agbọn khian gha ye hẹ ne iran kevbe emwa iran, amuẹtinyan ne iran mwẹ ghi gha wegbe yọ, iran ghi vbe gha hoo ne iran ga e Jehova ya sẹ ufomwẹ.—Mat 24:13; Gal 6:9.
8. De emwi ọvbehe nọ ya emwa ni khian yin agbọn rrie Ugie Ayere?
8 Emwi ọvbehe nọ ya emwa ni khian yin agbọn na rrie Ugie Ayere ọre wẹẹ, iran hoo ne iran rhie ẹre ma wẹẹ, iran hoẹmwẹ etẹn na hannọ zẹ kevbe wẹẹ, iran ye iran ike. E Baibol ka tae ye otọ wẹẹ, akugbe a gha rre uwu ẹkpo oghẹn eva na. Gia guan kaan ako eso vbe Baibol nọ tae ye otọ.
9. Zẹvbe nọ rre ebe Zẹkaraia 8:23, NW, de aro ne emwa ni khian yin agbọn na, ya ghee etẹn na hannọ zẹ?
9 Tie Zẹkaraia 8:23, NW. Ẹmwẹ akhasẹ na, ya ima rẹn aro ne emwa ni khian yin agbọn na ya ghee etẹn na hannọ zẹ. Etẹn na hannọ zẹ ni ghi kẹ vbe agbọn ọre “Ovbi e Ju” ne ebe Zẹkaraia ya unu kaan. (Rom 2:28, 29) “Ikpia igbe ni ke agbẹnvbo ughughan rre” ne ako nii guan kaan, ọre emwa ni ya aro yọ wẹẹ, uhunmwu otagbọn ẹre iran khian gha ye vbe etẹbitẹ. Ne iran na “daeyi gbain ighẹ ukpọn” ọghe etẹn na hannọ zẹ rhie ma wẹẹ, iran deba iran ga e Jehova vbe odẹ ọghe ẹmwata. Ẹi khabe, ne emwa ni khian yin agbọn na, na rrie Ugie Ayere, ne iran ya rhie ẹre ma wẹẹ, iran hoo ne iran rhikhan mu etẹn na hannọ zẹ.
10. De vbene Jehova he ya muẹn sẹ hẹ, ighẹ ẹmwẹ akhasẹ nọ rre ebe Ẹzikiẹl 37:15-19, 24, 25?
10 Tie Ẹzikiẹl 37:15-19, 24, 25. E Jehova mu ẹmwẹ akhasẹ na sẹ nẹ. Vbe ọ ya ru ẹre hẹ? E Jehova ru ẹre nẹ, ne etẹn na hannọ zẹ kevbe emwa ni khian yin agbọn na gha mwẹ akugbe, emwi rhọkpa i sẹtin wannọ iran. Akhasẹ ighẹ Ẹzikiẹl ya unu kaan erhan eva. Etẹn na hannọ zẹ ẹre a ya gie “erhan nọ rre ihe Juda.” Uniẹn e Juda, ẹre a na gha zẹ avbe ọba ni ghaa khaevbisẹ vbe otọ Izrẹl nẹdẹ. Emwa ni khian yin agbọn na, ẹre a ya gie “erhan nọ rre ihe Izrẹl.” * Vbene a ku erhan eva nii kugbe, erriọ ẹre Jehova ku oghẹn eva na kugbe. Ọna rhie ma wẹẹ, e Jesu Kristi ẹre ọ khian gha kha yan oghẹn eva na, zẹvbe ne iran ya ga e Jehova kugbe. Vbe ukpo ukpo, etẹn na hannọ zẹ kevbe emwa ni khian yin agbọn na gha khian do Ugie Ayere, dọmwadẹ ọghẹe i do ọghẹe; sokpan iran keghi do ẹre kugbe zẹvbe “oghẹn ohuan ọkpa” ni lele “ọsuohuan ọkpa.”—Jọn 10:16.
11. De vbene avbe “ohuan” ne ebe Matiu 25:31-36, 40 ya unu kaan ya rhie ẹre ma wẹẹ, iran ru iyobọ ne etiẹn e Kristi?
11 Tie Matiu 25:31-36, 40. “Ohuan” ne ebe Matiu na ya unu kaan, ọre emwa esi ni khian gha rrọọ vbe ẹdẹ okiekie, ni khian vbe yin agbọn na vbe etẹbitẹ. Iran keghi ya egbe hia ru iyobọ ne etiẹn e Kristi ni ghi dekẹ vbe agbọn na; odẹ ne iran ya ru ọna, ọre ne iran na deba iran kporhu iyẹn nọ maan vbe ehe hia vbe uhunmwu otagbọn na.—Mat 24:14; 28:19, 20.
12-13. De odẹ ọvbehe ne emwa ni khian yin agbọn na ya rhie ẹre ma wẹẹ, iran ye etiẹn e Kristi ike?
12 Vbe ukpo ukpo, vbọ ghaa bu ẹghẹ na ya do Ugie Ayere, emwa ni khian yin agbọn na keghi deba etiẹn e Kristi tie emwa ughughan vbe uhunmwu otagbọn na, gha die Ugie Ayere. (Ya ghee ẹkpẹti nọ khare wẹẹ, “ Uwẹ Mu Egbe Ye Otọ Khẹ Ẹghẹ Ugie Ayere Ra?”) Iran vbe ru emwamwa nọ khẹke, na mieke na sẹtin do Ugie Ayere vbe iko ughughan ni rre agbọn na, agharhemiẹn wẹẹ, ai kẹ miẹn iko ne a na miẹn emwa ni rri eka kevbe ni wọn ayọn na ghae. Ekhọe hia ẹre etẹn na, ya ye etiẹn e Kristi ike. Iran rẹnrẹn wẹẹ, emwi ke emwi ne iran ru ne etiẹn e Kristi, e Kristi ghee ẹre wẹẹ, irẹn tobọ irẹn ẹre iran ru ẹre na.—Mat 25:37-40.
13 De emwi ọvbehe nọ ya ima hia yo Ugie Ayere?
EVBỌZẸE NE IMA HIA NA YO
14. De vbene Jehova vbe Jesu he ya rhie ẹre ma wẹẹ, iran kakabọ hoẹmwẹ ima?
14 Ma gbọyẹmwẹ ye odẹ ne Jehova kevbe Kristi he ya rhie ẹre ma wẹẹ, iran hoẹmwẹ ima. Odẹ bun ne Jehova he ya rhie ẹre ma wẹẹ, ọ hoẹmwẹ ima. Sokpan nọ ghi wa hin usi sẹ, ọre ne ọ na gie Ovbi ẹre ne ọ hoẹmwẹ ọnrẹn gha dee, ne ọ do rri oya kevbe ne ọ do wu ba ẹmwẹ ima. (Jọn 3:16) Ma rẹnrẹn wẹẹ, te Jesu wa vbe hoẹmwẹ ima, ẹre ọ si ẹre ne ọ na gha dee do wu ne ima. (Jọn 15:13) Ma i khian sẹtin kpọnmwẹ e Jehova vbe Jesu ye ẹse nọkhua ne iran ru ne ima. Sokpan ma gha sẹtin rhie ẹre ma wẹẹ, ma gbọyẹmwẹ ye emwi ne iran ru, vbe odẹ ne ima ya yin vbe ẹdẹgbegbe. (Kọl 3:15) Ugie Ayere keghi ye ima ẹre rre wẹẹ, e Jehova vbe Jesu hoẹmwẹ ima; ọ vbe kie ẹkpotọ ne ima ya rhie ẹre ma wẹẹ, ma hoẹmwẹ iran.
15. Vbọzẹ ne etẹn na hannọ zẹ kevbe emwa ni khian yin agbọn na, na gbọyẹmwẹ ye izọese adẹwerriegbe?
15 Ma gbọyẹmwẹ ye izọese adẹwerriegbe. (Mat 20:28) Etẹn na hannọ zẹ wa gbọyẹmwẹ ye izọese adẹwerriegbe, rhunmwuda, ọni ẹre ọ zẹ ighẹ arrọọ etẹbitẹ vbe ẹrinmwi gha sẹ iran obọ. Te Jehova ghi ka iran ba emwa ata, ọ na vbe ya iran ru emọ, rhunmwuda ne iran na mu ẹtin yan izọese ne Jesu ru. (Rom 5:1; 8:15-17, 23) Emwa ni khian yin agbọn na wa vbe gbọyẹmwẹ ye izọese na. Rhunmwuda ne iran na mu ẹtin yan izọese ne Kristi ru, te Osanobua ghi ka iran ba emwa ni mudia ẹse, erriọ ẹre ọ vbe ya miẹn ugamwẹ ọghe iran yi; iran vbe ya aro yọ wẹẹ, iran gha miẹn uhunmwu vbe orueghe nọkhua nọ dee. (Arhie 7:13-15) Odẹ ọkpa ne etẹn na hannọ zẹ kevbe emwa ni khian yin agbọn na ya rhie ẹre ma wẹẹ, iran gbọyẹmwẹ ye adẹwerriegbe, ọre ne iran na do Ugie Ayere vbe ukpo ukpo.
16. De emwi ọvbehe nọ ya ima do Ugie Ayere?
16 Emwi ọvbehe nọ ya ima do Ugie na ọre wẹẹ, ma hoo ne ima họn ẹmwẹ ne Jesu. Ọre ẹrinmwi ẹre ima rrie, ra agbọn na ẹre ima khian gha ye, ma hia wa hoo ne ima lele iyi ne Jesu yi, ne ọ na wẹẹ: “Wa gha ru ọna ya ye mwẹ rre.”—1 Kọr 11:23, 24.
ERE NE IMA MIẸN VBE IMA GHA YO UGIE AYERE
17. De vbene Ugie Ayere ya si ima kẹ e Jehova hẹ?
17 Ọ ya ima sikẹ e Jehova sayọ. (Jems 4:8) Zẹvbe ne ima ruẹ ọre sin, Ugie Ayere keghi kie ẹkpotọ ne ima ya muẹn roro, avbe afiangbe ni khẹ ima vbe odaro kevbe ahoẹmwọmwa nẹi bẹghe ne Jehova mwẹ ne ima. (Jer 29:11; 1 Jọn 4:8-10) Ma ghaa mu ena hia roro, ma ghi do kakabọ hoẹmwẹ e Jehova, ma ghi vbe do sikẹ ọre sayọ.—Rom 8:38, 39.
18. Ma ghaa mu igiemwi ne Jesu rhie ye otọ roro, de emwi nọ khian gua ima kpa ya ru?
18 Ọ ru iyobọ ne ima ya ya egbe taa e Jesu. (1 Pit 2:21) Vbọ ghaa bu ẹghẹ na ya do Ugie Ayere, ma keghi tie avbe ako ọghe Baibol nọ guan kaan emwi nọ sunu vbe uzọla nokiekie ne Jesu gbe vbe agbọn, vbene a ya gbe ẹre rua hẹ kevbe vbene Osanobua ya huẹn ọnrẹn kpaegbe. Ọta na ya guan vbe ẹdẹ Ugie Ayere keghi ye ima ẹre rre, vbene Jesu hoẹmwẹ ima hẹ. (Ẹfis 5:2; 1 Jọn 3:16) Zẹvbe ne ima ya muẹn roro, igiemwi ne Jesu rhie ye otọ, ma ghi vbe gha hoo ne ima “gha yin zẹ vbene Jesu Kristi yin rin.”—1 Jọn 2:6.
19. De emwi ne ima gha ru, ne ima mieke na “mudia vbe uwu aho ẹmwẹ ọmwa Osanobua”?
19 Ọ ru iyobọ ne ima ya “mudia vbe uwu aho ẹmwẹ ọmwa Osanobua.” (Jud 20, 21) Ma gha mudia vbe uwu ahoẹmwọmwa ọghe Osanobua, ọ rhie ma wẹẹ, ma hia vbe odẹ ke odẹ ne ima gha họn ẹmwẹ nẹẹn, ne ima gha rhie uyi ye eni ẹnrẹn kevbe ne ima gha yae ghọghọ. (Itan 27:11; Mat 6:9; 1 Jọn 5:3) Ugie Ayere keghi gua ima kpa ya gha ru emwi nọ yẹẹ e Jehova vbe ẹdẹgbegbe, ọ ghi yevbe na miẹn wẹẹ, ma tama e Jehova wẹẹ, ‘Te I khian gha rre uwu ahoẹmwọmwa ruẹ vbe etẹbitẹ!’
20. Vbọzẹ nọ na khẹke ne ima gha rre Ugie Ayere?
20 Ma bẹghe ẹre nẹ wẹẹ, ọ khẹke ne ima hia fẹẹrẹ gha yo Ugie Ayere, ọre ẹrinmwi ẹre ima rrie, ra agbọn na ẹre ima khian gha ye. Ẹghẹ ke ẹghẹ ne ima ya si egbe koko ne ima do Ugie na, te ima rhie ẹre ma wẹẹ, ma ye Jesu Kristi rre. Sẹ ehia, te ima rhie ẹre ma wẹẹ, ma gbọyẹmwẹ ye ahoẹmwọmwa ne Jehova mwẹ ne ima, ne ọ na gie Ovbi ẹre rre, ne ọ do wu ne ima. Ẹdẹ e Fraide April 15, 2022 ẹre ima khian do Ugie Ayere vbe ukpo na. Ma gha rrie Ugie Ayere ọghe ukpo na, te ima rhie ẹre ma wẹẹ, ma gele hoẹmwẹ e Jehova kevbe Jesu Kristi.
IHUAN 16 Rho E Jehova Vbe Ovbi Ẹre Nọ Hannọ Zẹ
^ Ọre ẹrinmwi ẹre ima rrie, ra uhunmwu otagbọn na ẹre ima khian gha ye, ma hia wa hoo ne ima gha do Ugie Ayere vbe ukpo ukpo. Vbe ako iruẹmwi na, ma gha bẹghe emwi eso ne Baibol tae, nọ ya ima rẹn wẹẹ, ọ khẹke ne ima gha do Ugie Ayere; ma gha vbe guan kaan afiangbe ne ima gha miẹn, vbe ima ghaa do ugie na.
^ U ghaa hoo ne u rẹn sayọ vbekpa ile ọghe ọgbọn kevbe ile ọghe Arrioba, ya tie uhunmwuta nọ khare wẹẹ, “You Will Become ‘a Kingdom of Priests’” nọ ladian vbe The Watchtower ọghe October 15, 2014, ipapa 15-17.
^ U ghaa hoo ne u rẹn sayọ vbekpa erhan eva ne ebe Ẹzikiẹl uhunmwu ẹnrẹn 37 guan kaan, ya tie Pure Worship of Jehovah—Restored At Last!, ipapa 130-135, okhuẹn 3-17.
