E Jehova hoo ne ọdọ vbe amwẹ gha sọyẹnmwẹ kevbe ne iran rọnmwẹ egbe sẹ ota. (Mat 19:4-6) Adeghẹ u hoo ne u ru orọnmwẹ, de eke ne u khian na miẹn ọmwa esi ne u gha ya yin? E Jehova ẹre ọ yi ima, rhunmwuda ọni, ọ rẹn emwi nọ khẹke ne ima ru ne oghọghọ gha rre orọnmwẹ ọghe ima. Nọnaghiyerriọ, u ghaa ya ilele ọghe Osanobua ru emwi, u gha musoẹ. Nia gia ziro yan ilele eso ni gha ru iyobọ nuẹn.

Vbe okaro, ọ khẹke ne ima kọe ye ekhọe, emwi ne ebe Jerimaia tae vbekpa ekhọe emwa nagbọn, ọ wẹẹ: “Emwi ọvbehe nọ rẹrẹ ọmwa vbe ne irẹn ye i rrọọ, ọ khuọnmwi gberra nọ gia sinmwi.” (Jer 17:9) Orhunmwu eva ni hoo ne iran rọnmwẹ egbe gha suẹn gha si egbe obọ, ahoẹmwọmwa ne iran mwẹ ne egbe sẹtin gha gbe iran vbe na ghee ayọn; ẹghẹ nii iran i ghi ya aro sẹnrẹn ru emwi. Adeghẹ emwa na rhunmwuda orhirhi egbe la orọnmwẹ, ọ sẹtin si obalọ gie iran vbe okiekie. (Itan 28:26) Ọni ẹre ọ si ẹre nọ ma na khẹke ne orhunmwu eva ni ma wa rẹn egbe vberriọ gha ta ẹmwẹ ahoẹmwọmwa ma egbe ra ne iran gha ru eyan ma egbe.

Ebe Itan 22:3 khare wẹẹ: “Emwa ni wan gha miẹn wẹẹ orueghe dee, iran ghi rhie uhunmwu iran lẹre, sokpan, ọmwa ne ẹi ro iro ghi wa ya owẹ khian larọ, ọ ghi ya gha gbe I ma rẹn vbe okiekie.” De ẹbe ne a gha sẹtin miẹn vbọ deghẹ a na gha loo e websait ne a ya gualọ ọmwa na khian rhie ra na khian orọnmwẹ? Ọ da ima wẹẹ, emwa eso suẹn gha gu emwa si egbe obọ nẹ vbe intanẹt, iran ke do rẹn wẹẹ, te emwa vbenian mu iran rẹrẹ. Deba ọni, emwa eso rrọọ ni loo e websait vbenian, ni gualọ emwa ne iran khian fi ne iran miẹn ẹre igho. Ugbẹnso emwa vbenian kue kha wẹẹ, Osẹe Jehova ẹre iran khin.

Gia ghee ẹbe ọvbehe nọ gha sẹtin rhuan ọmwa. Eso vbe uwu avbe wẹbsait na, keghi loo avbe sọftwẹ na ya hannọ emwa ni gha sẹtin gu obọ egbe. Sokpan osẹ rhọkpa i rrọọ nọ rhie ẹre ma wẹẹ, obẹlẹ na gele winna. Ẹi re emwi ukọnmwẹ nọ, ne ọmwa mu etin yan e sọftwẹ ne ọmwa nagbọn ru, vbe ọ gha khian zẹ ọmwa ne ọ khian rhie ra ne ọ khian rọnmwẹ ra? A gha sẹtin ya e sọftwẹ gie ilele ni rre Baibol ra?—Itan 1:7; 3:5-7.

Ebe Itan 14:15 khare wẹẹ: “Ai miẹn ẹmwẹ ne akpa i yayi, avbe umẹwaẹn, te iran ghe  owẹ zẹ vbe otọ.” U ke zẹ ọmwa ne u khian rhie ra ne u khian rọnmwẹ, ọ khẹke ne u rẹn ọmwa nii sẹ owa. Sokpan u i khian sẹtin rẹn ọna vbe intanẹt. Ọ gha khọnrẹn ne u miẹn emwi eso ne ọmwa na mu ye intanẹt vbekpa egbe ẹre, ra ne uwa gha gie uhunmwu gie egbe vbe ẹghẹ hia, u gha gele sẹtin kha wẹẹ, u rẹn aro ọmwa ne ọ khin ra? Eso ni te roro ẹre wẹẹ iran miẹn agbawu ọghe iran nẹ vbe intanẹt, gha wa miẹn ọmwa nii ghee mwẹ ghee ruẹ, egbe ghi wa wọọ iran.

Ọsihuan ọkpa khare wẹẹ: “Mẹ i gu emwa ẹwobi mu obọ, mẹ i gu emwa ni fian yan egbe khian.” (Psm 26:4) Emwa nibun gha khian gbẹn aro ọmwa ne iran khin ye wẹbsait ne emwa na gualọ ọmwa ne iran khian rhie ra ne iran khian rọnmwẹ, iran i ta ẹmwata, ne iran mieke na miẹn emwa ni khian zẹ iran ọse. Emwa vbenian keghi ru vbene a miẹn wẹẹ, emwa esi ẹre iran khin vbe iran ghaa gie uhunmwu gie emwa vbe intanẹt. Ọ khẹke ne ima nọ egbe ima wẹẹ: “Emwa eso ni tie egbe iran Osẹe Jehova, iran gele dinmwiamẹ nẹ ra? Iran deziẹn vbe odẹ ọghe orhiọn ra? Iran hoẹmwẹ e Jehova ra? Etẹn ni rre iko ne iran ye ya aro nọ maan ghee iran ra? Ra emwa nọ khẹke na gban egbe na ẹre iran khin? (1 Kọr 15:33; 2 Tim 2:20, 21) Deghẹ emwa ni ka rhie okhuo nẹ ra ni ka rọnmwẹ ọdọ nẹ ẹre iran khin, iran gha ye sẹtin ru orọnmwẹ zẹvbe nọ gua ilele ọghe Baibol ro ra?” Ọ khẹke ne u rẹn ewanniẹn ọghe avbe inọta na; sokpan u i khian sẹtin rẹn ọna, vbe ẹi re te u gu etẹn ni rẹn ọnrẹn sẹ owa guan. (Itan 15:22) Vbene ẹmwata, ọguọmwadia e Jehova nọ rẹn enegbe i khian sẹtin gha gu ọmwa nẹi ga e Jehova “si egbe obọ.”—2 Kọr 6:14; 1 Kọr 7:39.

Ugbẹnvbe ima ghi rẹn wẹẹ, ẹbe rrọọ deghẹ a na gha loo intanẹt ya gualọ ọmwa ne ima khian rhie ra ne ima khian rọnmwẹ, de eke ne ima khian na ghi miẹn ọmwa esi ne ima khian gu yin? Deghẹ ẹkpotọ na kie ne Avbe Osẹe Jehova ya si egbe koko vbe Ọgua Arriọba ọghe iran, Ọgua Asikoko ra ehe ọvbehe, u sẹtin loo ẹkpotọ na ya gualọ ọmwa ne u khian rhie ra ne u khian rọnmwẹ.

Adeghẹ ima ma sẹtin si egbe koko rhunmwuda emwi eso, vbe na ghee COVID-19, ma keghi loo intanẹt ya do iko; ọna vbe kie ẹkpotọ yọ na ya rẹn emwa ọvbehe ni re okhiọnkpa ne ima gha sẹtin zẹ ọre ọse. U ghaa rre iko vbenian, ewanniẹn ne iran zẹ, ra ọta ne iran ya guan gha ya ruẹ rẹn vbene amuẹtinyan ọghe iran wegbe sẹ hẹ. (1 Tim 6:11, 12) Uwa sẹtin vbe loo breakout room ya gu egbe guan, vbe a gha zobọ nẹ vbe iko. Adeghẹ etẹn na ru emwamwa ne uwa loo intanẹt ya si egbe koko, ne uwa mieke na sọyẹnmwẹ egbe, u sẹtin gbe aro kotọ gha ghee ọmwa ne ẹmwẹ ọnrẹn yẹẹ ruẹ, ne u mieke na rẹn vbene ọ ya yin hẹ kevbe obọ ne ọ ya mu emwa ọvbehe. (1 Pit 3:4) Vbene ẹghẹ ya khian uwa ghi do gha rẹn egbe sayọ, uwa ghi rẹn deghẹ uwa eva gha sẹtin gu egbe ro, kevbe deghẹ odẹ ọkpa ẹre uwa hoo ne uwa ya loo ẹdagbọn uwa.

Adeghẹ avbe okhiọnkpa na gha gualọ ọmwa ne iran khian rhie ra ne iran khian rọnmwẹ vbe odẹ nọ gua ilele ọghe Baibol ro, iran gha do miẹn wẹẹ, ẹmwata ẹre ebe Itan tae ne ọ na kha wẹẹ: “Ọmwa nọ miẹn okhuo esi rhie [ra ọdọ esi] miẹn emwi nọ maan nẹ, te ọmwa vbenian miẹn ẹse nọ ke obọ e Jehova rre.”—Itan 18:22, NW.