E Pọl khare wẹẹ: “Nene Uhi tobọ ẹre, ẹre ọ vbe gbe mwẹ uan, ne I miẹn ehe na gha rre agbọn ne Osanobua.”—Gal 2:19.

Ẹmwẹ ne Pọl tae na wa gua ẹre ro, uhunmwu ẹmwẹ ne ọ hoo ne ọ rhie ladian vbe elẹta ne ọ gbẹn gie etẹn ni rre Galatia, vbe ikinkin ne arriọba e Rom kha yan. Emwa kegha ya ohoghe ne iran maa emwa re, mu etẹn eso ni rre uwu iko rẹrẹ. Iran kegha maa emwa re wẹẹ, emwa ghaa hoo ne iran miẹn fan, ọ khẹke ne iran gha lele Uhi e Mosis, katekate uhi nọ dekaan arhuẹ. Sokpan e Pọl rẹn rẹn wẹẹ, Osanobua ma ghi kha wẹẹ, esalẹbẹ nọ ne Ivbiotu e Kristi gha rhuẹ. E Pọl keghi gu etẹn ni rre Galatia ziro vbe elẹta ne ọ gbẹn, ne ọ ya gi iran rẹn wẹẹ, imamwaemwi ohoghe ni khin. Ọ na vbe ru iyobọ ne iran ya gele mu ẹtin yan izọese adẹwerriegbe ọghe Jesu Kristi.—Gal 2:4; 5:2.

E Baibol gi ima rẹn wẹẹ, ọmwa nọ wu nẹ ma ghi rẹn emwi rhọkpa, emwi nọ ghi sunu vbe agbọn, ma ghi vbe kaan rẹn. (Asan 9:5) Vbe Pọl khare wẹẹ: “Nene Uhi tobọ ẹre, ẹre ọ vbe gbe mwẹ uan,” emwi ne ọ yae kha ọre wẹẹ, irẹn i ghi rre ototọ Uhi e Mosis. E Pọl kegha mwẹ ilẹkẹtin wẹẹ, ne irẹn na mu ẹtin yan izọese adẹwerriegbe ọghe Jesu, te irẹn ghi “rre agbọn ne Osanobua.”

Uhi e Mosis ẹre ọ ya e Pọl khian nọ ghi “rre agbọn ne Osanobua.” Odẹ vbo? E Pọl ka rhan otọ re wẹẹ, “iyayi vbe uwu e Kristi ọkpa ẹre a sẹtin ya ya ọmwa khian ne ọ mudia ẹse vbe odaro Osanobua, ighẹ ẹi re na na ru zẹ vbene nene Uhi khare.” (Gal 2:16) Ẹmwata nọ rrọọ ọre wẹẹ, Uhi e Mosis mwẹ esa nọ ghaa ye. E Pọl tama etẹn ni rre Galatia wẹẹ: “Te a rhie ẹre te ẹre, ne a miẹn ehe na gha rẹn emwi ne a baku ru, te a wẹẹ ne ọ vbe gha rrọọ, ovbi Ebraham te do rre, ọmwa ne a ve ẹre nene emwi.” (Gal 3:19) Vbene ẹmwata, te nene Uhi yae dewarorua wẹẹ, emwa nagbọn ni ma gba, i khian sẹtin lele Uhi nii vbe odẹ nọ gbae kevbe wẹẹ, iran gualọ izọese nọ gbae. Nọnaghiyerriọ, te nene Uhi ya emwa rẹn wẹẹ, e Kristi ọre “ovbi Ebraham” na wẹẹ ọ dee. Ọmwa gha mu ẹtin yan e Jesu Kristi, Osanobua ghi kae ba ọmwa nọ mudia ẹse. (Gal 3:24) Te Osanobua vbe ka e Pọl ba ọmwa nọ mudia ẹse, rhunmwuda, Uhi nii keghi ru iyobọ nẹẹn ya rẹn e Kristi, kevbe ne ọ vbe ya mu ẹtin yan rẹn. Ẹi khabe ne Pọl na kha wẹẹ, “Nene Uhi tobọ ẹre, ẹre ọ vbe gbe mwẹ uan, ne I miẹn ehe na gha rre agbọn ne Osanobua.” E Pọl ma ghi gha rre ototọ nene Uhi, sokpan Osanobua ẹre ọ ghi gha dia ẹre.

Egbe emwi vbenian ẹre Pọl tama etẹn ni rre Rom. Ọ wẹẹ, “zẹvbe emwi ni la ghee odẹ ọghe nene Uhi, wa wulo nẹ, rhunmwuda, efẹn ọkpa vbe egbe Kristi ẹre uwa khin. . . Ma i ghi rre obọ nene Uhi, rhunmwuda, ma wulo hin emwi ne ọ te ka munọ ima zẹvbe ọghunmwu yi, rre nẹ.” (Rom 7:4, 6) Ako Evbagbẹn Nọhuanrẹn kevbe ebe Galatia 2:19 ya ima rẹn wẹẹ, ẹi re uwu ọghe ọmwa na khian gbe rua, rhunmwuda ne ọ ma na mu nene Uhi sẹ, ẹre Pọl ghaa guan kaan. Ẹmwẹ afanvbimu ẹre ọ ghaa guan kaan. Irẹn kevbe Ivbiotu e Kristi nikẹre ma ghi gha rre ototọ nene Uhi, rhunmwuda, amuẹtinyan ne iran mwẹ daa izọese adẹwerriegbe ọghe Jesu fan iran nẹ.