1. Vbe ọ ya ruẹ yayi wẹẹ Ẹmwẹ Osanobua mwẹ ẹtin. (Ghee efoto nọ rre omuhẹn.)

VBE nai na gbawawẹ, ma ne emwa ọghe Osanobua wa rẹn wẹẹ, “ekpakpasusu ọre Ẹmwẹ Osanobua khin.” (Hib. 4:12) Ẹtin nọ rre ẹmwẹ Osanobua ẹre ọ fi ima nibun werriẹ. Etẹn ima eso ka gha rra, eso ka vbe gha loo ukhunmwu ni wegbe vbene eso na gha mwẹ obọ vbe uyinmwẹ alama oghẹ. Eso te wa vbe fe, sokpan iran keghi bẹghe ẹre wẹẹ, arrọọ ọghe iran i mwẹ emwi nọ demu. (Asan. 2:​3-11) Te emwa nibun ni te bibi odẹ vbe agbọn Esu, ghi rre odẹ nọ su rrie arrọọ etẹbitẹ rhunmwuda, ẹtin nọ rre Ẹmwẹ Osanobua fi iran werriẹ nẹ. Ọ gha kẹ, ma nibun tie okha vbenian nẹ vbe uhunmwuta na gba re ikun nọ khare wẹẹ, “The Bible Changes Lives,” ne ọ ladian vbe The Watchtower. Zẹ vbene avbe emwi ẹwaẹn ni rhiẹre ma, emwa nibun gha ye miẹn odẹ ọghe ẹmwata yi nẹ, kherhe kherhe ẹre iran ya fẹko mwẹ alaghodaro vbe odẹ ọghe orhiọn zẹ vbene iran ya tie Baibol ne egbe iran.

2. De vbene ẹtin nọ rre Ẹmwẹ Osanobua ya ru iyobọ ne etẹn vbe orre nokaro hẹ?

² Ẹi zẹdẹ kpa ima odin ne emwa nibun vbe ẹdẹnẹrẹ na ru afiwerriẹ nọkhua vbe arrọọ ọghe iran rhunmwuda e Baibol ne  iran tie. Emwi ẹwaẹn vbenian keghi ya ima yerre afiwerriẹ ne etẹn ima na hannọ zẹ vbe orre nokaro vbe ru. (Tie 1 Kọrinti 6:​9-11.) E Pọl ghi yunu kaẹn uyinmwẹ nẹi khian ye emwa la Arriọba Osanobua, ọ keghi rhie tẹ wẹẹ: “Erriọ eso vbe uwu uwa te ye.” Sokpan orhiọn nọhuanrẹn kevbe ẹtin nọ rre Ẹmwẹ Osanobua ẹre ọ ru iyobọ ne iran ya fiwerriẹ. Vbe eso yevbe khian Ivbiotu e Kristi nẹ, iran na ye zẹ owẹ ihan. E Baibol guan kaẹn ọtẹn ọkpa ne a hannọ zẹ na kan fua vbe iko, ọ ghi sẹ ẹghẹ, a na vbe rhiẹre werriegbe. (1 Kọr. 5:1-5; 2 Kọr. 2:5-8) Ọ keghi re emwi nọ rhie igiọdu ne ima vbe ima ghaa ziro yan vbene ẹtin nọ rre Ẹmwẹ Osanobua ya ru iyobọ ne etẹn ima nibun ni werriẹ aro daa ọlọghọmwa.

3. Vbe ima khian ziro yan vbe ako iruẹmwi na?

³ Ẹmwẹ Osanobua gele wa mwẹ ẹtin, nọnaghiyerriọ, te ọ khẹke ne ima gha loo ẹre vbe odẹ nọ ghi maan sẹ. (2 Tim. 2:15) Vbe ako iruẹmwi na, ma gha guan kaẹn vbene ima khian ya kie ẹkpotọ yọ ne ẹtin nọ rre Ẹmwẹ Osanobua gha dia ima (1) vbe arrọọ ọghe ima, (2) vbe ima ghaa kporhu iyẹn nọ maan, kevbe (3) vbe ima ghaa ya ọta guan vbe iko. Avbe ayere na gha ya ahoẹmwọmwa ne ima mwẹ daa Erha mwa nọ rre ẹrinmwi wegbe sayọ. Ọ gha vbe ya ima gha gbọyẹmwẹ ye emwi ne ọ maa ima re rhunmwuda umamwẹ ọghe ima ẹre irẹn gualọ.—Aiz. 48:17.

4. (a) Vbọ khẹke ne ima ru deghẹ ima hoo ne Ẹmwẹ Osanobua gha dia ima? (b) De ẹghẹ ne u zẹ kọ ne u ya tie Baibol?

⁴ Ne Ẹmwẹ Osanobua mieke na gha dia ima, te ọ khẹke ne ima gha tie ẹre vbe ẹghẹ hia. Deghẹ ima na sẹtin, ma gha tie ẹre ẹdẹgbegbe. (Jọs. 1:8) Ẹmwata nọ wẹẹ ima nibun i miẹn ẹghẹ rhunmwuda iwinna, ọrheyerriọ, ọ ma khẹke ne emwi rhọkpa mu idobo ye ẹghẹ ne ima zẹ kọ ne ima ya tie Baibol. (Tie Ẹfisọs 5:15, 16.) Ẹghẹ ne emwa eso zẹ kọ ne iran ya tie Baibol keghi re ẹghẹ owiẹ, eso tie vbe avan, eso vbe tie vbe asọn. Iran keghi mwẹ egbe iziro ekhọe ọghe ọsian nọ khare wẹẹ: “U miẹn vbene l hoẹmwẹ uhi ruẹ hẹ, te I wa muẹn roro ne ebi ro!”—Psm. 119:97.

5, 6. (a) Vbọzẹe ne erria ne a ru na ru ekpataki? (b)  De odẹ ne ọ khẹke ne ima ya gha ru erria? (c) De afiangbe ne uwẹ he miẹn vbe Baibol na tie kevbe erria ne a ru yan rẹn?

⁵ Te ọ vbe khẹke ne ima gha ru erria yan ako ne ima rhirhi gha tie vbe Baibol. (Psm. 1:1-3) Odẹ vbenian ẹre ima khian ya sẹtin gha rhiẹre ye uyinmwẹ ighẹ emwi ẹwaẹn nọ hiunsi ni rre Baibol. Deghẹ ebe ẹre u ke tie ẹre ra e kọmputa ra e foni, hia ne u gi emwi ne u tie sẹ ruẹ ekhọe.

⁶ De odẹ ne ọ khẹke ne ima ya gha ru erria? Emwi ne etẹn eso ru ọre wẹẹ, iran gha ghi tie ako eso nẹ vbe Baibol, iran ghi nọ egbe iran ọta eso vbenian: ‘De emwi  ne ako na maa mwẹ re vbekpae Jehova? De odẹ eso ne I ya lele ilele nọ rre ako ne I tiere na? De ako eso ne I gha na situa? Ma ghaa ru erria yan emwi ne ima tie, ima na vbe gha muẹn ye erhunmwu, ọna gha gua ima kpa ya gha rhie emwi ne ima ruẹ ye uyinmwẹ. Ẹghẹ nii, ẹtin nọ rre Ẹmwẹ Osanobua ghi gele gha dia arrọọ ọghe ima.—2 Kọr. 10:4, 5.

7. De odẹ nọ khẹke ne ima ya gha loo Ẹmwẹ Osanobua vbe ikporhu?

⁷ Vbọ khian ru iyobọ ne ima, ne ima sẹtin gha loo Ẹmwẹ Osanobua ẹse vbe ikporhu? Gha loo ẹre vbe ẹghẹ hia vbe ikporhu. Ọtẹn nokpia ọkpa keghi kha wẹẹ, “Uwẹ vbe Jehova na gba gha kporhu, u gha kie ẹkpotọ nẹẹn ya vbe kporhu, ra uwẹ ọkpa ẹre ọ khian wa mu idan mu ẹgogo?” Emwi nọ hoo ne ima rẹn ọre wẹẹ: Ma ghaa tie Baibol ma emwa vbe ikporhu, te ima kie ẹkpotọ ne Jehova ya kporhu ma ọyan owa. Ako evbagbẹn nọhuanrẹn nọ gu ẹmwẹ ne a taa ro, ẹre ọ mwẹ ẹtin ne a ya sẹ emwa ekhọe sẹ ẹmwẹ kẹkan ne u gha taa. (1 Tẹs. 2:13) Nọ egbuẹ, ‘I loo ẹkpotọ nọ rhirhi gha kie ya tie Ẹmwẹ Osanobua ma emwa ne I miẹn vbe ikporhu ra?’

8. Vbọzẹe, ne ọ na khẹke na gha rhan otọre ighẹ ako ọghe Baibol ne ima tie ma emwa vbe ikporhu?

⁸ Vbene ẹmwata, e Baibol kẹkan na tie ma emwa vbe ikporhu ma sẹ rhunmwuda emwa nibun i mwẹ irẹnmwi ọghe Baibol vbe ẹdẹnẹrẹ, erriọ vbe gha ye vbe orre nokaro. (Rom 10:2) Nọnaghiyerriọ, ọ ma khẹke ne ima gha roro ẹre wẹẹ, ọmwa ne ima wa tie Baibol ma gha rẹn otọre. Ọ khẹke ne ima rhie ẹghẹ ya nianiaẹn, ma sẹtin dọlegbe tie ako ne ima hoo nọ kọ ye orhiọn, ma ke do rhan otọre. Odẹ vbenian ẹre Ẹmwẹ Osanobua khian ya sẹ ekhọe ọghe emwa ne ima maa re emwi.—Tie Luk 24:32.

9. De emwi ne ima gha ru ne emwa ne ima kporhu ma mieke na gha ghee Baibol zẹvbe ebe ne kpataki? Ru igiemwi yọ?

 ⁹ Ẹmwẹ ne ima taa ya muẹnso ighẹ ako ne ima khian tie vbe evbagbẹn nọhuanrẹn sẹtin ya emwa gha ghee Baibol zẹvbe ebe ne kpataki. Vbe igiemwi, ma sẹtin kha wẹẹ, “Gima ghee emwi ne Ayi ọghomwa khare vbekpae ẹmwẹ na.” Ma ghaa kporhu ma avbe ikeferi, ma sẹtin kha wẹẹ, “Gia ghee emwi ne Evbagbẹn Nọhuanrẹn tae.” Deghẹ emwa ne ẹi mwẹ ẹkorhiẹnrhiẹnmwẹ ye ẹmwẹ ugamwẹ ẹre ima miẹn, ma sẹtin nọ wẹẹ, “Uwẹ he ka họn vbe ọmwa kpe itan nẹdẹ na ra?” Odẹ ughughan ẹre ọ khẹke ne ima ya gha muẹn ẹmwẹ so vbe ikporhu rhunmwuda emwa ughughan ẹre ima vbe dekun.—1 Kọr. 9:22, 23.

10. (a) Taa emwi ẹwaẹn ọghe ọtẹn nokpia ọkpa? (b) De emwi ewaẹn ne uwẹ he miẹn vbe ikporhu, nọ rhiẹre ma wẹẹ Ẹmwẹ Ọghe Osanobua mwẹ ẹtin?

¹⁰ Emwa nibun keghi bẹghe ẹre wẹẹ, Ẹmwẹ Osanobua ne a loo vbe ikporhu keghi biẹ ọmọ esi. Vbe igiemwi, vbe ọtẹn nokpia ọkpa rre atuẹwerriegbe vbe ẹdẹ ọkpa, ọ keghi sẹ owa okpia ọkpa. Ọ kpẹre ne okpia na ke tie ebe iyẹn ọghomwa. Vbe ẹdẹ ne a kha na, ọtẹn nokpia na ma viọ ebe iyẹn ni da ladian nẹẹn, vbene ọ ka ruẹ dee yi. Ọ keghi tie ebe 2 Kọrinti 1:3, 4 ma rẹn vbe Baibol. Ako na khare wẹẹ: “Erha ne ọ mwẹ itohan kevbe Osanobua ne iyobọ hia ke obọ ẹre rre. Irẹn ọre ọ ye ima obọ vbe uwu ọlọghọmwa mwa hia.” Ako na keghi mu okpia na ekhọe sẹrriọ wẹẹ, ọ na wẹẹ ne ọtẹn ima nokpia werriegbe tie ẹre. Okpia na keghi kha wẹẹ irẹn vbe amwẹ ọnrẹn wa gualọ ifuẹko. Ako na tiere ma rẹn ẹre ọ ghi yae gha hoo nọ rẹn vbekpae Baibol sayọ. Ẹtin nọ rre Ẹmwẹ Osanobua gele wa rhiegbe ma vbe ima ghaa rre ikporhu.—Iwinna 19:20.

11. De iwinna nọ bi ye izabọ ọghe etẹn ni ya ọta guan?

¹¹ Ma hia wa sọyẹnmwẹ iko kevbe avbe asikoko ne a yo rhunmwuda, avbe ako na ẹre ima na rhie ugamwẹ ne Jehova. Ma wa vbe miẹn ere nọkhua vbe evbare orhiọn ne ima re vbọ. Ukpamuyọmọ nọkhua ẹre etẹn ni ya ọta guan vbe iko kevbe asikoko wa mwẹ, sokpan ọ khẹke ne iran vbe rẹn wẹẹ, iwinna nọkpọlọ ẹre ọ bi ye iran izabọ. (Jems 3:1) Te ọ khẹke ne Ẹmwẹ Osanobua gha re ẹzi ọghe emwi ne iran maa emwa re. A gha rhie ọta nuẹn, vbua khian ya rhiẹre ma hẹ wẹẹ e Baibol ẹre ẹmwẹ ne u taa hẹnhẹn egba yan?

12. De emwi ne ọtẹn nọ ya ọta guan gha ru ne Evbagbẹn Nọhuanrẹn mieke na gha re ẹzi ọghe ọta re?

¹² Gi Evbagbẹn Nọhuanrẹn gha re ẹzi ọghe ọta ruẹ. (Jọn 7:16) Vbua khian ya ru ọna hẹ? Ghẹ gi emwi ẹwaẹn, igiemwi ra vbene u ya ye ọta guan rhie emwa ekhọe hin ako ọghe Baibol ne u sunu yi rre. U vbe yerre wẹẹ na tie ako ọghe evbagbẹn nọhuanrẹn nibun, i wa re odẹ na ya ye Baibol ma ọmwa emwi. Deghẹ ako ọghe evbagbẹn nọhuanrẹn ne u tie re na bun gbe, a sẹtin miẹn wẹẹ erhọkpa ma sẹ ekhọe ọghe ọmwa nọ danmwehọ ruẹ. Nọnaghiyerriọ, gbaro kotọ hannọ ako ne u gha tie vbe Baibol, rhie ẹghẹ ya tie ẹre, rhan otọre, ru igiemwi yọ, u vbe gi etẹn rẹn vbene iran gha ya rhiẹre ye uyinmwẹ hẹ. (Neh. 8:8) Deghẹ atlaẹn ẹre ọta ruẹ ke ladian, rhie ẹghẹ ya tie ẹre ẹsẹsẹmwẹse kevbe ako evbagbẹn nọhuanrẹn na gbẹnnẹ yọ. Hia ne u rẹn vbene ifiẹmwẹ ni rre atlaẹn ruẹ ya ginna ako evbagbẹn nọhuanrẹn ni rre atlaẹn ruẹ. U ghi loo ako eso vbe Baibol ya rhan  otọ olika ẹmwẹ ni rre atlaẹn ruẹ. (U gha miẹn adia eso vbe iruẹmwi nogie 21 ya sẹ 23 vbe Benefit From Theocratic Ministry School Education.) Sẹ ehia, nọ e Jehova vbe erhunmwu nọ ru iyobọ nuẹn ya maa emwa emwi ewe ọghe orhiọn ni rre Ẹmwẹ ọnrẹn.—Tie Ezra 7:10; Itan 3:13, 14.

13. (a) De vbene ako ọkpa vbe ebe nọhuanrẹn na sunu yi vbe iko ya ru iyobọ ne ọtẹn nokhuo ọkpa hẹ? (b) De vbene odẹ ne a ya rhan otọ e Baibol vbe iko he ya ru iyobọ nuẹn?

¹³ Odẹ ne a ya rhan otọ ako eso vbe Baibol vbe iko wa kakabọ ru iyobọ ne ọtẹn nokhuo ọkpa vbe Australia. Vbe ọtẹn nokhuo na waan dee, emwi ni wegbe ẹre ọ sunu daa re, sokpan ọ na ye sẹtin ya egbe ẹre fiohan ne Jehova. Ọrheyerriọ, ọ ke wa gha lọghọe ne ọ gele yayi wẹẹ e Jehova hoẹmwẹ irẹn. Ọ ghi sẹ ẹghẹ, ọ keghi do yaeyi wẹẹ Osanobua họemwẹ irẹn. Sokpan, vbọ ya izirọ ọghẹe fiwerriẹ? Ọ keghi re vbe ọ ru erria yan ako ọkpa na tie re vbe evbagbẹn nọhuanrẹn vbe iko vbe ẹdẹ ọkpa. Ọ na ghi rhilo ẹre ginna uviẹn eso vbe Baibol. * De vbene ako ọghe Baibol na sunu yi vbe iko kevbe avbe asikoko ọghomwa he ya ru iyobọ nuẹn?—Neh. 8:12.

14. Vbe ima khian ya rhiẹre ma hẹ wẹẹ ima gbọyẹmwẹ ye Ẹmwẹ Ọghe Jehova?

¹⁴ Vbene ẹmwata, ma wa gbọyẹmwẹ ye Baibol ne Jehova kpemehe ẹre. Ọ yan rẹn wẹẹ, te Ẹmwẹ ọnrẹn khian gha rrọọ ẹdẹdẹmwẹdẹ, ọ na gele mu eyan rẹn sẹ. (1 Pit. 1:24, 25) Ọ khẹke ne ima gha tie Ẹmwẹ Osanobua vbe ẹghẹ hia, ma yae gha ru emwi vbe arrọọ ọghe ima, ma vbe yae gha ru iyobọ ne emwa ọvbehe. Ma ghaa ru ọna, te ima rhiẹre ma wẹẹ ima gbọyẹmwẹ ye emwi ewe na, ne ai ye igho dẹ, sẹ ehia, te ima gbọyẹmwẹ ye emwi ne Jehova ru ne ima.