Gi ima ghee vbene Baibol ya rhie ewanniẹn ye avbe inọta na.

Ebe Iwinna 24:15 gi ima rẹn wẹẹ, “arhiọkpaegbe a gha rrọọ ne emwa ni ru emwi esi kevbe emwa ni ma ru emwi esi.” Emwa ni ru emwi esi na guan kaẹn na, ọre emwa ni họn ẹmwẹ ne Osanobua, rhunmwuda ọni, a na gbẹn eni iran ye ebe arrọọ. (Mal 3:16) Emwa ni ma ru emwi esi, ọre emwa nọ ma kẹ iran ya rẹn vbekpa e Jehova iran ke wu, rhunmwuda ọni, a ma gbẹn eni iran ye ebe arrọọ.

Ẹbu eva na, ne ebe Iwinna 24:15 guan kaẹn, ẹre ebe Jọn 5:28, 29 vbe guan kaẹn. E Jesu khare wẹẹ, “a gha huẹn iran ni ru emwi esi kpaegbe, ne iran gha rrọọ, a gha huẹn iran ni ru emwi dan kpaegbe, a ghi bu ohiẹn iran.” Emwa ni ru emwi esi gha rhiọ kpaegbe rhunmwuda, a gbẹn eni iran ye ebe arrọọ. Sokpan a ghi bu ohiẹn emwa ni ru emwi dan vbe iran gha rhiọ kpaegbe nẹ, rhunmwuda, a ma he gbẹn eni iran ye ebe arrọọ. Vbe uwu ẹghẹ na khian ya bu ohiẹn iran, ẹkpotọ gha kie ne iran ya do rẹn vbekpa e Jehova. Iran gha họn ẹmwẹ ne Jehova, a ghi gbẹn eni iran ye ebe arrọọ.

Ebe Arhie Maan 20:12, 13 gi ima rẹn wẹẹ, te emwa hia ni rhiọ kpaegbe khian gha ya ‘emwi na gbẹnnẹ ye ebe na kiri nii’ ru emwi, ọni ọre uhi ọgbọn ne Osanobua khian yi ne ima vbe agbọn ọgbọn. Te Osanobua khian guọghọ emwa hia ni ma ya uhi na ru emwi.​—Aiz 65:20.

Ebe Daniẹl 12:2 gi ima rẹn wẹẹ, emwa hia ni wulo “gha dọlegbe gha rre agbọn, eso gha wa gha rrọọ ẹdẹdẹmwẹdẹ, eso ghi gha re na faraa ẹdẹdẹmwẹdẹ.” Ako na guan kaẹn emwi nọ khian sunu daa emwa ni rhiọ kpaegbe, ọ wẹẹ, eso ghi gha “rrọọ ẹdẹdẹmwẹdẹ,” eso ghi vbe gha re na “faraa ẹdẹdẹmwẹdẹ.” Ọna rhie ma wẹẹ, ukpo 1,000 gha ghi fo nẹ, eso ghi gha rrọọ vbe ẹdẹdẹmwẹdẹ; sokpan a ghi guọghọ eso rua, ai ghi dọlegbe miẹn iran.​—Arhie 20:15; 21:3, 4.

Gia ru igiemwi ọkpa yọ. A gha sẹtin ya ẹbu eva na, gie avbe ọrhiọvbe ni ya yin ẹvbo ọvbehe. Te emwa ni ru emwi esi yevbe na ghee emwa na rhie ebe asẹ na, ne iran ya gha winna ra ne iran ya gha rre ẹvbo nii, iran ghi vbe sẹtin gha mwẹ afanvbimu, vbene emọ otọ ni rre ẹvbo nii vbe ye. Sokpan te emwa ni ma ru emwi esi yevbe na ghee emwa na rhie ebe asẹ ọghe erhunmwuyẹn na. Te emwa vbenian gha hia ne iran rhie ẹre ma wẹẹ, emwa ni gha sẹtin dia ẹvbo nii ya ẹre iran khin. Erriọ vbe ye ne emwa ni ma ru emwi esi, ni khian rhiọ kpaegbe, te iran gha hia ne iran lele uhi e Jehova, na mieke na ka iran ba emwa esi ni khian gha rre Paradais. Ebe asẹ ke ebe asẹ na rhirhi rhie ne ọmwa, te ọ khẹke nọ gha lele uhi ẹvbo nii, vbe ẹi erriọ, a ghi werriegbe muẹn gha rrie ẹvbo ẹre. Uyinmwẹ ọmwa nii ẹre ọ khian tae, deghẹ ọ gha dia ẹvbo nii ya. Erriọ vbe ye, amuẹtinyan kevbe uyinmwẹ emwa ni khian rhiọ kpaegbe, ẹre ọ khian tae deghẹ iran gha dia agbọn ọgbọn ya.

E Jehova wa mwẹ ahoẹmwọmwa, erriọ vbe ya bu ohiẹn ata, ẹi gbe ewanmwẹ ghee obọ ọkpa. (Diut 32:4; Psm 33:5) Ne Jehova khian na huẹn emwa ni ru emwi esi kevbe ni ma ru emwi esi kpaegbe rhie ma wẹẹ, Osa nọ mwẹ ahoẹmwọmwa nọ. Sokpan emwa ni họn ẹmwẹ nẹẹn ọkpa, ẹre irẹn khian kue nọ gha rrọọ vbe etẹbitẹ. Ọna rhie ma wẹẹ, emwa ni hoẹmwẹ ọnrẹn kevbe emwa ni lele uhi ọghẹe ẹre ọ khian dia agbọn ọgbọn ya.