Vbe ebe 1 Kọrinti 15:8, e Pọl khare wẹẹ: “Vbe okiekie ehia, ọ keghi rhie egbe ma mwẹ, agharhemiẹn wẹẹ, te I yevbe ọmọ na ma sẹ uki biẹ.” Vbe ẹghẹ nọ gberra, ma te ka rhan otọ re wẹẹ, emwi ne Pọl ghaa guan kaẹn, ọre emwi nọ sunu daa ẹre, vbe ẹghẹ nọ ya miẹn e Jesu vbe umian. Vbe ẹghẹ na kha na, e Jesu rhiọ kpaegbe gha rrie ẹrinmwi nẹ. Te ọ yevbe na miẹn wẹẹ, te a mu uyi ye ọre egbe, a na huẹn ọnrẹn kpaegbe gha rrie ẹrinmwi zẹvbe ọmwa nẹi sẹtin wu, vbene ọ te sẹ ẹghẹ nọ khẹke na ya ru vberriọ. Ukpo iyisẹn nibun gberra nẹ arhiọkpaegbe vbenian ke suẹn gha sunu. Vbọrhirhighayehẹ, ma ghi dọlegbe mu ukpa mu uwerhẹn ghee ako na, ma na do bẹghe ẹre wẹẹ, te ọ khẹke na ru afiwerriẹ eso yọ.

Ẹmwata nọ wẹẹ, emwi nọ sunu vbe ẹghẹ ne Pọl ya khian Ovbiotu e Kristi, ẹre ọ ghaa guan kaẹn. Sokpan vbọ yae kha, vbe ọ khare wẹẹ te irẹn yevbe “ọmọ na ma sẹ uki biẹ”? Ọ gha kẹ, emwi nibun rrọọ nọ yae kha vberriọ.

Udemwurri ẹre Pọl ya khian Ovbiotu e Kristi, emwi nọ sunu na, na vbe si obalọ ye ọre egbe. Te ọ wa kpa emwa odin, vba gha biẹ ọmọ nọ ma sẹ uki. Vbe Sọl (nọ ghi do gha re Pọl) ghi mu okhian rrie Damaskọs nọ ya kpokpo Ivbiotu e Kristi, ọ keghi miẹn e Jesu Kristi nọ rhiọ kpaegbe nẹ vbe umian, e Pọl ma te rẹn wẹẹ ọna gha sunu. Vbene Pọl ya do khian Ovbiotu e Kristi wa kpa ẹre odin, erriọ vbe gha ye ne Ivbiotu e Kristi nọ khian te ya zẹ kpokpo vbe Damaskọs. E Pọl keghi rhu aro vbe ovbi ẹghẹ kherhe. Te emwi nọ sunu na wa si obalọ ye ọre egbe, erriọ vbe ya gbe oriri ku ọre.​—Iwinna 9:1-9, 17-19.

“Ẹghẹ nọ ma khẹke” ẹre Sọl ya khian Ovbiotu e Kristi. Emwi ọvbehe na ya ẹmwẹ e Grik na ke zedu “ọmọ na ma sẹ uki biẹ” kha, sẹtin vbe gha re ọmọ na biẹ vbe “ẹghẹ nọ ma khẹke.” The Jerusalem Bible khian ghi zedu ako na, ọ na wẹẹ: “Te I yevbe ọmọ na biẹ vbe ẹghẹ ne ọmwa rhọkpa ma ya aro yi.” Vbe ẹghẹ ne Pọl ya khian Ovbiotu e Kristi, e Jesu rre ẹrinmwi nẹ. E Pọl guan kaẹn emwa eso ne Jesu rhie egbe ma, ọ ke gha rrie ẹrinmwi vbe uviẹn 5-7, sokpan e Jesu ma rhie egbe ma e Pọl vbe ẹghẹ na. (1 Kọr 15:4-8) Ẹse nọkhua ẹre Jesu ru e Pọl re, nọ na rhie egbe ma rẹn, e Pọl ma te zẹdẹ ya aro yọ. Ọna ẹre ọ ya e Pọl gha yevbe “ọmọ na ma sẹ uki biẹ.”

Ẹmwẹ ne Pọl ta na rhie ma wẹẹ, ọmwa nọ mu egbe rriotọ nọ. Emwa eso ni rri egie ebe khare wẹẹ, ẹmwẹ ne Pọl ta na rhie ẹre ma wẹẹ, ọ ma ghee egbe ẹre sẹ emwi rhọkpa. Adeghẹ emwi vbenian ẹre Pọl ghaa mwẹ vbe ekhọe, ọ rhie ma wẹẹ, te ọ ghaa roro ẹre wẹẹ, uyi na mu ye irẹn egbe na ma te khẹke irẹn. Ọ na kue kha wẹẹ: “Mẹ ẹre ọ ghi kanmwa sẹ vbe uwu avbe ukọ hia, sẹrriọ wẹẹ, I ma te sẹ na gha tie ẹre ukọ, rhunmwuda, te imẹ ghaa zẹ iko ọghe Osanobua kpokpo. Sokpan vbekpa ẹsọhẹ Osanobua, ẹre I na re emwi ne I khin na.”​—1 Kọr 15:9, 10.

Nọnaghiyerriọ, ọ khọ wẹẹ emwi nọ sunu vbe ẹghẹ nọ ya khian Ovbiotu e Kristi ẹre ọ ghaa guan kaẹn. Ọni ọre ne Jesu na rhie egbe ma rẹn vbe udemwurri, nọ ma na ya aro yọ, nọ na vbe yevbe na miẹn wẹẹ, ẹghẹ nọ ma khẹke ẹre ọna ya sunu, kevbe nọ na gha roro ẹre wẹẹ, uyi na mu ye irẹn egbe ma khẹke irẹn. Vbe nọ rhirhi gha ye hẹ, e Pọl ma mianmian emwi nọ sunu na. Ọna keghi yae yayi wẹẹ, e Jesu gele rhiọ kpaegbe nẹ. Ẹi khabe nọ na mobọ gha guan kaẹn emwi nọ sunu na, vbe ọ ghaa kporhu ma emwa, vbekpa arhiọkpaegbe ọghe Jesu.​—Iwinna 22:6-11; 26:13-18.