E Jọn Ne Baptist—Igiemwi Nọ Gha Ya Ima Gha Sọyẹnmwẹ
Ọ MWẸ ukpamuyọmọ ne u te hoo ne u gha mwẹ vbe iko nọ ma he sẹ ruẹ obọ ra? A sẹtin miẹn wẹẹ, ọmwa ọvbehe ẹre ọ wa sọyẹnmwẹ ukpamuyọmọ na. Ọ sẹtin gha re ukpamuyọmọ ne u ka gha mwẹ, ne u i ghi mwẹ nian, rhunmwuda ne egbe na khian ọmaẹn nẹ, emianmwẹ, ai miẹn igho loo somwa ra iwinna nọ bi yọ ruẹ egbe vbuwe ẹgbẹe. A sẹtin vbe miẹn wẹẹ, ọ mwẹ ukpamuyọmọ ne u ka wa gha mwẹ ke ẹghẹ nọ kpẹre gha dee, sokpan, rhunmwuda afiwerriẹ nọ rhiegbe ma vbe otu e Jehova, u i ghi mwẹ ọnrẹn. Emwi vbenian sẹtin ya ruẹ gha roro ẹre wẹẹ, u ma ghi sẹtin rhiegbe ye ugamwẹ e Jehova vbene ọ te khẹke. Ọna sẹtin ya egbe wọọ ruẹ, ọ sẹtin vbe ya egbe kan ruẹ. Ọ ghaa yerriọ, vbọ khian ru iyobọ nuẹn, ne iziro vbenian ghẹ gbọzinian vbe ekhọe ruẹ? Vbọ khian ya ruẹ gha sọyẹnmwẹ?
Ma gha miẹn emwi ruẹ vbe okha ọghe Jọn ne Baptist, nọ gha ru iyobọ ne ima ya gha sọyẹnmwẹ. E Jọn wa gha mwẹ ukpamuyọmọ ni hiunsi vbe ugamwẹ e Jehova, sokpan, ọ gha kẹ, e Jọn ma te rẹn wẹẹ emwi gha fiwerriẹ vbe arrọọ ọghẹe. Ọ ma te vbe rẹn wẹẹ, odẹ ẹghẹ ne irẹn ya kporhu ẹre irẹn khian vbe gbe vbe eghan. Ọrheyerriọ, e Jọn na ye gha sọyẹnmwẹ ya sẹ ẹdẹ uwu. Vbọ ru iyobọ nẹẹn? Vbọ khian ya ima ye gha sọyẹnmwẹ deghẹ emwi ne ima yaro yi ma sẹ obọ?
IWINNA NỌ YE JỌN GHA SỌYẸNMWẸ
Ọ ghi rre uki April vbe ukpo 29 C.E., e Jọn keghi suẹn gha mu emwa egbe yotọ khẹ e Mẹzaia. Ọ na gha tama emwa wẹẹ: “Wa zobọ vbe orukhọ ne a ru rhunmwuda Arriọba ẹrinmwi sotọ foo.” (Mat 3:2; Luk 1:12-17) Emwa wa gha danmwehọ re. Emwa nibun keghi ke ehe nọ rree gha dee do gha danmwehọ re, nibun keghi fiwerriẹ, iran na dinmwiamẹ. E Jọn wa vbe gha ya udinmwẹ ya obọ sekhae ne ekaolotu Ivbi e Ju vbekpae emwi ọhanabe nọ khian rhuan iran deghẹ iran ma fiwerriẹ. (Mat 3:5-12) Emwi nọ ghi hiunsi sẹ ne Jọn ru vbe ẹghẹ nọ ya gha kporhu ọre nọ na dinmwi Jesu ye amẹ vbe uki October, vbe ukpo 29 C.E. Ke ẹghẹ nii kpa, e Jọn na ghi suẹn gha tama emwa ne iran gha lele Jesu ne Mẹzaia.—Jọn 1:32-37.
Rhunmwuda iwinna nọ hiunsi ne Jọn winnaẹn, e Jesu keghi kha wẹẹ: “Emwa ni he rrie agbọn na hia, Jọn ne Baptist ọrọre nọ kpọlọ sẹ vbe uwu ehia.” (Mat 11:11) E Jọn wa gha sọyẹnmwẹ afiangbe nibun nọ miẹn vbe obọ Osanobua. Erriọ eguọmwadia e Jehova nibun vbe ẹdẹnẹrẹ vbe ya miẹn afiangbe vbe obọ e Jehova. Vbe igiemwi, gi ima guan kaẹn Ọtẹn Nokpia Terry kevbe ọvbokhan rẹn ighẹ Sandra. Ọ gberra ukpo 50 ne iran he gbe vbe iwinna ugamwẹ ẹghẹ hia. E Terry keghi kha wẹẹ: “Ukpamuyọmọ nibun ẹre I he sọyẹnmwẹ ọnrẹn vbe ugamwẹ e Jehova. I ka gha re arọndẹ ọghe ẹghẹ hia, I ga vbe Bẹtẹl, I ka vbe gha re arọndẹ ne kpataki, I na do gha re ọgbaroghe ọghe otako kevbe ọgbaroghe ọghe odin, vbe okiekie, I na dọlegbe do gha re arọndẹ ne kpataki.” Ọ keghi sẹ ima ọyẹnmwẹ vbe ima ghaa mwẹ ukpamuyọmọ vbe ugamwẹ e Jehova, sokpan, okha ọghe Jọn gha ya ima rẹn wẹẹ, ne ima mieke na ye gha sọyẹnmwẹ vbe emwi gha fi werriẹ vbe arrọọ ọghe ima, te ima gha loo ẹrhiọn.
GHA GBỌYẸMWẸ YE UKPAMUYỌMỌ NE U MWẸ
Emwi nọ wa mobọ ya e Jọn ye gha sọyẹnmwẹ, ọre nọ na gha gbọyẹmwẹ ye ukpamuyọmọ nọ mwẹ vbe ugamwẹ e Jehova. Vbe igiemwi, e Jọn ghi dinmwi Jesu ye amẹ nẹ, erhuanegbe ẹre na gha dibu, sokpan ọghe Jesu na gha muan yọ. Rhunmwuda ọna, erhuanegbe Jọn keghi tama rẹn wẹẹ: “Ghee, irẹn wa dinmwi emwa ye amẹ nian, emwa hia wa kpe bu ẹre yo.” (Jọn 3:26, NW) E Jọn keghi wanniẹn wẹẹ: “Ọdafẹn ọha ẹre ọ yan ovbiọha. Ọse ọdafẹn ọha ghi mudia gha danmwehọ, ẹko ghi gha rhiẹnrhiẹn ọnrẹn vbe ọ gha họn urhu ọdafẹn ọha. Erriọ zẹẹ ọre a ya ye ọyẹnmwẹ nọ sẹ mwẹ khian nọ gbae.” (Jọn 3:29) E Jọn ma gu e Jesu suan, ọ ma vbe gha roro ẹre wẹẹ, iwinna irẹn i mwẹ esa nọ ye, rhunmwuda ne iwinna ne Jesu do ru na hiunsi sẹ ọghe irẹn. Te Jọn wa gha gbọyẹmwẹ ye ukpamuyọmọ nọ mwẹ, zẹvbe “ọse ọdafẹn ọha.”
Ne Jọn na gha re ọmwa ne emwi nọ mwẹ sẹ ọre ọkẹn, ẹre ọ zẹe nọ na gha sọyẹnmwẹ agharhemiẹn wẹẹ, iwinna rẹn ma gha khẹkhẹ. Vbe igiemwi, ke egbe ọvbokhan kpa, ẹre Jọn ya gha re Nazarait, rhunmwuda ọni, ọ ma zẹdẹ gha da ayọn. (Luk 1:15) Vbe Jesu ghi guan kaẹn odẹ ne Jọn ya loo arrọọ ọghẹe, ọ keghi kha wẹẹ: ‘Vbe Jọn ne Baptist rre, ọ ma gha rri evbare vbene emwa ọvbehe re, ọ ma vbe gha da ayọn.’ E Jesu vbe erhuanegbe ẹre ma gha ye vberriọ. Iran ghaa rri evbare, iran vbe gha da ayọn. (Mat 11:18, 19) Yevbesọni, e Jọn ma gha mwẹ ẹtin na ya ru emwi ọyunnuan, sokpan Osanobua rhie ẹtin na ya ru emwi ọyunnuan ne erhuanegbe Jesu kevbe erhuanegbe Jọn ni ghi suẹn gha lele Jesu. (Mat 10:1; Jọn 10:41) Te Jọn ye rhiegbe ye ugamwẹ e Jehova agharhemiẹn wẹẹ, ọ mwẹ ukpamuyọmọ eso nọ ma gha mwẹ.
Ma ghaa gbọyẹmwẹ ye ukpamuyọmọ ne ima mwẹ vbe otu e Jehova, te ima khian vbe gha sọyẹnmwẹ. E Terry na guan kaẹn ban keghi kha wẹẹ: “Te I wa gha ya ekhọe hia ru iwinna ne a rhirhi waa mẹ vbe otu e Jehova.” E Terry ghaa yerre, ẹghẹ hia nọ gbe vbe iwinna ugamwẹ ẹghẹ hia, ọyẹnmwẹ ghi gha sọe. Emwi ọkpa i rrọọ nọ ya re gbe I ma rẹn.
Te ima khian gha sọyẹnmwẹ sayọ deghẹ ima ru erria yan evbọzẹe ne iwinna ke iwinna ne ima ru vbe ugamwẹ e Jehova na ru ekpataki. Ukpamuyọmọ nọ hiunsi nọ, ne ima na ‘gu Osanobua winna.’ (1 Kọr 3:9) Ma ghaa ru erria yan vbene emwi ne ima re vbe ukhu hiunsi sẹ hẹ, ma ghi gha muẹn tetete, odẹ vbenian, ọ ghi tọ. Erriọ ima khian vbe ya gha sọyẹnmwẹ deghẹ ima na gha ru erria yan ukpamuyọmọ nọ hiunsi ne Jehova mu ye ima egbe, zẹvbe emwa ni gu ẹre winna. Ma i khian ghi vbe gha ya emwi ne ima ru vbe ugamwẹ e Jehova gie ọghe emwa ọvbehe. Ma i ghi vbe roro ẹre wẹẹ, iwinna ne emwa ọvbehe ru vbe ugamwẹ e Jehova hiunsi sẹ ọghe ima.—Gal 6:4.
RHIE ARO TUA EMWI ORHIỌN
Ọ gha kẹ, e Jọn rẹnrẹn wẹẹ, ovbi ẹghẹ kherhe ẹre irẹn khian ya kporhu iyẹn nọ maan sokpan ọ ma wa rẹn wẹẹ, udemwurri ẹre iwinna irẹn khian ya sẹ ufomwẹ. (Jọn 3:30) Ọ ghi rre odẹ uki ehan ne Jọn dinmwi Jesu ye amẹ vbe ukpo 30 C.E., Ọba e Hẹrọd na mu e Jọn khui. Vbe Jọn rre eghan, ọ na ye gha kporhu iyẹn nọ maan. (Mak 6:17-20) Vbọ ye Jọn ye gha sọyẹnmwẹ vbe afiwerriẹ vbenian rhiegbe ma vbe arrọọ ọghẹe? Te ọ rhie aro tua emwi orhiọn.
Vbe Jọn rre eghan, iyẹn keghi sẹ ọre obọ wẹẹ, iwinna ikporhu iyẹn nọ maan ọghe Jesu wa vẹwae khian. (Mat 11:2; Luk 7:18) Jọn rẹnrẹn wẹẹ Jesu ọre Mẹzaia nọ dee, sokpan, ọ kegha roro ẹre deghẹ Jesu gha gele sẹtin ru emwi hia ne avbe akhasẹ tae vbekpa re. Jọn vbe rẹn wẹẹ ọba ẹre Jesu khian gha khin. Ọ gha kẹ, inọta eso ni ghaa rre ọre ekhọe ọre wẹẹ: ‘Jesu gha rherhe suẹn gha kha zẹvbe ọba ra? Ọ gha suẹn gha kha zẹvbe ọba, ọ gha fan mwẹ hin eghan rre ra?’ Ena ẹre ọ si ẹre ne Jọn na gie erhuanegbe ẹre eva ya nọ e Jesu wẹẹ: ‘Wẹ ọre ọmwa nọ dee ra, ra ne ima gha khẹ ọmwa ọvbehe?’ (Luk 7:19) Ẹi mwẹ Jọn ma gbehọ kotọ danmwehọ erhuanegbe ẹre vbe iran ghi gha tama rẹn wẹẹ: “Avbe arhuaro bẹghe odẹ, avbe uke khiaẹn, a khuẹ avbe ọkhọnmwoti huan, ayin-ehọ họn ẹmwẹ, a huẹn ni wu kpaegbe vbe orinmwi, a kporhu Iyẹn Nọ Maan ma avbe ivbiogue.”—Luk 7:20-22.
Iyẹn nọ sẹ Jọn obọ na keghi rhie igiọdu nẹẹn. Ọ keghi suigiẹ yọ wẹẹ, Jesu ọre Mẹzaia nọ gele dee. Agharhemiẹn wẹẹ Jesu ma fan e Jọn fua vbe eghan, e Jọn na ye gha sọyẹnmwẹ rhunmwuda ọ rẹnrẹn wẹẹ, iwinna esi ẹre irẹn ru.
Ma gha rhie aro tua iwinna esi ne etẹn ima ru vbe uhunmwu otagbọn hia, ọyẹnmwẹ ghi gha sẹ ima
Ma ghaa rhie aro tua emwi orhiọn vbe na ghee Jọn, ma gha vbe sẹtin gha ya ọyẹnmwẹ zin egbe vbuwe ọlọghọmwa. (Kọl 1:9-11) E Baibol na tie kevbe na ru erria yan gha ru iyobọ ne ima, ọ gha vbe ya ima gha mwẹ ilẹkẹtin wẹẹ, aro nọ ghaan ẹre Jehova ya ghee iwinna ne ima ru vbe ugamwẹ ọghẹe. (1 Kọr 15:58) Sandra keghi kha wẹẹ: “Uhunmwu ebe ọkpa ọkpa ọghe Baibol ne I tie ẹdẹgbegbe keghi ya mwẹ sikẹ e Jehova sayọ. Ọghe Jehova mẹ ghi mu ye okaro, ẹi re ọghe enegbe mwẹ.” Ma gha rhie aro tua iwinna esi ne etẹn ima ru vbe uhunmwu otagbọn hia, ma i ghi mu ọghe enegbe ima roro. Sandra ye vbe kha wẹẹ: “JW Broadcasting® nọ ladian uki uki keghi ya ima rẹn etẹn nibun vbe otagbọn hia kevbe etẹn ni siẹnro iwinna ugamwẹ ọghomwa vbe otagbọn hia, ọ vbe ya ima sọyẹnmwẹ iwinna ugamwẹ.”
Agharhemiẹn wẹẹ ovbi ẹghẹ kherhe ẹre Jọn ya rhiegbe ye iwinna ugamwẹ, izọghae kevbe ẹtin vbe na ghee Ẹlaija ẹre ọ ya rhiegba yọ. Yevbesọni, “egbe ọmwa vbene ima ye,” ọre Jọn vbe gha khin. (Luk 1:17; Jems 5:17) Nọnaghiyerriọ, ma ghaa gbọyẹmwẹ ye ukpamuyọmọ ne ima mwẹ, ima na vbe gha rhie aro tua emwi orhiọn vbene Jọn ru ẹre, ma gha sẹtin gha sọyẹnmwẹ iwinna ugamwẹ vbuwe ọlọghọmwa ne ima rhirhi werriẹ aro daa.
