Inọta Ne Emwa Nọ

KPẸRE

Inọta Ne Emwa Nọ

E Baibol khare wẹẹ, vbe ẹi re te orhunmwu eva ra emwa ni gberra vberriọ do sosẹ ye ẹmwẹ, ọ ma khẹke na bu ohiẹn ọmwa. (Nọm 35:30; Diut 17:6; 19:15; Mat 18:16; 1 Tim 5:19) Sokpan Uhi e Mosis khare wẹẹ, deghẹ okpia na mu ovbialeke na ya ne ọmwa nẹ yagha vbuwe “oha,” vbene ovbialeke nii na tu ladian, te ọ khẹke na bu ohiẹn gbe okpia nii, sokpan a ghi sẹ ovbialeke nii rae. Ugbẹnvbe a miẹn wẹẹ, aro emwa ọvbehe ma sẹ ọre, vbọzẹe ne a khian na bu ohiẹn gbe okpia nii, vbene a gha na sẹ ovbialeke nọ rrọọ rae?

Ẹi re deghẹ okpia nii rriabe ra deghẹ ọ rriase ẹre ebe Diuteronomi 22:25-27 mobọ guan kaẹn, rhunmwuda, ako na gi ima rẹn nẹ wẹẹ ọ rriabe. Sokpan emwi ne ako na hoo nọ rhie ladian ọre wẹẹ, ovbialeke ne emwi vbenian sunu daa ma rriabe. Vbọ ya ima kha vberriọ? Gia ziro yan ẹmwẹ na ta sẹ evba.

Ebe Diuteronomi 22:23, 24 keghi guan kaan okpia ọkpa nọ lovbiẹ ke okhuo na ya ne ọmwa nẹ, vbe “ore ẹvbo.” Te okpia nọ yin uyinmwẹ vberriọ rriabe rhunmwuda, te ọ yevbe na miẹn wẹẹ okhuo nọ rre owa ọdọ ẹre ọ gu ru emwi ọdọ vbe amwẹ. Okhuo nii vbe vbo? “Ọ ma tu wẹẹ na bu irẹn rre.” Akpawẹ te ọ tu ladian, emwa gha te rhulẹ bu ẹre gha dee do ru iyobọ nẹẹn. Ugbẹnvbe a miẹn wẹẹ ọ ma ru vberriọ, ọni rhiema wẹẹ, ọ vbe rriabe. Te ọ fi owẹ ye oha. Nọnaghiyerriọ, iran eva ẹre a khian bu ohiẹn gbe.—Diut 22:23, 24.

Sokpan, a ma bu ohiẹn vbenian gbe ovbialeke na guan kaẹn vbe ebe Diuteronomi 22:25-27. Ako nii khare wẹẹ: “Gia kha ighẹ vbe a lahin ore ẹvbo rre nẹ, okpia keghi miẹn ọmọ na ya ne ọmwa nẹ, ọ na ya ẹtin vbe iwegbe gu ẹre ru emwi, ẹghẹ nii, okpia nọ rrọọ ọkpa ẹre a gha gbe rua. A ghẹ ru ọmọ okhuo nọ rrọọ emwi rhọkpa rhunmwuda, ọ ma ru orukhọ nọ kere na gbe ẹre rua ba. Te ẹmwẹ na vbe yevbe ẹmwẹ ọmwa nọ gheghe dekun ọmwa ọvbehe, ọ na gbe ẹre rua. Uwu oha ẹre ọmwa nii na mu ọvbokhan okhuo nii yagha, agharhemiẹn wẹẹ ọ te tu wẹẹ, na bu irẹn rre, a ma miẹn ọmwa nọ ye ọre obọ.”—Diut 22:25-27.

Egbe emwi vbenian gha sunu, avbe ọbuohiẹn ghi ya okhuo nii yi. Iran ghi gha roro ẹre wẹẹ, rhunmwuda ne emwi na, na sunu vbuwe oha, egbọre okhuo nii gele so ladian, sokpan ọ “ma miẹn ọmwa nọ ye ọre obọ.” Rhunmwuda ọni, ai khian kha wẹẹ te okhuo nii fi owẹ ye oha. Sokpan te okpia nọ rrọọ rriabe rhunmwuda, te ọ “ya ẹtin vbe iwegbe gu” okhuo nii, na ya ne okpia nẹ lovbiẹ. Nọnaghiyerriọ, te ọ mu okhuo nii yagha. Emwi awua ẹre ọ ru!

Agharhemiẹn wẹẹ ako na tama ima wẹẹ, ovbialeke ne emwi vbenian sunu daa ma rriabe, ọ vẹ na rẹn wẹẹ, te okpia nii rriabe, rhunmwuda te ọ “ya ẹtin vbe iwegbe gu” okhuo ẹrrẹe lovbiẹ. Ma yayi wẹẹ, avbe ọbuohiẹn ni ghaa rrọọ vbe ẹghẹ nii ke bu ohiẹn vbenian, ẹi mwẹ iran ma “kakabọ gualọ otọ ẹre” nẹ, iran ke bu ohiẹn gbe ọmwa vberriọ. Ma vbe yayi wẹẹ, uhi kevbe ilele ọghe Osanobua, ẹre iran ghaa lele vbe iran ghaa bu ohiẹn.—Diut 13:14; 17:4; Ẹks 20:14.