U gha sẹtin rhie ewanniẹn ye avbe inọta na ra, zẹvbe ne ima ruẹ ọre vbe ebe Owa Ọkhẹ ọghe 2019?

Ne Osanobua na wẹẹ: “Emwi igbinna ọkpa ne ọ gha sẹtin kuan ruẹn egbe i rrọọ,” vbe ọ yae kha? (Aiz 54:17)

Ma mwẹ ilẹkẹtin wẹẹ e Jehova gha miẹn ima fan vbe obọ “emwa dan.” (Aiz 25:4, 5) Eghian ima i khian sẹtin rhie ikuanegbe ọghe etẹbitẹ ne ima.—w19.01, ipapa 6-7.

De vbene obọ ne Jehova ya mu Ivbi e Kena kevbe Ivbi Izrẹl ni zẹ utun vbe ehọ ya rhiẹre ma wẹẹ, Osa nọ bu ohiẹn ata ẹre irẹn khin?

Osanobua keghi bu ohiẹn gbe emwa ni ghaa yin uyinmwẹ alamoghẹ kevbe ni ghaa ya obọ dan mu ikhuo kevbe ibiẹka. Irẹn keghi fiangbe emwa ni ya ẹkoata gae kevbe ni ghaa ya obọ esi mu emwa ọvbehe.—w19.02, ipapa 22-23.

Ọmwa nẹi re Osẹe Jehova ghaa na erhunmwu sirra ima, vbọ khẹke ne ima ru?

Ma sẹtin wa hunwan, sokpan ma i gbe “isẹ” yọ, ma i vbe da egbe obọ yi vbuwe ẹghẹ ne erhunmwu nii ya khian. Ma sẹtin gha ya ekhọe na erhunmwu ọghe obọ ima vbe ẹghẹ vbenian.—w19.03, ipapa 31.

Vbọzẹe nọ na re orukhọ nọ wegbe deghẹ ọmwa na mu ọvbokhan yagha?

Emwi ọhanabe ẹre ọmwa nọ mu ọvbokhan yagha ru daa ọmọ nii, te ọmwa vberriọ sọtẹ daa iko ọghe Ivbiotu e Kristi, te ọ vbe sọtẹ daa arriọba kevbe Osanobua. Vbe otọ ẹvbo eso, uhi khare wẹẹ, te ọ khẹke na tama arriọba vbe ọmwa gha mu ọvbokhan yagha. Ediọn ni rre uwu iko wa vbe lele uhi na vbe ẹvbo vberriọ.—w19.05, ipapa 9-10.

De vbene u khian ya sẹtin ya ekhọe ruẹ khian ọghe ọgbọn hẹ?

Emwi nọ khẹke ne u ru ẹre na khin: Gha na erhunmwu gie Jehova. Gha ru erria yan emwi ne u tie ne u mieke na gha rhiẹre ye uyinmwẹ. Gha gu avbe ọse ni maan muobọ.—w19.06, ipapa 11.

Vbe ima khian ya sẹtin mu egbe khẹ ukpokpo hẹ?

Te ọ khẹke ne ima ya asikẹgbe ne ima gu e Jehova mwẹ wegbe sayọ. Gi ma gha mwẹ ilẹkẹtin wẹẹ e Jehova hoẹmwẹ ima, ẹi khian vbe sẹ ima rae ẹdẹ. Gi ima gha tie Baibol vbe ẹdẹgbegbe, ma ghi vbe gha na erhunmwu vbe ẹghẹ hia. Gi ima gha mwẹ ilẹkẹtin wẹẹ e Jehova gha mu eyan hia nọ yan rẹn nọ dekaan Arriọba ọghẹe sẹ. Ma ghi hia ne ima rẹn ọnrẹn ye uhunmwu avbe ako ni ghi yẹẹ ima sẹ vbe Baibol. Ma ghi vbe rẹn ihuan Arriọba ọghomwa ye uhunmwu.—w19.07, ipapa 2-4.

De vbene ima khian ya ru iyobọ ne etẹn ima vbuwe ẹgbẹe nẹi ga e Jehova, ne iran mieke na miẹn fan?

Gi ima gha mwẹ amuroro daa iran, ma ghi vbe gha mwẹ uyinmwẹ esi rhunmwuda, ọna sẹtin fi iran werriẹ. Ọ khẹke ne ima vbe gha mwẹ izinegbe kevbe ọghọ.—w19.08, ipapa 15-17.

De vbene ima ya miẹn irọkhegbe hẹ, zẹvbe ne Jesu tae vbe ebe Matiu 11:28?

Ma keghi mwẹ avbe ọsuohuan ni ghi maan sẹ, avbe ọse ni ghi maan sẹ kevbe iwinna nọ ghi maan sẹ.—w19.09, ipapa 23.

De vbene Osanobua ya rhie aguakpa kevbe ẹtin ne ima ya ru ahoo ọghẹe? (Fil 2:13)

Ma ghaa tie Baibol, ma na vbe gha ru erria yan rẹn, Osanobua ghi rhie aguakpa kevbe ẹtin ne ima, ne ima ya zẹ emwi ru. Ọ sẹtin ya orhiọn nọhuanrẹn ru iyobọ ne ima, ne ima mieke na sẹtin ya emwi ne irẹn ya we ima ru ahoo ọghẹe.—w19.10, ipapa 21.

Vbọ khẹke ne ima ru, ma ke ru atamuolọyan ne kpataki?

Emwi isẹn nọ khẹke ne ima ru ọre: Kakabọ ru ezanzan. Na erhunmwu ne Osanobua rhie ẹwaẹn nuẹn. Zanzan ekhọe ruẹ ghee, ne u mieke na rẹn evbọzẹe ne u khian na ru atamuolọyan nọ rhirhi gha khin. Fian okhuo ne egbuẹ. Ghẹ ru atamuolọyan ne u rẹnrẹn wẹẹ u i khian sẹtin mu sẹ.—w19.11, ipapa 27-29.

Emwa nibun yayi wẹẹ, emwa nagbọn mwẹ orhiọn nẹi wu. Ọna ẹre Setan ghaa mwẹ vbe ekhọe vbe ọ gu Ivi guan vbe ogba ọghe Idẹni ra?

Hiehie. Emwi ne Esu tama Ivi ọre wẹẹ, ẹi khian wu hiehie, ọ ma tama rẹn wẹẹ, ikinnegbe ẹre ọkpa ẹre ọ khian wu. Deghẹ iyayi ọghe orhiọn nẹi wu ghaa rrọọ vbe ẹghẹ Noa, ra vbene ọ te sẹ ẹghẹ nii, ẹi mwẹ ọ ma sẹ ufomwẹ vbe Osanobua ghi ya Okpamẹ guọghọ emwa dan rua. Ọ khọ wẹẹ, a te miẹn wẹẹ Osanobua fi urhuẹvbo ọghe emwa nagbọn werriẹ vbe Babẹl, ẹre imamwaemwi ọghe orhiọn nẹi wu ya suẹn.—w19.12, ipapa 15.