Ẹn o, ako ọkpa i rrọọ vbe Baibol ra ebe ọvbehe, nọ so igiẹ yọ wẹẹ, egbe emwi vberriọ ghaa sunu.

Odẹ ne Baibol nibun ya zedu ako na keghi ya emwa eso roro ẹre wẹẹ, te Ivbiotu e Kristi ni ghaa rrọọ vbe ẹghẹ ọghe Pọl ghaa dinmwiamẹ ne emwa ni wu nẹ. Vbe igiemwi, New International Version khare wẹẹ: “Nia, deghẹ arhiọkpaegbe i rrọọ, de emwi ne emwa ni dinmwiamẹ ne emwa ni wulo nẹ khian ghi ru?”

Gia ghee emwi ne ikpia eva ni rri egie ebe khare. Dr. Gregory Lockwood khare wẹẹ, ‘Ako ọkpa i rrọọ vbe Baibol ra ebe ọvbehe na gbẹnnẹ, nọ so igiẹ yọ wẹẹ a ghaa dinmwiamẹ ne emwa ni wulo nẹ.’ Egbe ẹmwẹ vbenian ẹre Professor Gordon D. Fee vbe ta, ọ wẹẹ: ‘Igiemwi rhọkpa i rre Baibol ra ebe ọvbehe nọ dekaẹn egbe idinmwiamẹ na. Ako ọkpa i rrọọ vbe ebe Matiu ya sẹ ebe Arhie Maan nọ guan kaẹn rẹn; osẹ rhọkpa i vbe rrọọ nọ rhiẹre ma wẹẹ egbe idinmwiamẹ na, ghaa rrọọ vbe ẹghẹ ọghe avbe ukọ ra vbe iran ghi wu nẹ.’

Jesu tama erhuanegbe ẹre wẹẹ, “Wa bu emwa . . . ne uwa gha ya iran khian erhuanegbe mwẹ, wa ghi gha dinmwi iran ye amẹ. . . . Wa ghi gha maa iran ẹre, ne iran gha ru emwi hia ne I yi ẹre iyi ne uwa.” (Mat 28:19, 20, NW) Ọna rhiema wẹẹ, ọmwa ke sẹtin dinmwiamẹ, te ọ gha ka ruẹ emwi vbekpae Jehova kevbe Jesu, ọ ghi ya iran yi, ọ ghi vbe gha họn ẹmwẹ ne iran. Ọmwa nọ wu nẹ, i khian sẹtin ru ọna; Ovbiotu e Kristi nọ rre agbọn i khian vbe sẹtin ru ẹre nẹẹn.—Asan 9:5, 10; Jọn 4:1, NW; 1 Kọr 1:14-16, NW.

Nọnaghiyerriọ, de emwi ne Pọl ghi ya ẹmwẹ nọ rre ako nii kha?

Ivbi e Kọrinti eso kegha kha wẹẹ, arhiọkpaegbe i rrọọ. (1 Kọr 15:12) Sokpan, e Pọl keghi dia iziro na. Ọ khare wẹẹ, “ẹdẹgbegbe ọre [irẹn] ya rhie uhunmwu daa uwu.” Ọ na vbe gi iran rẹn wẹẹ, agharhemiẹn wẹẹ, ẹghẹ hia ẹre irẹn ya gha werriẹ aro daa ọlọghọmwa nọ te miẹn irẹn uhunmwu, irẹn wa gha mwẹ ilẹkẹtin wẹẹ irẹn gha wu, Osanobua gha huẹn irẹn kpaegbe gha rrie ẹrinmwi, vbene ọ vbe huẹn Jesu kpaegbe.—1 Kọr 15:30-32, 42-44.

E Pọl kegha hoo ne etẹn ni rre Kọrinti rẹn wẹẹ, zẹvbe emwa na hannọ zẹ, te iran khian gha werriẹ aro daa ọlọghọmwa vbe ẹghẹ hia, iran gha vbe wu, a te miẹn wẹẹ Osanobua huẹn iran kpaegbe. Ugbẹnvbe a miẹn wẹẹ, te iran dinmwiamẹ zẹvbe erhuanegbe Jesu, te iran gha vbe “dinmwiamẹ ye uwu nọ wu.” (Rom 6:3, NW) Ọna rhiema wẹẹ, vbe na ghee Jesu, te iran khian vbe rri oya, iran ghi vbe wu, a te miẹn wẹẹ Osanobua huẹn iran kpaegbe.

Jesu keghi tama eva vbe ukọ ẹre wẹẹ: “Vbene idinmwiamẹ mwẹ ye, erriọ ọghe uwa khian vbe gha ye.” (Mak 10:38, 39, NW) Vbe ẹghẹ ne Jesu ya ta ẹmwẹ na, ọ gberra ukpo eva nẹ nọ ya dinmwiamẹ. Rhunmwuda ọni, ẹi re idinmwiamẹ kẹkan ẹre ọ ghaa guan kaẹn. Emwi ne Jesu ya ọna kha ọre wẹẹ, irẹn gha wu rhunmwuda imudiase ọghe irẹn. E Pọl keghi tama etẹn na hannọ zẹ wẹẹ, “Deghẹ ima ghae vbe oya e Kristi, ma gha vbe ghae vbe uyi ẹre.” (Rom 8:16, 17; 2 Kọr 4:17) Ọna rhiema wẹẹ, te iran khian vbe wu, a ke sẹtin huẹn iran gha rrie ẹrinmwi.

Ẹi khabe ne New World Translation na zedu ẹmwẹ ne Pọl tae vbenian: “Deghẹ ẹi re erriọ, iran ni dinmwiamẹ ne iran mieke na wu ghi vbo? Deghẹ ai khian huẹn emwa ni wulo kpaegbe, vbọ ghi zẹe ne iran na dinmwiamẹ vbe odẹ vberriọ?”