EMWA ne Baibol ta okha re keghi re emwa “vbene ima ye.” Ẹmwẹ wa bun ne iran tae na gbẹnnẹ ye Baibol. Vbene ọ wa gha ye iran hẹ vbe ekhọe, erriọ iran wa ya tae zẹẹ. (Jems 5:17) Vbe igiemwi, ẹmwẹ ne Pọl tae vbe ebe Rom 7:21-24 wa kaẹn ima, ma vbe rẹn ehe ne ẹmwẹ nii rrie rhunmwuda, ọ rre ima hia egbe. Ọ keghi kha wẹẹ: “Mẹ gha wẹẹ ne I ru emwi esi, emwi dan ọkpa ọre ẹtin mwẹ sẹ. . . . Ọ sẹ mwẹ sẹ egbe mwẹ!” Ẹmwẹ ne Pọl tae na keghi rhie igiọdu ne ima vbe ima ghaa gu abakuru ọghomwa suan, rhunmwuda, irẹn tobọ irẹn vbe gha gu abakuru ọghẹe suan.

Ẹmwẹ nibun ọvbehe rrọọ ne Pọl tae zẹvbe nọ wa rre ọre ekhọe. Vbe ebe Galatia 2:20, ọ keghi kha wẹẹ: “Kristi . . . hoẹmwẹ mwẹ, ọ na rhie ẹdẹ agbọn rẹn mẹ.” Ọna rhiema wẹẹ, te Pọl wa gha mwẹ iyayi ne ẹi beghe wẹẹ, irẹn ẹre Jesu wu na. Ma mwẹ iyayi vberriọ ra? Ugbẹnso, emwi eso sẹtin sunu nọ gha ya ima gha gbawawẹ deghẹ ima ẹre Jesu gele wu na.

Adeghẹ ima i ghee egbe ima sẹ emwi rhọkpa, rhunmwuda orukhọ ne ima ru vbe ẹghẹ nọ gberra, ma sẹtin do gha roro ẹre wẹẹ, e Jehova ma hoẹmwẹ ima kevbe wẹẹ, ẹi khian sẹtin yabọ ima. Ma sẹtin vbe gha gbawawẹ deghẹ ima tobọ ima ẹre Jesu gele wu na. Deghẹ ọna ọre osuan ne ima ye, inọta eva nọ khẹke ne ima nọ egbe ima re ọre wẹẹ: Jesu gele hoo ne ima gha ya aro vberriọ ghee izọese adẹwerriegbe ne irẹn ru ra? Deghẹ aro vberriọ ẹre ima ya ghee ẹre, de emwi nọ khian ru iyobọ ne ima ya fi iziro ọghe ima werriẹ? Gi ima zẹ ewanniẹn ye inọta eva na.

Vbene ẹmwata, Jesu hoo ne ima gha mwẹ ọnrẹn vbe orhiọn wẹẹ, ima tobọ ima ẹre irẹn wu na. Vbọ khian ya ima gha mwẹ iyayi vbenian? Gi ima hia, ne ima ya aro ekhọe bẹghe emwi nọ sunu vbe ebe Luk 23:39-43. Vbe ako na, ọ mwẹ okpia ọkpa na kaen mu erhan irrioya ba e Jesu. Okpia nii keghi miẹnkue wẹẹ, orukhọ ne irẹn ru ẹre irẹn rrioya yi. Ọ khọ wẹẹ, orukhọ nọ wegbe ẹre okpia nii ru rhunmwuda, avbe izigan ni ru orukhọ nọ wegbe ẹre a rri ọre oya vberriọ. Ekhọe okpia na, kegha bu abe gbe ẹre, rhunmwuda ọni, ọ na suẹn gha rinmwian e Jesu. Ọ na wẹẹ: “Ẹghẹ ne u gha na rre zẹvbe Ọba, u ghi yee mwẹ rre.”

De emwi ne Jesu ghi ru? Hia ne u ya ekhọe zomwa rẹn, obalọ ne Jesu ghaa ye vbe ọ fẹko mu aro daa izigan nii. Vbuwe obalọ na, Jesu na ye muẹmuẹ ogiẹ daa re. Jesu na ghi tama rẹn wẹẹ: “I tama ruẹ nian ẹrẹna, u gha gu mwẹ gha rre Paradais.” Te Jesu gha te sẹtin wa tama izigan nii wẹẹ, te irẹn rrie agbọn na do ya arrọọ ọghe irẹn “dẹ emwa nibun werriegbe.” (Mat 20:28) Sokpan Jesu ma ru vberriọ. Ọ keghi gi izigan nii rẹn wẹẹ, ọ gha miẹn ere vbe izọese adẹwerriegbe ne irẹn do ru. Jesu keghi mu orhiọn izigan nii sotọ, vbe ọ tama rẹn wẹẹ, “u gha gu mwẹ gha rre Paradais.” Ọni rhiema wẹẹ, izigan nii mwẹ ayayẹro ọghe arrọọ etẹbitẹ vbe paradais vbe uhunmwu otagbọn na.

Vbene ẹmwata, te Jesu ghaa hoo ne izigan nii rẹn wẹẹ, ọ rre usun emwa ne irẹn do wu na. Jesu keghi mwẹ itohan daa izigan nii, ne ẹkpotọ ma kie na ya ga Osanobua, inu ghi nọ ne Ovbiotu e Kristi nọ dinmwiamẹ nẹ vbe otu e Jehova? De emwi nọ khian ghi ya ima gha mwẹ ilẹkẹtin wẹẹ, ima tobọ ima gha miẹn afiangbe vbe izọese adẹwerriegbe ọghe Jesu, ọ gha khọnrẹn wẹẹ ima ka ru orukhọ vbe ẹghẹ nọ gberra?

Iwinna ikporhu iyẹn nọ maan ne Jesu waa ne Pọl, ẹre ọ ya e Pọl rẹn wẹẹ, irẹn rre usun emwa ne Jesu do wu na. Vbe ima ya rẹn hẹ? E Pọl keghi kha wẹẹ: “I kpọnmwẹ Kristi Jesu Nọyaẹnmwa, ọmwa nọ rhie ẹtin mẹ ya winna iwinna mwẹ. I kpọnmwẹ ọnrẹn ye nọ na ka mwẹ ye ọmwa nọ kere, ọ keghi [mu iwinna mẹ]. Egbe na ya miẹn wẹẹ, vbe ẹghẹ nọ gberra, te I ghaa ya ukpẹ sankaẹn, I zẹ ọre kpokpo, I na vbe gha filo unu gie ẹre.” (1 Tim 1:12-14) Iwinna ikporhu iyẹn nọ maan na, ẹre ọ ya e Pọl yayi wẹẹ, Jesu hoẹmwẹ irẹn, ọ mwẹ itohan daa irẹn kevbe wẹẹ, ọ mu ẹtin yan irẹn wẹẹ, irẹn gha sẹtin ru iwinna nọ waa irẹn re. Iwinna ikporhu na, ẹre Jesu vbe waa edọmwadẹ ima re vbe ẹdẹnẹrẹ. (Mat 28:19, 20) Ọ wa vbe khẹke ne iwinna na ya ima gha mwẹ iyayi ne ẹi beghe wẹẹ, dọmwadẹ ima ẹre Jesu do wu na.

Ọ mwẹ ọtẹn nokpia ọkpa na tie ẹre Albert na kan fua vbe iko. Ukpo 34 ẹre ọ gbe vbuwe agbọn, ọ ke werriegbe bu e Jehova gha dee vbọ ma he kpẹẹ gbe na. Ọ keghi kha wẹẹ: “Ẹghẹ hia ẹre I ya yee orukhọ ne I ru rre. Sokpan I ghaa rre ikporhu, orhiọn mwẹ ghi wa sotọ. Vbe na ghee Pọl, orhiọn mwẹ ghi gha tama mwẹ wẹẹ, Jesu ẹre ọ waa mwẹ iwinna na. Ọna keghi ya mwẹ sọyẹnmwẹ, ẹre ọ vbe zẹe ighẹ I mwẹ ilẹkẹtin wẹẹ, emwi hia gha dunna vbe odaro.”—Psm 51:3.

Allan nọ ka gha yin uyinmwẹ ọkhọ kevbe igbinna oguo, ọ ke do rẹn odẹ ọghe ẹmwata keghi kha wẹẹ: “Te ekhọe mwẹ wa ye fi mwẹ uwẹnrhiẹn ye obalọ ne I si ye emwa egbe. Ugbẹnso, iro ghi wa han mwẹ. Sokpan, I kpọnmwẹ e Jehova nọ na kie ẹkpotọ yọ, ne imẹ ne ọmwa orukhọ gha kporhu iyẹn nọ maan ma emwa ọvbehe. I gha bẹghe vbene emwa ya gbọyẹmwẹ ye iyẹn nọ maan hẹ, I ghi wa gele bẹghe ẹre wẹẹ, Osa nọ mwẹ ahoẹmwọmwa kevbe ekhọe esi ẹre Jehova khin. I rẹnrẹn wẹẹ, te Jehova loo mwẹ ya ru iyobọ ne emwa ọvbehe ni ka vbe ru orukhọ nọ wegbe vbene imẹ vbe ye.”

Ma ghaa rre ikporhu, ẹkpotọ keghi kie ne ima ya gha loo ẹtin ima ye emwi esi, erriọ iziro nọ maan vbe ya la ima ekhọe. Iwinna na keghi yee ima re rre wẹẹ, Jesu mwẹ itohan daa ima, ọ hoẹmwẹ ima, kevbe wẹẹ, ọ mu ẹtin yan ima.

Vbe ẹi re te agbọn e Setan sẹ ufomwẹ nẹ, te ekhọe ima khian ye zẹdia gha fi ima uwẹnrhiẹn ye orukhọ ne ima ru vbe ẹghẹ nọ gberra. Vbọ khian ru iyobọ ne ima deghẹ ekhọe ima ye fi ima uwẹnrhiẹn?

E Jean ne ekhọe ọre ye fi ẹre uwẹnrhiẹn rhunmwuda uyinmwẹ agabagebe nọ ghaa yin vbe ọ rre igbama, keghi kha wẹẹ, “Ọ keghi rhie igiọdu mẹ ne I na rẹn wẹẹ, ‘Osanobua kpọlọ sẹ’ ekhọe ima.” (1 Jọn 3:19, 20) Vbe na ghee Jean, gi ima hia gha mwẹ agbẹkunsotọ rhunmwuda ne ima na rẹn wẹẹ, e Jehova kevbe Jesu i rhie aro tua orukhọ ọghe ima, iran rẹnrẹn wẹẹ emwa ni ma gba ẹre ima khin. Ghẹ mianmian wẹẹ, emwa orukhọ ni roro iro fi uyinmwẹ werriẹ ẹre Jesu do wu na, ẹi re emwa ni gbae.—1 Tim 1:15.

Ma ghaa ru erria yan obọ esi ne Jesu ya gha mu emwa orukhọ vbe ọ rre agbọn, ima na vbe gha hia vbene ẹtin ima sẹ vbe iwinna ikporhu iyẹn nọ maan ne Jesu waa ima re, ma ghi do gha mwẹ iyayi ne ẹi beghe wẹẹ, ima tobọ ima ẹre Jesu do wu na. Ẹghẹ nii, vbe na ghee Pọl, u ghi vbe si agbada vbe unu tae wẹẹ: Jesu “hoẹmwẹ mwẹ, ọ na rhie ẹdẹ agbọn rẹn mẹ.”