1. Zẹvbe nọ rre ebe Matiu 28:18-20, NW, de emwi ne Jesu wẹẹ ne erhuanegbe ẹre gha ru?

VBE Jesu ghi rhiọ kpaegbe nẹ, ọ na rhiegbe ma erhuanegbe ẹre, ni si egbe koko vbe Galili. Ọ mwẹ ẹmwẹ kpataki nọ do tama iran. Ẹmwẹ nọ tama iran rre ebe Matiu 28:18-20, NW.—Tie ẹre.

2. De avbe inọta ne ima khian ziro yan vbe ako iruẹmwi na?

² Iyi ne Jesu yi ne erhuanegbe ẹre, vbe dekaẹn eguọmwadia Osanobua hia ni rrọọ vbe ẹdẹnẹrẹ. Nọnaghiyerriọ, gia ziro yan inọta eha ni dekaẹn iyi na. Nokaro, vbọ gberra na gha maa emwa na gu ruẹ e Baibol emwi vbekpae avbe uhi ọghe Osanobua, de emwi ọvbehe nọ khẹke ne ima ru? Nogieva, de vbene etẹn hia ni rre uwu iko khian ya ru iyobọ ne emwa na gu ruẹ e Baibol, ne iran gha mwẹ alaghodaro? Nogieha, de vbene ima khian ya ru iyobọ ne etẹn ni worua vbe odẹ ọghe orhiọn, ne iran dọlegbe suẹn gha zọghae vbe iwinna ikporhu?

3. De emwi kpataki ne Jesu wẹẹ ne ima gha ru?

³ Ẹmwẹ ne Jesu tae vbe ebe Matiu 28:18-20, NW, i lọghọ na rẹn otọ re. Ọ wẹẹ ne ima gha maa emwa iyi ne irẹn yi. Sokpan, ọ ye mwẹ emwi ọvbehe ne kpataki nọ khẹke ne ima gha ru. Jesu khare wẹẹ: “Wa ghi gha maa iran ẹre, ne iran gha ru emwi hia ne I yi ẹre iyi ne uwa.” Ọna rhiema wẹẹ, ẹi re te ima khian wa gha maa emwa emwi kẹkan, sokpan ma ghi gha gi iran rẹn vbene iran khian ya gha rhiẹre ye uyinmwẹ hẹ. (Iwinna 8:31) Vbọzẹe nọ na khẹke ne ima gha ru vberriọ?

4. Vbe ima khian ya ru iyobọ ne emwa hẹ, ne iran gha ru emwi ne Kristi yi ẹre iyi ne ima? Ru igiemwi yọ.

⁴ Vbe ima khian ya ru iyobọ ne emwa hẹ, ne iran gha “ru” emwi  ne Kristi yi ẹre iyi ne ima? Gia ru igiemwi yọ. Gia kha wẹẹ ọmwa maa ọmwa ọvbehe vbene a ya fi imọto hẹ. Vbọ khian ya ru iyobọ ne ọmwa nọ maa re imọto hẹ, nọ gha lele avbe uhi na lele vbe a ghaa fi imọto khian? Vbe okaro, ọ ghi ka gi ọmwa nii rẹn nene uhi. Gberra ọni, ọ vbe khẹke nọ lelẹe la odẹ, nọ mieke na sẹtin ru iyobọ nẹẹn ya gha lele avbe uhi nii, vbe ọ ghaa fi imọto khian. Vbe ima miẹn ruẹ vbe igiemwi na?

5. (a) Zẹvbe nọ rre ebe Jọn 14:15 kevbe 1 Jọn 2:3, vbọ khẹke ne ima ru iyobọ ne emwa ne ima gu ruẹ e Baibol ya rẹn? (b) Vbua khian ya ru iyobọ ne ọmwa ne u gu ruẹ e Baibol ya rẹn, vbene ọ khian ya gha rhie emwi nọ ruẹ ye uyinmwẹ hẹ?

⁵ Ma ghaa gu emwa ruẹ e Baibol, te ọ khẹke ne ima gha maa iran re, avbe uhi ọghe Osanobua. Gberra ọni, ma ghi vbe gha ru iyobọ ne iran ya rẹn vbene iran khian ya gha rhiẹre ye uyinmwẹ hẹ. (Tie Jọn 14:15; 1 Jọn 2:3.) Ma sẹtin gi iran rẹn vbene iran khian ya gha ya avbe ilele ọghe Baibol ru emwi vbe owebe, isiwinna ra vbe iran ghaa sọyẹnmwẹ egbe. Odẹ ọkpa ne ima khian ya ru ọna ọre igiemwi ne ima rhie yotọ. Ma sẹtin gi iran rẹn vbene ilele ọghe Baibol he ya gbogba ga ima, ne ẹbe ghẹ rhuan ima kevbe vbene ọ ya ru iyobọ ne ima ya sẹtin ru azẹ nọ maan hẹ. Ma sẹtin vbe gu ọmwa ne ima gu ruẹ e Baibol na erhunmwu, ne Jehova ya orhiọn nọhuanrẹn ọghẹe dia re.—Jọn 16:13, NW.

6. De emwi ọvbehe nọ khẹke ne ima ru, vbe ima ghaa maa emwa ọvbehe, vbene iran khian ya gha ru emwi ne Jesu yi ẹre iyi ne ima?

⁶ De emwi ọvbehe nọ khẹke ne ima ru, vbe ima ghaa maa emwa ọvbehe, vbene iran khian ya gha ru emwi ne Jesu yi ẹre iyi ne ima? Te ọ khẹke ne ima ru iyobọ ne ọmwa ne ima gu ruẹ e Baibol, ne iwinna ikporhu gha gbe ẹre otiti. Emwa eso ne ima gu ruẹ e Baibol keghi si egbe, vbe ọ gha de ọghe ikporhu, rhunmwuda ne ohan na mu iran. Nọnaghiyerriọ, te ọ khẹke ne ima gha mwẹ izinegbe vbe egbe iran, ma ghi fẹko gha ru iyobọ ne iran ya rẹn ẹmwata ni rre Baibol sayọ. Ma ghaa ru vberriọ, emwi ne iran ruẹ ghi do mu iran ekhọe, iran ghi vbe gha mwẹ amuẹtinyan nọ wegbe. Ẹghẹ nii, iran ghi gha hoo ne iran gha tama emwa ọvbehe vbekpae emwi ne iran ruẹ. De emwi eso ne ima gha ru, ne ima ya ru iyobọ ne iran, ne iwinna ikporhu mieke na gha gbe iran otiti?

7. De vbene ima khian ya ru iyobọ ne ọmwa ne ima gu ruẹ e Baibol, ne iwinna ikporhu gha gbe ẹre otiti?

⁷ Ma sẹtin nọ ọmwa ne ima gu ruẹ e Baibol avbe inọta vbenian: “De ere ne u he miẹn ke ne u ya rẹn avbe ẹmwata ni rre Baibol, kevbe ne u ya suẹn gha ya avbe ilele ni rrọọ ru emwi vbe arrọọ ọghuẹ? Uwẹ ma ghee ẹre wẹẹ, te ọ khẹke ne emwa ọvbehe vbe rẹn avbe ẹmwata na ra? Vbọ khẹke ne u ru, ne iran mieke na vbe rẹn avbe ẹmwata na?” (Itan 3:27; Mat 9:37, 38) U sẹtin ma re avbe asobọrrie ne ima loo vbe ikporhu. U ghi nọ rẹn wẹẹ, ‘Vbuwe avbe asobọrrie na, de ne u yayi wẹẹ, ọ gha yẹẹ emwa ruẹ vbuwe ẹgbẹe, avbe ọse ruẹ, ra emwa ne uwa gba winna?’ Ọ gha ghi zẹ avbe asobọrrie nọ rẹnrẹn wẹẹ ọ gha yẹẹ emwa rẹn nẹ, u ghi viọ nibun nẹẹn. Iyeke ọni, uwẹ vbe ọre ghi koko ruẹ ọre yotọ, vbene ọ khian ya fẹko ya ẹwaẹn rhie asobọrrie na ne ọmwa hẹ. Ọmwa ne u gu ruẹ e Baibol gha suẹn gha ya iyẹn wewe nẹ, u ghi gha lelẹe yo ikporhu vbe ẹghẹ hia, ne u mieke na sẹtin ru iyobọ nọ khẹke nẹẹn.—Asan 4:9, 10; Luk 6:40.

8. Vbọzẹe nọ na khẹke ne emwa ne ima gu ruẹ e Baibol gha mwẹ ahoẹmwọmwa nọ wegbe daa Osanobua kevbe ogieva iran? (Vbe ya ghee ẹkpẹti nọ khare wẹẹ, “ Ru Iyobọ Ne Emwa Ne U Gu Ruẹ E Baibol, Ne Ahoẹmwọmwa Ne Iran Mwẹ Ne Osanobua Gha Wegbe Sayọ.”)

⁸ Yerre wẹẹ, te Jesu wẹẹ ne ima gha maa emwa ọvbehe emwi, ne iran “gha ru emwi hia” nọ yi ẹre iyi ne ima. Usun iyi na, ọre uhi eva ni ghi ru ekpataki sẹ. Ọni ọre na hoẹmwẹ Osanobua kevbe ogieva ima. (Mat 22:37-39) Vbe ẹi re te ima hoẹmwẹ Osanobua kevbe ogieva ima, ma i khian sẹtin kporhu. Sokpan, vbọ gha de ọghe na suẹn  gha kporhu, emwa eso ne ima gu ruẹ e Baibol ghi gha si egbe rhunmwuda ohanmumwẹ. Ọ khẹke ne ima gha rhie igiọdu ne iran wẹẹ, e Jehova gha ru iyobọ ne iran ya gha mwẹ udinmwẹ. (Psm 18:1-3; Itan 29:25, NW) Ẹkpẹti nọ rre ako iruẹmwi na, gi ima rẹn vbene ima khian ya ru iyobọ ne emwa ne ima gu ruẹ e Baibol, ne ahoẹmwọmwa ne iran mwẹ ne Osanobua gha wegbe yọ. Deba ọni, de vbene etẹn vbuwe iko khian ya ru iyobọ ne emwa na gu ruẹ e Baibol, ne ahoẹmwọmwa ne iran mwẹ ne Osanobua kevbe ogieva iran mieke na gha wegbe yọ?

9. De vbene ọmwa nọ ruẹ imọto ya ruẹ emwi hẹ vbe ọ ghaa rre odẹ?

⁹ Gia werriegbe guan kaẹn igiemwi ọghe ọmwa nọ ruẹ imọto. Ọ ghaa fi imọto khian, ọ ghi gha ruẹ emwi vbe obọ ọmwa nọ maa re imọto, ọ ghi vbe gha ruẹ emwi vbe obọ avbe driver ọvbehe ni rre odẹ, ni guẹ vbene a ya fi imọto hẹ. Vbe igiemwi, ọmwa nọ maa re imọto gha bẹghe vbene driver ọvbehe ya fẹko bi egbe ne imọto ọvbehe vbe odẹ, ọ ghi rhie ekhọe ọmwa nọ ruẹ imọto nii ghee emwi ne driver nii ru. Ọ gha vbe bẹghe vbene driver ọvbehe ya fẹko si ukpa imọto ọghẹe kotọ, ne emwa ọvbehe ni fi imọto dee mieke na ye gha bẹghe odẹ, ọ ghi vbe rhie ekhọe ọmwa nọ ruẹ imọto nii ghee ẹre. Igiemwi vbenian gha ru iyobọ ne ọmwa nọ ruẹ imọto ya rẹn vbene ọ khẹke nọ ya gha fi imọto vbe ọ ghaa rre odẹ.

10. Vbọ khian ru iyobọ ne ọmwa na gu ruẹ e Baibol ya gha mwẹ alaghodaro?

¹⁰ Erriọ vbe ye, ọmwa na gu ruẹ e Baibol nọ hoo nọ gha rre odẹ ọghe ẹmwata na, gha wa miẹn emwi nibun ruẹ vbe obọ ọmwa nọ maa re emwi, sokpan emwi wa bun nọ gha vbe miẹn ruẹ vbe obọ etẹn ọvbehe vbuwe iko. Nọnaghiyerriọ, iko na yo gha wa ru iyobọ ne emwa ne ima gu ruẹ e Baibol ya gha mwẹ alaghodaro. Vbọ ya ima kha vberriọ? Emwi ne iran ruẹ vbe iko gha ya iran gha mwẹ irẹnmwi sayọ, ọna ẹre ọ khian ghi ya amuẹtinyan ọghe iran wegbe, ẹghẹ nii, ahoẹmwọmwa ne iran mwẹ ne Osanobua ghi do wegbe yọ. (Iwinna 15:30-32) Deba ọni, ọmwa ne ima gu ruẹ e Baibol gha rrie iko, ma ghi gie etẹn nikpia kevbe etẹn nikhuo ni rre uwu iko ma rẹn, ne ima rẹnrẹn wẹẹ ọ gha rherhe sẹtin guobọ re. Ọ gha wa miẹn igiemwi ọghe etẹn nibun vbuwe iko, ni rhiẹre ma wẹẹ iran hoẹmwẹ e Jehova kevbe ogieva iran. Gia ziro yan igiemwi eso.

11. De igiemwi ọghe etẹn eso vbuwe iko nọ gha sẹtin ru iyobọ ne ọmwa na gu ruẹ e Baibol?

¹¹ Ọmwa na gu ruẹ e Baibol, ne irẹn ọkpa fẹko koko emọ khian gha wa miẹn emwi nibun ruẹ, vbe obọ ọtẹn nokhuo vbuwe iko, nọ vbe werriẹ aro daa isievẹn vberriọ. Ọ gha bẹghe vbene ọtẹn nokhuo na, ya hia nọ gha yo iko vbe ẹghẹ hia, ke irẹn ke ivbi ẹre, ẹi mwẹ ọ ma gha hoo nọ vbe ya egbe taa ẹre. Ọmwa na gu ruẹ e Baibol nọ ma sẹtin ban esiga na si, gha wa miẹn emwi ruẹ vbe igiemwi ọghe ọtẹn nọ ka gha si esiga, nọ ghi do ban rẹn. Ọtẹn na sẹtin tama rẹn, vbene ahoẹmwọmwa ne irẹn mwẹ ne Jehova ya ru iyobọ ne irẹn ya ban esiga na si. (2 Kọr 7:1; Fil 4:13) Ọtẹn na gha ghi ta okha ọghẹe ma rẹn nẹ, ẹi mwẹ ọ ma gha mwẹ ilẹkẹtin wẹẹ, irẹn gha vbe sẹtin ban esiga na si. Ọvbokhan okhuo na gu ruẹ e Baibol gha wa miẹn emwi nibun ruẹ vbe obọ ọtẹn nokhuo nọ re igbama vbuwe iko, nọ wa ghọghọ vbe ẹghẹ hia. Ọ gha bẹghe vbene ọtẹn nokhuo na ya ghọghọ hẹ, ọ ghi gha hoo nọ rẹn evbọ yae ghọghọ.

12. Vbọzẹe ne ima gha na sẹtin kha wẹẹ, etẹn hia vbuwe iko mwẹ emwi ne iran gha sẹtin ru, ne ọmwa na gu ruẹ e Baibol mieke na gha mwẹ alaghodaro?

¹² Ọmwa na gu ruẹ e Baibol gha ghi guobọ etẹn ughughan nẹ vbuwe iko, igiemwi esi ọghe iran ghi ru iyobọ nẹẹn ya rẹn emwi ne Jesu yae kha, nọ na wẹẹ ne ima hoẹmwẹ Osanobua kevbe ogieva ima. (Jọn 13:35; 1 Tim 4:12) Deba ọni, zẹvbe ne ima ka ruẹ ọre ban, ọmwa na gu ruẹ e Baibol nọ werriẹ aro daa isievẹn eso, gha wa miẹn emwi nibun ruẹ vbe obọ etẹn ni ka werriẹ aro daa isievẹn vberriọ. Ọ gha bẹghe vbene etẹn na, ya sẹtin ru afiwerriẹ nọ khẹke vbe arrọọ  ọghe iran, nọ zẹe ighẹ iran do khian erhuanegbe Kristi, ọ ghi vbe rẹn wẹẹ, irẹn tobọ irẹn gha vbe sẹtin ru afiwerriẹ vberriọ. (Diut 30:11) Etẹn hia vbuwe iko mwẹ emwi ne iran gha sẹtin ru, ne ọmwa na gu ruẹ e Baibol mieke na gha mwẹ alaghodaro. (Mat 5:16) Nọnaghiyerriọ, nọ egbuẹ wẹẹ, ‘De emwi ne I gha sẹtin ru, nọ gha rhie igiọdu ne ọmwa na gu ruẹ e Baibol nọ rrie iko?’

13-14. De obọ ne Jesu ya mu avbe ukọ ọghẹe, vbe orhiọn gbe ye iran iwu?

¹³ Ma hoo ne ima ru iyobọ ne etẹn ima ni worua vbe odẹ ọghe orhiọn, ne iran dọlegbe gha zọghae vbe iwinna ikporhu. Ma gha wa miẹn emwi ruẹ vbe obọ ne Jesu ya mu avbe ukọ ọghẹe, vbe ẹghẹ ne orhiọn ya gbe ye iran iwu.

¹⁴ Vbe ọ ghi bu ẹghẹ ne Jesu khian ya wu, “erhuanegbe hia . . . na sẹ ọre rae, iran keghi lẹẹ kua.” (Mak 14:50; Jọn 16:32) De emwi ne Jesu ghi ru vbe ọ ghi rhiọ kpaegbe nẹ, nọ ya ru iyobọ ne avbe ukọ ọghẹe ne orhiọn gbe ye ọre iwu? Vbobọvbobọ nii, ọ keghi tama erhuanegbe ẹre eso wẹẹ: “Wa ghẹ gie ohan mu uwa, wa ya khama avbe etẹn mwẹ [wẹẹ I rhiọ kpaegbe nẹ].” (Mat 28:10a) Jesu ma gi egbe avbe ukọ ọghẹe wọọ re. Agharhemiẹn wẹẹ iran ka lẹẹ sẹrae, ọ na ye tie iran “etẹn mwẹ.” Ọmwa nọ mwẹ ekhọe itohan kevbe ekhọe ayabọ ẹre Jesu khin, zẹvbe ne Jehova vbe ye.—2 Ọba 13:23.

15. De aro ne ima ya ghee etẹn ni worua?

¹⁵ Ọ mwẹ etẹn eso ni worua vbe odẹ ọghe orhiọn. Agharhemiẹn wẹẹ etẹn vbenian i ghi mwẹ obọ vbe iwinna ikporhu, etẹn ima ẹre iran ye khin. Ma wa mu ẹmwẹ iran roro, erriọ ima vbe ya hoẹmwẹ iran! Ma wa ye yerre, iwinna ne iran winnaẹn vbe ugamwẹ e Jehova vbe ẹghẹ nọ gberra. Eso rrọọ ni ya ukpo nibun ga e Jehova, a te miẹn wẹẹ iran dobọ yi. Ma i khian sẹtin mianmian iran. (Hib 6:10) Vbene ẹmwata, ẹmwẹ etẹn na wa da ima! (Luk 15:4-7) Zẹvbe ne Jesu ya rhiẹre ma wẹẹ, irẹn mwẹ amuroro daa avbe ukọ ọghẹe, de vbene ima khian ya rhiẹre ma wẹẹ, ma mu ẹmwẹ etẹn vbenian roro?

16. Vbe ima khian ya rhiẹre ma wẹẹ, ma mu ẹmwẹ etẹn ima ni worua roro?

¹⁶ Fẹko gi iran rẹn wẹẹ, u hoo ne iran dọlegbe suẹn gha yo iko. Odẹ ọkpa ne Jesu ya rhie igiọdu ne avbe ukọ ọghẹe vbe ẹghẹ ne orhiọn ya gbe ye iran iwu, ọre nọ na gie na tie iran gha die iko ọkpa nọ gu iran do. (Mat 28:10b; 1 Kọr 15:6) Deghẹ u rẹn ọtẹn rhọkpa nẹi ghi yo iko, u sẹtin vbe rhie igiọdu nẹẹn, nọ suẹn gha yo iko. Ọ khẹke ne ima rẹn wẹẹ, emwa eso i khian wa ya uhukpa suẹn iko vbe ima gha rhie igiọdu ne iran, ne iran ru vberriọ, rhunmwuda ọni, ọ ma khẹke ne ima gi egbe iran wọọ ima. Ẹi mwẹ Jesu ma gha ghọghọ, vbe ọ bẹghe ẹre wẹẹ, avbe ukọ ọghẹe gele rrie iko ne irẹn na gie na tie iran.—Yae taa ebe Matiu 28:16 kevbe Luk 15:6.

17. Vbọ khẹke ne ima ru deghẹ ọtẹn nọ worua na rrie Ọgua Arriọba?

¹⁷ Iran gha rre, ya ekhọe hia gbe ọbokhian ne iran. Vbe erhuanegbe Jesu ghi rrie iko ne Jesu na gie na tie iran, Jesu keghi ya ekhọe hia gbe ọbokhian ne iran; ọ ma gha khẹ ne iran ka bu irẹn gha dee nẹ, irẹn ke gu iran guan, nọghayayerriọ, ọ na khian bu iran, ya gu iran guan. (Mat 28:18, NW) Vbọ khẹke ne ima ru deghẹ ọtẹn nọ worua na rrie Ọgua Arriọba? Ọ khẹke ne ima bu ẹre, ne ima ya ekhọe hia gbe ọbokhian nẹẹn. Ma sẹtin gha roro ẹre wẹẹ, ma ma rẹn emwi ne ima khian tama rẹn. Sokpan ma sẹtin wa tama rẹn wẹẹ, ẹko hia wa sẹ ima ọyẹnmwẹ ne ima na dọlegbe miẹn ọnrẹn. Vbọrhirhighayehẹ, ma ghi hia ne ima ghẹ ru emwi, ra ne ima ghẹ ta ẹmwẹ nọ gha ya ekhue muẹn.

18. De vbene ima khian ya rhie igiọdu ne etẹn ni worua?

¹⁸ Gha rhie igiọdu ne iran. Ọ gha kẹ, erhuanegbe Jesu ghaa roro ẹre wẹẹ, iran i khian sẹtin kporhu iyẹn nọ maan la uhunmwu otagbọn hia zẹvbe ne Jesu wẹẹ ne iran ru ẹre. Jesu keghi rhie  igiọdu ne iran wẹẹ: “I gu uwa rrọọ vbe ẹghẹ hia.” (Mat 28:20, NW) Ẹmwẹ na gele rhie igiọdu ne iran ra? Kakabọ. Vbọ ma he kpẹẹ vba, iran kegha “yo dọmwadẹ owa ya gha maa emwa emwi kevbe ne iran gha kporhu iyẹn nọ maan.” (Iwinna 5:42) Etẹn ni worua sẹtin gha roro ẹre wẹẹ, iran i khian ghi sẹtin mwẹ obọ vbe iwinna ikporhu, rhunmwuda ọni, te ọ khẹke ne ima gha rhie igiọdu ne iran. Ma sẹtin gi iran rẹn wẹẹ, iran gha ye sẹtin gha kporhu, rhunmwuda etẹn ni rre uwu iko rre iran iyeke. Iran gha ghi mu egbe ne iran ya suẹn ikporhu, ma sẹtin lele iran ladian. Iran gha ghi gele suẹn ikporhu nẹ, ẹi mwẹ iran ma gbọyẹmwẹ ye iyobọ ne ima ru ne iran. Ma ghaa ya obọ esi mu etẹn ni worua, ma na ye gha ghee iran zẹvbe etẹn ima, ọna sẹtin gua iran kpa ya dọlegbe suẹn gha zọghae. Ọ ghaa yerriọ, etẹn hia ni rre uwu iko ghi gha ghọghọ!

19. De emwi ne ima mu egbe ne ima ya ru? Vbọzẹe?

¹⁹ De ẹghẹ ne ima khian ya dobọ iwinna ikporhu yi? Vbe ẹi re te ọ sẹ ufomwẹ agbọn na nẹ, ma i khian dobọ yi. (Mat 28:20, NW) Ma gha gele sẹtin rhiegbe ye iwinna na, ya sẹ ufomwẹ ra? Ẹẹn, ma mu egbe ne ima ya ru vberriọ! Ekhọe hia ẹre ima ya loo ẹghẹ, ẹrhiọn kevbe emwi ewe ọghe ima, ne ima mieke na sẹtin ru iyobọ ne “emwa ni gele hoo ne iran gha mwẹ arrọọ ọghe etẹbitẹ.” (Iwinna 13:48, NW) Ma ghaa ru vberriọ, ọ rhiema wẹẹ, te ima lele igiemwi ọghe Jesu. Jesu khare wẹẹ: “Evbare mwẹ ọrọre ne I họn ẹmwẹ ọmwa ne ọ gie mwẹ uhunmwu, ne I vbe winna okhuo ne ọ fian mẹ fo.” (Jọn 4:34; 17:4) Erriọ ima wa vbe hoo ne ima winnaẹn fo ighẹ iwinna ne Jesu waa ima re. (Jọn 20:21) Ma vbe hoo ne emwa ọvbehe deba ima rhiegbe ye iwinna na sẹ ufomwẹ, ya sẹ egbe etẹn ima ni te worua vbe odẹ ọghe orhiọn.—Mat 24:13.

20. Zẹvbe nọ rre ebe Filipai 4:13, vbọ ya ima mwẹ ilẹkẹtin wẹẹ, ma gha sẹtin musọe vbe iwinna ne Jesu waa ima re?

²⁰ Ẹmwata nọ wẹẹ, iwinna ne Jesu waa ima re i wa re iwinna nọ khuẹrhẹ. Vbọrhirhighayehẹ, ẹi re ẹtin obọ ima ẹre ima khian ya ru iwinna na. Jesu gi ima rẹn wẹẹ, irẹn rre ima iyeke. Ugbẹnvbe a miẹn wẹẹ emwa ni “winna ne Osanobua” kevbe “eguọmwadia e Kristi” ẹre ima khin, ma mwẹ ilẹkẹtin wẹẹ, e Jehova vbe Jesu gha ru iyobọ ne ima ya musọe. (1 Kọr 3:9; 2 Kọr 2:17) Ukpamuyọmọ nọkhua nọ, ne ima na mwẹ obọ vbe iwinna na kevbe ne ima na ru iyobọ ne emwa ọvbehe ya gha mwẹ obọ vbọ. Ọna ẹre ọ si ẹre ne ima na ya ekhọe hia ru ẹre!—Tie Filipai 4:13.