1-2. (a) De emwi ne arriọba khian ya wewe vbe ẹghẹ nẹi khian ghi kpẹẹ gbe na? (b) De avbe inọta nọ khẹke ne ima rhie ewanniẹn yi?

MUẸN roro vbene ọ khian gha ye hẹ, vbe arriọba gha ghi yae wewe wẹẹ iran mwẹ ‘ọfunmwegbe kevbe agbẹkunsotọ’ nẹ. Iran sẹtin gha roro ẹre wẹẹ, te ọfunmwegbe ghi wa rre ehe hia vbe uhunmwu otagbọn na. Iran ghi vbe gha hoo ne ima yayi wẹẹ, iran gha sẹtin sọfurre ye ọlọghọmwa hia ne emwa nagbọn werriẹ aro daa. Sokpan iran i khian sẹtin da obọ re yi ighẹ emwi ọhanabe nọ khian rhuan iran! Vbọzẹe? Rhunmwuda, e Baibol tae yotọ nẹ wẹẹ, “Orriọkhọ [ra ọguọghua] ghi de gbe iran vbe udemwurri. Ọkpa ne ọ ra miẹn uhunmwu ẹi rrọọ.”—1 Tẹs 5:3.

² Ọ mwẹ inọta eso ne kpataki nọ khẹke ne ima rhie ewanniẹn yi: De emwi nọ khian sunu vbe ẹghẹ ‘orueghe nọkhua’? De emwi ne Jehova hoo ne ima ru vbe ẹghẹ orueghe nọkhua? De vbene ima khian ya muegbe yotọ hẹ nia, ne ima mieke na sẹtin da imudiase ọghe ima yi vbe ẹghẹ orueghe nọkhua?—Mat 24:21.

3. Zẹvbe nọ rre ebe Arhie Maan 17:5, 15-18, de vbene Osanobua khian ya guọghọ e “Babilọn Nọkhua” hẹ?

³ Tie Arhie Maan 17:5, 15-18. “Babilọn Nọkhua” gha guọghua! Zẹvbe ne ima ka tae ban, arriọba emwa nagbọn i khian sẹtin da obọ re yi ighẹ emwi ọhanabe nọ khian sunu. Vbọzẹe? “Rhunmwuda Osanobua [gha rhiẹre] ye iran ekhọe, ne iran gha hoo ne iran ru vbene irẹn hoo.” De emwi nọ re ahoo ọghe Osanobua na? Ahoo ọghe Osanobua ọre na wabọ ugamwẹ ohoghe hia hin uhunmwu otagbọn na rre, ya sẹ egbe iyayi okulugbe. * Osanobua  gha rhie ẹmwẹ na ye ekhọe ọghe “igho igbe” ọghe “aranmwẹ oha ne ọ baa ọkpa.” Igho igbe nii keghi mudia ye ihe avbe arriọba ni ye “aranmwẹ oha nii” ike. Aranmwẹ oha nii ọre United Nations. (Arhie 17:3, 11-13; 18:8) Ẹghẹ ne avbe arriọba nii khian ya werriẹ aro nọ khọọ daa ugamwẹ ohoghe, ẹre orueghe nọkhua khian ya suẹn. Nọ ne emwi nọ khian sunu vbe ẹghẹ nii, ọ gbe obọ gbe unu ẹre khian gha nọ; te emwa hia khian họn rẹn vbe egbe.

4. (a) De emwi ne ima yayi wẹẹ, arriọba emwa nagbọn gha mu na wẹẹ, ẹre ọ si ẹre ne iran na guọghọ ugamwẹ ohoghe? (b) De emwi ne ima yayi wẹẹ emwa ni te ka rre ugamwẹ ohoghe khian ghi ru?

⁴ Ma ma rẹn emwi ne arriọba emwa nagbọn khian gu werriẹ aro nọ khọọ dae Babilọn Nọkhua. Iran sẹtin kha wẹẹ, ugamwẹ ohoghe ẹre ọ si ẹre ne ọfunmwegbe i na rre agbọn na, rhunmwuda nọ na fi ukpẹ ye emwamwa otu azẹ ọghe agbọn na. Ọ sẹtin vbe gha re rhunmwuda ne ugamwẹ ohoghe na fe ya obọ mu iso, kevbe ne ọ na mwẹ emwi ewe nibun. (Arhie 18:3, 7) Ọ khọ wẹẹ, ẹi re emwa hia ni rre ugamwẹ ohoghe ẹre obọ khian vba, vbe arriọba gha werriẹ aro nọ khọọ daa ugamwẹ ohoghe. Sokpan, ugamwẹ ohoghe tobọre ẹre arriọba emwa nagbọn khian wabọ re hin uhunmwu otagbọn na rre. A gha ghi guọghọ ugamwẹ ohoghe nẹ, emwa ni te ka rrọọ ghi do rẹn wẹẹ, te avbe ọkaolotu ọghe iran te wa mu iran rẹrẹ, rhunmwuda ọni, iran ghi wannọ egbe hin ugamwẹ ohoghe rre.

5. De eyan ne Jehova yan rẹn vbekpa orueghe nọkhua? Vbọzẹe?

⁵ E Baibol ma wa tama ima vbene ọ khian kpẹẹ sẹ ighẹ ẹghẹ na khian ya guọghọ e Babilọn Nọkhua, sokpan emwi ne ima rẹnrẹn ọre wẹẹ, ẹi khian kpẹẹ vbe otọ. (Arhie 18:10, 21) E Jehova yan rẹn nẹ wẹẹ, irẹn gha “fian avbe ẹdẹ” ọghe orueghe nọkhua kanmwa, ne “emwa irẹn ne ọ hannọ zẹ” mieke na miẹn fan, kevbe ne ugamwẹ ẹmwata mieke na ye gha rrọọ. (Mak 13:19, 20) Sokpan de emwi ne Jehova hoo ne ima ru, a te miẹn wẹẹ orueghe nọkhua suẹn rẹn, kevbe a te miẹn wẹẹ okuo Amagẹdọn rre?

6. Vbọ gberra na wannọ egbe hin ugamwẹ ohoghe rre, de emwi ọvbehe nọ khẹke ne ima ru?

⁶ Zẹ vbene ima ruẹ ọre vbe ako iruẹmwi nọ lae, e Jehova hoo ne eguọmwadia re wannọ egbe hin e Babilọn Nọkhua rre. Sokpan, ọ ma wa  fo ye evba. Te ima gha ta mu olọ yan rẹn wẹẹ, ma gha ga e Jehova vbe odẹ ọghe ẹmwata. Gia ziro yan odẹ eva ne ima khian ya ru ọna.

7. (a) De odẹ ne ima khian ya gha rhie owẹ lele avbe ilele nọ gbae ọghe Jehova? (b) De vbene ebe Hibru 10:24, 25 ya rhiẹre ma wẹẹ, ọ wa kakabọ ru ekpataki ne ima gha yo iko, katekate vbe ẹghẹ ne ima wa ye na?

⁷ Vbe okaro, te ọ khẹke ne ima gha rhie owẹ lele avbe ilele nọ gbae ọghe Jehova. Ma i khian gha mwẹ obọ vbe uyinmwẹ esakan ọghe agbọn na, ma i vbe kue yọ. Vbe igiemwi, aro dan ẹre ima ya ghee uyinmwẹ alamoghẹ nọ rhirhi gha khin, ya sẹ egbe orọnmwẹ ọghe emwa ni mwẹ ẹgẹn ọkpa. (Mat 19:4, 5; Rom 1:26, 27) Nogieva, te ọ khẹke ne ima ye gha deba etẹn ima ga e Jehova. Te ima khian ye gha koko ga e Jehova kugbe vbe ehe ke ehe nọ rhirhi gha khin, ọre Ọgua Arriọba nọ, ra owa ọghe ọtẹn ra vbe ẹkhokho. Ma i khian dobọ iko na do yi, ọ gha khọn rẹn ne emwi gha lọghọ. Vbene ẹmwata, ọ khẹke ne ima ye gha do iko “vbene a na wa miẹn nian wẹẹ, Ẹdẹ Nọyaẹnmwa sẹ otọ fo nẹ.”—Tie Hibru 10:24, 25.

8. De aro igiuhunmwu ne ima khian ya gha wewe vbe odaro?

⁸ Ọ khọ wẹẹ, igiuhunmwu ne ima khian ya gha wewe vbe ẹghẹ orueghe nọkhua gha lughaẹn ne igiuhunmwu ne ima ya wewe nia. Iyẹn nọ maan ọghe Arriọba Osanobua ẹre ima ya wewe nia, ma vbe hia ne ima ya emwa khian erhuanegbe ọghe Kristi. Sokpan vbe ẹghẹ nii, ẹmwẹ nọ wegbe vbe na ghee okuta avannukhunmwu ẹre ima khian ghi ya gha wewe. (Arhie 16:21) Egbọre iyẹn ọguọghua ọghe agbọn Esu ẹre ima khian ghi ya gha wewe. Ọ gha sẹ ẹghẹ, ma gha rẹn aro igiuhunmwu ne ima khian ya gha wewe, kevbe odẹ ne ima khian ya gha ru vberriọ. Obẹlẹ ne ima loo ya kporhu ke ọwara ukpo iyisẹn ọkpa gha dee, ẹre ima khian vbe gha loo vbe ẹghẹ nii ra? Ra obẹlẹ ọvbehe ẹre ima khian loo? Ma ma rẹn. Vbe nọ rhirhi gha ye hẹ, ọ khọ wẹẹ igiuhunmwu ọghe ọfuan nọ khian rhuan emwa nagbọn ẹre ima khian ya udinmwẹ gha tama emwa vbe ẹghẹ nii!—Ẹzik 2:3-5.

9. De vbene emwa nagbọn khian ya khuẹnniẹn ye igiuhunmwu ọghe ima hẹ? De ilẹkẹtin ne ima mwẹ?

⁹ Ọ gha kẹ, igiuhunmwu ne ima khian ya gha wewe gha ya ohu mu emwa nagbọn sẹrriọ wẹẹ, iran ghi gha hoo ne iran wabọ ima hin uhunmwu otagbọn na rre. Vbene ima hẹnhẹn egbe yan e Jehova nia, ne ọ ru iyobọ ne ima vbe iwinna ikporhu ọghomwa, erriọ ẹre ọ vbe khẹke ne ima hẹnhẹn egbe yan rẹn vbe ọ gha sẹ ẹghẹ nii. Ma mwẹ ilẹkẹtin wẹẹ, Osanobua gha rhie ẹtin ne ima, ne ima ya mu ahoo ọghẹe sẹ.—Mai 3:8.

10. Zẹvbe nọ rre ebe Luk 21:25-28, de vbene emwi khian gha ye hẹ ne emwa vbe ẹghẹ orueghe nọkhua?

¹⁰ Tie Luk 21:25-28. Egbe gha wa wọọ emwa nagbọn vbe ẹghẹ orueghe nọkhua, vbe iran gha bẹghe ẹre wẹẹ, emwi ne iran te mu ẹtin yan vbe agbọn na dihoi rua. Te iran khian gha rre uwu ‘ibavbaro,’ iran ghi gha guọ kpẹkpẹkpẹ rhunmwuda ne iran khian na werriẹ aro daa orueghe nọ ghi wegbe sẹ ne emwa nagbọn he miẹn. (Zẹf 1:14, 15) Te emwi khian wa vbe wegbe mu eguọmwadia e Jehova vbe ẹghẹ nii. Ma gha wa werriẹ aro daa ọlọghọmwa ni wegbe, rhunmwuda ne ima i na re ọkpa vbe agbọn na. Emwi eso na ya yin agbọn sẹtin do gha vbee ima.

11. (a) Vbọzẹe ne emwa khian na werriẹ aro daa Avbe Osẹe Jehova, iyeke vbe ugamwẹ ohoghe gha ghi guọghua nẹ? (b) Vbọzẹe nọ ma na khẹke ne ima gha mu ohan orueghe nọkhua?

¹¹ Emwa ne arriọba khian wabọ ugamwẹ ọghe iran vbe ẹghẹ nii gha ghi bẹghe ẹre wẹẹ, Avbe Osẹe Jehova ye rhiegbe ye ugamwẹ ọghe iran, ohu ghi gha mu iran. Te iran khian wa gha rhiẹre ma vbe ẹghẹ hia wẹẹ ohu Avbe Osẹe Jehova mu iran. Ọna sẹtin vbe rhiegbe ma vbe intanẹt. Te Setan kevbe ekpayẹ ọre khian gha khẹko ima, rhunmwuda ne ima khian na gha re ugamwẹ ọkpa nọ ghi kẹ vbe uhunmwu otagbọn na hia. Emwamwa ọghe iran, ọre ne iran te wabọ ugamwẹ hia hin uhunmwu otagbọn na rre. Sokpan  iran gha bẹghe ẹre wẹẹ ugamwẹ ọghe ima ye rrọọ, iran ghi werriẹ aro daa ima. Ẹghẹ na, ẹre iran khian ghi ya gha re Gọg ọghe Magọg. * Iran ghi si uhunmwu koko, ne iran werriẹ aro nọ khọọ daa emwa ọghe Jehova. (Ẹzik 38:2, 14-16) Ena hia sẹtin ya ohan gha mu ima, ugbẹnvbe a miẹn wẹẹ, ma ma wa rẹn vbene emwi hia khian gha ye hẹ vbe ẹghẹ nii. Vbọrhirhighayehẹ, emwi ọkpa nọ khẹke ne ima kọ ye orhiọn ọre wẹẹ: Ọ ma khẹke ne ima gha mu ohan orueghe nọkhua. E Jehova gha rhie adia nọ khẹke ne ima, ne ima mieke na miẹn uhunmwu. (Psm 34:19) Ẹghẹ nii, ma “ghi kpaegbe mudia” rhunmwuda ne ima na rẹn wẹẹ “ẹghẹ imienfan [ọghe ima] sẹ otọ fo.” *

12. De odẹ ne ‘ọviẹn nọ gia mu ẹtin yan kevbe nọ fuẹro’ ya mu ima egbe khẹ emwi ni khian sunu vbe odaro?

¹² Odẹ ughughan ẹre ‘ọviẹn nọ gia mu ẹtin yan kevbe nọ fuẹro’ he ya mu ima egbe yotọ, ne ima mieke na sẹtin da imudiase ọghe ima yi vbe ẹghẹ orueghe nọkhua. (Mat 24:45) Odẹ ọkpa ne iran ya ru ọna, ọre asikoko ọghe ukpo 2016-2018 ne iran ru emwamwa rẹn. Avbe ọta ne ima danmwehọ re vbe avbe asikoko nii, wa rhie igiọdu ne ima, ne ima gha mwẹ avbe akpa ni gha ru iyobọ ne ima, zẹvbe ne ima ya sikẹ ẹdẹ ọghe Jehova. Gia dọlegbe ziro yan avbe akpa na.

13. De emwi nọ khian ya ima gha mwẹ ẹkoata dae Jehova? Vbọzẹe nọ na khẹke ne ima ru vberriọ nia?

¹³ Ẹkoata: Uhunmwuta ọghe asikoko odin ọghe 2016 ọre “Gha Mwẹ Ẹkoata Dae Jehova!” Asikoko nii ya ima rẹn wẹẹ, ma ghaa gu e Jehova mwẹ asikẹgbe ne khuankhuankhuan, ma ghi gha mwẹ ẹkoata daa re. Ma vbe ruẹ ọre wẹẹ, emwi nọ khian ya ima sikẹ e Jehova sayọ, ọre deghẹ ima na gha ya ekhọe hia na erhunmwu gie ẹre kevbe deghẹ ima na gha ruẹ Evbagbẹn Nọhuanrẹn ẹsẹsẹmwẹse. Ma ghaa ru vberriọ, ma gha sẹtin zin egbe ọlọghọmwa nọ rhirhi gha khin. Gi ima gha mwẹ ọnrẹn vbe orhiọn wẹẹ, zẹvbe ne ufomwẹ ọghe agbọn e Setan na ya sikẹ otọ, te ima khian gha werriẹ aro daa emwi ughughan nọ gha danmwẹ ẹkoata ne ima mwẹ dae Jehova kevbe Arriọba ọghẹe. Emwa sẹtin ye gha ya ima gbogiẹ. (2 Pit 3:3, 4) Emwi nọ khian ya emwa gha ru vberriọ, ọre rhunmwuda ne ima i na gu agbọn ru emwi ne iran ru. Te ọ khẹke ne ima gha mwẹ ẹkoata nia, ne ima mieke na sẹtin da imudiase ọghe ima yi vbe ẹghẹ orueghe nọkhua.

14. (a) De afiwerriẹ eso nọ khian rhiegbe ma vbe nọ dekaan emwa ni su vbe otu ọghe Jehova vbe uhunmwu otagbọn na? (b) Vbọzẹe nọ na khẹke ne ima lele adia na khian gha rhie ne ima vbe ẹghẹ nii?

¹⁴ Vbuwe ẹghẹ orueghe nọkhua, afiwerriẹ eso gha rhiegbe ma vbe nọ dekaan emwa ni su vbe otu ọghe Jehova vbe uhunmwu otagbọn na. Ọ gha sẹ ẹghẹ, Osanobua ghi si emwa na hannọ zẹ hia koko gha rrie ẹrinmwi, ne iran mieke na ya deba e Kristi khọn okuo Amagẹdọn. (Mat 24:31; Arhie 2:26, 27) Ọna rhiema wẹẹ, Ẹbu Nọ Su i khian ghi gu ima gha rre uhunmwu otagbọn na vbe ẹghẹ nii. Sokpan, ọna ma rhiema wẹẹ, te oghẹn ne gbii khian ghi zagha. Etẹn ni gbegba ni rre usun oghẹn ne gbii, ẹre ọ khian ghi gha su ima vbe ẹghẹ nii. Osanobua gha loo etẹn na ya gha rhie adia ne ima vbe ẹghẹ nii, ọ khẹke ne ima lele adia nii, ne ima ya rhiẹre ma wẹẹ ima mwẹ ẹkoata dae Jehova. Ma ghaa lele adia ne iran rhie ne ima, ẹre ima khian na miẹn uhunmwu!

15. De emwi nọ khian ya ima gha mwẹ izinegbe sayọ? Vbọzẹe nọ na ru ekpataki ne ima gha mwẹ izinegbe nia?

¹⁵ Izinegbe: Uhunmwuta ọghe asikoko odin  ọghe 2017 ọre “Ghẹ Gi Ẹtin Fuẹ!” Asikoko nii keghi ya ima rẹn emwi nọ gha ru iyobọ ne ima ya sẹtin gha zin egbe avbe ọlọghọmwa. Ma ruẹ ọre wẹẹ, ọ maan ra ọ khọọ, emwi ọkpa nọ khian ya ima gha mwẹ izinegbe ọre deghẹ ima na mu ẹtin yan e Jehova. (Rom 12:12) Wa ghẹ gi ima mianmian eyan ne Jesu yan rẹn, ne ọ na kha wẹẹ: ‘Ọmwa nọ zin egbe ya sẹ ufomwẹ, ẹre ọ khian miẹn fan.’ (Mat 24:13) Ọna rhiema wẹẹ, ọ khẹke ne ima da imudiase ọghe ima yi, ọ gha khọn rẹn wẹẹ ima werriẹ aro daa ọlọghọmwa nọ wegbe. Adeghẹ ima na gha zin egbe avbe ọlọghọmwa ne ima werriẹ aro daa nia, ọ ghi do ya ima wegbe, ne ima mieke na sẹtin zin egbe avbe ọlọghọmwa ne ima khian werriẹ aro daa vbe ẹghẹ orueghe nọkhua.

16. De emwi nọ ya ima mwẹ udinmwẹ? De emwi nọ khian ya ima gha mwẹ udinmwẹ sayọ nia?

¹⁶ Udinmwẹ: Uhunmwuta ọghe asikoko odin ọghe 2018 ọre “Gha Mwẹ Udinmwẹ!” Asikoko nii ya ima rẹn wẹẹ, ẹi re rhunmwuda irẹnmwi ra ẹtin ọghe obọ ima ẹre ọ khian ya ima gha mwẹ udinmwẹ. Vbene ọ vbe ye ne izinegbe, emwi ọkpa nọ khian ya ima gele gha mwẹ udinmwẹ ọre deghẹ ima na mu ẹtin yan e Jehova. Emwi nọ khian ru iyobọ ne ima ya mu ẹtin yan e Jehova ọre, deghẹ ima na gha tie Evbagbẹn Nọhuanrẹn vbe ẹdẹgbegbe, ma ghi vbe gha ru erria yan odẹ ne Jehova ya miẹn emwa rẹn fan vbe ẹghẹ nọ gberra. (Psm 68:20; 2 Pit 2:9) Ẹghẹ ne agbẹnvbo khian ya werriẹ aro nọ khọọ daa ima vbe ẹghẹ orueghe nọkhua, ẹre ima ya gele gualọ udinmwẹ, ẹghẹ nii ẹre ọ vbe khẹke ne ima ya mu ẹtin yan e Jehova sẹ. (Psm 112:7, 8; Hib 13:6) Ma gha mu ẹtin yan e Jehova nia, ọ gha ru iyobọ ne ima ya gha mwẹ udinmwẹ vbe ẹghẹ ne Gọg khian ya werriẹ aro nọ khọọ daa ima. *

17. Vbọzẹe ne ima i na mu ohan okuo Amagẹdọn? (Ghee efoto nọ rre odaro ebe na.)

¹⁷ Zẹvbe ne ima ka ya unu kaan rẹn vbe ako iruẹmwi nọ lae, vbuwe ẹghẹ okiekie ẹdẹ ẹre ima nibun he ya yin agbọn. Sokpan, ma vbe mwẹ ayayẹro wẹẹ ima gha miẹn uhunmwu vbe orueghe nọkhua. Okuo Amagẹdọn ẹre ọ khian  ghi mu agbọn Esu na sẹ ufomwẹ. Vbọrhirhighayehẹ, ọ ma khẹke ne ima gha mu ohan. Vbọzẹe? Rhunmwuda, Osanobua ẹre ọ khian gbinna ne ima. (Itan 1:33; Ẹzik 38:18-20; Zẹk 14:3) Ọ gha sẹ ẹghẹ ne Jehova mwamwa yọ, Jesu Kristi, etẹn na hannọ zẹ ni rhiọ kpaegbe kevbe ọkhọngborrie ọghe avbe odibosa ghi mu okuo gha dia agbọn na. Iran ghi gu e Setan kevbe avbe ugbogiorinmwi ọghẹe khọn, vbe ya sẹ egbe ekpayẹ ọghe Esu hia ni rre uhunmwu otagbọn na.—Dan 12:1; Arhie 6:2; 17:14.

18. (a) De eyan ne Jehova yan rẹn? (b) De vbene ebe Arhie Maan 7:9, 13-17 ya ya ima mwẹ ilẹkẹtin hẹ wẹẹ ima gha miẹn fan vbe odaro?

¹⁸ E Jehova yan rẹn nẹ wẹẹ: “Emwi igbinna ọkpa ne ọ gha sẹtin kuan ruẹn egbe i rrọọ.” (Aiz 54:17) Eguọmwadia e Jehova ni re ‘oghẹn ne gbii’ ni mwẹ amuẹtinyan gha miẹn uhunmwu vbe orueghe nọkhua! Ẹghẹ nii, iran ghi gha rhie ugamwẹ nọhuanrẹn ne Osanobua vbe etẹbitẹ. (Tie Arhie Maan 7:9, 13-17.) E Baibol wa rhie ilẹkẹtin ne ima wẹẹ, ma gha miẹn uhunmwu vbe odaro! Ma rẹnrẹn wẹẹ e Jehova keghi “degue ọmwa ne ọ gia mu ẹtin yan.” (Psm 31:23) Emwa hia ni hoẹmwẹ e Jehova kevbe ni rhie urhomwẹ nẹẹn gha bẹghe ẹre, vbe Jehova gha ya eni ẹnrẹn khian nọhuanrẹn.—Ẹzik 38:23.

19. De ayayẹro nọ hiunsi ne ima mwẹ?

¹⁹ Muẹn roro aro emwa ni khian gha rre agbọn ọgbọn. A gha wẹẹ na gie uyinmwẹ nọ khian gu emwa obọ ro vbe ẹghẹ nii vbe ebe 2 Timoti 3:2-5, ọ gha wa lughaẹn ne vbene ọ ye na. (Ghee ne ẹkpẹti “Aro Uyinmwẹ Nọ Khian Gu Emwa Obọ Ro Vbe Ẹghẹ Nii.”) Ọtẹn Nokpia George Gangas, * nọ ghaa re ọkpa vbe Ẹbu Nọ Su keghi gie vbene emwa khian gha ye hẹ vbe agbọn ọgbọn. Ọ keghi kha wẹẹ: “Agbọn gha rhiẹnrhiẹn gbe vbe ẹghẹ nii! Emwa hia ghi gha ga e Jehova. Vbene ẹi khian ghi kpẹẹ gbe, u ghi do gha rre agbọn ọgbọn. Ma hia ghi gha rrọọ vbe etẹbitẹ rhunmwuda, e Jehova ne Osa ọghe ima, Osa ọghe etẹbitẹghori ẹre nọ.” Ayayẹro nọ hiunsi ẹre ọna wa khin!