1. Vbọzẹe nọ na khẹke ne ima gha ga e Jehova ọkpa?

E JEHOVA ọkpa ẹre ọ khẹke ne ima gha ga, rhunmwuda irẹn ẹre ọ yi ima, irẹn ẹre ọ vbe zẹe ighẹ ima rre agbọn. (Arhie 4:11) Vbọrhirhighayehẹ, ọ khẹke ne ima gha begbe. Agharhemiẹn wẹẹ ima hoẹmwẹ e Jehova, kevbe wẹẹ ima vbe rhie ọghọ nẹẹn, emwi eso sẹtin mu idobo ye ima egbe, ne ima ghẹ ghi ya ekhọe hia gha ga e Jehova. Ma gha ziro yan vbene ọna gha ya sẹtin sunu hẹ. Sokpan, gi ima ka guan kaan emwi nọ demu, na gha rhie ugamwẹ na ma gua ne Jehova.

2. Zẹvbe nọ rre ebe Ẹksọdọs 34:14, de emwi ne ima khian ru deghẹ ima na gele ya ekhọe hia hoẹmwẹ e Jehova?

² Zẹvbe ne Baibol ya gie ẹre, ma gha gele hoẹmwẹ e Jehova, ma ghi ya ekhọe hia gha gae. Ma i khian gi ahoẹmwọmwa ne ima mwẹ ne ọmwaikọmwa ra emwi ke emwi sẹ ahoẹmwọmwa ne ima mwẹ ne Jehova.—Tie Ẹksọdọs 34:14.

3. Vbọzẹe ne ima na hoẹmwẹ e Jehova?

³ Ẹi re te ima wa gheghe hoẹmwẹ e Jehova kẹkan. Emwi nibun ne ima ruẹ vbekpa re ẹre ọ ya ima hoẹmwẹ ọnrẹn. Zẹvbe ne ima ya ruẹ vbekpa re, ma na do bẹghe avbe akpa esi esi ne ọ mwẹ. Ma na do rẹn emwi ni yẹẹ ọre kevbe emwi ni sọnnọ ọnrẹn. Ma na vbe do bẹghe odẹ ne ọ ya ru iyobọ ne ima, kevbe emwamwa ne irẹn mwẹ ne ima ne emwa nagbọn. Ma keghi vbe do gbọyẹmwẹ ye ukpamuyọmọ nọ mu ne ima, ne ọ na kie ẹkpotọ yọ ne ima gha re ọsie ọre. (Psm 25:14) Emwi hia ne ima ruẹ vbekpa Ayi ọghomwa keghi ya ima sikẹ ọre sayọ.—Jems 4:8.

4. (a) De emwi ne Esu ru, ne ima ghẹ mieke na ya ekhọe hia hoẹmwẹ e Jehova? (b) De emwi ne ima khian ziro yan vbe ako iruẹmwi na?

⁴ Rhunmwuda ne Esu na kha yan agbọn na, irẹn keghi ya  emwa roro ẹre wẹẹ, emwi ikpakpa ne iran gualọ ẹre ọ ru ekpataki sẹ vbe arrọọ ọghe iran. Ọ vbe yae lọghọ ne ima sẹtin gha gbanegbe ne emwi dan. (Ẹfis 2:1-3; 1 Jọn 5:19) Irẹn ma hoo ne ima hoẹmwẹ e Jehova ọkpa, irẹn vbe hoo ne ima hoẹmwẹ emwi ọvbehe. Gi ima ziro yan odẹ eva ne Esu ya ru ọna. Nokaro, irẹn keghi danmwẹ ima ne ima gha khu igho khian. Nogieva, ọ keghi hia ne ọ ya ima zẹ irọkhegbe nọ ma khẹke.

5. Vbọzẹe nọ na khẹke ne ima gha begbe, ne ima ghẹ do hoẹmwẹ igho?

⁵ Ai miẹn ọmwa nẹi hoo ne irẹn gha mwẹ igho, rhunmwuda, ọmwa nẹi mwẹ igho, ọ lọghọ ọ ke miẹn evbare ẹdẹ re, ọ lọghọ ọ ke miẹn ukpọn yọ, ọ vbe lọghọ ọ ke miẹn ehe dia. Vbọrhirhighayehẹ, ọ khẹke ne ima gha begbe, ne ima ghẹ do hoẹmwẹ igho gberra egbe. Te emwa ni rre uwu agbọn wa hoẹmwẹ igho kevbe emwi ke emwi ne igho sẹtin dẹ. (2 Tim 3:2) Jesu rẹnrẹn wẹẹ, erhuanegbe irẹn sẹtin vbe do hoẹmwẹ igho gberra egbe. Ọni ẹre ọ si ẹre ne irẹn na kha wẹẹ, “Orhunmwu ọkpa ne ọ gha sẹtin ga arowa eva, ẹi rrọọ. Ọ gha hoẹmwẹ ọkpa, ọ ghi gha khuiwu enogieva, ọ gha họn ẹmwẹ ne ọkpa, ọ ghi gha yan enọkpa zẹ, wẹ i sẹtin ga Osanobua ga Igho.” (Mat 6:24) Adeghẹ ọmwa nọ ga e Jehova na gha loo ẹghẹ nibun ya khu ẹfe, ọ ghi yevbe na miẹn wẹẹ te ọ ga arowa eva. Ọ ghi do yevbe na miẹn wẹẹ, ugamwẹ na gua re ẹre irẹn ghi rhie ne Jehova.

6. Vbe ima miẹn ruẹ vbe adia ne Jesu rhie ne iko nọ ghaa rre Laodisia?

⁶ Vbe ọ ghi bu ufomwẹ ọghe orre nokaro, etẹn eso ni ghaa rre iko ọghe Laodisia na gha ya emwi ne iran mwẹ rhuọ. Eso vbuwe iran na gha kha wẹẹ: “I fe nẹ, obọ gue mwẹ, emwi ne I hoo gba mẹ.” Sokpan vbe odaro e Jehova kevbe Jesu, “agbọn ọrhiae na gbe ọsọre na, ọre [iran ghaa] ye.” Jesu keghi tama  edọmwadẹ iran wẹẹ: “Ovbiogue ẹre u khin, te u bannọ ruan, te u rhu aro.” Ẹi re rhunmwuda ẹfe ọghe iran ẹre Jesu gu rhie adia ne iran, sokpan emwi ne ọ gu rhie adia ne iran ọre wẹẹ, iran keghi gi iwinna ẹfe na khu khian mu iran sẹrriọ wẹẹ, iran na do fẹko gha khian rree ne Jehova. (Arhie 3:14-17) Ma gha bẹghe ẹre wẹẹ te ima khian ghi hoẹmwẹ igho gberra egbe, ọ khẹke ne ima dia iziro ọghe ima vbobọvbobọ. (1 Tim 6:7, 8) Adeghẹ ima ma ru vberriọ, ma sẹtin do gha rhie ugamwẹ na gua re ne Jehova. Irẹn i khian miẹn ugamwẹ vberriọ yi. “Rhunmwuda Osanobua . . . i hoo ne a gha gu ẹre mwa ẹrrẹe.” (Diut 4:24) De emwi eso nọ gha sẹtin ya ima do hoẹmwẹ igho gberra egbe?

7-9. De emwi ne u miẹn ruẹ vbe emwi ẹwaẹn ọghe Devid?

⁷ Gia ziro yan igiemwi ọghe Devid nọ rre United States. Ọdiọn nọ wa hia ẹsẹsẹmwẹse ẹre irẹn khin vbuwe iko. Irẹn khare wẹẹ, te irẹn wa rhiegbe ye iwinna ne irẹn na gha miẹn igho. Ọ wa gha mwẹ alaghodaro vbe isiwinna ọghẹe, iran wa vbe gha hae re igho ọrhẹnrhẹn. Uhiẹn te arriọba ọghe ẹvbo ne ọ ye wa vbe rẹn ọnrẹn zẹvbe ọkpa vbe usun emwa ni guẹ iwinna sẹ vbe ẹvbo nii. Ọtẹn na keghi wẹẹ, “Rhunmwuda ne I na gha mwẹ alaghodaro vbe isiwinna mwẹ, I na te gha roro ẹre wẹẹ, afiangbe ọghe Jehova nọ.” Sokpan, ẹmwata ẹre ọni gele khin ra?

⁸ Vbene ẹghẹ ya khian, e Devid na do bẹghe ẹre wẹẹ, iwinna ọghe irẹn fẹko ya irẹn khian rree ne Jehova nẹ kherhe kherhe. Irẹn keghi kha wẹẹ, “Ẹmwẹ iwinna mwẹ ẹre I ghi wa gha mu roro vbe ẹghẹ hia, uhiẹn vbe I ghaa rre iko ra ikporhu. I te wa gha miẹn igho ọrhẹnrhẹn, sokpan orhiọn mwẹ ma sotọ. I ma ghi vbe gha mwẹ ẹghẹ ne ọvbokhan mwẹ.”

⁹ E Devid keghi do bẹghe ẹre wẹẹ, ọ khẹke ne irẹn ru afiwerriẹ eso. Ọ na ghi ya tama ọmwa nọ winna lele wẹẹ, irẹn hoo ne irẹn fi ẹghẹ ne  irẹn ya winna werriẹ. Sokpan nọ winna lele ma kue yọ, rhunmwuda ọni, ọ na khu e Devid vbe iwinna. De emwi ne Devid ghi ru? Ọ khare wẹẹ, “Vbe ẹdẹ ghi gbe, I na mu obọ ye ebe wẹẹ, I hoo ne I suẹn gha ru iwinna arọndẹ ọghe ọyobọ vbe ẹghẹ hia.” Iwinna akpehuan ẹre Devid vbe ọvbokhan rẹn ghi gha ru, ne iran miẹn ya gha gaga egbe. Vbene ẹghẹ ya khian, e Devid keghi suẹn iwinna arọndẹ ọghe ẹghẹ hia, vbe ọ ghi zẹ kpẹẹ, ọvbokhan rẹn na vbe suẹn iwinna arọndẹ ọghe ẹghẹ hia. Agharhemiẹn wẹẹ iwinna ne emwa ma mobọ ka yọ, ẹre Devid vbe ọvbokhan rẹn ru ne iran ya gaga egbe, sokpan iran ma lele, rhunmwuda, ọni i re emwi nọ ru ekpataki ne iran. Ẹmwata nọ wẹẹ, igho ne iran ghi miẹn vbe uki nia ma zẹdẹ mwẹ eke nọ sẹ, vbe a gha yae taa igho ne iran te ka gha miẹn, sokpan igho ne iran miẹn ye sẹ iran gha loo. Emwi nọ ru ekpataki sẹ vbe arrọọ ọghe iran, ọre iwinna ugamwẹ ọghe Jehova. Iran vbe tobọre iran bẹghe ẹre nẹ wẹẹ, e Jehova gbaroghe ọmwaikọmwa nọ mu iwinna Arriọba Osanobua ye okaro.—Mat 6:31-33.

10. De vbene ima khian ya gbogba ga ẹkokoudu ọghe ima hẹ?

¹⁰ Ọre ovbiogue ẹre ima khin ra ọdafẹn, ọ ye khẹke ne ima gha gbogba ga ẹkokoudu ọghe ima. De vbene ima khian ya ru ọna hẹ? Ghẹ hoẹmwẹ igho gberra egbe. Ghẹ vbe gi iwinna ne u na miẹn igho ru ekpataki sẹ ugamwẹ e Jehova. De vbene u khian ya rẹn hẹ, deghẹ ọ te kẹ ruẹ ya gha ru vberriọ nẹ? U sẹtin nọ egbuẹ wẹẹ: ‘Mẹ mobọ mu ẹmwẹ iwinna roro vbe I ghaa rre iko ra ikporhu ra? Mẹ mobọ kpokpo egbe ba ẹmwẹ vbene agbọn khian ya maan mwẹ hẹ vbe odaro ra? Ẹmwẹ igho kevbe emwi ewe mobọ si ẹzọ ne imẹ vbe ọvbokhan mwẹ ra ọdafẹn mwẹ ra? Mẹ muegbe ne I ya ru iwinna ne emwa ma ka yọ, nọ gha kie ẹkpotọ mẹ ya ru sayọ vbe ugamwẹ e Jehova ra?’ (1 Tim 6:9-12) Ma ghaa mu avbe inọta na roro, ọ khẹke ne ima yerre wẹẹ, e Jehova hoẹmwẹ ima, ọ vbe rhie ilẹkẹtin ne ọmwaikọmwa nọ ya ekhọe hia gae wẹẹ: “Mẹ i ra sẹ ruẹ rae ẹdẹ, mẹ i ra he uwẹ ye otọ ẹdẹ.” Ọni ẹre ọ si ẹre ne ukọ e Pọl na kha wẹẹ: “Fannọ obọ igho ne a hoẹmwẹ ọnrẹn hin ẹdẹ agbọn ruẹn egbe rre.”—Hib 13:5, 6.

11. De emwi ne irọkhegbe gha sẹtin si ye ima egbe?

¹¹ E Jehova hoo ne ima gha sọyẹnmwẹ egbe, ọni ẹre ọ si ẹre nọ na khẹke ne ima zẹdia gha rọkhegbe. Evbagbẹn Nọhuanrẹn vbe kha wẹẹ, “emwi ne ọ maan sẹ ne ọmwa gha sẹtin ru ọrọre ne ọ gha re, ne ọ gha da kevbe ne ọ ya okhuan ne ọ khuaẹn gha zọmọ.”  (Asan 2:24) Vbọrhirhighayehẹ, emwi eso na ya rọkhegbe vbe agbọn na sẹtin mu ekhọe ima rhia. Ọ sẹtin mu uyinmwẹ esi ọghe ima rhia, ọ ghi do ya ima hoẹmwẹ emwi ni sọnnọ Osanobua.

12. Zẹvbe nọ rre ebe 1 Kọrinti 10:21, 22, vbọzẹe nọ na khẹke ne ima ya ẹwaẹn gha zẹ irọkhegbe?

¹² Ma hoo ne ima gha rhie ugamwẹ na ma gua ne Jehova, rhunmwuda ọni, ma i khian sẹtin gha rri evbare vbe eteburu “ọghe Nọyaẹnmwa” kevbe eteburu ọghe “avbe [ugbogiorinmwi].” (Tie 1 Kọrinti 10:21, 22.) Ọmwa ne ima hoẹmwẹ ọnrẹn, ẹre ima gu rri evbare. Ma gha zẹ irọkhegbe nọ vuọn ne igbinna oguo, orhiọn dan na gu muobọ, uyinmwẹ alamoghẹ ra emwi ke emwi nọ ma gua ilele ọghe Baibol ro, ọni rhiema wẹẹ, te ima ghi rri evbare ne eghian ọghe Osanobua le. Ọna sẹtin rhie ikuanegbe ne ima, ọ ghi vbe mu asikẹgbe ne ima gu e Jehova mwẹ rhia.

13-14. Zẹvbe ne ebe Jems 1:14, 15 rhiẹre ma, vbọzẹe nọ na khẹke ne ima gha begbe vbe aro ughe ne ima ghee? Ru igiemwi yọ.

¹³ Gia ziro yan odẹ eso ne irọkhegbe ya yevbe na ghee evbare. Ma gha sẹtin zẹ ne egbe ima, aro evbare ne ima gha re. Sokpan ma gha ghi rri evbare nii nẹ, ẹi re ima ẹre ọ khian ghi tae vbene ọ khian ya winna hẹ vbe egbe ima. Ma ghaa rri evbare esi, ma i khian gha khuọnmwi vbe ẹghẹ hia; sokpan ma ghaa rri evbare nẹi maan, emianmwẹ emianmwẹ ẹre ima khian gha khuọnmwi. Ma gha rri evbare nẹi maan, a sẹtin miẹn wẹẹ, ẹi khian wa si emianmwẹ ye ima egbe vbobọvbobọ nii, sokpan vbene ẹghẹ ya khian, ma ghi do gha họn rẹn vbe egbe.

¹⁴ Erriọ vbe nọ, ma gha sẹtin zẹ ne egbe ima, aro ughe ne ima gha ghee. Sokpan ma gha ghi ghee ughe nii nẹ, ekhọe ima ghi suẹn gha winna yan rẹn. Ma gha ghee ughe nọ maan, egbe ghi rọkhọ ima; sokpan ma gha ghee ughe nẹi maan, ọ ghi rhie ikuanegbe ne ima. (Tie Jems 1:14, 15.) A sẹtin miẹn wẹẹ, ẹi khian wa rhie ikuanegbe ne ima vbobọvbobọ nii, sokpan vbene ẹghẹ ya khian, ọ ghi do rhiegbe ma. Ọni ẹre ọ si ẹre ne Baibol na ya obọ sekhae ne ima wẹẹ: “Wa ghẹ rẹrẹ egbe uwa, ọmwa rhọkpa i sẹtin do Osanobua ọzuọ, emwi ne ọmwa kọe zẹẹ, ẹre ọ gha vbe rhọọ. Ọ gha kọ emwi ne egbe hoo ye ugbo, evba ẹre ọ ra na ya rhọ emwiorhọ uwu.” (Gal 6:7, 8) Uwa ma bẹghe ẹre wẹẹ, ọ wa kakabọ ru ekpataki, ne ima gbanegbe ne irọkhegbe nọ vuọn ne emwi ne Jehova wua?—Psm 97:10.

15. De emwi ne Jehova kpemehe ẹre ne ima, ne ima gha sọyẹnmwẹ ọnrẹn?

¹⁵ JW Broadcasting^® wa yẹẹ eguọmwadia e Jehova nibun na ghee, rhunmwuda uyinmwẹ esakan rhọkpa i rrọọ. Ọtẹn nokhuo ọkpa na tie ẹre Marilyn keghi kha wẹẹ: “JW Broadcasting wa ru iyobọ mẹ ya gha re ọmwa nọ mwẹ oghọghọ. Te orhiọn mwẹ wa sotọ vbe I ghaa ghee ẹre, rhunmwuda ai miẹn emwi ọkpa rhie fua vbọ. Ẹghẹ ke ẹghẹ ne iro ya han mwẹ, I ghi danmwehọ ọta ọkpa ni rre ototọ Ebe Ẹdẹ Na Ziro Yan Vbe Owiẹ Owiẹ. Ọ ghi wa rhie igiọdu mẹ. Ọna ẹre ọ ya mwẹ sikẹ e Jehova kevbe otu ọghẹe sayọ. Te JW Broadcasting wa fi arrọọ mwẹ werriẹ fẹfẹfẹ.” Uwẹ vbe sọyẹnmwẹ ẹse ọghe Jehova na ra? JW Broadcasting keghi mwẹ e vidio ni ladian vbe uki uki, gberra ọni, ọ vbe mwẹ avbe vidio ọvbehe, evba ya ehọ viọ kevbe ihuan ughughan ni rhie igiọdu ne ọmwa.

16-17. Vbọzẹe nọ na khẹke ne ima gha begbe, ne ima ghẹ ya gha loo ẹghẹ nọ bun gbe ye irọkhegbe? De emwi nọ khian ru iyobọ ne ima?

¹⁶ Ọ khẹke ne ima gha ya ẹwaẹn zẹ irọkhegbe, gberra ọni, ọ vbe khẹke ne ima gha begbe, ne ima ghẹ gha loo ẹghẹ nọ bun gbe yọ. Ma ghaa loo ẹghẹ nọbun ye irọkhegbe, ma i ghi miẹn ẹghẹ ya ru ọghe Jehova. Emwa nibun ma he ye rẹn inu ẹghẹ nọ khẹke ne iran gha loo ye irọkhegbe. Ọtẹn nokhuo ọkpa na tie ẹre  Abigail nọ rre ukpo 18 keghi kha wẹẹ: “I gha wa wiẹn egbua nẹ vbe ẹdẹ, ẹkpẹti ughe ẹre I ghi ya fẹko rọkhọ egbe. Sokpan I ma na yegbe, I sẹtin gbe inu ughaẹdẹ nọkhin vbe odaro ẹkpẹti ughe.” Ọtẹn nokpia ọkpa na tie ẹre Samuel nọ rre ukpo 21 na vbe kha wẹẹ: “Ugbẹnso, I ghi wa gha ghee avbe vidio ne kuẹi kuẹi nibun vbe intanẹt. Ọkpa ẹre I ya suẹn, sokpan I ke rẹn emwi nọ sunu, I ghi wa gbe ughaẹdẹ eha ra enẹ vbe evba.”

¹⁷ De emwi nọ khian ru iyobọ nuẹn, ne u ghẹ mieke na gha loo ẹghẹ nọ bun gbe ye irọkhegbe? Nokaro, ọ khẹke ne u rẹn inu ẹghẹ ne u loo ye irọkhegbe. U sẹtin gha gbẹnnẹ ọnrẹn ye otọ, inugba ne u ghee ẹkpẹti ughe vbe uzọla, inugba ne u la intanẹt kevbe ne u ya gbe gem vbe efoni ruẹ. U gha bẹghe ẹre wẹẹ u wa loo ẹghẹ nọ bun yọ, u ghi ru emwamwa nọ khẹke. U ghi ka mwamwa ẹghẹ yọ ne u khian ya gha ru avbe emwi ni ru ekpataki, u ke do mwamwa ẹghẹ ye irọkhegbe. Iyeke ọni, u ghi rinmwian e Jehova ne ọ ru iyobọ nuẹn ya sẹtin rhie owẹ lele emwamwa ne u ru. U gha ru emwamwa vbenian, u ghi miẹn ẹghẹ ya gha tie Baibol ne egbuẹ, u ghi miẹn ẹghẹ ya gha ru iruẹmwi ẹgbẹe, u ghi vbe miẹn ẹghẹ ya gha yo iko kevbe ikporhu. U ghaa ru ena hia, orhiọn ruẹ ghi vbe sotọ vbe u ghaa rọkhegbe, rhunmwuda u rẹnrẹn wẹẹ, u loo ẹghẹ nọ khẹke ya ru emwi ni ru ekpataki nẹ.

18-19. De vbene ima khian ya rhiẹre ma wẹẹ, ekhọe hia ẹre ima ya ga e Jehova?

¹⁸ Iyeke vbe Pita ghi guan kaan ufomwẹ ọghe agbọn e Setan nẹ, kevbe ọ ghi guan kaan agbọn ọgbọn nọ dee nẹ, ọ na kha wẹẹ: “Wa ne ọse mwẹ, vbuwe ne uwa na mudia khẹ Ẹdẹ ne ẹdẹrriọ, wa ziga ne uwa gha re ni hianrẹn kevbe ne ẹi mwẹ okan vbe odaro Osanobua, ne uwa gu ẹre gha rrọọ vbe ọfunmwegbe.” (2 Pit 3:14) Adeghẹ ima na lele ẹmwẹ ibude na, ma na hia vbe odẹ ke odẹ ne ima gha re emwa ni mwẹ uyinmwẹ nọhuanrẹn, kevbe ne ima gha re emwa ni huanrẹn vbe odẹ ọghe orhiọn, ọni rhiema wẹẹ, ugamwẹ na ma gua ẹre ima rhie ne Jehova.

¹⁹ Setan kevbe agbọn nọ kha yan gha ye gha danmwẹ ima, ne ima gha mu emwi ọvbehe karo ne ugamwẹ e Jehova. (Luk 4:13) Sokpan, ma i khian kue ne ọmwaikọmwa ra emwi ke emwi muẹn rhia, ugamwẹ ne ima rhie ne Jehova. Ma muegbe ne ima ya gha rhie ugamwẹ na ma gua ne Jehova, rhunmwuda irẹn ọkpa ẹre ọ khẹke ne ima gha ya ekhọe hia ga!