EMWA eso rrọọ ni loo emadogua ya ghee vbene dọmwadẹ ẹdẹ khian gha ye hẹ, deghẹ ovẹn gha yunmwu ra deghẹ amẹ gha rhọọ. Emwa vbenia gha bẹghe ẹre wẹẹ, okpẹhoho khian la vbe ẹdogbo ne emwa na wa kakabọ bun, iran ghi ya obọ sekhae ne emwa ni rre ẹdogbo nii. Vbọzẹe? Rhunmwuda iran ma hoo ne ẹbe rhuan iran.

Odẹ vberriọ ẹre Jehova vbe ya ya obọ sekhae ne emwa hia ni rre uhunmwu otagbọn na, rhunmwuda oguọghua nọ dee nọ wegbe sẹ okpẹhoho. De vbene ọ ya ya obọ sekhae ne iran hẹ? Vbọzẹe ne ima na mwẹ ilẹkẹtin wẹẹ, e Jehova keghi rhie ẹghẹ nọ taẹn ne emwa ne iran ya fi werriẹ? Ne ima ya miẹn ewanniẹn ọghe avbe inọta na, gi ima ka ziro yan odẹ eso ne Jehova ya ya obọ sekhae ne emwa, vbe ẹghẹ nọ gberra.

Ẹghẹ ke ẹghẹ ne Jehova khian ya bu ohiẹn emwa ni mema he ẹmwẹ ye ọre obọ vbe ẹghẹ nẹdẹ, ọ ghi ka ya obọ sekhae ne iran. (Itan 10:25; Jer 30:23) Ọ ghi vbe rhie ẹghẹ nọ taẹn ne iran, ne iran mieke na roro iro fi uyinmwẹ werriẹ. (2 Ọba 17:12-15; Neh 9:29, 30) Irẹn keghi vbe ru iyobọ ne iran, ne iran mieke na sẹtin fi werriẹ. Odẹ ọkpa ne irẹn ya ru ọna, ọre ne ọ na gie eguọmwadia ọghẹe ni mwẹ ẹkoata bu iran, ne iran ya gi iran rẹn wẹẹ, te ọ khẹke ne iran rherhe zẹ emwi ru, ne iran ghẹ mieke na fuan.—Emọs 3:7.

Ọkpa vbe eguọmwadia Osanobua nọ ru vberriọ ọre Noa. Ọwara ukpo nibun ẹre Noa ya gha ya udinmwẹ ya obọ sekhae ne emwa ni ru orukhọ wẹẹ, Osanobua khian do ya amẹ fuẹn agbọn na. (Gẹn 6:9-13, 17) Ọ na vbe gha tama iran emwi nọ khẹke ne iran ru, ne iran mieke na miẹn fan. Ọmwa “ne ọ ghaa kporhu ẹmwata” ẹre Noa wa gha khin.—2 Pit 2:5.

Agharhemiẹn wẹẹ e Noa te gha hia nọ ya obọ sekhae ne iran, iran ma họn. Iran ma gha mwẹ amuẹtinyan. Vbọ ghi sunu daa iran? Iran keghi fuan, Okpamẹ keghi “kpolo ehia gha rrie.” (Mat 24:39; Hib 11:7) Ẹghẹ ne ẹbe ghi ya rhuan iran, iran ma ghi sẹtin kha wẹẹ Osanobua ma ya obọ sekhae ne iran.

Ẹghẹ eso vbe gha rrọọ, ne Jehova ya loo ovbi ẹghẹ kherhe ya ya obọ sekhae ne emwa. Ọrheyerriọ, te ọ ye kie ẹkpotọ ne iran ya fi werriẹ. Vbe igiemwi, te Jehova ka wa ya obọ sekhae ne Ivbi Igipt, a te miẹn wẹẹ ọ hihiẹ Orueghe Igbe kue iran. Vbe a ghi tiẹre akhuẹ ne Jehova khian hihiẹ orueghe nogie ihinrọn kue Ivbi Igipt, ọ na gie Mosis kevbe Erọn ne iran ya ya obọ sekhae ne Fero kevbe eguọmwadia ẹre wẹẹ, okuta avannukhunmwu khian suẹn gha dele vbe otọ Igipt. Sokpan, Osanobua zẹdẹ kie ẹkpotọ ne iran, ne iran mieke na miẹn fan vbe orueghe nii ra? E Baibol keghi kha wẹẹ: “Afianma keghi fian eso vbe uwu ekhaẹmwẹ ọba Igipt rhunmwuda ẹmwẹ nẹ Nọyaẹnmwa tae, iran na viọ eviẹn kevbe emwirri la owa. Sokpan eso vbọ ma zẹ ye ẹmwẹ ne Nọyaẹnmwa tae, iran na sẹ eviẹn kevbe emwirri iran rae ye adesore.” (Ẹks 9:18-21) Ọna rhiema wẹẹ, te Jehova ya obọ sekhae ne iran, ne emwa ni họn ẹmwẹ vbuwe iran mieke na rherhe zẹ emwi ru, ne orueghe nii ghẹ fuẹn iran rua.

Vbe Osanobua khian vbe hihiẹ orueghe nogie igbe yan Igipt, ọ na vbe ya obọ sekhae ne Fero kevbe eguọmwadia re. Sokpan iran ma miẹn ọnrẹn yi. (Ẹks 4:22, 23) Rhunmwuda ne iran ma na họn ẹmwẹ ne Osanobua, ivbi iran nikpia ne ọdiọn keghi wulo ye iran aro. Emwi nọ da ọmwa ẹre ọna wa khin! (Ẹks 11:4-10; 12:29) Ẹkpotọ te kie ne iran ya fi werriẹ ra? Kakabọ! E Mosis keghi ya obọ sekhae ne Ivbi Izrẹl wẹẹ, orueghe vberriọ dee, ọ na vbe gi iran rẹn emwi nọ khẹke ne iran  ru, ne ẹbe ghẹ rhuan iran. (Ẹks 12:21-28) Inu emwa ẹre ọ ya ẹmwẹ ne Mosis tae ru emwi? Emwa ni kpa vbe otọ Igipt vbe ẹghẹ nii sẹ ẹbo eha, ke Ivbi Izrẹl kevbe Ivbi Igipt kevbe “emwa nibun ọvbehe.” Iran na, ẹre ọ miẹn uhunmwu vbe ọfuan nọ rhuan Ivbi Igipt.—Ẹks 12:38.

Avbe igiemwi na rhiẹre ma wẹẹ, e Jehova keghi rhie ẹghẹ nọ taẹn ne emwa, ne iran ya roro iro fi uyinmwẹ werriẹ, a te miẹn wẹẹ ọ bu ohiẹn iran. (Diut 32:4) Vbọzẹe ne Osanobua na kie ẹkpotọ vberriọ ne emwa? Ukọ e Pita gi ima rẹn wẹẹ, e Jehova “i hoo ne ọmwa rhọkpa fuan, sokpan ọ hoo ne emwa hia fiwerriẹ hin orukhọ iran rre.” (2 Pit 3:9) Vbene ẹmwata, Osanobua wa hoẹmwẹ emwa ni ghaa rrọọ vbe ẹghẹ nọ gberra. Te irẹn wa gha hoo ne iran roro iro fi uyinmwẹ werriẹ, ne iran gha họn ẹmwẹ ne irẹn, ne ọfuan ghẹ mieke na rhuan iran.—Aiz 48:17, 18; Rom 2:4.

Osanobua wa vbe ya obọ sekhae ne emwa vbe ẹdẹnẹrẹ, te ọ khẹke ne iran họn ẹmwẹ nẹẹn. Vbe Jesu rre uhunmwu otagbọn na, ọ keghi ya obọ sekhae ne emwa wẹẹ, te agbọn Esu na khian guọghua vbe ẹghẹ orueghe nọkhua. (Mat 24:21) Irẹn keghi tama erhuanegbe ẹre, emwi ni khian gha sunu vbe ẹghẹ nii ghaa bu otọ nẹ. Emwi nibun ne Jesu guan kaẹn wa sunu nẹ nia.—Mat 24:3-12; Luk 21:10-13.

Ne ẹmwẹ akhasẹ nii ghi na mwẹ amusẹ nia, e Jehova keghi rhie igiọdu ne emwa hia, ne iran do gha rre ototọ ọdakha ọghe irẹn. Irẹn hoo ne emwa ni họn ẹmwẹ ne irẹn gha sọyẹnmwẹ arrọọ nia, irẹn vbe hoo ne iran sọyẹnmwẹ afiangbe ne wọrhọwọrhọ nọ dee vbe odaro. (2 Pit 3:13) E Jehova keghi hoo ne emwa gha mwẹ amuẹtinyan daa eyan hia ne irẹn yan rẹn, ọni ẹre ọ si ẹre ne irẹn na ru emwamwa na ya “kporhu iyẹn nọ maan ọghe Arriọba . . . la otọ agbọn hia” zẹvbe ne Jesu tae yotọ. (Mat 24:14) Eguọmwadia Osanobua ni ya ẹkoata gae, ẹre Osanobua loo ya kporhu iyẹn nọ maan na vbe otọ ẹvbo 240. E Jehova hoo ne emwa nibun roro iro fi uyinmwẹ werriẹ, ne iran mieke na miẹn fan vbe ọfuan nọ dee vbe odaro.—Zẹf 1:14, 15; 2:2, 3.

Ai vbe gbawawẹ yọ deghẹ e Jehova kie ẹkpotọ ne emwa ya roro iro fi uyinmwẹ werriẹ, rhunmwuda, emwi wa bun ni sosẹ yọ wẹẹ ọ ru vberriọ. Emwi na khian gha kha vbọ ọre wẹẹ: Emwa gha roro iro fi uyinmwẹ werriẹ vbene ẹghẹ na ye rrọọ na ra? Zẹvbe eguọmwadia Osanobua ne ima khin, gi ima ye gha hia vbe odẹ ke odẹ ne ima ru iyobọ ne emwa, ne iran mieke na miẹn uhunmwu vbe ọfuan nọ khian rhuan agbọn Esu na vbe odaro.