Vbene Jesu te wu, vbọzẹe ne ọ na ya unu kaẹn emwi ne Devid tae vbe ebe Psalm 22:1?

Usun ẹmwẹ ne Jesu tae kiekie ọ ke wu ọre ẹmwẹ nọ rre ebe Matiu 27:46, ako nii wẹẹ: “Osanobua mwẹ Osanobua mwẹ, vbọzẹe ne u na he mwẹ ye otọ?” Ẹmwẹ ne Jesu tae na, keghi ya ẹmwẹ akhasẹ nọ rre ebe Psalm 22:1 sẹ vbe egbe ẹre. (Mak 15:34) Ọ ma khẹke ne ima gha roro ẹre wẹẹ, te Jesu ta ẹmwẹ na, rhunmwuda ọ ma gha mwẹ amuẹtinyan, ra rhunmwuda ọ ghaa mu ohu Erhae. E Jesu wa rẹn evbọzẹe nọ na khẹke ne irẹn wu, ekhọe obọ re ẹre ọ vbe ya rhie egbe ladian. (Mat 16:21; 20:28) Ọ vbe rẹn wẹẹ, ọ ghaa bu ẹghẹ ne irẹn khian ya wu, e Jehova i khian “tan obọ gue” irẹn. (Job 1:10) Te Jehova kie ẹkpotọ ne Jesu ne ọ ya rhie ẹre ma wẹẹ, ọ gha sẹtin da imudiase ọghẹe yi, ọ gha khọnrẹn ne emwi wegbe muẹn, ọ ke wu.—Mak 14:35, 36.

Vbọ ghi ya Jesu ya unu kaẹn emwi nọ rre ebe Psalm na? Ma ma wa rẹn. Sokpan gia ziro yan emwi eso ne ima yayi wẹẹ ẹre ọ si ẹre. *

Ne Jesu na ya unu kaẹn ẹmwẹ nọ rre ako nii, egbọre te ọ ghaa hoo ne ọ nianian wẹẹ, e Jehova i khian da iran obọ yi, na ghẹ gbe irẹn rua. Ne Jesu mieke na sẹtin dẹ ima werriegbe, e Jehova i khian ru iyobọ nẹẹn, te ọ gha wu “ne emwa hia.”—Hib 2:9.

Egbọre ne Jesu na ya unu kaẹn abọ eso vbe ebe Psalm nii, te ọ ghaa rhie emwa ekhọe ghee emwi hia nọ rre ebe Psalm nii. Vbe ẹghẹ ọghe Jesu, Ivbi e Ju wa rẹn emwi nọ rre ako  nibun vbe ebe Psalm ye uhunmwu. Ne Jesu na ya unu kaẹn ẹmwẹ nọ rre ako ọkpa vbe ebe Psalm nii, ọ sẹtin ye iran ẹre rre, ẹmwẹ ni rre abọ nikẹre. Adeghẹ ọna ẹre Jesu ghaa mwẹ vbe ekhọe, ọni rhie ma wẹẹ, te irẹn rhie ekhọe ọghe erhuanegbe ẹre ghee ẹmwẹ akhasẹ nibun nọ rre Psalm nọ dekaẹn uwu ọghe irẹn. (Psm 22:7, 8, 15, 16, 18, 24) Deba ọni, ufomwẹ ọghe Psalm 22 nii keghi rho e Jehova, ọ na tie ẹre Ọba nọ khaevbisẹ yan otagbọn hia.—Psm 22:27-31.

Ọ gha kẹ, ne Jesu na ya unu kaẹn ẹmwẹ ne Devid tae, te ọ ghaa kha wẹẹ, irẹn ma rẹn ọkpa rẹn eva. Vbene Jesu te wu, iran keghi ba re ifiẹzọ wẹẹ, ọ rhoo ro, iran na vbe bu ohiẹn gbe ẹre. (Mat 26:65, 66) Okhirhi khirhi ẹre iran wa ya bu ohiẹn e Jesu vbe ogiasọn; emwi ne iran ru na ma zẹdẹ gua uhi ẹvbo iran ro. (Mat 26:59; Mak 14:56-59) Egbọre ne Jesu na nọ ọta nọ rre ebe Psalm nii, te ọ ghaa hoo nọ gi emwa rẹn wẹẹ, irẹn ma rri abe uwu.

Ughaghe, te Jesu ghaa hoo ne ọ gi emwa rẹn wẹẹ, agharhemiẹn wẹẹ, e Devid nọ gbẹn ebe Psalm na rri oya, ọni ma rhie ma wẹẹ, te Jehova ghaa mu ohu ẹre. Ne Devid na nọ ọta nọ rre ebe Psalm na ma rhie ma wẹẹ, ọ ma gha mwẹ amuẹtinyan. Vbe ọ ghi nọ ọta nii nẹ, ọ na kha wẹẹ, irẹn mwẹ ilẹkẹtin wẹẹ, e Jehova mwẹ ẹtin ne ọ khian ya miẹn irẹn fan; e Jehova ma vbe fi iyeke gbe ẹre hiehie. (Psm 22:23, 24, 27) Erriọ vbe ye, agharhemiẹn wẹẹ, e Jesu ne “ovbi e Devid” rri oya, ọ ma rhie ma wẹẹ, te Jehova ghaa mu ohu ẹre.—Mat 21:9.

A sẹtin miẹn wẹẹ, te Jesu tu ladian vberriọ, rhunmwuda ne Jehova ma na gbogba ga re vbe ẹghẹ nii, ne ọ mieke na rhie ẹre ma wẹẹ, irẹn gha sẹtin da imudiase ọghe irẹn yi. Vbe Jehova yi Jesu, ọ ma gha mwẹ ọnrẹn vbe ekhọe wẹẹ, ọ gha rri oya, amaiwẹ, te ọ khian wu. Ne Adam vbe Ivi na sọtẹ, ẹre ọ ghi si ọna rre. E Jesu ma ru emwi rhọkpa khọọ, sokpan te Jesu gha rri oya, te ọ gha vbe wu, na mieke na sẹtin zuze ye ẹmwẹ nọkhua nọ rre otọ ne Esu mu rre, kevbe ne ọ mieke na sẹtin dẹ emwa nagbọn werriegbe. (Mak 8:31; 1 Pit 2:21-24) Ne ọna mieke na sunu, e Jehova i khian gbogba ga Jesu na ghẹ gbe ẹre rua.

Ọ gha kẹ, te Jesu ghaa hoo ne erhuanegbe ẹre rẹn evbọzẹe ne Jehova na kue ne irẹn wu vbe uhunmwu erhan irrioya. * E Jesu rẹnrẹn wẹẹ, emwa nibun i khian rẹn evbọzẹe na khian na gbe irẹn rua vbe erhan irrioya, vbe na gbe izigan. (1 Kọr 1:23) Adeghẹ erhuanegbe ẹre na rẹn evbọzẹe ne ọ na wu, ọ gha ru iyobọ ne iran ya rẹn otọ emwi ne uwu ọghẹe gele demu. (Gal 3:13, 14) Ẹghẹ nii, iran ghi do rẹn wẹẹ, ẹi re izigan, sokpan Ọmiọmwafan ọghe iran nọ.

Ma ma wa rẹn emwi ne Jesu gu ya unu kaẹn ẹmwẹ nọ rre ako nii. Sokpan emwi ne ima rẹnrẹn ọre wẹẹ, Jesu ghaa mwẹ ilẹkẹtin wẹẹ, ne irẹn na wu vbe erhan irrioya, te irẹn ghaa ru emwi ne Jehova wẹẹ ne irẹn do ru. Vbe iyeke Jesu ghi ya unu kaẹn emwi nọ rre ebe Psalm nii nẹ, ọ na kha wẹẹ: “Ọ fo!” (Jọn 19:30; Luk 22:37) Ne Jehova na kue na gbe Jesu rua, vbene ọ ma na bu ẹre rre, ẹre ọ kie ẹkpotọ ne Jesu ya ru emwi hia na gie ẹre ne ọ do ru vbe agbọn. Ọ vbe kie ẹkpotọ nẹẹn ya muẹn sẹ, emwi hia na gbẹnnẹ yotọ vbekpa ẹre “vbe Uhi e Mosis, kevbe avbe akhasẹ kevbe ebe Psalm.”—Luk 24:44.