Ke egbe ọvbokhan gha dee, ẹre I ya hoẹmwẹ emwi ughughan ne Osanobua yi. Ẹghẹ hia ẹre imẹ vbe ẹgbẹe mwẹ ya gha khian ladian, ma ghi ya gha ghee avbe ẹgbo kevbe odighi ne mose mose, ni rre ẹdogbo ne ima ghaa ye vbe Jyväskylä, vbe Central Finland. Ọmwa nọ wa hoẹmwẹ aranmwẹ ẹre I khin. Vbe I rre ọvbokhan, ẹghẹ ke ẹghẹ ne I ya miẹn ekita kevbe ovbi ẹdẹn, I ghi wa gha hoo ne I gu iran ku, ne I vbe gha ya obọ rharha iran egbe! Zẹvbe ne I ya gha waan dee, I na do bẹghe ẹre wẹẹ, emwa ya obọ atosi mu avbe aranmwẹ. Ọna ma zẹdẹ gha ya ẹko rhiẹnrhiẹn mwẹ. Vbene ẹghẹ ya khian, I na do deba otu nọ sinmwi oseghe ne avbe aranmwẹ. Emwa ni hoẹmwẹ aranmwẹ vbene imẹ vbe ye, ẹre ọ ghaa rre otu nii.

Ẹghẹ hia ẹre ima wa ya gha sinmwi oseghe ne avbe aranmwẹ. Ma ghi gha print ebe ghae ne emwa, ma ghi vbe gha gbe olighi ne emwa ghẹ ghi ya ohian aranmwẹ ru ukpọn kevbe ne iran ghẹ ghi gbele aranmwẹ rua, rhunmwuda ighẹ iran khian loo iran ya gualọ otọ emwi eso. Ma na vbe mu otu ọgbọn gbọọ, nọ khian gha gbogba ga avbe aranmwẹ. Rhunmwuda ne ima na gha ru ẹre gberra egbe, ma wa mobọ gha la ẹmwẹ vbe obọ arriọba. Ẹi re avbiẹ inugba, ẹre avbe olakpa mu mwẹ, ẹi re avbiẹ inugba, ẹre I vbe yo owa ẹzọ.

Gberra wẹẹ, I ghaa sinmwi oseghe ne avbe aranmwẹ, ọlọghọmwa ne emwa werriẹ aro daa wa vbe gha kpokpo mwẹ vbe orhiọn. Ẹre I na ghi deba otu ughughan ni sinmwi oseghe ẹvbo. Usun otu ne I deba, ọre Amnesty International kevbe Greenpeace. Egbe hia ẹre I wa ya rhiegba ye otu na. I na gha sinmwi oseghe ne ivbiogue, emwa ni ma miẹn evbare re kevbe emwa nẹi mwẹ iyobọ.

Vbọrhirhighayehẹ, vbene ẹghẹ ya khian, I na do bẹghe ẹre wẹẹ, I i khian sẹtin fi agbọn na werriẹ. Agharhemiẹn wẹẹ avbe otu ne I deba, te vbe hia vbene ẹtin iran sẹ, ne iran sọfurre ye ọlọghọmwa eso ni rre agbọn na, sokpan inu ẹre ẹwe khian lalọ sẹ vbe ẹbo umwẹ? Avbe ọlọghọmwa ni wegbe wa ye gha rre otọ, uhiẹn, te iran kue gha tua sayọ. Ọ na yevbe na miẹn wẹẹ, te emwi dan ghi wa miẹn agba dia vbe ekhọe emwa nibun, emwi nọ sunu i ghi vbe gbe iran rhọkpa egbe. I na do bẹghe ẹre wẹẹ, ẹtin mwẹ i sẹ ọna.

Vbe I ghi do bẹghe ẹre wẹẹ, I i khian sẹtin fi agbọn na werriẹ, I na suẹn gha mu ẹmwẹ Osanobua kevbe Baibol roro. Ọ ghaa mwẹ asẹ ọkpa vberriọ, ne Avbe Osẹe Jehova ya gu mwẹ gha ruẹ e Baibol. Sokpan I ma mu egbe ne I khian ya fi uyinmwẹ mwẹ werriẹ vbe ẹghẹ nii, agharhemiẹn wẹẹ I te wa rẹn wẹẹ, emwa esi ẹre iran khin kevbe wẹẹ obọ esi, ẹre iran ya gha mu mwẹ. Sokpan vbe ẹghẹ na, I na ghi mu egbe ne I ya ru afiwerriẹ nọ khẹke vbe arrọọ mwẹ.

I na ghi mu e Baibol mwẹ ladian, I na suẹn gha tie ẹre. Emwi ne I tie re vbọ wa kakabọ fu mwẹ ekhọe rre. I na do bẹghe ẹre wẹẹ, ako nibun rre Baibol nọ wẹẹ na gha ya obọ esi mu aranmwẹ. Vbe igiemwi, ebe Itan 12:10 khare wẹẹ, emwa esi ẹre ọ “gbaroghe emwi irri” ọghe iran. I na vbe do bẹghe ẹre wẹẹ, ẹi re Osanobua ẹre ọ si ọlọghọmwa ni rre uhunmwu otagbọn na. Sokpan ne emwa i na lele uhi Osanobua, ẹre ọ si ẹre ne emwi hia na kulo vbe ẹdẹnẹrẹ. Vbe I ghi do ruẹ vbekpa ahoẹmwọmwa ọghe Jehova kevbe odẹ nọ ya mwẹ izinegbe vbe egbe ima, I na gha hoo ne I sikẹ ọre sayọ.​—Psalm 103:​8-​14.

Asẹ nii, ẹre I ghi ya tama Avbe Osẹe Jehova ne iran rhie ebe na tie ẹre What Does the Bible Really Teach? gu mwẹ. Vbọ ma he kpẹẹ vba, ọdọ vbe amwẹ ọkpa ni re Osẹe Jehova na wa sobọ vbe ẹkhu mwẹ, iran na nọ mwẹ deghẹ I gha hoo ne iran do gu mwẹ gha ruẹ e Baibol, I na wa kue yọ. I na vbe suẹn gha yo iko ọghe Avbe Osẹe Jehova. Vbene ẹghẹ ya khian, emwi ne I ruẹ vbe Baibol na do mu mwẹ ekhọe.

E Baibol ẹre ọ ghi fi arrọọ mwẹ werriẹ. I ma ghi gha si esiga, I ma ghi vbe gha da ayọn gbe egbe. I na ghi do gha dọlọ egbe mwẹ yi; I na vbe dobọ re yi ighẹ avbe ẹmwẹ nọ gbiruẹn ni te ke unu mwẹ ladian. I na ghi vbe gha rhie ọghọ ne emwa ni rre ọdakha vbe arriọba. (Rom 13:1) Te imẹ te ka gha fuẹn vbe uwu uyinmwẹ alama oghẹ, sokpan I na ghi do sẹtin dobọ re yi.

I ke sẹtin kpa hin avbe otu ne I ghaa ye rre, te ọ baa re. Ọna ọre afiwerriẹ nọ ghi lọghọ mwẹ sẹ na ru. I na gha roro ẹre wẹẹ, I gha wẹẹ ne I kpa hin avbe otu na rre, ọ ghi yevbe na miẹn wẹẹ te I sọtẹ daa iran. Vbọrhirhighayehẹ, I na do bẹghe ẹre wẹẹ, Arriọba Osanobua ọkpa, ẹre ọ khian sẹtin sọfurre ye ọlọghọmwa ni rre agbọn na. I na ghi ta mu olọ yan rẹn wẹẹ, ne I gha te ya gha mu ẹghẹ mwẹ rhia ye otu ọghe emwa nagbọn, gu mwẹ wa loo ẹrhiọn mwẹ hia ya ye Arriọba Osanobua ike, I ghi vbe gha tama emwa ọvbehe vbekpa re.​—Matiu 6:​33.

Vbe ẹghẹ ne I ya gha sinmwi oseghe ẹvbo, I gha wa miẹn ọmwa vbe ẹghẹ okaro, emwi ne ekhọe mwẹ wa tama mwẹ ọre wẹẹ, ‘Deghẹ ọmwa na i re ọmwa esi, ọ ghi gha re ọmwa dan.’ I gha wa bẹghe ẹre nẹ wẹẹ ọmwa dan nọ, I ghi mu egbe ne I ya ru ẹre emwi. Sokpan I i ghi ya aro vberriọ ghee emwa nia, rhunmwuda e Baibol ru iyobọ mẹ nẹ. Te I ghi hia ne I hoẹmwẹ emwa hia. (Matiu 5:44) Odẹ ọkpa ne I ya rhie ẹre ma wẹẹ I hoẹmwẹ emwa, ọre ne I na kporhu iyẹn nọ maan ọghe Arriọba Osanobua ma iran. Ọ keghi sẹ mwẹ ọyẹnmwẹ vbe I gha bẹghe vbene iwinna esi ne I ru na, ya ru iyobọ ne emwa ọvbehe ya gha mwẹ oghọghọ vbe arrọọ ọghe iran, ọ vbe ru iyobọ ne iran ya gha rrọọ vbe ọfunmwegbe, ọ ghi vbe ya iran gha mwẹ ọnrẹn vbe orhiọn wẹẹ, emwi hia gha maan vbe odaro.

Te orhiọn mwẹ ghi sotọ ne I na sẹ emwi hia rae ye obọ e Jehova. I wa yayi wẹẹ, e Jehova nọ re Ayi ọghe emwi hia i khian kue, na wa gha ya obọ atosi mu aranmwẹ kevbe emwa nagbọn khian, ọ gha dobọ re yi vbe ọ gha sẹ ẹghẹ. Ẹi khian vbe kue na fuẹn uhunmwu otagbọn na ne mose mose rua. Vbe nẹi khian ghi kpẹẹ gbe, Arriọba ọghẹe gha do dọlọ emwi hia yi vbe agbọn na. (Aizaia 11:​1-9) Ne I na rẹn ena hia keghi ya mwẹ sọyẹnmwẹ. Emwi ọvbehe nọ vbe ya mwẹ sọyẹnmwẹ, ọre ne I na sẹtin ru iyobọ ne emwa ọvbehe, ya do gha mwẹ egbe iyayi ne I vbe mwẹ na. I keghi do bẹghe ẹre wẹẹ ẹi re imẹ ẹre ọ khian fi agbọn na werriẹ.