Iruẹmwi 10

Avbe Uyinmwẹ ne Osanobua Hee

De vbene u ya muẹnroro hẹ vbekpa avbe emwi ne Osanobua khare wẹ ẹi ma? (1)

De aro uyinmwẹ ẹgẹn nẹi ma? (2)

De aro ne Ovbi Otu e Kristi gha ya ghe ohoghe? (3) uzọgbẹn? (3) oyi? (3) igbinnoguo? (4) aguorhiọndan muobọ? (5) adayọngbegbe? (6)

De vbene ọmwa gha ya sẹtin lẹfe hin uyinmwẹ dan rre hẹ? (7)

1. Eguọmwadia Osanobua hoẹmwẹ emwi nọma. Sokpan te iran gha vbe ruẹ ne iran he emwi nẹi ma. (Psalm 97:10) Ọni rhiema wẹ te a gha gbaẹngbe ne usun avbe uyinmwẹ ne Osanobua hee. Vbe ọre eso vbe nene uyinmwẹ?

2. Alamoghẹ: Ulomwẹ ẹgẹn a te ru orọnmwẹ, oghẹ, ne ọmwa vbe aranmwẹ na mu egbe, ne ọtọntẹn na rọnmwẹ egbe, kevbe ne okpia na rọnmwẹ okpia ehia na ke gha re orukhọ nọwegbe dae Osanobua. (Levitikọs 18:6; Rom 1:26, 27; 1 Kọrinti 6:9, 10) Adeghẹ ọdọ vbamwẹ ma na ru orọnmwẹ sokpan iran na gha koko rre ehe ọkpa te iran gha ghae egbe ra khekherriọ rhie obọ ye ebe orọnmwẹ.—Hibru 13:4.

3. Ohoghe, Uzọgbẹn, Oyi: Osanobua Jehova i sẹtin ta ohoghe. (Taitọs 1:2) Emwa nọ ghi ho aro nọma ọghẹe te ọ gha gbaẹngbe ne ohoghe na ta. (Itan 6:16-19; Kọlose 3:9, 10) Ne a ghi rhirhi tie ẹre uzọgbẹn ne arovbẹmwẹ si ẹre nọ. Rhunmwudọni Ivbi Otu e Kristi i mwẹ obọ vbe uzọgbẹn ke uzọgbẹn, vbe ne etẹtẹ ye, ulẹ ẹsin na rhie, kevbe ekadi uzọgbẹn. (Ẹfisọs 5:3-5) Kevbe wẹ Ivbi Otu e Kristi i rha. Iran i vbe rẹn emwi oyi dẹ ra ne a rhie emwi vbene a ma na miẹn akueyi nẹ.—Ẹksodọs 20:15; Ẹfisọs 4:28.

4.Ohu Ẹgiẹgiẹ, Igbinnoguo: Ohu na ma gbaro ghe sẹtin do si igbinnoguo. (Gẹnẹsis 4:5-8) Ọmwa oguo i sẹtin gha re ọse ọghe Osanobua. (Psalm 11:5; Itan 22:24, 25) Emwi nẹi ma nọ na rriaikhi ra na ye orukhọ ha osa emwidan ne emwa ọvbehe gha sẹtin ru da ima.—Itan 24:29; Rom 12:17-21.

5. Ohun Na Ta Kevbe Aguorhiọnda Muobọ: Emwa eso ke ghi tie ẹtin ọghe avbe orhiọn ne a ya gba gbaro ghe emianmwẹ. Eso ghi ta ohun ya si emianmwẹ ye eghian ọghiran egbe ra uhiẹn nọ gbe iran. Ẹtin nọ rre iyeke avbe uyinmwẹ na hia ọre Setan. Rhunmwudọni Ivbi Otu e Kristi i khian mwẹ obọ vbe enena rhọkpa. (Diuteronomi 18:9-13) Na do sikẹ Jehova ke ghi re ugue nọmasẹ nọ gbaẹn ohun fua na miẹn wẹ emwa ọvbehe gha ta ima re.—Itan 18:10.

6. Adayọngbegbe: Ẹire emwi dan na da ayọn kherhe, ebiẹ, ra evbawọn nọfian ọvbehe nọ mu ọmwa rueghe. (Psalm 104:15; 1 Timoti 5:23) Sokpan eda nọkhua kevbe adayọngbegbe ẹi ma vbe odaro Osanobua. (1 Kọrinti 5:11-13; 1 Timoti 3:8) Na do da ayọn gberra egbe sẹtin guọghọ egberranmwẹ ruẹn rua kevbe zaghae ẹgbẹe ruẹ. Ọ sẹtin vbe siẹre ne u rherhe de ye avbe edanmwẹ ọvbehe.—Itan 23:20, 21, 29-35.

7. Emwa nọ yin avbe uyinmwẹ ne Osanobua khare wẹ ẹi ma ghi “sẹtin rhan obọ miẹn Arriọba Osanobua.” (Galatia 5:19-21) Adeghẹ uwẹ gele hoẹmwẹ Osanobua kevbe u na gha ho ne u ye ẹko rhiẹnrhiẹn ọnrẹn, uwẹ gha sẹtin lẹfe hin avbe uyinmwẹ na rre. (1 Jọn 5:3) Ruẹ ne u ya gha he emwi ne Osanobua khare wẹ ẹi ma. (Rom 12:9) Gha gu emwa ni mwẹ akpaosa muobọ. (Itan 13:20) Ivbi Otu e Kristi ni wẹro na gu muobọ gha vbe rhiema ẹzi ọghe iyobọ. (Jems 5:14) Nọ ghi sẹ ehia, hẹnhẹn egbe yan iyobọ ọghe Osanobua vbe erhunmwu.—Filipai 4:6, 7, 13.

 [Efoto nọ rre ipapa 20, 21]

Osanobua he adayọngbegbe, oyi, uzọgbẹn, kevbe igbinnoguo