Iruẹmwi 5

De Emwi ne Ọre Emwamwa Ọghe Osanobua Dae Otagbọn?

Vbọzẹ ne Jehova na yi otagbọn? (1, 2)

Vbọzẹ ne otagbọn i na re eparadais nian? (3)

Demwi nọ khian sunu ne emwa dan? (4)

Vbe odaro, de emwi ne Jesu gha ru ne enikhuọnmwi? enikhiọnmaẹn? eniwulo? (5, 6)

Ne a gha mwẹ oghae vbe avbe afiangbe nọrre odaro, de emwi ne u ghi ho ne u ru? (7)

1. Jehova yi otagbọn na ne a miẹn wẹ emwa gha sọyẹnmwẹ arrọọ vbọ vbe etẹbitẹ. Irẹn ho ne otagbọn gha re ne emwa imudiase, nọmwẹ oghọghọ yin ẹnren vbe ẹghẹ hia. (Psalm 115:16; Aizaia 45:18) Otagbọn na i re nọ khian guọghua; te ọ khian gha rrọ vbe etẹbitẹ.—Psalm 104:5; Asan-Ibo 1:4.

2. A te miẹn wẹ Osanobua yi ọmwa, Irẹn ke ghi zẹ ako kherhe vbe otagbọn kevbe ọ ke yae ru eparadais ne mosemose. Ọ ke gha tie ẹre ogba ọghe Idẹn. Emwa na ọre ọ viọ okpia kevbe okhuo nokaro yi, Adam vbe Ivi. Emwamwa ọghe Osanobua ne iran ọre ne iran gha mwẹ emọ kevbe ne iran vuọn ehe hia vbe otagbọn. Hẹnnẹhẹnnẹ iran ghi do ye otagbọn hia khin eparadais.—Gẹnẹsis 1:28; 2:8, 15.

3. Adam vbe Ivi ru orukhọ vbene iran na mẹma rra uhi Osanobua. Erriọ ọre Jehova na do khulo iran kua vbe uwu ogba ọghe Idẹn. Eparadais na ghi wii. (Gẹnẹsis 3:1-6, 23) Sokpan Jehova ma he ye mianmian emwamwa ọghe irẹn dae otagbọn na. Irẹn yanrẹn ne ọ yae khin eparadais, ako ne emwa nagbọn ghaa ye vbe etẹbitẹ. De vbene ọ ra ya ru ọna hẹ?—Psalm 37:29.

4. A te miẹn wẹ otagbọn na do sẹtin khin eparadais, emwa dan gha khiẹn ena viọ hin vbọ rre. (Psalm 37:38) Ọna gha sunu vbe Amagẹdọn, nọ re okuo ọghe Osanobua ne ọ ra ya rhie ufomwẹ ye emwi dan. Nọlelẹe, a ghi mu Setan ye eghan vbe uwu ukpo 1,000. Ọna rhiema wẹ ai khian sẹ emwa dan rhọkpa rae nọ mu otagbọn rhia. Emwa ọghe Osanobua ọkpa ọre ọ khian miẹnfan.—Arhie 16:14, 16; 20:1-3.

 5. Vbe ẹghẹ ni Jesu Kristi gha kha yan otagbọn na zẹvbe Ọba vbe ukpo 1,000. (Arhie 20:6) Hẹnnẹhẹnnẹ irẹn ghi rhie orukhọ hin ekhọe kevbe egbe ọghima rre. Ma ghi do gha re emwa nagbọn nọgbae zẹvbe ne Adam vbe Ivi ghaa ye a te miẹn wẹ iran ru orukhọ. Vbe ẹghẹ ni emianmwẹ, akhiọnmaẹn, kevbe uwu ighi khian gha rrọ. A gha mu emwa nikhuọnmwi egbe rran, kevbe avbe ọmaẹn ghi do werriegbe khien ne sọguọsọguọ.—Job 33:25; Aizaia 33:24; Arhie 21:3, 4.

6. Vbuwe Ukpo Arriaisẹn ne Jesu khian ya khaevbisẹ, emwa na muẹtinyan gha winna ne a ya ye otagbọn hia fẹrẹrẹ khien eparadais. (Luk 23:43) Debare, uye inu nọkhin ọghe emwa ni wulo gha khin e na huẹn kpaegbe do gha re nọ rrọ vbe otagbọn. (Iwinna 24:15) Adeghẹ iran na ru emwi ne Osanobua hoo vbe obọ iran, iran ghi do gha rrọ rhinrin vbe otagbọn etẹbitẹ. Adeghẹ ẹire rriọ iran gha re na guọghua vbe etẹbitẹ.—Jọn 5:28, 29; Arhie 20:11-15.

7. Emwamwa omuhẹn ọghe Osanobua ghe otagbọn na ghi do dunna. Ọ gha yẹ ruẹ ne uwẹ gha mwẹ oghae vbe avbe afiangbe nọ de vbe odaro ra? Adeghẹ erriọ nọ, emwi ne uwẹ gha ru ọre ne u ye gha ruẹ vbekpa Jehova kevbe họẹnmwẹ ne emwi ne irẹn hoo. Na gha yo iko vbe Ọgua Arriọba ọghe avbe Osẹe Jehova vbe ẹdogbo ne u ye gha ru iyobọ nuẹn nu ya ru vberriọ.—Aizaia 11:9; Hibru 10:24, 25.

[Efoto nọ rre ipapa 10]

Eparadais wiiri

[Efoto nọ rre ipapa 11]

Vbe iyeke Amagẹdọn, otagbọn ghaa re na ya khin eparadais